1, 2. (a) Baita laloa bada ḡauna badana be dahaka? (b) Dahaka dainai Dirava ena lohia siahuna baita abia isi karana na mai anina bada?

HARI ina negai, taunimanima momo na moni e lalo badamu. Idia na e uramu moni momo bae habou eiava dekediai moni miadia na asie uramu bae ḡaukaralai. Ma haida na edia ruma bese, edia helt, eiava bae haḡuḡuru ḡaudia e lalo badamu.

² To, baita laloa bada ḡauna badana na, Iehova ena lohia siahuna baita abia isi karana. Namona na baita henahua toho una baita laloa boio garina. Edena dalai una baine vara diba? Bema dina ta ta ai ta karamu ḡaudia ai baita bisimu, eiava eda hekwakwanai baita lalodia momomu, Dirava ena lohia siahuna baita abia isi karana na basita laloa badamu. To, bema Iehova ena lohia siahuna baita abia isi karana baita laloa badamu, dina ta ta ai ta davarimu hekwakwanaidia na baita haheaukalaidiamu, bona Iehova baita raka henia kahi dibamu.

3. Dirava ena lohia dalana dainai Satana be dahaka e gwaurai?

³ Satana Diabolo na ena kara amo Iehova ena lohia siahuna ena maoro e hepapahuahulaia. Ia na eto Iehova na dia lohia tauna  namona bona ia ese taunimanima na ḡau namodia se henidiamu. Danu ia na eto, taunimanima na sibodia bae helohia neganai bae moale diba. (Gen. 3:1-5) Satana na ma eto taunimanima na mai kudoudia idoinai ida Dirava na basie badinaia dibamu, bona hahetoho aukadia be davarimu neganai Iehova ena lohia dalana na be dadaraiamu. (Iobu 2:4, 5) Una dainai Iehova ese nega e heni, unu amo taunimanima edia mauri ai bae vara ḡaudia amo baine hamomokania Iena lohia dalana mo maoro.

4. Dahaka dainai Dirava ese ena lohia siahuna dainai e vara hepapahuahuna baine hamaoromaoroa na namo?

⁴ Momokani, Iehova na mai dibana Diabolo ena hereva na koikoi. To dahaka dainai Dirava ese Satana na nega e henia ena hereva baine hamomokania totona? Una henanadai na mai anina bada taunimanima bona aneru ediai. (Salamo 83:18 ba duahia.) Tau bona hahine ginigunadia ese Iehova ena lohia dalana na e dadaraia, bona una nega amo momo danu unu e kara toma. Una dainai reana haida na be laloamu Diabolo ena hereva na maoro. Una idaunega hepapahuahu herevana na do se hamaoromaoroa dainai, bese iboudiai na lalotamona bona maino ai asie nohomu. To Iehova ese ena lohia siahuna ena maoro be hamomokaniamu neganai, taunimanima iboudiai na Iena lohia dalana namona henunai be noho hanaihanaimu. Iunives lalonai maino ma be havaraiamu.​—Efe. 1:9, 10.

5. Iehova ena lohia siahuna dainai e vara hepapahuahuna ihamaoromaorona karana be ede baita durua toma?

⁵ Dirava ena lohia siahuna na bae abia isi, bona Satana bona taunimanima edia lohia dalana na be oremu. Dirava na ena Mesia Basileiana amo be lohiamu, bona Ia e abidadama heniamu taudia ese be hamomokaniamu, taunimanima ese Dirava ena lohia dalana na bae badinaia diba. (Isa. 45:23, 24) O uramu Dirava ena lohia siahuna e abia isimu abidadama taudia bogaraḡidiai ba noho, a? Oibe! Eda abidadama baita hagoadaia totona, namona na Dirava ena lohia siahuna baita abia isi bona baita laloparara una na mai anina bada.

