1, 2. (a) Iehova ese e henida dava bada kohudia toi be dahaka? (b) Ina stadi ai dahaka baita herevalaimu?

IEHOVA ena taḡa na asi ihaheḡereḡerena. (1 Sis. 29:11, 12) Ia na hariharibada Diravana dainai, ena dava bada kohudia na e lalo badamu taudia e henidiamu. Ta moalemu badina Iehova ese dava bada kohudia na ita e henida, idia na (1) Dirava ena Basileia, (2) haroro ḡaukara, bona (3) ena Hereva ai ta davari hereva momokanidia! To, bema basita henahua tohomu, unu dava bada kohudia na basita lalodia badamu. Baita lalodia bada totona, namona na baita ḡaukaralaidia namonamo bona nega iboudiai baita ura henidia. Iesu na eto: “Emui kohu e miamu gabuna ai lalomui danu unuseni ai.”​—Luka 12:34.

² Dirava ena Basileia, haroro ḡaukara, bona hereva momokani baita ura henidia bona baita lalodia bada daladia mani aita herevalai. Unu ta herevalaimu neganai, unu dava bada kohudia ba ura henidia daladia mani ba lalodia dobu.

3. Iesu ena parabole ai e herevalaia hoihoi tauna be dahaka e kara aḡeva nadina baine hoia totona? (Rau 9 ai laulau ba itaia.)

³ Mataio 13:45, 46 ba duahi. Iesu ese ena parabole ai aḡeva  o pel nadidia e tahuva hoihoi tauna ta e herevalaia. Laḡani momo lalodiai, una hoihoi tauna na pel nadidia momo e hoidia bena ia ese ma e hoihoilaiva. To, hari ia na pel nadina ta mai hairaina e davaria dainai e moale. Una nadi ihoina totona, ia na ena ḡau iboudiai baine hoihoilaidia. Mani a laloa, ia enai una aḡeva o pel nadina na mai anina bada!

4. Bema Dirava ena Basileia ta ura heniamu, hoihoi tauna ese aḡeva nadina e ura henia heḡereḡerena, dahaka baita karamu?

⁴ Una parabole amo dahaka ta dibamu? Dirava ena Basileia na una dava bada aḡeva nadina na heto. Bema baita ura heniamu, hoihoi tauna ese aḡeva nadina e ura henia heḡereḡerena, ita na mai eda ura ida ḡau momo baita dadaraimu, Basileia henunai baita noho helaoreana. (Mareko 10:28-30 ba duahi.) Unu e kara toma taudia rarua mani aita herevalaidia.

5. Edena dalai Sakaio ese e hahedinaraia Dirava ena Basileia e laloa bada?

⁵ Sakaio na tax gogo taudia biagudia ta bona ia na taḡa tauna ai ela badina koikoi dalanai taunimanima edia moni e abiva. (Luka 19:1-9) To, Iesu ese Basileia e harorolaiava sivaraina e kamonai neganai, e diba e kamonai ḡauna na mai anina bada dainai kara ta e karaia. Sakaio na e gwa: “Lohiabada e, a itaia, egu kohu kahana na ogoḡami taudia aina henidia; bona ena kohu vada na abia kava tauna na nega hani baina henia lou.” Ia ese taunimanima edia amo e abi monidia na mai moalena ida e henidia lou bona kohu imataḡaniḡani henidia karana e dadaraia.

6. Rose be dahaka e kara bona dahaka dainai unu e kara toma?

⁶ Laḡani haida gunadiai, hahine ta ladana Rose na Basileia sivaraina e kamonai. Ia na hahine (o lesbian) ta ida e heturava. Danu ia na hahine ai e laomu taudia o tatau ai e laomu hahinedia e abidia daemu oreana ta ena presiden. To, Baibul e stadilaia neganai, Dirava ena Basileia ena namo e lalopararalaia, bona e diba ena kara baine haidaua na namo. (1 Kor. 6:9, 10) Ia ese Dirava e lalokau henia dainai ena dagi amo e risain bona e hetura heniava hahinena ida ena hetura karana e hadokoa. Rose na laḡani 2009 ai e bapatiso, bona murina laḡanina ai regula painia ḡaukara e karaia matama. Ena lalokau Iehova enai bona iena Basileia ai na goada dainai tauanina ena ura na e dadaraia.​—Mar. 12:29, 30.

