“NAMO! Oi namo?”

Nega momo oi ese hahenamo hereva unu bamodia o gwauraimu. Reana ta enai una hahenamo herevana o gwauraiamu neganai o sekehanimu eiava o rosiamu. Gabu ta ta edia kastom bona hereva igwauraidia daladia na idauidau, to hahenamo herevadia na heḡereḡere. Danu, ma haida ediai hahenamo herevana basio gwauraiamu eiava basio haere henidiamu neganai, be laloamu una na dia lalokau eiava hemataurai karana.

To ma haida ihedavari henidia karana na dia taunimanima iboudia ese e karaiamu. Haida na e hemaraimu eiava e laloamu ta ese na se lalodia badamu dainai asie uramu ma haida bae hedavari henidia. Haida ese ma haida bae hedavari henidia na auka, badina bese, kastom eiava noho daladia na i’idau. To, hahenamo hereva kwadoḡina ta ese namo baine havaraia diba.

Sibomu ba henanadai: ‘Hahenamo herevana ta ese dahaka namo baine havaraia diba? Bona Dirava ena Hereva amo hahenamo herevadia igwauraidia karana ai dahaka na dibamu?’

Aposetolo Petro ese Idau Bese tauna ginigunana, Korenelio, na Kristen kongrigeisen lalonai e abia dae neganai, ini e gwau toma: “Dirava ese taunimanima oromadia se lalomu.” (Kara 10:34) Gabeai, Petro na eto, Dirava na “e uramu iboumui ai ba helalo kerehai.” (2 Pet. 3:9) Reana unu siri na hereva momokani e dibaiamu tauna ta enai ta herevalaimu. To, Petro ese Kristen taudia e haḡanidia danu, eto: “Taunimanima iboudiai ba matauraidia. Iseda orea taudia ba lalokau henidia.” (1 Pet. 2:17) Una dainai, namona na ma haida baita hedavari henidia, herevana edia bese, kastom, eiava noho daladia na idau. Una dala amo lalokau bona hemataurai baita hahedinaraia.

Aposetolo Paulo ese kongrigeisen taudia na e haḡanidia: “Ba heabi-dae heheni, Keriso ese umui e abimui dae heḡereḡerena.” (Roma 15:7) Paulo ese ia e hagoadaiava tadikakadia e herevalaidia. Hari ina negai, tadikaka bona taihu ida baita hahegoada heheni na namo, badina Satana ese Dirava ena taunimanima na e daḡedaḡe henidiamu.​—Kol. 4:11; Apok. 12:12, 17.

Baibul sivaraidia ese e hahedinaraimu hahenamo herevadia igwauraidia karana ese ma haida edia hemami baine hanamoa diba, to dia una mo.

Iehova ese Natuna ena mauri na Maria bogana ai baine atoa neganai, aneru ta e siaia Maria baine hereva henia. Aneru na eto: “Ba mauri, e lalokau henimumu hahinemu! Lohiabada ese baine bamomu.” Maria na “kudouna e hetaha,” e daradara dahaka dainai aneru ese e hereva henia. Aneru ese una e itaia neganai, eto: “Maria e, asio gari, badina be Dirava ena harihari ome abia.” Aneru ese e hadibaia Dirava ena ura na ia ese Mesia baine havaraia. Maria na ma se daradara, to mai ena abidadama ida eto: “Lau na Lohiabada ena hesiai hahinegu; emu hereva heḡereḡerena ai egu ai baine vara.”​—Luka 1:26-38.

Aneru na Iehova ena gwaukau tauna ai ela na hahenamo ta; to, dia ḡoevadae tauna ta baine hereva henia karana na e laloa bada. Ia ese hahenamo herevana ta e gwauraia guna. Una haheitalai amo dahaka ta dibamu? Namona na baita heḡaeḡae ma haida baita hedavari henidia bona baita hagoadadia. Hereva haida baita gwauraimu amo, ma haida baita durudiamu unu amo be abia dae momokanimu idia na Iehova ena taunimanima.

