1. Edena dala ai Tamada lalokauna, Iehova, baita tohotohoa diba?

IEHOVA ese ita na e lalokau henida badamu. (Ioa. 3:16) Ita na ta uramu Tamada lalokauna baita tohotohoa. Una dainai ‘baita hekaha heheni, baita heura heheni, tadikaka na heheto, [bona] baita hebogahisi heheni,’ namona na “iseda abidadama tamona” taudia ediai unu kara baita hahedinarai. (1 Pet. 3:8; Gal. 6:10, NWT) Iseda tadikaka bona taihu ese hekwakwanai e davarimu neganai, namona na baita durudia.

2. Ina stadi ai dahaka baita herevalaimu?

² Iehova ena ruma bese ai e uramu baela taudia ediai hekwakwanai idauidau na be varamu. (Mar. 10:29, 30) Ina nega oromana dokona e kahikahimu lalonai, ita na hekwakwanai momo baita davarimu. Edena dala ai baita heduru heheni diba? Mani Baibul ai Lot, Iobu, bona Naomi sivaraidia amo baita dibamu ḡaudia aita herevalai. Danu eda tadikaka bona taihu ese hari e davarimu hekwakwanaidia haida bona baita durudia daladia baita herevalaimu.

3. 2 Petro 2:7, 8 ese e hahedinaraia, Lot be dahaka abi hidi kererena e karaia, bona una dainai dahaka e vara?

³ Lot ese abi hidi kererena ta e karaia; ia na e ura Sodoma ai kara dika rohorohodia e karava taudia bogaraḡidiai baine noho. (2 Petro 2:7, 8 ba duahi.) Sodoma na taḡa hanuana, to Lot na una hanua ai e hanoho neganai hekwakwanai momo e davari. (Gen. 13:8-13; 14:12) Ia adavana ese una hanua bona unuseniai e nohova taudia  haida e ura henidia dainai Iehova na se badinaia. Dirava ese lahi bona nadi siahudia amo una hanua e habuaia tari neganai, Lot adavana na e mase. Bona mani Lot natuna kekenidia raruosi aita lalodia. Idia na Sodoma tataudia ida e hemaoheni; unu tatau na una hanua ai e mase. Lot ese ena ruma bona kohu iboudiai e haboio, bona ena hisihisi e habadaia ḡauna na, adavana e mase. (Gen. 19:12-14, 17, 26) Una metau negana lalonai, Iehova be e hesiku Lot enai, a? Lasi.

4. Edena dala ai Iehova ese Lot enai haheauka karana e hahedinaraia? (Rau 1 laulauna ba itaia.)

⁴ Ena be Lot na e ura Sodoma ai baine noho, to Iehova na mai hebogahisina ida aneru e siaidia ia bona ena ruma bese bae hamauridia. Aneru ese e haḡanidia Sodoma baine rakatania neganai, Lot na “e halahe.” Aneru ese ia bona ena ruma bese imadia ai e abi bena hanua amo e heau lasi. (Gen. 19:15, 16) Bena aneru ese e hamaoroa ororo kahadia baine heau lao. Lot na Iehova ena hereva bema kamonai, to ia na e noinoi hanua kahikahina ta bainela. (Gen. 19:17-20) Iehova ese mai haheaukana ida Lot ena noinoi e abia dae bona se koua una hanua bainela. Gabeai, ia na una hanua ai baine noho garina e gari dainai ororo kahadia ai e hanoho, matamanai Iehova ese e hamaoroa bainela gabuna. (Gen. 19:30) Iehova ese haheauka karana e hahedinaraia ḡoevaḡoeva! Edena dala ai Ia baita tohotohoa?

5-6. Dirava baita tohotohoa totona 1 Tesalonika 5:14 be ede baita badinaia toma?

