ITA iboudai ese ta abia daemu “dina gabedia ai” Iehova ese ena taunimanima e hakaudiamu, bona ia ibadinana totona ḡau momo e henidiamu. (2 Tim. 3:1) To, ia ibadinana karana na ita ta ta siboda ese baita abia hidimu. Tano ḡaḡaena ai Israel taudia ediai e vara ḡauna bona hari isedai e varamu ḡauna baita haheḡereḡerea. Idia na kibi reḡena heḡereḡerenai ḡau ta e karaiava.

Iehova ese Mose e hamaoroa kibi rua baine karadia, silver amo baine korodia. “Reḡedia na taunimanima ihaboudia bona taruha ikokina toadia ai baela.” (Num. 10:2) Hahelaḡa taudia ese unu na dala idauidau ai bae hiriri bena taunimanima bae diba idia be dahaka bae kara. (Num. 10:3-8) Hari ina negai, Dirava ena taunimanima na dala idauidau ai e hadibadiamu. Ina atikol ai, Dirava ena hahediba herevadia ta abimu daladia toi baita herevalaimu, bona mani idaunegai Israel taudia ese kibi e hiririva daladia ida baita haheḡereḡeredia. Unu dala toi na, Dirava ena taunimanima na e vavediamu hebou badadia bae lao heni, elda taudia na treinini e abimu, bona kongrigeisin ihakauna daladia na e haidaumu.

Iehova na e urava “taunimanima iboudiai” na hebou kalaḡana ena ist kahanai bae hebou neḡanai, hahelaḡa taudia ese kibi ruaosi e hiririva. (Num. 10:3) Iduhu iboudiai ese una kibi reḡena e kamonaiava. Idia na kaha foa ai e haridia, hebou kalagana e taruhaia heḡeḡe. Hebou kalagana badinai e taruhava taudia na kibi reḡena e badinaia haraḡava. To haida na daudau dainai, neḡa bada lalonai bona be hekwarahimu unu baela totona. Herevana kahikahi eiava daudau, to Iehova na e urava iboudiai na bae hebou bona iena hereva bae hakala heni.

Hari, ita na dia hebou kalagana ta ai ta heboumu, to e vavedamu Dirava ena taunimanima edia hebou baita lao heni. Unu hebou haida na rijinol hebouheboudia eiava spesel heboudia, unuseniai ita na hahediba bona hahekau hereva badadia ta abimu. Tanobada heḡeḡemadai, tano idauidau ai Iehova ena taunimanima na proḡram tamona e moalelaiamu. Una dainai, unu hebou e lao henimu taudia na e moalemu. Haida na gabu daudaudia amo e maimu. To, iboudiai na e hamomokaniamu edia hekwarahi na mai anina.

Gabu daudaudia ai e nohomu grup maraḡidia be ede bamona? Hari ina nega teknoloji dainai idia momo danu una proḡram amo namo e davarimu bona e mamiamu idia na unu hebouhebou badana lalonai. Heḡereḡere, hedikota amo tadikaka ta ese Benin ena brens e vadivadia neganai,  una proḡram na Sahara Desert ai mininḡ taoni ta ladana Arlit, Niger ai e kamonaia danu. Tadikaka taihu bona kamonai taudia 21 e hebou. Ena be idia na gabu daudauna ai e hebou, to e hemami idia na hebou taudia 44,131 bogaraḡidiai na heto. Tadikaka ta na e gwa: “Kudoumai idoinai ida a tenkiumu badina una program a hakalaia. Una ese e hahedinaraiamu umui ese ai na o lalokau henimaimu.”

Israel ena hahelaḡa tauna na kibi tamona e hiririamu neḡanai, “bese lohiadia, Israel iduhudia kwaradia” na hebou kalagana vairanai bae hebou. (Num. 10:4) Unuseniai idia ese Mose amo hahediba herevadia bona treinini bae abi. Unu ese bae durudia edia iduhu lalodiai edia maduna bae hua. Bema oi na una lohia ta, ḡau iboudiai boma kara una hebou ai boma vareai bona namo boma abi totona, a?