Paulo ese Asia Minor bona Europe kongrigeisen taudia momo e dibadia. Iena revareva lalodiai hahenamo herevadia momo mimia. Roma karoa 16 ai una ta dibamu. Paulo na kristen taudia momo ediai hahenamo  herevadia e siai. Ia ese Foibe e gwauraia, “taihuda,” bona tadikaka e haḡanidia eto: “Lohiabada bagunai bavabia dae, ani, helaḡa taudia o abidia daemu na heto; bona ena ḡaukara ai ba durua.” Paulo ese Priskila bona Akula e hanamodia, eto: “Lau ese na hanamodiamu; a dia lau mo, bese idau-idau edia ekalesia oreadia iboudiai danu.” Ia ese ma haida danu e hanamodia, hari ina negai momo na asi dibadia idia​—“na lalokau heniamu tauna, Epaineto,” bona “Trufena bona Trufosa, idia na Lohiabada ena orea hahinedia.” Oibe, Paulo ese tadikakana bona taihuna na e hanamodia.​—⁠Roma 16:1-16.

Unu tadikaka bona taihu na e moale badina e diba haida ese e lalodia tao. Edia lalokau Paulo enai bona ta ta ediai na e goada! Bona Kristen taudia ma haida ese unu hahenamo hereva namodia e kamonai neganai, una ese e hagoadadia, bona e durudia abidadama ai bae gini tutuka totona. Oibe, hahenamo herevadia amo ma haida ilalodia bada karana baita hahedinaraia, bona haida ihanamodia karana ese Dirava ena hesiai taudia e hatamonadiamu bona edia hetura karana e hagoadaiamu.

Paulo na Puteoli ai e kau bona Roma e lao heniava neganai, Kristen taudia haida na saut kahana amo ela ia bae hedavari henia. Paulo ese daudauna amo e itadia neganai, “Dirava e hanamoa bona lalona vada e goada.” (Kara 28:13-15) Nega haida, eda hahenamo na kiri eiava ima davedave karana amo mo baita hahedinaraiamu. To, una ese e lalometaumu eiava e lalohisihisimu tauna baine hagoadaia diba.

Hahediba tauna Iakobo ese sisiba aukana e heni, badina Kristen taudia haida na tanobada e hetura heniava, una na vaitani lauma dalanai e heudahanaiva. (Iak. 4:4) To, mani Iakobo ese ena revareva ai e gwauraia matama herevana a laloa:

“Lau Iakobo, Dirava ena hesiai tauna bona Iesu Keriso ena danu, veve gwauta-rarua taumui, idau tano idau tano ai o noho hedoa-hedoamu, na hahenamo henimuimu.” (Iak. 1:1) Ena revareva e duahia taudia na e davaria iena sisiba bae abia dae na dia auka badina ena hahenamo herevana amo e diba idia danu Dirava vairanai edia kara bae laloa. Oibe, mai manauda ida hahenamo herevana ta igwauraina karana ese dala be kehoamu hekwakwanai badadia baita herevalai totona.

Ena be hahenamo hereva namona ta na hereva kwadoḡi ai baita gwauraia, to namona na mai momokanida ida baita gwauraia bona lalokau korikorina baita hahedinaraia. Herevana ta ese una na basine laloa. (Mat. 22:39) Ireland ai, taihu ta na nega ta Kingdom Hall ai hebou baine hematama lalonai e kau. E vareai haraḡa lalonai, tadikaka ta na mai kirina ida ia dekena ela, bona eto: “Namo. Namo herea ma name itamu.” Taihu na maoromaoro ela ena helai gabuna.

Wiki haida muridiai, una taihu na tadikaka dekena ela bona e hamaoroa ia na ruma ai mai ena hekwakwanai ta dainai e lalohisihisiva. Ini e gwau toma: “Una adorahi ai lalogu na e hisihisi bada herea. Bona kahirakahira Kingdom Hall na basinama mai. Hebou ai e herevalai ḡaudia na asina lalotaomu, to emu hahenamo herevana hari na laloataomu. Una ese lalogu na e hagoadaia. Tenkiu.”

Una tadikaka na se diba ena hahenamo hereva kwadoḡina ese anina namona e havaraia. Ia na eto: “Taihu ese e hamaorogu una hahenamo herevana ese e hagoadaia neganai, na moale dikadika.”

Solomon na eto: “Amu aniani na davara kopina ai ba negea, badina be dina momo muridiai ma ba davaria.” (Koh. 11:1) Tadikakada ediai hahenamo herevadia baita gwaurai edia namo baita lalo badamu neganai, ita bona ma haida be hagoadadamu. Una dainai, namona na baita helalotao hahenamo herevana baita gwauraia na mai ena namo.