1. Dahaka badi dainai ta moalemu?

TA MOALEMU badina ta kamonaimu Iehova ena taunimanima ese edia diari na e hahedinaraiamu! Laḡani gunanai, ita ese Baibul stadi 10,000,000 mai kahana ta karadia. Una ese e hahedinaraiamu Dirava ena hesiai taudia ese edia diari na e hahedinaraiamu! Bona kamonai taudia momo herea na Memorial ema. Unu amo Dirava ese mauri davana e heni karana amo e hahedinaraia lalokauna e dibaia.​—1 Ioa. 4:9.

2, 3. (a) Dahaka ese basine kouda eda “diari” baita hahedinaraia totona? (b) Iesu ena hereva Mataio 5:14-16 ai baita laloamu neganai, dahaka baita herevalaimu?

² Tanobada heḡeḡemadai, Iehova ena taunimanima na gado idauidau taudia. To, una ese se koudamu mai laloda tamonadia ida Tamada, Iehova, baita hanamoa totona. (Apok. 7:9) Herevana edena gado ai ta herevamu bona edeseni ai ta nohomu, to eda “diari” na tanobada ai baita hahedinaraia diba.​—Fili. 2:15.

³ Eda hesiai ḡaukara, eda Kristen lalotamona karana, bona baita gima karana amo Iehova baita heatolaia. Ina atikol ai, unu  baita kara toma daladia baita herevalaimu.​—Mataio 5:14-16 ba duahi.

4, 5. (a) Dia haroro ḡaukara ai mo, to edena dala ai danu eda diari baita hahedinaraia diba? (b) Eda kara namodia amo dahaka namo baine vara? (Rau 21 ai laulau ba itaia.)

⁴ “Ini dina gabedia ai ta na mai momokanina ida Lohiabada na basine abidadama henia dibamu . . . bema dala idauidau ai ena diari basine hahedinaraia.” Una hereva na The Watch Tower June 1, 1925 ena atikol ladana “Light in the Darkness” ai e hahedinaraia. Una atikol na ma eto: “Namona na ia ese taunimanima ediai sivarai namona baine harorolaia, bona ena mauri lalonai Iehova ena kara maoromaoro taravatudia baine badina.” E hahedinaraia ḡoevaḡoevamu, eda diari baita hahedinaraia dalana ta na, sivarai namona baita harorolaia bona hahediba ḡaukarana baita karaia. (Mat. 28:19, 20) Danu, eda Kristen kara namodia amo Iehova baita hanamoa diba. Ruma taudia bona raka hanai taudia ese eda kara na e itamu. Baita kiri henidiamu bona hahenamo herevadia baita gwauraimu neganai, be dibamu ita be daidia bona edena Dirava ta tomadiho heniamu.

⁵ Iesu ese ena hahediba e hamaorodia: “Ruma na ba raka vareai negana ai na ba hanamoa.” (Mat. 10:12) Iesu bona ena aposetolo taudia e haroro momova gabudia ai, taunimanima ese idau taudia na edia ruma ai e abidia daeva. Hari ina negai, gabu momo ai unu na asie kara tomamu. To, kara namodia bo hahedinaraimu bona ola badina bo herevalaiamu neganai, ruma tauna na basine lalohekwarahimu eiava basine daradaramu. Nega momo herevahereva ihamatamana dalana namona na kiri toana ba hahedinaraia. Tadikaka bona taihu ese pablik haroro ai pablikeisen e hahedinaraimu troli eiava teibolo e ḡaukaralaiamu neganai, unu e kara tomamu. Una haroro dalana bo karaiamu neganai, bo davariamu nega momo taunimanima na emu kiri toana bona hahenamo herevana ese lalodia be verimu. Bona be uramu dekeda baema bona eda pablikeisen ta bae abia. Danu, emu kara namona ese be durumumu herevahereva ba hamatamaia totona.

