IEHOVA DIRAVA ese Kristen taudia e haḡanidia maino karadia bae hahedinarai bona maino ai bae noho. Tomadiho momokani taudia ese maino karadia bae hahedinarai neganai, iboudiai ese maino bada bae moalelaia. Una ese heiriheiri asie uramu taudia baine veridia Kristen kongrigeisen ai bae vareai totona.

Heḡereḡere, Madagascar ai, babalau tauna ta ese Iehova ena Witnes taudia edia lalotamona karana e itaia. Bena sibona e lalo, ‘Bema na uramu tomadiho ta baina badinaia, ina tomadiho baina badinaia hari namo.’ Gabeai, ia ese ena babalau karadia e hadoko, Baibul ena hereva heḡereḡerenai ena headava e hamaoromaoroa, bena Iehova, maino Diravana, itomadiho henina tauna ta ai ela.

Una tau heḡereḡerena, laḡani ta ta ai taunimanima momo na Kristen kongrigeisen ai e vareaimu bona e ura heniamu mainona e davariamu. To, Baibul ese e hahedinaraiamu, bema kongrigeisen lalonai “vaḡeḡe dikadia bona heiri-heiri” na mia, una ese hebamo namodia baine hadika bona hekwakwanai baine havara diba. (Iak. 3:14-16) To ta moalemu, badina Baibul ese unu hekwakwanai ihahanaidia bona maino ihavarana daladia ai sisiba namodia e henimu. Unu sisiba namodia ese haida e durudia daladia mani aita itadia.

“Lau bona tadikaka ta na asia ḡaukara hebou namonamova. Nega ta a helolo heheni neganai, tatau rarua na ema bona una kara e itaia.”​—CHRIS.

“Lau ida nega momo a haroro hebouva taihuna ta na gabeai haroro ḡaukara ai se urava baine bamogu. Gabeai lau na se hereva heniguva. Asi dibagu dahaka dainai ia na unu e kara tomava.”​—JANET.

“Lau na tatau tatoi ida fon ai a herevaherevava. Idia ta na e gwa bamahuta, bona na laloava iena fon na de koua. Bena lau na fon amo tau ihatoina enai tau iharuana na maumauraiava, to asi dibagu una na maumauraiava tauna ena fon na do se koua.”​—MICHAEL.

“Emai kongrigeisen ai, painia taihudia rarua padadiai hekwakwanai ta e vara. Ta ese ma ta e gwau heniava. Una kara ese ma haida na e hahekwakwanaidia.”​—GARY.

Reana bo laloamu unu na hekwakwanai maraḡidia. To, unu hekwakwanai ta ta ese unu tadikaka bona taihu edia hemami e hadika bona kongrigeisen ena maino danu e hadikaia. To moale ḡauna na, unu tadikaka bona taihu na Baibul ena hahekau herevadia e badina bona maino e kara. O laloamu ededia hahekau herevadia Baibul ai e badina?

 “Dala ai basio heiri-heiri.” (Gen. 45:24) Iosef tadikakana na tamadia dekena baela neganai, Iosef ese una sisiba e henidia. Una na sisiba namona, ani? Bema ta na ena hemami basine biaguamu bona be badu haraḡamu, ia ese ma haida na be habadudia dibamu. Chris na e diba, ia na e hekokoroku bona se ura hahekau herevadia baine badina. Ia na e ura ena kara baine haidaua, una dainai tadikakana e sori henia bona e ḡaukara goada ena badu baine biagua totona. Chris ida e ḡaukara hebouva tauna na e itaia Chris na ena kara e haidaua dainai, ia danu ena kara e haidaua. Hari idia raruosi na mai moaledia ida Iehova e hesiai heniamu.

“Ta se hahealomu negana ai, taunimanima edia lalo-hata ḡaudia asie tubu namonamomu.” (Her. 15:22) Janet na e lalo una sisiba baine badinaia na namo. Ia na ela ia se hereva heniava taihuna baine hereva henia. Edia herevahereva lalonai, Janet na mai ena hemataurai ida una taihu e noia ia se hereva heniava badina baine gwauraia hedinarai totona. Reana matamanai na asie herevahereva namonamo, to gabeai mai manaudia ida edia hekwakwanai e hamaoromaoroa neganai, idia na e hereva hebou namonamova. Una taihu na e diba Janet ese e karaia karana ta na ia ese e laloa kerere. Una dainai Janet e sori henia, bona hari idia na Iehova e hesiai henia heboumu.

