Gima Kohorona matamatadia o duahidia namonamomu, a? Mani ini henanadai ba haerelaidia:

Dirava ena orea amo hahekau herevadia e maimu neganai, seket taudia bona kongrigeisen elda be dahaka bae kara na namo?

Namona na maoromaoro una hahekau herevana bae badinaia. Sibodia bae henanadai diba: ‘Lau ese tadikaka taihu na hagoadadiamu, eiava? Hahekau taudia edia hereva na badinamu, eiava?’​—w16.11, rau 11.

Kristen taudia korikoridia be edena negai Babulono ena iḡui ai e noho?

Aposetolo taudia e mase murinai una e vara. Una negai, dagi oreana ta na e hematamava. Dubu bona Gavamani ese aposteit oreana e hamomokania bona e urava horoa Kristen taudia, uit ida e haheḡereḡeredia taudia, bae koudia. To laḡani 1914 do lasi neganai horoa taudia na Babulono ena iḡui amo e heruha matama.​—w16.11, rau 23-25.

“Tau-anina ilalona” bona “lauma ilalona” edia idau be dahaka? (Roma 8:6)

Tauani ḡaudia e lalomu tauna na sibona ena ura e laloa badamu eiava ena ura ese e biaguamu, ia na nega iboudiai tauani ḡaudia mo be herevalaimu o be moalelaimu. A lauma ḡaudia e lalomu Kristen tauna na ena mauri lalonai Dirava ena lalohadai e badinaiamu; ia na lauma helaḡa ese darana e hadibaiamu. Tau-anina ḡaudia ilalodia karana ese mase baine havaraia, a lauma ḡaudia ilalodia karana ese mauri bona maino baine havaraia.​—w16.12, rau 15-17.

Emu lalohekwarahi ba hamaraḡia daladia namodia haida be dahaka?

Mai anina bada ḡaudia bavato guna, lalohadai maorona bavabia, dina ta ta ai nega bavato ba laḡa-ani, Dirava ese e havara ḡaudia ba moalelai, ba moale, ba eksasais hanaihanai, bona ba mahuta namonamo.​—w16.12, rau 22-23.

Dahaka dainai manau karana na mai anina bada?

Manau anina na siboda eda kara bona eda goada hetoadia baita lalopararalai. Una baita diba karana ese baine duruda ma haida baita kara namo henidia bona basita hekokoroku.​—w17.01, rau 18.

Dahaka ese e hamomokaniamu Dirava ese aposetolo edia negai e nohova gavanin bodi na e hakauava, hari ina negai e nohomu Gavanin Bodi e hakauamu heḡereḡerena?

Lauma helaḡa ena heduru amo, idia ese Baibul ena hereva momokanidia na e lalopararalaidia. Aneru edia heduru amo haroro ḡaukara e nariava, bona hahekau herevadia e heniva negadiai Dirava ena Hereva ai e tabekauva. Hari ina negai danu unuheto.​—w17.02, rau 26-28.

Kristen tauna ta ese abi hidi ta baine karaia murinai, baine haidaua diba, eiava?

Eda hereva baita badinaia na namo. To, nega haida na ta karaia guna abi hidina baita laloa lou na namo. Nineve taudia e helalo-kerehai neganai, Dirava ese ena abi hidi na e haidaua bona Nineve taudia na se hamasedia. Nega haida, eda mauri daladia be idaumu eiava diba matamatana ta baita abiamu dainai eda abi hidi na baita haidaua dibamu.​—w17.03, rau 16-17.

Dahaka dainai maumau karana na mai ena dika?

Maumau karana ese hekwakwanai baine habadaia diba. Herevana ita na maoro eiava kerere, to hahehisi herevadia ese ḡau ta na basine hanamoa dibamu.​—w17.04, rau 21.