6. Dahaka dainai Dirava ena lohia siahuna baita abia isi na mai anina bada?

⁶ Matamanai tame herevalaia heḡereḡerena, Iehova ena lohia siahuna baita abia isi na mai anina bada. Una ese siboda eda ura baita lalo bada karana na e hereaia. To una anina be eda hahemauri karana be da asi anina eiava Iehova ese ita be se laloda badamu, a? Lasi. Dahaka dainai?

7, 8. Dahaka dainai Dirava na ena lohia siahuna iabi isina karana amo ena gwauhamata baine haḡuḡurudia?

⁷ Iehova ese ita na e lalokau henidamu bona e laloda badamu. Una dainai mai ena ura ida Natuna e heni, unu amo mauri hanaihanai baita abia diba. (Ioa. 3:16; 1 Ioa. 4:9) Bema Iehova na ena gwauhamata basinema haḡuḡurudia, Diabolo ese bema gwauraia koikoi tauna, ena taunimanima na ḡau namodia se henidiamu bona ena lohia dalana na dia maoro. Danu, gwau-edeede taudia ese bema kirikirilaia, bema gwau: “Ena lou mai gwauhamatana na edeheto? Badina be tubuda tamada e mahutava negadia ema harihari, ḡau iboudiai vada eme hesiriu, tanobada e karaia negana heḡereḡerena.” (2 Pet. 3:3, 4) Una dainai, Iehova ese ena lohia siahuna iabi isina karana amo Ia e kamonai heniamu taudia baine hamauridia! (Isaia 55:10, 11 ba duahi.) Danu, Iehova na mai lalokauna ida baine lohia. Una dainai ta dibamu Ia ese mai edia  abidadama ida Ia e hesiai heniamu taudia na e lalokau henidiamu bona e lalodia badamu.​—Eso. 34:6.

⁸ Iehova ena lohia siahuna baita abia isi na mai anina bada, to basitato Ia ese eda hahemauri karana na se laloa badamu eiava ita na se lalodamu. Namona na Iehova ena lohia siahuna bona eda hahemauri karana ai lalohadai maorona baita abia. Una na mai anina bada bema ta uramu Iehova ena lohia dalana maoromaorona baita laloa bada bona baita badinaia.

9. Satana ese Iobu be ede e herevalaia toma? (Rau 22 ai laulau ba itaia.)

⁹ Baibul bukana Iobu ese lalohadai maorona baita abia dalana na e hahedinaraia ḡoevaḡoeva​—Iobu bukana na e torea Baibul bukana ginigunana ta. Una buka ai ta diba, Satana na e gwa bema Iobu na hisihisi momo be davarimu, Dirava be dadaraiamu. Bona e gwa Dirava ese Iobu baine hahisia. To Iehova na unu se kara toma, bona Ia ese Satana na se koua Iobu baine tohoa, eto: “Ena ḡau iboudiai na imamu ai.” (Iobu 1:7-12 ba duahi.) Gabeai, Iobu ese ena hesiai taudia, ena kohu, bona natuna iboudiai 10 e haboiodia. Satana na una dala amo e ura Iobu na baine laloa Dirava sibona ese unu hekwakwanai e havarava. (Iobu 1:13-19) Gabeai, Satana ese toto dika-hereadia amo Iobu e hahisia. (Iobu 2:7) Iobu ena hisihisi e habadaia ḡauna ma ta na, ia adavana bona turana koikoidia tatoiosi ese lalomanoka herevadia e gwauraiva.​—Iobu 2:9; 3:11; 16:2.

10. (a) Iobu be dahaka e kara unu amo e hahedinaraia ia na Dirava e badinaia? (b) Edena dalai lalohadai kererena e abia?

¹⁰ Dahaka e vara? Iobu ese Dirava na se rakatania, unu amo e hahedinaraia Satana ena hereva na koikoi. (Iobu 27:5) To, Iobu na lalohadai kererena e abia. Ia na e laloava ia sibona ena kara na maoromaoro, bona e urava ena hisihisi badina baine diba. (Iobu 7:20; 13:24) Reana baita laloamu Iobu ena lalohadai na maoro badina hisihisi bada herea e ani. To, Dirava ese Iobu ena lalohadai na e hamaoromaoroa. Iehova ese Iobu be dahaka e hamaoroa?

