IDAUNEGAI Israel taudia na Ioridane Sinavaina bae hanaia bena Dirava ese e gwauhamata henidia tanona baela totona e heḡaeḡaeva lalonai, vadivadi taudia haida e kau. Unu vadivadi taudia na idau tano hahinedia bona idia ese Israel tataudia e boiridia idia ida edia aria ta baela. Israel tataudia ediai una na dala namona, tura matamatadia bae hedavari henidia, bae mavaru, bona aniani namodia bae ani. Ena be unu hahine edia kastom bona kara na dia Dirava ese Israel e henidia Taravatuna heḡereḡerena, to Israel tataudia haida na reana e laloava: ‘Dika ta basine varamu. Ai na baia henahua tohomu.’

 Dahaka e vara? Baibul na e gwaumu: “Idia na Moab hahinedia ida e kara havarava.” Unu hahine na e urava Israel tataudia ese dirava koikoidia bae toma henidia diho. Bona una na e vara! Una dainai “Iehova ese Israel taudia e badu henidia.”​—Num. 25:1-3.

Israel taudia na ini dala rua ai Dirava ena Taravatu e utu: (1) Idia na kaivakuku e tomadiho henidia, bona (2) matabodaḡa karadia e kara. Edia gwau-edeede dainai Israel taudia tausen momo e mase. (Eso. 20:4, 5, 14; Deu. 13:6-9) Dahaka dainai edia kara ese dika bada e havaraia? Bema idia ese Dirava ena Taravatu basiema utua, Israel taudia tausen momo ese Ioridane bema hanaia bena Gwauhamata Tanona ai bema vareai.​—Num. 25:5, 9.

Aposetolo Paulo ese e vara ḡauna e herevalaia neganai, eto: “Unu ḡau be idia ediai e vara, toa ai baela totona; sivaraidia danu vada e tore henida, ina tanobada dokona tauda isisibalai-henida.” (1 Kor. 10:7-11) Ta dibamu Satana na e moale badina Israel taudia haida na kara dika badadia e kara dainai Gwauhamata Tanona ai se vareai. Una haheitalai baita laloa na ḡau badana, badina ta dibamu Satana na se uramu Dirava ena tanobada matamatana ai baita vareai.

Satana na e uramu Kristen taudia baine tarapudia, una dainai ia ese momo e hamorudia daladia e ḡaukaralaimu. Israel taudia ediai e kara heḡereḡerena, Satana ese matabodaḡa karana e ḡaukaralaiamu. Hari iseda negai, matabodaḡa karana na tarapu dikana ta. Baine hamoruda dalana ta na, matabodaḡa laulau dikadia (o pornography) itadia karana.

Hari ina negai, ta na hehuni ai pornography baine itadia diba. Laḡani momo gunadiai, ta na pornography muvidia itadia totona theater e laova, eiava pornography bukadia e hoihoilaiva stoadia ai pornography bukadia e hoiva. Momo na unu gabu asie laova badina asie urava haida ese bae itadia. To hari, Intanet dainai ta na ḡaukara gabunai o motuka lalonai pornography laulaudia baine ita diba. Tano momo ai, taunimanima momo na edia ruma ai pornography laulaudia bae ita diba.

Dia una mo. Mobael fon bona tablet ai taunimanima ese pornography laulaudia bae ita na haraḡa. Dala ai e rakamu, basi o trein ai e guimu neganai, edia mobael o tablet amo matabodaḡa laulaudia bae ita diba.

Hari taunimanima ediai na dia auka pornography laulaudia bae ita totona, una dainai momo edia mauri e hadikaiamu, dia guna heḡereḡerena. Pornography e itamu taudia momo na edia headava e dikamu, sibodia edia mauri se matauraiamu, bona lalodia mamina e hadikaiamu. Bona dika hereana be, edia hetura karana Dirava ida e hadikaiamu. Momokani, pornography e itamu taudia na una kara ese edia mauri e hadikaiamu. Gabu momo ai, pornography e itamu taudia ese e abimu lalohadai mirodia na kipara na heto, se ore haraḡamu. Ena be unu bero na metairametaira be namo be laomu, to kiparadia na dounu mimia.

To, namona na baita diba Iehova ese Satana ena tarapu amo baine gimada daladia na e hadibadamu. Iehova ese baine gimada totona, namona na mai kudouda idoinai ida Ia baita “badinaia”; Israel tataudia na unu asie kara toma. (Eso. 19:5) Baita abia dae momokani Dirava ese pornography itadia karana na e inai henia dikadikamu. Dahaka dainai unu ta gwau tomamu?