7. Dahaka baita kara na namo Dirava ena Basileia baita ura henia totona?

⁷ Ita momo na eda mauri ta haidau Dirava ena Basileia henunai baita noho helaoreana. (Roma 12:2) To, una mo na dia heḡereḡere. Namona na una Basileia iura henina karana baine koua ḡaudia, heḡereḡere moni bona kohu momo iura henidia karana bona matabodaḡa karadia iboudiai baita dadaraidia. (Her. 4:23; Mat. 5:27-29) Mai kudouda idoinai ida Iehova ena Basileia baita ura henia totona, Ia ese dava bada kohuna ma ta e henida.

8. (a) Dahaka dainai aposetolo Paulo ese haroro ḡaukarana na e gwauraia “kohu namona” ta hodu lalonai na heto? (b) Edena dalai Paulo ese e hahedinaraia haroro ḡaukara na e laloa bada?

⁸ Baita helalotao, Iesu ese Dirava ena Basileia sivaraina namona iharorolaina bona ihahedibalaina ḡaukarana na ita e henida. (Mat. 28:19, 20) Aposetolo Paulo na mai dibana haroro ḡaukara na mai anina bada. Ia ese hesiai ḡaukara ena kontrak matamana na e gwauraia “kohu namona” ta hodu lalonai na heto. (2 Kor. 4:7; 1 Tim. 1:12) Ena be ita na dia ḡoevadae, to ta harorolaiamu sivaraina amo ita bona e kamonai henidamu taudia ese mauri hanaihanai baita abia diba. Paulo na mai dibana dainai, ini e gwau  toma: “Ḡau iboudiai na sivarai namo dainai na karamu, ia lalonai ahugu baina abia helaoreana.” (1 Kor. 9:23) Oibe, Paulo ese haroro ḡaukarana na e ura heniava dainai, e ḡaukara goadava ma haida na hahediba ai baine halaodia totona. (Roma 1:14, 15; 2 Timoteo 4:2 ba duahi.) Una ese e durua daḡedaḡe e haheaukalai. (1 Tes. 2:2) Edena dala ai baita hahedinaraia haroro ḡaukara na ta ura heniamu?

9. Ededia dala haida ai baita hahedinaraia diba haroro ḡaukara na ta laloa badamu?

⁹ Paulo ese haroro ḡaukara e laloa bada dalana ta na, dala e hekehova negadiai ma haida e haroro henidiava. Aposetolo taudia bona Kristen ginigunadia heḡereḡeredia, ita ese haroro ḡaukara na nega bona gabu idauidau ai, taunimanima vairadiai, bona ruma ta ruma ta ai ta karaiamu. (Kara 5:42; 20:20) Eda noho dalana heḡereḡerena ai, dala baita tahu eda haroro ḡaukara baita habadaia totona, reana heduru o regula painia ḡaukara baita karaia. Eiava reana gado ma ta baita dibaia, o eda tano ai gabu ma ta baitala, eiava tano ma ta baitala.​—Kara 16:9, 10.

10. Irene na sivarai namona iharorolaina karana e laloa bada dainai dahaka hahenamo e davari?

¹⁰ United States ai, singul taihuna ta ladana Irene mani a laloa. Ia na e ura dikadikava Russia gado ai e herevamu taudia baine haroro henidia. Una dainai laḡani 1993 ai, New York Siti ai, Russia gado grup e bamoava. Una negai una grup ai pablisa na 20 heḡereḡerena. Laḡani 20 lalodiai, Irene na una grup ida e ḡaukara hebouva. Ia na ini e gwau toma: “Russia gado na asina herevalaia namonamova.” To, Iehova ese ia bona pablisa ma haida na e durudia dainai unu gado taudia e haroro henidia. Hari, New York Siti ai Russia kongrigeisen iboudiai na siks. Irene ena stadi taudia 15 na e bapatiso. Idia haida na Betele ai e ḡaukaramu, e painiamu, bona elda taudia ai ela. Irene na eto: “Bema lau na ḡau idaudia nama tahu, moale korikorina na basinama davaria diba.” Oibe, ia ese ena haroro ḡaukarana na e laloa bada!