6. Burukadia rarua ese edia hesiai ḡaukara be ede e habadaia toma?

⁶ England ai, burukadia rarua na mai edia gorere dainai dia heḡereḡere ruma-ta-ruma-ta haroro ḡaukarana bae karaia. Lalodia e hadai edia ruma murimurinai edia diari bae hahedinaraia totona. Idia na sikuli badinai e nohova, una dainai Baibul pablikeisen na teibolo ta ai e ato, unu amo tama sina na natudia ihakaudia baema neganai bae ita diba. Tama sina momo ese Questions Young People Ask​—Answers That Work, Volium 1 bona 2, bona buklet ma haida e ura heni dainai e abidia. Edia kongrigeisen amo painia taihuna ta ese e bamodia. Unu burukadia rarua bona taihu edia kara namodia dainai, tama ta ese Baibul stadi e abia dae.

7. Emu gabu ai refiuji taudia be ede ba durudia toma?

⁷ Vanega laḡanidia ai, tano momo ai refiuji na momo. Dahaka ba kara diba unu amo ba durudia Iehova bona ena ura bae diba? Ḡau ginigunana na, edia gado ai hahenamo herevana ta ba dibaia. Unu ba kara toma totona JW Language app ese baine durumu diba. Danu, edia ura ihabadana totona hereva igwauraidia daladia haida ba diba na namo. Bena baola jw.org bona edia gado ai e halasi pablikeisen bona vidio idauidau ba hahedinarai.​—⁠Deu. 10:19.

8, 9. (a) Eda pura ta ta heboudia ai dahaka heduru ta abimu? (b) Edena dala ai tama sina ese natudia bae durudia hebou ai bae haere totona?

⁸ Iehova na mai lalokauna ida Mauri Bona Hesiai Ḡaukara Hebouna e heḡaeḡaelaia,  unu amo haroro ḡaukara baita karaia namonamo diba. Una hebou ai ta abimu hahediba hereva maorodia ese e durudamu lou henia bona Baibul stadi baita karadia namonamo totona.

⁹ Hebou ai vadivadi taudia momo na e itamu natuda na haere e henimu. Tama sina e, natumui ba durudia edia diari bae hahedinaraia totona, namona na ba hadibadia sibodia edia hereva amo haere bae heni. Natu na mai kudoudia idoinai ida haere e henimu neganai, nega momo una ese kamonai taudia matamatadia lalodia e verimu hereva momokani bae dibaia.​—1 Kor. 14:25.

10. Edena dala ai ruma bese ena tomadiho ese lalotamona karana baine havaraia?

¹⁰ Diari ba hahedinaraia dalana ta na, emu ruma bese bona kongrigeisen lalonai lalotamona karana ba habadaia. Tama sina ese una bae karaia diba dalana ta na, Ruma Bese ena Tomadiho bae karaia hanaihanai. Momo na hua ta ta ai JW Broadcasting e itamu. Una ba itaia murinai, nega bavato diba poin haida ibadinadia daladia ba herevalai totona, ani? Tama sina ese ruma bese ena tomadiho bae karaia neganai, namona na bae helalotao, natu maraḡina ta bae hadibaia dalana na natu badana ta ena amo idau. Stadi bukadia bavabi hidi namonamo, unu amo ruma bese taudia ta ta na namo bae davari.​—Sal. 148:12, 13.

11-13. Edena dala ai kongrigeisen ai lalotamona karana ba habadaia bona ma haida ba durudia edia diari bae hahedinaraia?

