1. Aposetolo Paulo ese horoa Kristen taudia be dahaka sisiba e henidia?

APOSETOLO PAULO na e sisiba, eto: “Ina tanobada oromana na basio tohotohoa.” (Roma 12:2) Paulo ese una sisiba na Kristen taudia ginigunadia ediai e gwauraia. Dahaka dainai una sisiba na Dirava enai e gwauhamata bona lauma helaḡa amo e horodia tataudia bona hahinedia e henidia?​—Roma 1:7.

2-3. Satana be edena dala ai e uramu Iehova amo baine hakauda siri, bona darada amo “goada momokani ḡaudia” be ede baita kokidia toma?

² Paulo na e lalohekwarahiva badina Kristen taudia haida na Satana ena tanobada aonegana bona lalohadai kereredia e badinava. (Efe. 4:17-19) Ita edai una na baine vara diba. Satana, ina tanobada oromana e biaguamu diravana, na dala idauidau amo e uramu Iehova ena amo baine hakauda siri. Bema dagi badana iabina o ladada bae bada lalohadaina baita abiamu, ia ese una baine ḡaukaralaia diba. Eiava eda mauri dalana, eda kastom eiava eda edukeisen amo ta diba ḡaudia baine ḡaukaralai diba eda lalohadai baine biagua totona.

³ Darada amo “goada momokani ḡaudia” baita koki diba, eiava? (2 Kor. 10:4, NWT) Paulo ena haere aita laloa, e gwaumu: “Hepapahuahu bona Dirava idibana e laoa ahumu ḡaudia iboudiai a haketodiamu; bona lalo-hadai iboudiai a ḡuidiamu, Keriso ikamonai-henina ai.” (2 Kor. 10:5) Oibe, Iehova ena heduru amo lalohadai  kereredia baita kokidia diba. Muramura ese gorere e laoa ahumu heḡereḡerena, Dirava ena Hereva ese Satana ena tanobada ena lalohadai kereredia baine laodia ahu diba.

4. Hereva momokani ta abia dae matama neganai dahaka senisi ta kara?

⁴ Baibul ena hereva momokani o abia dae matama bona lalomu o hadaia Iehova ba hesiai henia negana ai o kara senisidia mani a lalo lou. Ita momo ese ta karava karadia haida na ta haidau. (1 Kor. 6:9-11) Ta moalemu badina Iehova ese e duruda kara dikadia ta dadarai.

5. Roma 12:2 ai baita kara ḡaudia rua be dahaka?

⁵ To, basita lalo senisi ta kara dainai ita na da heḡereḡere. Ena be guna ta karava kara dika badadia na vada ta rakatani, to bapatiso murinai dounu baita hekwarahi na namo, unu amo eda kara gunadia na basita lou heni. Edena dala ai? Paulo na e gwa: “Ina tanobada oromana na basio tohotohoa; a lalomui ba hamatamata, bae idau vaitani.” (Roma 12:2) Una dainai ḡau rua baita kara na namo. (1) Ina tanobada ena lalohadai ‘basita tohotohoa.’ (2) ‘Laloda baita hamatamata.’

6. Mataio 12:43-45 ai, Iesu ena hereva amo dahaka ta dibamu?

⁶ Paulo na dia toada mo baita haidaua karana e herevalaia, to eto eda lalohadai, hemami bona ura baita haidau na namo. (Maua ladana “ Eda Kara be Ta Haidau Vaitani Eiava Toada Mo Ta Haidau?” ba itaia.) Una dainai siboda baita henanadai, ‘Kristen tauna ai bainala totona na karamu senisidia be toagu ai mo e hedinaraimu eiava mai lalogu idoinai ida ini senisi na karamu?’  Mataio 12:43-45 ai Iesu ena hereva ese e hahedinaraiamu dahaka baita kara na namo. (Ba duahia.) Unu hereva amo ta dibamu ḡauna badana bina: Lalohadai mirodia baita koki mo na dia heḡereḡere, namona na Dirava ena lalohadai baita abia.

7. Edena dala ai eda kara bona lalohadai baita haidau diba?

⁷ Eda kara bona lalohadai baita haidau diba, eiava? Baibul na e gwaumu: “Daramui ba hamatamata, tau matamatana ba hahedokilaia, Dirava heida-idana, kara maoromaoro ai bona hereva momokani helaḡana ai vada e karaia.” (Efe. 4:23, 24) Oibe, baita haidau diba, to una na mai hekwarahina. Ura dikadia bona kara dikadia baita dadarai mo na dia heḡereḡere. Namona na ‘darada’ o eda lalohadai baita haidaua. Anina na eda ura bona ta manadalai karadia baita haidau. Hanaihanai unu baita kara toma na ḡau badana.