“Taunabunai, emu boubou ḡauna pata helaḡana ai bavatoa negana ai na ba helalo une, tadikakamu enai mai emu kerere, emu boubou ḡauna pata helaḡana vairanai ba rakatania, baola, tadikakamu ida ba herohemaino guna.” (Mat. 5:23, 24) Una sisiba na Iesu ese Ororo Harorona ai e gwauraia. Michael ena hemami na se namo badina e laloparara ia ese tadikakana na se laloa bona e maumauraia. Una dainai lalona e hadaia tadikakana ida baine herohemaino. Mai manauna ida una tadikaka e sori henia. Bena dahaka e vara? Michael na eto, “Tadikakagu ese egu kerere na e gwauatao.” Idia raruosi na tura namodia ai ma ela.

“Ba haheauka heheni. Ta ese bamona baine habadelaia negana ai, emui dika ba hegwau tao heheni.” (Kol. 3:12-14) E painia daudau taihudia raruosi na elda ta ese e durudia ini henanadai bae lalodia: ‘Ita raruosi na ḡau ta ai asita lalotamonamu dainai, ita be mai eda maoro ma haida lalodia baita hahisi, a? Ita be badi namona ta dainai asita ḡaukara heboumu bona dia maino ai Iehova ta hesiai heniamu, a?’ Unu taihu ese elda ena sisiba e abia dae bona e badinaia. Hari idia na mai moaledia ida sivarai namona e harorolaia heboumu.

Bema ta ese lalomu e hahisiamu, namona na Kolose 3:12-14 ese e herevalaia sisibana ba badinaia. Momo na e dibamu bema bae  manau, ma haida edia kerere bae gwautao bona bae lalodia boio diba. To bema una na se varamu, Mataio 18:15 ena hahekau herevana ba badinaia diba, ani? Iesu ena sisiba ai, ta ese tadikakana baine kara dika henia neganai baine karaia ḡauna e herevalaia. To, oi ese una hahekau herevana ba badinaia na namo. Namona na tadikaka o taihu dekena baola bena mai gado namomu bona manaumu ida e vara hekwakwanai ba herevalaia bona ba hamaoromaoroa.

Momokani, Baibul ese heduru daladia namodia ma haida e hahedinarai. Una heduru dalana ta na ‘lauma huahuadia’ baita hahedinarai, heḡereḡere “lalokau, moale, maino, haheauka, hebogahisi, kara maoromaoro, hereva ibadinana, manau, boga-auka.” (Gal. 5:22, 23) Oela ese misini ena heau dalana e hanamoamu heḡereḡerena, unu kara namodia ese maino baine havaraia diba.

Ita ta ta eda kara na idauidau. Ḡau ta haeromu eiava ta lalomu daladia na ma ta ena amo idau. Una ese eda hebamo heheni karana baine hanamoa diba. To, eda kara idauidau ese danu hekwakwanai na baine havaraia diba. Lo elda tauna ta ese ina haheitalai e gwauraia, eto: “E hemaraimu tauna ese e hereva momomu tauna baine bamoa na auka. Reana bo laloamu una na dia ḡau badana, to una ese hekwakwanai badana baine havaraia diba.” To, o laloamu bema taunimanima edia kara na idauidau, hekwakwanai be varamu, eiava? Mani aposetolo taudia rarua aita lalodia. Petro ena kara be ede bamona? Reana bo laloamu ia na ena lalohadai na mai momokanina ida e gwaurai hedinaraiva bona se lalo namonamova bena e hereva haraḡava tauna. Ioane ena kara be ede bamona? Reana baita laloamu ia na tadikaka lalokauna ta bona e lalo namonamo gunava gabeai e herevava bona kara e karava. Reana badi haida dainai una aposetolo taudia rarua na unu bo lalodia tomamu. Ena be idia raruosi edia kara na idau to e ḡaukara hebou namonamova. (Kara 8:14; Gal. 2:9) Una heḡereḡerena, ena be hari ina negai Kristen taudia edia kara  na idauidau to bae ḡaukara hebou namonamo diba.