¹¹ Edena dala ai memero kekeni ese kongrigeisen ai lalotamona bae havaraia diba bona ma haida bae hagoadadia edia diari bae hahedinaraia? Bema oi na Kristen merona eiava kekenina, namona na tadikaka bona taihu badadia ba bamodia, ani? Mai hematauraimu ida ba nanadaidia laḡani momo hesiai ḡaukaradia e kara sivaraidia ta bae herevalaia. Una ese be hagoadamumu, bona oi bona idia be durumuimu hereva momokani ena diari ba hahedinaraia totona. Bona iboudai ese Kingdom Hall ai hebou e maimu taudia baita welkam henidia na namo. Unu baita kara tomamu neganai, lalotamona karana baita havaraiamu bona vadivadi taudia be hagoadadiamu bena be uramu edia diari bae hahedinaraia. Mai moalemu ida vadivadi taudia ediai hahenamo herevana ta ba gwauraia, bona edia helai gabudia ba hadibadia. Ba laohaidia ma haida ida bae hedavari, unu amo bae mamia idia na o lalodia badamu.

 ¹² Bema oi na e abimu hidi haroro ḡaukara ena hebou ba naria, namona na burukadia ba durudia diba haroro ḡaukara bae karaia. Idia be mai edia teritori namodia, a? Nega haida, matamata tauna ta bavabia hidi diba idia ida bae ḡaukara bona bae durudia. Danu, mai edia gorere eiava edia noho daladia dia heḡereḡere dainai asie haroro momomu taudia na ba lalopararalaidia. Oibe, matamata taudia bona burukadia na bo lalodia badamu bona bo lalopararalaidiamu karana ese be durudiamu, mai goadadia ida sivarai namona bae harorolaia totona.​—Lev. 19:32.

¹³ Salamo itorena tauna na eto: “Tadikaka bae noho hebou mai lalodia tamona, una na namo, bona mai moalena danu.” (Salamo 133:1, 2 ba duahi.) Israel taudia na Iehova e tomadiho heniava taudia ma haida edia lalotamona karana amo namo e davari. Una lalotamona karana na dehoro helaḡana ida e haheḡereḡerea, bonana na namo herea bona hemami e hanamoamu. Lalomu ba hadaia lalohadai maorona bavabia bona tadikaka taihu bogaraḡidiai lalotamona karana ba havaraia. Bema oi na unu o kara tomamu, a hanamomumu. ‘Emu lalokau ba habadaia,’ anina na, tadikaka taihu ba hebamo henidia namonamo bona hanaihanai unu ba kara toma, ani?​—2 Kor. 6:11-13.

14. Dahaka ba kara diba dekemu taudia ediai emu diari ba hahedinaraia totona?

¹⁴ Ba ḡaukara goada dekemu taudia ediai Baibul ena hereva momokani diarina ba hahedinaraia. Emu hereva bona kara namodia dainai dekemu tauna ese hereva momokani baine abia dae diba. Sibomu ba henanadai: ‘Dekegu taudia ese lau be ede e lalogu tomamu? Egu ruma bona ruma badina be na haḡoevadia namonamomu, a? Dekegu taudia ese e itaiamu be ḡoeva, a? Lau ese ma haida na durudiamu, eiava?’ Witnes taudia ma haida ida o herevaherevamu neganai, ba nanadaidia edena dala ai edia kara namodia amo varavaradia, dekedia taudia, e ḡaukara heboumu eiava e sikuli heboumu taudia e durudia. Edia sivarai namodia momo bo kamonaimu.​—Efe. 5:9.

15. Dahaka dainai hanaihanai baita gima na mai anina bada?

¹⁵ Eda kara na mai anina bada bema ta uramu baita ḡaukara goada eda diari baita hahedinaraia namonamo. Iesu ese ena hahediba e hagoadadia neganai, ina hereva e gwauraia loulou: “Ba gima.” (Mat. 24:42; 25:13; 26:41) Momokani, bema baita laloamu hisihisi badana na do daudau, bona dia eda nega lalonai be kaumu, eda haroro ḡaukara na basita laloa badamu. (Mat. 24:21) Eda diari na taina ruana be maraḡimu eiava be boiomu dainai, dekeda taudia ediai basita hahedinaraia namonamomu.