11. Daḡedaḡe negadiai baita haroro hanaihanai karana amo dahaka namo baine vara diba?

¹¹ Bema eda haroro ḡaukara baita laloa badamu, aposetolo Paulo heḡereḡerena, haroro ḡaukara na baita karaia hanaihanaimu ena be daḡedaḡe bae vara. (Kara 14:19-22) Laḡani 1930 ela 1940 lalodiai, United States ai, eda tadikaka na daḡedaḡe bada herea e davari. To, Paulo heḡereḡerena, idia na e gini goada bona dounu e harorova. Gavamani ese eda ḡaukara e ura bae koua neganai, eda tadikaka na ela kota bona idia ese keis momo e kwalimulaidia. Laḡani 1943 ai, Tadikaka Nathan H. Knorr ese U.S. Supreme Court ai tadikaka e kwalimu sivaraina ta e herevalaia neganai, eto: “Emui hekwarahi dainai o kwalimu. Bema pablisa na basiema  haroro goadagoada Supreme Court ai keis ini bamodia na basiema vara; to umui pablisa taumui daimui ai, tanobada heḡeḡemadai tadikaka na e haroro goadagoadamu, bona ina ḡaukara na basie hadokoamu ena be daḡedaḡe bae davari. Lohiabada ena taunimanima na edia gini goada karana dainai, keis unu bamodia ai e kwalimumu.” Tano ma haida ai e nohomu tadikakadia danu e gini goadamu dainai e kwalimumu. Oibe, haroro ḡaukara iura henina karana ese daḡedaḡe karadia na baine hadareredia diba.

12. Haroro ḡaukara dainai lalomu ba hadaia dahaka ba kara?

¹² Bema haroro ḡaukara na Iehova ena amo ema dava bada ḡauna ta heḡereḡerena baita laloamu, ita na dia ripoti ai ta tore horadia mo baita lalomu. To, mai eda goada idoinai ida ‘sivarai namona baita gwauraia hedinaraimu.’ (Kara 20:24; 2 Tim. 4:5) To ma haida be dahaka baita hadibalaidia? Dirava ese e heni dava bada kohuna ma ta mani aita laloa.

13, 14. Mataio 13:52 ai Iesu ena hereva anina be dahaka, bona edena dala ai unu baita kara toma?

¹³ Dava bada kohuna ihatoina na, ta diba hereva momokanidia. Iehova na hereva momokani Diravana. (2 Sam. 7:28; Sal. 31:5; NWT) Ia na Tama ta mai ena hariharibada dainai, iena hereva momokanidia na ia e gari heniamu taudia e hadibalaidiamu. Hereva momokani ta diba matama negana amo, ita ese Baibul, eda Kristen pablikeisen, bona hebou badadia bona maraḡidia ai hereva momokanidia momo ta dibadia. Nega be laomu lalonai, ita ese hereva momokani matamatadia bona gunadia na vaitani eda ‘taḡa amo baita vaimu,’ anina na eda dava bada kohudia ai baita halaomu. (Mataio 13:52 ba duahia.) Bema unu hereva momokanidia na e hehuni kohu namodia heḡereḡeredia baita tahudiamu, Iehova ese be durudamu hereva momokani matamatadia na eda dava bada kohudia ai baita halaodiamu. (Hereva Lada-isidia 2:4-7 ba duahi.) Edena dalai una baita karaia?

¹⁴ Namona na siboda eda stadi baita karaia hanaihanai, bona Dirava ena Hereva bona eda pablikeisen baita stadilaidia namonamo. Una ese be durudamu hereva momokani “matamatadia,” guna asita diba ḡaudia, baita dibamu. (Ios. 1:8, 9; Sal. 1:2, 3) July 1879 ai e halasia Watch Tower ginigunana na ini e gwau toma: “Hereva momokani na flaoaflaoa mai hairaina ta tano ḡaḡaena ai na heto, una flaoaflaoa na ava dikadia ese e ḡeḡea ahu. Ba davaria totona oi na bo hetahu namonamomu. . . . Bema o uramu bavabia, namona na ba igo diho bena bavabia. To flaoa tamona mo bavabia na dia heḡereḡere. . . . Oi na flaoa momo ba tahu bona ba gogo.” Oibe, namona na baita ḡaukara goada Dirava ena hereva momokanidia baita tahudia bona baita haboudia.

15. Dahaka dainai baita gwau dibamu hereva momokani haida na “gunadia,” bona ededia hereva momokanidia o lalo badamu?

¹⁵ Baibul ta stadilaia matama neganai, mai anina bada hereva momokanidia haida ta diba. Unu na baita gwauraidia dibamu hereva momokani “gunadia,” badina idia na matamanai ta diba ḡaudia. Idia haida be dahaka? Ta diba Iehova na ḡau iboudiai e havaradia bona mauri e henimu Diravana, bona ia na mai ena ura taunimanima ediai. Danu ta diba Dirava na mai ena lalokau ida Natuna ena mauri idavalaina boubouna e heni, kara dika bona mase amo baine ruhada helaoreana. Bona ta diba iena Basileia ese hisihisi iboudiai baine haoredia bona una Basileia henunai ita na maino bona moale ai baita noho hanaihanaimu.​—Ioa. 3:16; Apok. 4:11; 21:3, 4.