Mani a laloa: Dirava ese Israel besena e henidia taravatudia na bese idaudia edia amo idau. Dirava ena taravatu na haba ta na heto, Israel taudia e gimadiava bese idaudia bona edia kara dikadia ese basie hakaudia kerere. (Deu. 4:6-8) Unu taravatu ese mai anina bada herevana ta e hahedinaraia:  Iehova ese matabodaḡa karadia na e inai henidiamu.

Iehova ese Israel besena ediai bese idaudia edia kara e herevalai neganai, e hamaorodia, eto: “Baina hakaumui vareai tanona, Kanaan, taudia . . . edia kara basio kara. . . . Tano danu vada e hamiroa; una dainai ena dika davana vada na henia.” Israel edia helaḡa Diravana vairanai, Kanaan taudia edia mauri dalana na dika rohoroho bona edia matabodaḡa karadia daidiai e noholaiava tanona na e hamiroa.​—Lev. 18:3, 25.

Ena be Iehova ese Kanaan taudia na e panisidia, to haida na dounu matabodaḡa karadia e karava. Laḡani 1,500 mai kahana muridiai, Paulo ese Kristen taudia edia negai e nohova besedia edia kara e herevalai, eto: “Mami namodia asie abimu; a lebulebu daladia ai e rakamu, bona mata-dika karadia e ura heni lalo-dikamu.” (Efe. 4:17-19) Hari danu, taunimanima momo na matabodaḡa kara dika rohorohodia e karamu. Una dainai, tomadiho momokani e badinaiamu taudia ese matabodaḡa taudia edia kara na basie ita.

Pornography e itamu tauna ese Dirava na se matauraiamu. Dirava ese ita e karada, ia heida-idana, bona diba e henida unu amo maoro bona kerere edia idau baita lalopararalaia. Aonega Diravana ese mahuta hebou taravatuna e atoa. Anina na headava taudia sibodia mo maoro e henidia bae mahuta hebou totona. (Gen. 1:26-28; Her. 5:18, 19) To pornography laulaudia e karamu o e hahedinaraimu taudia edia kara be ede bamona? Idia ese Dirava ena kara maoromaoro taravatudia e dadarai vaitanimu. Momokani, pornography e hahedinaraimu taudia ese Iehova na asie matauraiamu. Dirava ese unu bamona taudia na baine hahemaoro henidia.​—Roma 1:24-27.

To mai edia ura ida pornography e itamu eiava e duahimu taudia be ede bamona? Reana haida na e laloamu una na dia kerere. To, idia ese Iehova ena taravatu asie badinaiamu taudia e durudiamu. Reana pornography e ita matama neganai una na asie laloa. To, Baibul ese e hahedinaraia ḡoevaḡoeva, namona na Dirava momokanina e tomadiho heniamu taudia ese pornography  bae inai henia momokani. Baibul na e gwaumu: “Iehova o lalokau heniamu taumui e, dika ba inai henia.”​—Sal. 97:10, NWT.

Pornography itana karana e uramu bae dadaraia taudia ediai na auka unu bae kara toma. Ita na dia ḡoevadae tauda, bona ta hekwarahimu matabodaḡa uradia baita dadarai. Danu, kudouda ese baine koida diba Dirava ena taravatu baita dadaraia totona. (Ier. 17:9) To Kristen ai ela taudia momo ese pornography itana karana na e dadaraia. Una dainai oi ese danu una kara na ba dadaraia diba. Satana ena tarapu, pornography itana karana, ba dadaraia totona Dirava ena Hereva ese baine durumu dalana ba laloa.

Matamanai ta herevalaia heḡereḡerena, Israel taudia momo na ura dikadia e badina dainai dika e davari. Hari una na baine vara diba. Iesu tadikakana Iakobo ese e herevalaia, eto: “Taunimanima ta sibona ena ura dikadia ese lalona e aniamu bona e koiamu. Bena ura dikadia na e rogorogomu, kara dikadia e havaramu.” (Iak. 1:14, 15) Bema ta na kudouna ai ura dikadia baine lalohadailai, ia na gabeai kara dikana ta baine karaia diba. Una dainai baita hekwarahi matabodaḡa lalohadaidia baita dadaraidia vaitani.

Bema lalohadai mirodia o abimu, kara ta ba karaia haraḡa. Iesu na eto: “Imamu eiava aemu ta ese baine hahekwakwanaimu na ba utua oho, ba negea daure. . . . Eiava matamu ta ese baine hahekwakwanaimu, ba giboa lasi, ba negea daure.” (Mat. 18:8, 9) Iesu na dia tauanida baita utu oho karana e herevalaia. To e durudamu lalohadai mirodia ta abimu badina baita lalopararalaia, bona kara ta baita karaia haraḡa una lalohadai baita kokia totona. Edena dala ai una sisiba baita badinaia, pornography baita dadaraia totona?