11, 12. Iehova ese Iobu be ede e durua toma, bona Iobu be dahaka e kara?

¹¹ Iehova ese Iobu enai e gwaurai herevadia na Iobu karoa 38 ela 41 lalodiai mimia. To unu karoa lalodiai Dirava ese Iobu e hisihisiva badidia na se herevalaia. Iehova na dia una badi dainai Iobu e hereva henia, badina bema unu bema kara toma, una na vaitani ia na e uramu sibona ena maoro  baine hahedinaraia. To, Iehova na e ura Iobu baine durua bena baine laloparara Dirava ese taunimanima na e hereadia. Bona Iobu e durua unu amo ena hekwakwanai mo basine laloa, to mai anina bada ḡauna baine laloa bada. (Iobu 38:18-21 ba duahi.) Una ese Iobu e durua lalohadai maorona e abia.

¹² Iobu ese hahetoho e haheaukalai murinai, Iehova ese e sisiba henia be dia hebogahisi karana, a? Lasi, bona Iobu na unu se lalo toma. Ena be Iobu na hahetoho e davari, to ia ese Iehova na e hanamoa. Bona ini e gwau toma: “Lau na sibogu na hedadaraimu, ḡahu bona kahu ai na helalo kerehaimu.” Iehova ena sisiba namona dainai Iobu na una hereva e gwauraia. (Iobu 42:1-6) Iobu na eregabe tauna Elihu ena amo sisiba namodia e abi danu. (Iobu 32:5-10) Iobu ese Iehova ena sisiba e abia dae bona ena lalohadai e hamaoromaoroa neganai, Iehova ese ma haida vairadiai e hahedinaraia Ia na Iobu ena abidadama karana dainai e moale.​—Iobu 42:7, 8.

13. Iobu ena hahetoho e ore muridiai, edena dalai Iehova ena sisiba ese dounu e duruava?

¹³ Iobu ena hahetoho e ore muridiai, Iehova ena sisiba ese dounu e duruava. Edena dalai? “Iehova ese Iobu ena dina gabedia e hanamodia bada, a matamana ai ihanamona be maraḡi.” E haboio ḡaudia latadiai ma momo e abi, badina gabeai ia na ‘natuna mamaruanedia hahitu bona natuna hahinedia tatoi’ ma e havara. (Iobu 42:12-14) Momokani, Satana ese Iobu natuna e hamasedia neganai, Iobu ese natuna na e misidiava. Bona reana enai e vara hisihisidia na dounu e lalodiava. Ena be ena hisihisi badidia na reana gabeai e lalopararalai, to reana nega haida e lalova dahaka dainai enai unu hisihisi e varava. Herevana ede bema lalo toma, to Dirava ena sisiba baine lalodia na namo. Unu baine kara toma neganai, lalohadai maorona bona tauhalo baine abi diba.​—Sal. 94:19.

14. Iobu ena sivarai amo dahaka ta dibamu?

¹⁴ Iobu ena sivarai amo ta dibamu lalohadai maorona bona tauhalo na baita abi dibamu. Iehova ese Iobu ena sivarai na “ita ihadibalaida totona e tore, bena Buka Helaḡa ese haheauka bona tauhalo bae havara, ela bona helaro baita davaria.” (Roma 15:4) Dahaka ta dibamu? Dia namo eda hekwakwanai baita lalodia momo bena Iehova ena lohia siahuna iabi isina karana basita laloa bada. Namona na Iobu heḡereḡerena, hahetoho aukadia lalodiai Dirava baita badinaia hanaihanai, unu amo baita hahedinaraia Iena lohia siahuna na ta abia isimu.