Reana emu kongrigeisen ai tadikaka ta ena hereva o kara ese lalomu e hahisiamu. To, namona na ba helalotao Keriso na oi bona una tadikaka o taihu dainai e mase, bona lalokau ba hahedinaraia na namo. (Ioa. 13:34, 35; Roma 5:6-8) Dia namo emui hebamo karana ba hadokoa, to sibomu ba henanadai: ‘Lau tadikakagu be Baibul ese e taravatua ḡauna ta e karaia, a? Ia be e uramu lalogu baine hahisia, a? Eiava emai kara na idau dainai una hekwakwanai e vara, a?’ To, mai anina bada henanadaina na ina: ‘Iena kara namodia amo edena kara ese lau na be durugu dibamu?’

Heḡereḡere, bema ta na hereva momo tauna to oi be lasi, haroro ḡaukara ai ena hereva e hamatamamu daladia ba haerodia. Reana ba noia haroro ai ba ḡaukara hebou bona ia amo diba bavabi. Bema ia na harihari karana e hahedinaraiamu tauna to oi be lasi, namona na burukadia, gorere taudia bona ogoḡami taudia idurudia karana amo e maimu moalena ba laloa. Mai anina bada ḡauna na ina, ena be oi bona tadikakamu emui kara na idauidau, to emui kara namodia ba lalodia karana ese emui hetura karana na baine hagoadaia diba. Una ese dia emui hetura karana mo be hanamoamu, to umui raruosi padamui ai bona kongrigeisen ai danu maino be havaraia dibamu.

Reana Euodia bona Sunutuke edia kara na idauidau. To, aposetolo Paulo ese e hagoadadia lalodia “bae tamona Lohiabada lalonai.” (Fili. 4:2) Ita danu ta uramu tadikakada ida lalo tamona ai Dirava baita hesiai henia bona kongrigeisen ai maino baine mia.

Flaoa umana ta lalonai ava dikadia e tubumu heḡereḡerena, eda hemami dikadia ma haida ediai na be goadamu bema basita kokidia haraḡamu. Badu ese kudouda baine biagua neganai, una ese kongrigeisen  ena lalotamona baine hadikaia diba. Bema Iehova bona tadikakada baita lalokau henidiamu, baita ḡaukara goadamu Dirava ena taunimanima edia maino e hadikaiamu karadia baita dadaraidia totona.

Hekwakwanai baita hamaoromaoromu bona maino baita karamu neganai, una ese anina namona be havaraiamu. Taihu ta enai e vara ḡauna mani aita laloa, ia na eto: “Lau na na mamia taihu ta ese lau na vaitani maraḡina ta heḡereḡerena e kara heniguva. Una dainai asina moale. Na lalohisihisiva dainai na kara auka heniava. Ini na lalo toma, ‘Ia ese lau na se matauraigumu dainai, ia danu basina matauraia.’”

Gabeai, una taihu na ena kara e haerodia. Eto: “Egu kerere na lalopararalai matama neganai asina moale. Na diba egu lalohadai baina haidaua na namo. Iehova enai na ḡuriḡurilaia murinai, una taihu ena harihari ḡauna maraḡina ta na hoia bona egu sori herevana na kadi ta ai na torea bona na henia. Ai raruosi na aherahu bona a lalotamona emai hekwakwanai na baia laloaboio. Una murinai ai padamai ai hekwakwanai ma haida asie vara.”

Taunimanima na e uramu maino ai bae noho. To e hemamimu edia dagi na haida ese e uramu bae abi eiava hekokoroku dainai maino karadia na asie karamu. Iehova asie tomadiho heniamu taudia momo ediai una na e varamu, to Ia e tomadiho heniamu taudia bogaraḡidiai maino bona lalotamona baine mia na namo. Paulo na ini e gwau toma: “Lau . . . na hahealo henimuimu: ba raka, e boirimui rakana heḡereḡerena. Lalomui bae manau, bae manada, bae haheauka. Lalokau ai ba haheauka heheni. Lauma ena lalo-tamona ba kahua tao, maino ena iḡui ai.” (Efe. 4:1-3) Una “maino,” ita ihatamonada ḡauna, na mai anina bada. Namona na una kara baita habadaia, bona laloda baita hadai bogaraḡidai e varamu hekwakwanaidia baita hamaoromaorodia.