16. Hereva momokani ai diba matamatana ta abiamu neganai, dahaka baita kara na namo?

 ¹⁶ Dina ta ta ai, Baibul ena peroveta herevana ta eiava Baibul siridia haida ai laloparara matamatadia ta abimu. Unu laloparara matamatadia e hedinaraimu neganai, namona na nega baita ato baita stadilaidia namonamo bona baita lalodia dobu. (Kara 17:11; 1 Tim. 4:15) To diba matamatana baita lalopararalaia mo na dia heḡereḡere, namona na una diba matamatana bona gunana edia idau danu baita haheḡereḡeredia. Bema baita stadilaidia namonamomu, ini hereva momokani matamatadia na darada bona kudouda ai baita lalodia badamu, vaitani eda dava bada kohudia ai be laomu. Dahaka dainai unu baita kara toma na namo?

17, 18. Edena dala ai lauma helaḡa ese baine duruda diba?

¹⁷ Iesu na e gwa Dirava ena lauma helaḡa ese baine duruda diba, guna ta diba ḡaudia baita lalodia lou totona. (Ioa. 14:25, 26) Edena dalai una ese be durudamu sivarai namona baita harorolaia totona? Tadikaka ta ladana Peter enai e vara ḡauna mani aita laloa. Laḡani 1970 ai ia laḡanina na 19 bona hari ia na Britain Betel ai e ḡaukaramu. Ruma ta ruma ta haroro ḡaukara ai, laḡanina 50 tauna ta e hedavari henia. Peter ese e nanadaia bema e urava Baibul baine lalopararalaia. Una tau na e hoa, bona Peter e hamaoroa ia na Iuda edia rabi tauna ta. Ia na e ura Peter baine tohoa dainai, Peter e nanadaia: “Natugu, Daniel bukana be edena gado ai e torea?” Peter na e haere, eto: “Kahana ta na Aramia gado ai e torea.” Peter na e gwa, ‘Rabi tauna na e hoa badina haere na mai dibagu​—bona lau danu na hoa! Haere be ede na diba toma? Ruma nala neganai hua gunadia edia Watchtower bona Awake! magasin na sekedia, bona atikol ta na davaria una atikol ai e hahedinaraia Daniel bukana na Aramia gado ai e torea.” (Dan. 2:4, NWT) Oibe, lauma helaḡa ese baine duruda diba guna ta duahidia bona eda dava bada kohudia ai ta halaodia ḡaudia baita lalodia lou totona.​—Luka 12:11, 12; 21:13-15.

¹⁸ Bema Iehova ena amo e maimu aonegana baita laloa badamu, baita uramu hereva momokani matamatadia bona gunadia na eda dava bada kohudia ai baita halaodia. Iehova ena aonega baita ura heniamu bona baita laloa badamu neganai, baita heḡereḡere dibamu ma haida baita hadibadia totona.

19. Dahaka dainai Dirava ese e henida dava bada kohudia baita gimadia na namo?

¹⁹ Satana bona ena tanobada na e uramu, ina stadi ai tame herevalai dava bada kohudia iura henidia karana bae hamanokaia eiava bae hadikaia. Bema basita henahua tohomu baita moru dibamu. Reana moni ḡaukara namona ta baita tahuamu, kohu momo maurina baita lalohadailaiamu, eiava eda kohu baita heaḡilaimu. Aposetolo Ioane na e gwa ina tanobada mai ena heḡahusi ida na bae lao bubuni. (1 Ioa. 2:15-17) Una dainai, namona na baita ḡaukara goada Dirava ese e henida dava bada kohudia baita lalodia bada bona baita gimadia.

20. Dirava ese e heni dava bada kohudia ba gimadia totona dahaka ba kara na namo?

²⁰ Dirava ena Basileia iura henina karana baine hadikaia diba ḡaudia na mai emu ura ida ba dadaraidia. Ba haroro goadagoada, bona haroro ḡaukarana ba laloa bada. Hanaihanai Dirava ena hereva momokanidia ba tahudia namonamo. Unu bo kara tomamu neganai, oi na “guba kohuna, basine ore ḡauna” o habouamu, “unuseni ai henao tauna se raka vareaimu, bona pitopito danu se ani oremu. Badina be emui kohu e miamu gabuna ai lalomui danu unuseni ai.”​—Luka 12:33, 34.