⁵ Lot heḡereḡerena, eda tadikaka o taihu ta na reana abi hidi kereredia be karamu dainai, hekwakwanai badadia be davarimu. Bema una baine vara, dahaka baita kara? Reana baita hamaoroamu ia na e hadoa ḡauna heḡereḡerena baine abia, vaia una na momokani. (Gal. 6:7) To dia namo unu baita hereva toma. Namona na baita durua, Iehova ese Lot e durua heḡereḡerena. Edena dala ai?

⁶ Iehova ese aneru e siaidia Lot bae hadibaia bona bae durua Sodoma ena dika amo baine heau mauri. Una heḡereḡerena, bema ta dibamu tadikaka ta na e karaia abi hidina dainai dika baine davari diba, baita hadibaia na namo. To dia una mo, namona na baita durua. Bema ia ese Baibul ena hahekau herevadia basine badina haraḡa, baita haheauka na namo. Aneru ruaosi e heḡereḡeredia baita kara. Basita hesiku bona tadikakada basita rakatania, to dala baita tahu baita durua. (1 Ioa. 3:18) Reana baita hadibaia ita na ta uramu baita durua e abi sisiba namodia baine badina, una na vaitani imanai ta abimu na heto.​—1 Tesalonika 5:14 ba duahia.

7. Edena dala ai Iehova ese Lot ena kara e laloa dalana baita tohotohoa diba?

⁷ Iehova ese Lot ena kerere na bema lalodiatao diba. To unu na se kara toma. Gabeai iena lauma helaḡa ena heduru amo aposetolo Paulo ese Lot e gwauraia kara maoromaoro tauna. Ta moalemu badina Iehova ese eda dika na e gwautaomu. (Sal. 130:3) Iehova ese Lot ena kara e laloa dalana baita tohotohoa diba, a? Bema eda tadikaka bona taihu edia kara namodia mo baita lalomu, mai haheaukada ida baita durudiamu. Bona idia ese danu iseda heduru bae abi dae diba.

8. Hebogahisi dainai dahaka baita karamu?

⁸ Iobu na dia Lot heḡereḡerena abi hidi kereredia haida daidiai e hisihisi. To, hekwakwanai haida e davari, heḡereḡere  ena kohu e haboio, kominiti ai haida ese se matauraiava, bona e gorerea. Dika hereana na, natudia iboudiai e mase. Danu turana koikoidia tatoiosi ese e gwauraia dika. Iobu turana koikoidia asie hebogahisi badina ta be dahaka? Idia ese iena hekwakwanai badina korikorina na asie lalopararalaia. Una dainai, lalohadai kereredia e abi bona Iobu e gwau henia. Edena dala ai unu na basita kara toma? Namona na baita laloparara Iehova na ta ena hekwakwanai badidia iboudiai mai dibana. E hisihisimu tauna ena hereva ba hakala namonamo. To dia una mo, namona na ena hisihisi ba mamia toho. Unu amo bo hahedinaraiamu oi na tadikakamu ena hemami o laloa badamu.

9. Hebogahisi dainai dahaka basita karamu, bona badina be dahaka?

⁹ Hebogahisi dainai basita uramu haida edia hekwakwanai na ma haida ediai baita herevalai. E hesivarai loaloamu tauna ese kongrigeisin se hagoadaiamu, to e hapararaiamu. (Her. 20:19; Roma 14:19) Se lalo namonamomu tauna ena hereva ese e hisihisimu tauna ena hisihisi baine habadaia diba. (Her. 12:18; Efe. 4:31, 32) Ta ena kara namodia bona baita durua daladia baita lalomu neganai, una ese namo baine havaraia diba!

10. Iobu 6:2, 3 ena hereva amo dahaka ta dibamu?

¹⁰ Iobu 6:2, 3 ba duahi. Iobu na nega haida ‘hereva kavakavadia’ e gwauraiva. To, gabeai sibona e hereva hedinarai ia ese e gwaurai herevadia haida na kekerere. (Iobu 42:6) Iobu heḡereḡerena, hari ina negai e lalometaumu tauna na reana hereva kavakavadia be gwauraimu, bona ena hereva na gabeai be lalohisihisilaimu. Dahaka baita kara be namo? Dia  namo baita maumauraia, to namona na baita bogaia hisi. Baita helalotao, Iehova na se uramu hari ta davarimu metaudia na ita edai bae vara. Una dainai ta lalopararamu bema Iehova ena hesiai tauna ta na e lalometau badamu dainai hereva kereredia be gwauraimu. Ena be Iehova eiava ita baine gwauraida dika, to ena hereva dainai basita badu henia eiava basita hahemaoro henia.​—Her. 19:11.