8-9. Tadikaka ta ena ekspiriens ese edena dalai e hahedinaraiamu eda lalohadai na baita haidau diba?

⁸ Guna e daḡedaḡeva tadikakana ta ena ekspiriens aita laloa. Ia ese inuinu kekero bona taunimanima iheatu henidia karadia e rakatani, bena una murinai ia na e heḡereḡere baine bapatiso. Iena kara ese hanua taudia na haroro namona e henidia. To se daudau hahetoho ta e vara. Adorahi ta, kekero tauna ta na ena ruma ela bona e urava ia baine heatu henia. Matamanai, eda tadikaka na se ura baine heatu. To una tau ese Iehova ladana e hadikaia neganai, tadikaka na e badu dikadika. Una dainai e raka lasi bona una tau e dadabaia. Dahaka dainai unu e kara toma? Ena be Baibul istadilaina karana ese e durua heatu urana baine dadaraia, to darana na se hamatamataia eiava se haidaua.

⁹ To, una tadikaka na se hesiku ena kara baine haidau totona. (Her. 24:16) Elda edia heduru dainai ena kara e haidaua bona e goada. Gabeai elda ta ai ela. Dina ta, Kingdom Hall murimurinai, guna enai e vara ḡauna ta ma e vara. Kekero tauna ta na e urava elda tauna ta baine dadabaia. Iseda tadikaka be dahaka e kara? Ia na se badu, to mai manauna ida una kekero tauna e hereva henia namonamo, bena ena ruma e laohaia. Dahaka dainai tadikaka ena kara na e idau? Ia ese darana o ena lalohadai e hamatamataia. Ia na manau tauna ai ela. Bona una ese Iehova e hanamoa.

10. Dahaka baita kara eda lalohadai baita haidau totona?

¹⁰ Eda mauri ai ta karamu senisidia na dia haraḡa herea e varamu, eiava se vara kavamu. Lasi, to laḡani momo lalodiai “baita hekwarahi” na namo. (2 Pet. 1:5, NWT) Basitato hereva momokani ai vada ta noho daudau dainai eda kara baita haidau na asi anina. Namona na baita hekwarahi eda lalohadai bona kara baita haidau. Mai anina bada ḡaudia haida baita kara na namo. Mani unu ḡau haida aita herevalai.

11. Edena dala ai ḡuriḡuri karana ese baine duruda darada baita hamatamata?

¹¹ Mai anina bada ḡauna ginigunana na, ḡuriḡuri karana. Salamo itorena tauna heḡereḡerena baita ḡuriḡuri, eto:  “Dirava e, lalo-ḡoevaḡoeva na lalogu ai ba havaraia, bona lauma matamatana bona maoromaorona na lalogu ai bavatoa.” (Sal. 51:10) Namona na baita hahedinaraia ita na ta uramu darada baita hamatamata bona Iehova ena heduru baita noia. Ede ta diba tomamu Iehova ese baine duruda eda lalohadai baita haidau? Esekiel ena negai Iehova ese gwau-edeede Israel taudia daidiai e gwauraia gwauhamatana ese e hagoadadamu, eto: “Lalodia na baina hatamonadia, bona lauma matamatana na idia lalodiai baina atoa; . . . lalo-manada baina henidia.” (Esek. 11:19) Iehova na e ura Israel taudia baine durudia, bona e uramu ita danu baine duruda.

12-13. (a) Salamo 119:59 ena hereva heḡereḡerena, baita lalodia dobu ḡaudia haida be dahaka? (b) Sibomu ededia henanadai ba lalo?

¹² Mai anina bada ḡauna iharuana na, lalo dobu karana. Dina ta ta Baibul ta duahiamu neganai, namona na nega baita ato ta duahiamu ḡauna na baita laloa dobu o baita haeroa namonamo, unu amo baita dibamu ededia lalohadai o hemami baita haidau. (Salamo 119:59 ba duahia; Heb. 4:12; Iak. 1:25) Namona na tanobada aonegana ese e havaramu lalohadaidia baita diba. Danu, namona na baita abia dae ita na mai eda manoka ḡaudia, bona baita hekwarahi unu manoka ḡaudia baita hanamodia.

