1. Edena dala ai Iehova na mararoto hahinena ta bamona?

“MARAROTO hahinena ta ese e ubuamu merona baine laloa boio a?” Una na peroveta tauna Isaia ena nega ai Iehova ese e gwauraia henanadaina ta. Dirava ese ena taunimanima e hamaorodia, eto: “Oibe, unu idia na bae helalo boio readia; a lau ese oi basina lalomu boio.” (Isa. 49:15) Nega momo Ia na sina ta ida sibona ena kara na se haheḡereḡereava. To una negai ia na unu e hereva toma. Iehova ese sina bona natu padadiai e miamu lalokauna e herevalaia amo e hahedinaraia ia ese ena hesiai taudia na e lalodia badamu. Sina momo edia hemami na taihu ta ladana Jasmin ena hemami heḡereḡerena, ia na eto: “Natumu bo nariamu neganai, umui raruosi padamuiai emui hetura karana na be goadamu bona be mia hanaihanaimu.”

2. Bema Iehova natuna ta na iena amo e daudaumu, iena hemami be ede bamona?

² Iehova na natuna ta se heboumu bona se haroromu neganai, ia ese na e laloamu. Una dainai, laḡani ta ta lalodiai iena hesiai taudia tausen momo e manokamu * neganai, una ese ia na e hahisia badamu.

3. Iehova ena ura be dahaka?

³ Unu lalokau tadikaka bona taihu momo na gabeai kongrigeisin e lou heniamu neganai, ita na ta moalemu. Iehova na e uramu idia na bae lou, bona ita danu unu ta ura tomamu. (1 Pet. 2:25) Edena dalai baita durudia? Una henanadai do asita haerelaia lalonai, namona na baita diba dahaka dainai idia na asie heboumu bona asie haroromu.

4. Edena dala ai moni ḡaukara ese ta baine hamanokaia diba?

⁴ Haida na edia mauri lalodiai edia moni ḡaukarana e laloa badamu. Asia ai, tadikaka ta ladana Hung * na e gwaumu: “Egu moni ḡaukara ai nega bona goada bada na ḡaukaralaimu. Na lalova bema egu moni na momo Iehova na baina hesiai henia namonamo diba. Una dainai, hora momo na ḡaukarava. Kongrigeisin heboudia momo na readiava, bena hebou lao karana na hadokoa. Toana na Satana ena tanobada ese taunimanima na metairametaira Dirava ena amo e veridia ohomu.”

5. Taihu ta na enai e vara hekwakwanaidia daidiai dahaka e vara?

⁵ Tadikaka taihu haida na hekwakwanai momo daidiai e lalomanokamu. Britain ai sina ta ladana na Anne, natuna na faiv. Anne na e gwa: “Lau natugu ta na e vara neganai mai ena gorere. Gabeai, natugu kekenina ta na orea murimurina ai e atoa bona natugu merona ta na kwara gorerena e abia. Lau na na lalometau bada dainai asina hebouva bona asina harorova. Bena na manoka.” Anne bona ena famili bona hekwakwanai unu bamodia e davarimu taudia daidiai ta hebogahisimu.

6. Kolose 3:13 basine badinaiamu tauna be edena dala ai Iehova ena taunimanima baine hadaudaudia?

⁶ Kolose 3:13 ba duahia. Iehova ena hesiai taudia haida na tadikaka eiava taihu haida edia kara ese e hahisidia. Aposetolo Paulo na e diba nega haida tadikaka ta eiava taihu ta na badi maorona ta dainai baita hahebadelaiamu o baita maumaulaiamu. Reana e kara henida dalana na dia maoro. Bema basita henari namonamomu, reana baita badulaimu. Badu karana ese ta na Iehova ena taunimanima amo baine hadaudaua diba. South America ai, tadikaka ta ladana Pablo mani a laloa. Ia na kerere ta se karaia, to ta ese e samania koikoi, una dainai kongrigeisin ai ena maduna e kokia. Ia be dahaka e kara? Pablo na e gwa: “Lau na na badu bona taina ruana kongrigeisin amo na daudau.”

7. Ta lalona mamina dikana ese ienai be dahaka baine havaraia diba?

⁷ Eiava, ta na guna kara dika badana ta e karaia, nega daudau lalonai una ese ia lalona mamina na be hadikaiamu. Be laloamu Dirava ese ia na se lalokau heniamu. Ena be ia na e helalo-kerehai bona Iehova ena hebogahisi na e mamia, to reana e mamiamu ia na dia heḡereḡere Dirava ena hesiai tauna ta ai bainela. Tadikaka ta ladana Francisco na unu e hemami toma, ia na eto: “Matabodaḡa karana ta dainai lau na sisiba na abi. Ena be matamanai hebou na na laova to gabeai na lalometau bona na hemamiva lau na dia heḡereḡere Dirava ena taunimanima bogaraḡidiai baina noho. Lalogu mamina na se namo bona na laloava Iehova ese egu dika na se gwautao. Una dainai lau na asina hebouva bona asina harorova.” Unu hekwakwanai e davarimu tadikaka bona taihu be ede o lalodia tomamu? Idia o bogadia hisimu, a? Mai anina bada ḡauna na, Iehova ese idia be ede e lalodia tomamu?