11. Elda taudia ese sisiba bae heni neganai, edena dala ai Elihu bae tohotohoa diba?

¹¹ Nega haida, metau e davarimu tauna na heduru o sisiba baine abi na namo. (Gal. 6:1) Elda taudia be edena dala ai unu bae kara toma? Namona na Elihu bae tohotohoa; ia na mai hebogahisina ida Iobu ena hereva e hakala henia. (Iobu 33:6, 7) Elihu ese Iobu ena lalohadai e lalopararalaia murinai, sisiba maorodia e henia. Elihu bamona, elda taudia ese ta ena hereva bae hakala namonamo bona ena hekwakwanai bae lalopararalaia toho. Bena sisiba maorodia bae heni neganai, e hakalamu tauna kudouna bae hamarerea diba.

12. Naomi enai be dahaka e vara adavana bona natuna memerodia raruosi e mase neganai?

¹² Naomi na abidadama hahinena bona Iehova e lalokau heniava. To adavana bona natuna memerodia raruosi e mase murinai, ia na e ura ladana na bae hatoa “Mara,” anina na “Idita.” (Ruta 1:3, 5, 20, futnout, 21) Ena metau negadiai ravana hahinena Ruta ese na se rakatania. Ruta ese Naomi na e durua bona e hagoadaia. Ena hereva amo e hahedinaraia ia na Naomi e lalokau henia bona e urava baine durua.​—Ruta 1:16, 17.

13. Dahaka dainai adavadia e mase taudia baita durudia na namo?

¹³ Iseda tadikaka o taihu ta adavana e masemu neganai, baita durua na namo. Tau bona hahine na au rua e tubu heboumu na heto. Laḡani momo lalodiai, unu au ramudia na e hepuimu eiava e hemoḡemu. Au ta e raḡaiamu bona e masemu neganai, au iharuana danu baine dika diba. Una heḡereḡerena, ta na adavana e masemu neganai, ia na laḡani momo lalodiai be lalohisihisimu. Paula * adavana na e mase, bona ia na ini e gwau tomamu: “Egu mauri na e idau herea, bona na mamiava lau na asi goadagu. Turagu namona na haboioa. Adavagu enai ḡau iboudiai na herevalaiva. Lau na moaleva neganai ia danu e moaleva, bona metau negadiai e duruguva. Egu lalohekwarahi ḡaudia na herevalaiva neganai, e hakalava. Na hemami lau na e kara ta ese kaia amo e utugu parara.”

14-15. Adavana e mase tauna o hahinena be ede baita hagoadaia toma?

¹⁴ Adavana e mase tauna o hahinena be ede baita hagoadaia toma? Mai anina bada ḡauna ta na, ia ba hereva henia, ena be o hemaraimu eiava asi dibamu dahaka ba gwaurai. Matamanai ta herevalaia hahinena Paula na e gwa: “Na lalopararamu mase e varamu neganai taunimanima na e daradaramu dahaka bae kara o bae gwaurai. E lalohekwarahimu hari be hereva kereredia be gwauraimu. To bema taunimanima ese hereva ta basie gwauraiamu, heduru namona ta basine varamu.” E lalohisihisimu tauna na basine gwaumu ia baita hagoadaia. Paula na eto: “Na moalelaia ḡauna na, turagu ese e  hamaoroguva, ‘Sori emu ai dika e vara dainai.’”