16, 17. Dahaka ba kara diba ba gima hanaihanai totona?

¹⁶ Ina nega na e dika hereamu dainai, hanaihanai baita gima na namo. Iehova ese kara ta baine karaia neganai, nega korikorina ai baine karaia. Una na asi daradarana. (Mat. 24:42-44) To una do se vara lalonai, namona na baita haheauka bona baita gima. Dina ta ta ai Dirava ena Hereva baita duahia, bona ḡuriḡuri karana baita goadalaia. (1 Pet. 4:7) Laḡani momo Dirava e hesiai henia tadikaka bona taihu edia mauri sivaraidia amo diba bavabi. Mauri sivaraina ta na The Watchtower, April 15, 2012, rau 18-21 ai atikol ladana, “Seventy Years of Holding On to the Skirt of a Jew,” ai ba duahia diba.

¹⁷ Emu mauri lalonai hesiai ḡaukaradia ba kara bona tadikaka taihu ba bamodia. Unu amo bo moalemu, bona bo itaiamu nega na e heau haraḡamu. (Efe. 5:16) Laḡani handred gunadiai, tadikakada na ḡau momo e haḡuḡuru. To hari ina negai, Iehova ena hahekau henunai ita ese ḡau momo herea ta  haḡuḡurumu. Ita ese eda diari na ta hahedinaraia badabadamu dia guna heḡereḡerena.

18, 19. Edena dala ai kongrigeisen elda ese bae duruda baita ḡaukara goada totona? Haheitalai ba gwauraia.

¹⁸ Ta dibamu ena be ita na dia ḡoevadae, to dala maorona ai Iehova ta hesiai heniamu dainai, una ese eda abidadama na e hagoadaiamu. Iehova “ena herahia” ḡaudia, kongrigeisen elda taudia, baita lalodia bada. (Efeso 4:8, 11, 12 ba duahi.) Bema elda ta ese e vadivadimumu, e henimu sisibadia bona heduru herevadia na bavabi dae unu amo namo ba davari diba.

¹⁹ England ai, tadikaka ta mai adavana ida na mai edia hekwakwanai dainai elda rarua ese vadivadidia. Taihu na eto adavana na lauma dalanai ena maduna na se huaia namonamomu. Adavana na eto ia na dia hahediba tauna namona bona se heḡaeḡaeva ruma bese ena tomadiho baine karaia hanaihanai totona. Elda taudia ese una tadikaka adavana ida bae durudia totona Iesu ena haheitalai e herevalaia. Ia ese ena hahediba na e lalodia badava bona edia dabu ḡaudia e heniva. Elda taudia ese tadikaka e hagoadaia Iesu ena haheitalai baine tohotohoa. Bona taihu e hagoadaia baine haheauka. Danu elda taudia ese heduru herevadia haida e henidia ede bae ḡaukara hebou toma, unu amo natudia raruosi ida ruma bese ena tomadiho bae karaia. (Efe. 5:21-29) Gabeai, unu elda taudia ese tadikaka na ena hekwarahi dainai e hanamoa. Idia ese e hagoadaia basine hesiku bona lauma helaḡa ena heduru ai baine tabekau, unu amo tama namona ai bainela. Unu elda taudia edia lalokau bona heduru dainai una ruma bese ese edia diari e hahedinaraia.

20. Emu diari bo hahedinaraiamu neganai dahaka be varamu?

²⁰ Salamo itorena tauna na eto: “Iehova garina e garimu taudia iboudiai na nanamo; idia na iena dala ai e rakamu.” (Sal. 128:1) Ma haida bo durudiamu Dirava bae hesiai henia, lalotamona karadia bo hahedinaraimu, bona hanaihanai bo gimamu karana amo emu diari bo hahedinaraiamu neganai, bo moalemu. Ma haida ese emu kara namodia be itamu neganai, una ese be hagoadadiamu Tamada bae heatolaia totona.​—Mat. 5:16.