8. Guna Iehova e hesiai heniava to gabeai e manoka taudia be Ia ese e lalodia boiomu, a? Ba herevalaia.

⁸ Guna Iehova e hesiai heniava to nega sisina lalonai e manoka taudia na Iehova ese e lalodiamu. Bona iena hesiai ḡaukara lalonai e kara ḡaudia danu e lalodiataomu. (Heb. 6:10) Peroveta tauna Isaia ese haheḡereḡere ta amo e hahedinaraia Iehova ese ena taunimanima na e lalodiamu. Isaia na e gwa: “Ia ese ena seri baine ubua, mamoe ireḡudia tauna na heto. Mamoe natudia na imana ai baine  rosidia, bona kemena ai baine rosidia lao.” (Isa. 40:11) Iehova, Mamoe Inarina Tauna Badana, ena hemami be ede bamona bema ena hesiai tauna ta na ia e rakataniamu? Iesu ese Iehova ena hemami na e hahedinaraia ena hahediba taudia e nanadaidia neganai, eto: “Umui na dahaka o tomamu? Tau ta ena mamoe bema sinahu-ta, a tamona bema dobi, ia na taurahani-ta-ahui taurahani-ta basinema rakatanidia, e dobi ḡauna ororo ai basinema ha tahua a? Baine davaria, na hamaoromui momokanimu, baine moalelaia bada; a taurahani-ta-ahui taurahani-ta asie dobi ḡaudia baine moalelaidia maraḡi.”​—Mat. 18:12, 13.

9. Baibul negadiai mamoe e nariva taudia namodia ese edia mamoe be ede e kara henidia tomava? (Rau 1 laulauna ba itaia.)

⁹ Dahaka dainai Iehova na mamoe inarina tauna ta ida baita haheḡereḡerea na maoro? Badina Baibul negadiai, mamoe inarina tauna namona ese ena mamoe na e lalodia badava. Heḡereḡere, David na leona bona bea ta e heatu henidia ena mamoe serina baine gimadia totona. (1 Sam. 17:34, 35) Mamoe inarina tauna namona na mamoe tamo-tamona be boiomu danu be dibamu. (Ioa. 10:3, 14) Mamoe inarina tauna unu bamona ese ena mamoe 99 na maḡu lalonai be rakatanidiamu eiava mamoe inarina tauna ma ta ena henari henunai be rakatanidiamu bena be laomu boio mamoena itahuna. Iesu ese una boio mamoena sivaraina e gwauraia amo mai anina bada ḡauna ta e hahedinaraia, e gwa: “Tamamui guba ai e nohomu na se uramu ini memero-memero ta baine mase.”​—Mat. 18:14.

10. Esekiel 34:11-16 heḡereḡerena, e boio mamoedia daidiai Iehova ena gwauhamata be dahaka?

¹⁰ Iehova ese ita ta ta na e lalokau henidamu, “memero-memero” eiava iena mamoe oreana amo e raka boio taudia danu. Peroveta tauna Esekiel ena amo Dirava na e gwauhamata ena boio mamoedia baine tahudia bona baine durudia edia hetura karana Ia ida baine namo helaoreana. Bona idurudia totona Ia na dala haida e badinamu, unu na Israel ai bema mamoe ta na e boiova neganai, mamoe inaridia  taudia ese e badinava daladia heḡereḡeredia. (Esekiel 34:11-16 ba duahi.) Matamanai, mamoe inarina tauna na ena nega bona goada bada e heniva ena mamoe e tahuava. Bena e davariava neganai, e loulaiava mamoe serina lalonai. Danu, bema mamoe na mai berona eiava e hitoloa, mamoe inarina tauna na mai lalokauna ida e duruava, ena bero e kumidiava, e huaiava, bona e ubuava. Elda taudia, “Dirava ena mamoe serina” e reḡuamu taudia ese unu dala bae badina na namo, unu amo kongrigeisin e rakatania taudia bae durudia. (1 Pet. 5:2, 3) Elda taudia ese idia be tahudiamu, bena bae durudia kongrigeisin bae lou henia, bona mai lalokaudia ida bae durudia Iehova turana ai baela. *

11. Mamoe e nariva tauna namona be dahaka e lalopararalaia?

¹¹ Mamoe inarina tauna namona na e lalopararava mamoe na bae boio diba. Bema mamoe ta e boiova, mamoe inarina tauna ese na se panisiava. Mani Dirava ese ena hesiai taudia e durudia dalana ba laloa, idia ese nega sisina lalonai ia na e rakatania.