¹⁵ William​—adavana na laḡani haida gunadiai e mase​—na ini e gwau toma: “Haida ese adavagu ena kara namodia e herevalaimu neganai na moalemu, badina na dibamu idia ese adavagu na e lalokau heniava bona e matauraiava. Edia hereva ese tauhalo e henigumu badina adavagu na na lalokau heniamu bona egu mauri lalonai ia ese lau na e durugu bada herea.” Vabu ta ladana Bianca na e gwaumu: “Haida ida a ḡuriḡuri heboumu bona siri ta o rua e duahi henigumu neganai, lau na e hagoadagumu. Idia ese adavagu ena kara namodia e herevalaimu bona lau ese iena kara namodia na herevalaimu neganai egu hereva na e hakalamu, una ese lau na e durugumu.”

16. (a) Ta adavana e masemu neganai, dahaka baita kara be namo? (b) Iakobo 1:27 ena hereva heḡereḡerena, iseda maduna be dahaka?

¹⁶ Ruta ese Naomi e durua bona e hagoadaia heḡereḡerena, ita ese adavadia e mase taudia baita durudia bona baita hagoadadia noho. Paula, matamanai ta herevalaia hahinena, na e gwaumu: “Adavagu e mase neganai, momo ese lau na e durugu. A nega e hanai lalonai, iboudiai na e lou edia dina ta ta ḡaukaradia e karava. To, egu mauri na e idau vaitani. Bema haida ese e lalohisihisimu tauna na hua haida o laḡani haida muridiai dounu be duruamu, una na mai anina bada ia enai.” Momokani, taunimanima na idauidau. Haida be ediai e vara ḡaudia na basie lalodia momomu. To, ma haida be  adavadia mauridiai e karava ḡaudia be karamu neganai, adavadia be lalodiamu. Ta ese mase e lalohisihisilaiamu dalana na idau ma ta ena amo. Namona na baita helalotao, adavadia e mase taudia na baita durudia badina una na Iehova ese e henida madunana bona hahenamona.​—Iakobo 1:27 ba duahia.

17. Dahaka dainai adavadia ese e rakatanidia taudia baita durudia na namo?

¹⁷ Tatau o hahine haida na adavadia ese e rakatanidiamu neganai e lalometaumu bona e lalohisihisimu. Joyce, adavana ese e rakatania hahinena, na ini e gwau toma: “Divos ena hisihisi ese adavagu bema mase hisihisina na e hereaia. Bema aksiden eiava gorere ai bema mase, una na dia ia ese e abia hidi ḡauna. To, ia ese e karaia abi hidina na lau baine rakatanigu. Iena kara ese lau na e hahemaraigu.”

18. Adavadia ese e rakatanidia taudia be edena dala ai baita durudia?

¹⁸ Adavadia ese e rakatanidia taudia ediai kara namona ta baita karaiamu neganai, be dibamu idia na ta lalokau henidiamu. Idia na sibodia e nohomu dainai, turadia namodia ai baitala na namo. (Her. 17:17) Edena dala ai ba hahedinaraia oi na idia turadia? Ba boiridia diba bavaniani hebou totona. Bona nega bavato moale karana ta ba karaia hebou eiava ba haroro hebou. Eiava ba noidia emu ruma bese ena tomadiho ai bae helai vareai. Bema unu bo kara tomamu, Iehova bo hamoaleamu, badina ia na “lalo-hisihisi taudia dekedekediai” bona “vabu igimadia” Diravana.​—Sal. 34:18; 68:5.

19. 1 Petro 3:8 ese e hadibadamu dahaka baita kara na namo?

¹⁹ Kahirakahira Dirava ena Basileia ese tanobada baine lohiaia neganai, taunimanima ese e lalohisihisilaimu ḡaudia iboudiai na bae lalodia boio. Una negana ai “ḡau gunadia na basie lalodia tao bona basie lalodia une.” Ita ese una nega namona na ta nariamu. (Isa. 65:16, 17) Una nega ta nariamu lalonai, namona na hari baita heduru heheni bona eda hereva bona kara amo baita hamomokania eda tadikaka bona taihu na ta lalokau henidiamu.​—1 Petro 3:8 ba duahia.