Pornography e hedinaraimu neganai, basioto, ‘Dika ta basine varamu.’ Haraḡa herea ba roha muri. Maoromaoro televisen ba haofua. Kompiuta o mobael fon ba koua haraḡa. Ḡau namodia ba lalo. Una ese be durumumu emu lalohadai ba biagua totona, dia emu lalohadai ese oi baine biagumu.

Bema pornography laulaudia itadia karana na o hadokoa vaitani, to nega ta ta ai o lalodia loumu be ede bamona? Ta ese pornography laulaudia o lalohadaidia na basine lalodiaboio haraḡamu. Unu na nega idauidau ai baine vara diba. Bema una baine vara, reana bo uramu kara mirona ta ba karaia, heḡereḡere tauanimu bo gadaralaimu (o masturbation). Una dainai ba heḡaeḡae, bema unu lalohadai o abimu, haraḡa herea ba tuari henidia.

Lalomu ba hadaia emu lalohadai bona kara na Dirava ena ura ida bae heḡereḡere. Aposetolo Paulo heḡereḡerena ba kara, ia na mai ena ura ida ‘sibona tau-anina e tutua’ bona ‘e ḡuia.’ (1 Kor. 9:27) Ura dikadia ese basie biagumu na namo. Baibul na e gwaumu: “Lalomui ba hamatamata, bae idau vaitani, bena Dirava ena ura, mai namona bona mai hairaina bona mai hereadaena ida, vada ba diba.” (Roma 12:2) Ba helalotao: Bema emu lalohadai bona kara na Dirava ena ura ida heḡereḡere, bo moalemu, a lalohadai dikadia bo abimu neganai basio moalemu.

Baibul siridia haida ba lalotao. Bena lalohadai dikadia o abimu neganai, ba hekwarahi unu siri ba lalodia. Salamo 119:37; Isaia 52:11; Mataio 5:28; Efeso 5:3; Kolose 3:5; 1 Tesalonika 4:4-8 ese be durumumu, pornography itana karana ba dadaraia bona Iehova ena lalohadai ba badinaia.

Nega haida bema o mamiamu emu ai na auka matabodaḡa laulaudia itadia o ilalodia karana ba dadaraia, dahaka ba kara? Eda haheitalai hereadaena, Iesu, ba tohotohoa. (1 Pet. 2:21) Iesu e bapatiso murinai, Satana ese e dibaḡania loulou. Iesu be dahaka e kara? Ia ese unu hedibaḡani ta ta e dadarai. Ia ese siri haida e ḡaukaralai Satana ena hedibaḡani baine dadarai totona. Iesu eto: “Satana e, dauha aola.” Bena Satana ese e rakatania. Iesu na se hesiku to Diabolo e dadaraia, oi danu basio hesiku. (Mat. 4:1-11) Satana bona ena tanobada ese dounu be dorimumu matabodaḡa lalohadaidia bavabi, to dounu ba dadaraia. Pornography itana karana na ba dadaraia diba. Iehova ese baine durumu, inaimu ba hadarerea.

Hanaihanai Iehova ba ḡuriḡuri henia. Paulo na eto: “Emui ura na Dirava ba hamaorolaia. Bena Dirava ena maino, eda diba idoinai e hereaiamu mainona, ese lalomui bona daramui baine gima, Keriso Iesu lalonai.” (Flp. 4:6, 7) Dirava ena maino ese baine durumu kara dikadia ba dadaraidia. Bema Iehova ba raka henia kahi, “ia ese danu baine raka henimui kahi.”​—Iak. 4:8.

Ḡau iboudiai e lohiadiamu Diravana ida baita hetura namonamomu neganai, dika idauidau amo be gimadamu. Iesu na eto: “Tanobada lohiana [Satana] vada e maimu. Lauegu ai ia na asi siahuna.” (Ioa. 14:30) Iesu be ede e diba toma? Nega ta ini e gwau toma: “E siaigu Diravana ese e bamogumu, ia ese se rakatanigu, sibogu asina nohomu; badina be iena ura karadia nega idoidiai na karamu.” (Ioa. 8:29) Iehova ihamoalena karadia bo karamu neganai, ia ese oi na basine rakatanimumu. Pornography laulaudia ba dadaraidia, bena Satana ese baine rakatanimu.