12. Iehova ese Iona be ede e kara henia toma?

¹² Peroveta tauna Iona na Iehova ena hereva se badinaia bona Nineva na sela. To Iehova ese ia na se dadaraia vaitani. Mamoe inarina tauna namona bamona, Iehova ese e hamauria bona lalona e hagoadaia ena hesiai ḡaukara baine haḡuḡurua totona. (Iona 2:7; 3:1, 2) Gabeai, Iehova ese tubutubu auna ta amo Iona e durua bena e laloparara taunimanima ta ta edia mauri na mai anina bada. (Iona 4:10, 11) Una ese dahaka e hadibadamu? Elda taudia na manoka taudia edia kara daidiai basie hesiku haraḡa. To, bae hekwarahi manoka taudia e manoka badidia bae lalopararalai. Bona boio mamoena na Iehova e lou heniamu neganai, elda taudia ese dounu bae lalokau henidia bona bae lalodia bada.

13. Iehova ese Salamo 73 e torea tauna e kara henia dalana amo dahaka ta dibamu?

¹³ Salamo 73 e torea tauna na kara dika taudia e itadia idia na hahenamo e davariva dainai e lalomanoka. Ia na e lalo Dirava ena ura e  karaiava be mai ena namo eiava. (Sal. 73:12, 13, 16) Iehova be dahaka e kara? Ia ese Salamo e torea tauna na se gwau henia. To ena hereva na Baibul ai e tore. Gabeai Salamo e torea tauna na e diba iena mauri ibounai lalonai iena hetura karana Iehova ida na ḡau ta ese se hereaia. (Sal. 73:23, 24, 26, 28) Una ese dahaka e hadibadamu? Elda taudia na Iehova ihesiai henina ena hahenamo e daradaralaiamu taudia basie hahemaoro henidia haraḡa na namo. To, bae hekwarahi idia edia hereva bona kara badidia bae lalopararalai. Bena una negana ai elda taudia ese Baibul amo hahegoada herevadia bae heni diba.

14. Dahaka dainai Elia na heduru e ura, bona edena dalai Iehova ese e durua?

¹⁴ Peroveta tauna Elia na kwin Iesebel ena amo e heau. (1 Han. 19:1-3) Ia na e laloava Iehova e hesiai heniava peroveta tauna na ia mo, bona e hemami iena hesiai ḡaukara na asi anina. Ia na e lalometau bona e ura baine mase. (1 Han. 19:4, 10) Iehova ese Elia na se gwau henia, to e hadibaia ia na dia sibona, Dirava enai baine tabekau na namo, bona baine kara ḡaukaradia na dounu momo. Iehova ese Elia ena lalohekwarahi herevadia na e hakala heni bona ḡaukara matamatadia e henia. (1 Han. 19:11-16, 18) Una ese dahaka e hadibadamu? Ita iboudai, bada hereana na elda taudia ese Iehova ena mamoe na mai hebogahisidia ida bae kara henidia. Ena be ta na e gwaumu ia na e badumu eiava e laloamu Iehova ese ena dika na basine gwautaomu, namona na elda taudia na bae hakala. Bena elda taudia ese boio mamoena na bae hadibaia Iehova ese ia na e lalokau heniamu.

15. Ioane 6:39 heḡereḡerena, Iesu ese Tamana ena mamoe be ede e lalodia toma?

¹⁵ Iehova be e uramu iena boio mamoena be ede baita laloa toma? Iesu ena haheitalai amo ḡau ta baita dibaia. Ia na mai dibana Iehova ese ena mamoe iboudiai na e lalodia badamu, una dainai Iesu na ḡau iboudiai e kara “Israel besena ena dobi mamoedia” na Iehova bae lou henia totona. (Mat. 15:24; Luka 19:9, 10) Iesu na mamoe inarina tauna namona dainai, ḡau iboudiai e kara Iehova ena mamoe ta basine boio totona.​—Ioane 6:39 ba duahia.

16-17. Elda taudia ese manoka taudia idurudia karana be ede e laloa tomamu? (Ina maua “ Manoka Taudia Edia Hemami” ba itaia.)

¹⁶ Aposetolo Paulo ese Efeso kongrigeisin ena elda taudia e hagoadadia Iesu ena haheitalai bae tohotohoa totona. Eto: “Ba ḡaukara, lau bamogu, manoka-manoka taudia ba kahadia; bona Lohiabada Iesu ena hereva ba laloa tao, eto “Ḡau ihenina be namo bada, ḡau iabina be namo maraḡi.” (Apos. 20:17, 35) Una siri ese e hahedinaraia ḡoevaḡoevamu, hari ina negai elda taudia edia maduna badana na Iehova ena taunimanima bae naridia. Spain ai, elda ta ladana Salvador na e gwa: “Iehova ese ena boio mamoedia e lalodia badamu karana na laloamu neganai, una ese e hagoadagumu ḡau iboudiai baina kara idia baina durudia totona. Lau na elda ta dainai, na diba momokanimu Iehova na e uramu iena mamoe baina naridia.”

¹⁷ Ina atikol ai tame herevalaidia taudia iboudiai na e durudia Iehova e lou henia. To, harihari Iehova e rakatania taudia momo danu e uramu unu bae kara toma. Stadi atikol 26 ese idia baita durudia daladia be herevalaimu.