¹³ Heḡereḡere, sibomu ba henanadai: ‘Lau be kudougu ai haida na mama henidiamu, a?’ (1 Pet. 2:1) ‘Lau be egu mauri dalana, egu edukeisin bona mai egu moni dainai na hekokorokumu, a?’ (Her. 16:5) ‘Asi edia kohu eiava idau hanua taudia be lau ese na hereadia, a?’ (Iak. 2:2-4) ‘Satana ena tanobada ai na itamu ḡaudia na ura henimu, a?’ (1 Ioa. 2:15-17) ‘Daḡedaḡe bona matabodaḡa karadia e hahedinaraimu moale karadia na ura henimu, a?’ (Sal. 97:10; 101:3; Amos 5:15) Emu haere amo bo dibamu emu mauri lalonai oi be dahaka senisi ba kara. Kudouda amo lalohadai mirodia o hemami dikadia baita kokimu neganai, Tamada guba ai baita hamoaleamu.​—Sal. 19:14.

14. Dahaka dainai bamo namodia baita abi hidi na mai anina bada?

¹⁴ Mai anina bada ḡauna ihatoina na, bamo namodia baita abi hidi. Turada ese dala maorona ai eiava dala kererena ai bae hakauda diba. (Her. 13:20) Moni ḡaukara gabunai eiava skuli ai, haida ese ita na basie durudamu Dirava ena lalohadai baita badinaia totona. To, Kristen heboudia ai tura namodia baita davari dibamu. Idia ese be durudamu “lalokau bona kara namodia” baita hahedinarai.​—Heb. 10:24, 25.

15-16. Satana be edena dala ai e uramu eda lalohadai baine haidaua?

¹⁵ Baita helalotao, Satana na e uramu eda lalohadai baine haidaua. Ia na e uramu hahediba koikoidia amo laloda baine haidau bena Baibul ena hereva momokanidia baita dadarai.

¹⁶ Satana ese Eden imeana ai Heva e henia henanadaina na doini e gwauraiamu, eto: “Momokani Dirava eto . . . ?” (Gen. 3:1) Satana ese e biaguamu tanobadana ai, nega momo daradara e havaramu henanadaidia ta kamonaimu, heḡereḡere: ‘Momokani Dirava ese tatau  rarua eiava hahine rarua bae headava karana se abia daemu? Momokani Dirava se uramu Krismas bona vara dinadia ba moalelai? Oiemu Dirava be momokani e uramu rara ba dadaraia, a? Lalokau Diravana be momokani e uramu orea amo e atodia sirimu taudia basio bamodia, a?’

17. Ta ese e nanadaidamu neganai dahaka baita kara na namo, bona Kolose 2:6, 7 ese ena namo be ede e herevalaia toma?

¹⁷ Namona na ta abi daemu ḡaudia na baita hamomokanidia. Bema henanadai badadia haeredia basita tahumu, ta abi daemu herevadia baita daradaralaimu. Una ese eda lalohadai baine haidaua diba bona eda abidadama baine hadikaia diba. Dahaka baita kara na namo? Dirava ena hereva na e gwaumu, darada baita hamatamata unu amo “Dirava ena ura, mai namona bona mai hairaina bona mai hereadaena” na siboda ese baita hamomokania. (Roma 12:2) Stadi hanaihanai karana amo baita hamomokaniamu, Baibul ai ta dibamu ḡaudia na hereva momokanidia. Bona baita abia dae momokanimu Iehova ena taravatu na mamaoromaoro. Au ta ramuna e goadamu heḡereḡerena, abidadama ai baita goadamu.​—Kolose 2:6, 7 ba duahi.

18. Dahaka ese be durudamu Satana ena tanobada ena poisin dikadia baita laodia ahu totona?

¹⁸ Ta ese oi daimu ai emu abidadama na basine hagoadaia dibamu, una dainai ba hekwarahi daramu ba hamatamataia loulou. Ḡuriḡuri karana basio hadokoa; Iehova ena lauma helaḡa ena heduru ba noia. Ba lalo dobu; emu lalohadai bona ura ba haerodia hanaihanai. Tura namodia bavabi hidi; idia ese be durumumu emu lalohadai ba haidaua totona. Unu bo kara tomamu neganai, Satana ena tanobada ena poisin dikadia bo laodia ahu dibamu bona “hepapahuahu bona Dirava idibana e laoa ahumu ḡaudia iboudiai” bo haketodiamu.​—2 Kor. 10:5.