15. Hahetoho negadiai Dirava baita badinaiamu ena namo be dahaka?

 ¹⁵ Dahaka dainai Dirava ibadinana karana baita laloa bada? Badina ta davarimu hahetohodia ese na se hahedinaraiamu Iehova na ita e badu henidamu, to idia ese dala e kehomu Dirava ena lohia siahuna baita abia isi. (Her. 27:11) Eda haheauka karana ese Dirava e hamoaleamu bona eda helaro e hagoadaiamu. (Roma 5:3-5 ba duahi.) Iobu ena sivarai ese e hahedinaraiamu Iehova na ‘hebogahisi bona hariharibada’ Diravana. (Iak. 5:11) Una dainai Iena lohia siahuna baita abia isimu neganai, ahuda namona be henidamu. Una ta dibamu dainai baita ‘haheauka bona baita boga auka mai moaleda ida.’​—Kol. 1:11.

16. Dahaka dainai hekwakwanai negadiai Dirava ena lohia siahuna baita badinaia na ḡau badana?

¹⁶ Nega haida eda hekwakwanai ese be hametaudamu neganai, Iehova ena lohia siahuna iabi isina karana baita laloa badamu na auka. Bona bema hekwakwanai maraḡidia baita lalodia momomu, hekwakwanai badadia ai be lao dibamu. Una dainai, namona na hanaihanai baita helalotao hekwakwanai negadiai Dirava ena lohia siahuna baita badinaia na ḡau badana.

17. Edena dalai Iehova baita hesiai henia hanaihanai karana ese baine duruda diba?

¹⁷ Iehova baita hesiai henia hanaihanaimu neganai, una ese be durudamu Iena lohia siahuna iabi isina karana baita laloa badamu. Heḡereḡere, Witnes hahinena ta ladana Renee na stroke bona cancer gorerena dainai hisihisi bada herea e mami. Hosipele ai e nohova neganai, ia ese hosipele ai e ḡaukarava taudia, gorere taudia bona e vadivadiva taudia e haroro henidiava. Nega ta, ia na wiki rua mai kahana lalonai hosipele ai hora 80 e haroro. Ena be Renee na mai dibana ia na be masemu, to ia ese Iehova ena lohia siahuna iabi isina karana na e laloa bada. Una ese lalomaino e henia.

18. Edena dalai taihu ta ena ekspiriens ese e hahedinaraia Iehova ena lohia siahuna baita abi isi na mai ena namo?

¹⁸ Momokani, dina ta ta ai ta davarimu hekwakwanaidia lalodiai Iehova ena lohia siahuna iabi isina karana baita laloa bada na namo. Jennifer na ena hanua bainela totona dina toi airport ai e nariva. Baine gui pleinidia iboudiai na se laova ena hanua. E hemamiva ia na sibona bona e hesiku dainai, reana bema lalohisihisi diba. To, ia ese Dirava e noia baine durua airport ai e nariva taudia ma haida baine haroro henidia. Dahaka e vara? Momo e haroro henidia bona pablikeisen momo e hariharilai. Ia na eto: “Ena be una hahetoho na egu ai e vara, to na mamia Iehova ese lau na goada e henigu unu amo Ia ladana baina gwauraia hedinarai.” Momokani, una taihu ese Iehova ena ura na e laloa bada.

19. Iehova ena taunimanima ese Iena lohia siahuna be ede e laloa tomamu?

¹⁹ Iehova ena taunimanima na Iena lohia siahuna e abia isimu dainai, e hahedinaraiamu idia na tomadiho koikoi amo idau. Ita na tomadiho momokani ta badinaiamu tauda dainai, namona na hanaihanai Dirava ena lohia siahuna baita abia isi.

20. Iehova ese ena lohia siahuna ta abia isimu karana be ede e laloa tomamu?

²⁰ Dirava ta hesiai heniamu bona hahetoho lalodiai ta haheaukamu karana amo Iehova ena lohia siahuna ta abia isimu, bona Iehova ese una na e laloa badamu. (Sal. 18:25) Stadi gabena ese be hahedinaraiamu dahaka dainai mai kudouda idoinai ida Iehova ena lohia siahuna baita badinaia bona edena dalai unu baita kara toma.