Hari ina negai, kongrigeisin elda taudia na dia lohia taudia bona Dirava ena mamoe na asie biagudiamu. (1 Pet. 5:1-3) To idia na e hekwarahimu Dirava ena taunimanima bae naridia. Una dainai, treinini ma haida bae abi totona sikuli haida heḡereḡere Kingdom Ministry School ai e vavediamu neganai, mai edia ura ida e laomu. Unu sikuli lalodiai, elda taudia na kongrigeisin bae naria namonamo daladia e dibadiamu. Unu amo idia bona e naridiamu taudia na Iehova bae tura henia namonamo. Ena be una sikuli ta lalonai so vareai, to ela taudia ese e dibadia ḡaudia amo kongrigeisin e duruamu.

Neḡa haida Israel ena hahelaḡa taudia ese kibi e hiririava dalana na e haidauava. Unu amo e taruhava taudia iboudiai na e dibava Iehova na e urava idia na gabu ta ma baela. (Num. 10:5, 6) Una ese edia ḡaukara hebou karana e hahedinaraia, to danu Israel tauda ediai una na mai hekwarahina. Nega haida, Israel taudia haida na asie urava ma gabu ta baela. Dahaka dainai?

Reana badina haida na e laloava kibi na nega momo e hiririava bona idia ese asie laloava negana ai e hiririava. “Neḡa haida ori na adorahi ai e diho, e mia rani; daba ai ma e dae.” To, ma neḡa haida “dina rua, eiava hua ta, eiava neḡa daudau” lalonai unu e hetova. (Num. 9:21, 22) Israel taudia be gabu hida ai e taruha? Numera karoa 33 ese e hahedinaraiamu Israel taudia na gabu 40 ai e taruha.

Nega haida, idia na mai ikerukeruna gabudia ai e taruhava. Reana momo ese una na e moalelaiava badina idia na “tano ḡaḡaena badana bona dika-hereana” ai e loaloava. (Deu. 1:19) Una dainai, reana haida na e lalova bema gabu ta ma be laomu reana una na dia gabu namona.

Gabu ma ta e urava baela neganai, iduhu haida na e nariva lalonai bae haheauka na namo. Ena be iboudiai ese kibi reḡena e kamonai, to dia iboudiai nega tamona e laova. Kibi reḡena e haidauava ese ist kahanai e taruhuva iduhudia Iuda, Isakara, Sebulun e hadibadiava idia bae raka oho. (Num. 2:3-7; 10:5, 6) Idia e raka ohova murinai, hahelaḡa taudia ese kibi reḡena idauna na nega iharuana e hiririava saut kahana iduhudia toiosi bae raka totona. Hahelaḡa taudia na unu e kara tomava ela bona e taruha taudia iboudiai e raka ohova.

Orea ena heau daladia e idaumu neganai, reana emu ai na e aukamu bavabi dae. Reana o laloamu sensi momo e varamu. Eiava reana dala ḡunadia o manadalai dainai so uramu unu na bae haidaudia. Ena be badi idauidau daidiai unu o lalo tomamu, to o hemamimu una ese oiemu haheauka e tohoa bona nega bada e ore murinai una na o manadalaia. To bema baita hekwarahimu e haidau ḡaudia baita badinadiamu, Iehova ese ita na be hanamodamu.

Mose ena negai, Iehova ese tano ḡaḡaena ai tatau, hahine, bona natu milioni e hakaudia. Bema Ia ese basinema naridia bona basinema hakaudia, idia na basiema mauri. Hari ina negai, Iehova ena heduru dainai ita na ta goadamu. Oibe, Iehova ese e durudamu eda abidadama baine goada totona. Una dainai abidadama Israel taudia bamodia baita kara, laloda baita hadai Iehova ena hereva baita badina.