1-2. Iehova ena Witnes taudia ediai ededia ḡau rua na mai anidia bada?

HARI ina negai ita edai Iehova ena lohia siahuna bona Ia ladana ihahelaḡana karana na mai anidia bada. Ita na Iehova ena Witnes taudia dainai, ta uramu unu na baita herevalai. To Dirava ena lohia siahuna bona ia ladana ihahelaḡana karana be ḡau idaudia rua, a? Lasi.

² Ita iboudai na ta lalopararamu Dirava ladana ihadikana karadia iboudiai bae ore na namo. Bona ta dibamu namona na baine hedinarai ḡoevaḡoeva Iehova ena lohia dalana na hereadae. Unu ḡau ruaosi na mai anidia bada.

3. Iehova ladana anina be dahaka?

³ Dirava ladana Iehova ese ena kara iboudiai bona iena lohia dalana e hahedinaraiamu. Una dainai bema ta gwaumu Iehova ladana ihadikana karadia iboudiai bae ore na mai anina bada, bona ta gwaumu baine hedinarai ḡoevaḡoeva Iehova ena lohia dalana na hereadae. Iehova na siahu ibounai Lohia Badana bona iena lohia dalana na mai anina ia ladana ihahelaḡana karana ai.​—Maua ladana “ Iehova Ladana Ihahelaḡana ai Ḡau Rua Na Mai Anidia Bada.” ba itaia.

4. Salamo 135:13 ese Dirava ladana be ede e herevalaia toma, bona ina atikol ai ededia henanadai baita haerelaimu?

⁴ Iehova ladana na lada ta ida basita haheḡereḡerea diba. (Salamo 135:13 ba duahia.) Dahaka dainai Dirava ladana na mai anina bada? Edena negai una lada e hadikaia matama? Edena dala ai Dirava ese ladana e hahelaḡaiamu? Dahaka baita kara Dirava ladana baine namo helaoreana? Mani unu henanadai haeredia aita herevalai.

5. Dahaka dainai haida ese Dirava ladana ihahelaḡana karana na e daradaralaiamu?

⁵ “Oi ladamu baia hahelaḡaia.” (Mat. 6:9) Iesu na e gwa una na ita ese baita ḡuriḡurilaia ḡauna badana ta. Iena hereva anina be dahaka? Ḡau ta ba hahelaḡaia anina na e hadikaiamu ḡaudia ba kokidia. Reana haida na be gwaumu bema Iehova ladana na helaḡa bona ḡoeva, dahaka dainai baita hahelaḡaia? Una henanadai baita haerelaia totona, namona na ta ladana amo ta dibamu ḡaudia baita lalodia.

6. Dahaka dainai lada na mai anina bada?

⁶ Lada na dia pepa ai e toreamu eiava e gwauraiamu ḡauna mo. Baibul na e gwaumu: “Lada namona iabi-hidina ese taḡa badadia iabi-hididia e hereadiamu.” (Her. 22:1; Koh. 7:1) Dahaka dainai lada na mai anina bada? Badina ta ladana bo kamonaiamu neganai, iena kara bona ia be taunimanima ede bamona bo lalodiamu. Lada e toreamu eiava e gwauraiamu dalana na mai anina, to mai anina bada ḡauna na, una be daika ladana bona taunimanima ese ia be ede e laloa tomamu.

7. Edena dala ai taunimanima ese Dirava ladana e hadikaiamu?

⁷ Taunimanima ese Iehova e sivarailaia koikoimu neganai, ma haida na e laloamu Dirava ena kara na dia nanamo. Unu e kara tomamu neganai, idia ese ia ladana e hadikaiamu. Dirava ladana bona ena kara e gwauraidia dika negana ginigunana na Eden imeana ai. Una ese ita be dahaka e hadibadamu?

8. Adam bona Heva be dahaka mai dibadia, bona ededia henanadai baita herevalaimu?

⁸ Adam bona Heva na mai dibadia Dirava ladana na Iehova, bona iena kara danu mai dibadia. Heḡereḡere, idia na mai dibadia Ia na ḡau iboudiai e Havara Tauna, ia na edia mauri, edia noho gabuna paradaiso e heni, bona edia headava e karaia Tauna. (Gen. 1:26-28; 2:18) To idia ese daradia ḡoevadaedia e ḡaukaralai, Iehova ese idia daidiai e kara ḡaudia bae lalodia dobu totona, a? Idia ese edia lalokau bona tenkiu karana Iehova enai e habadaia, eiava? Dirava inaina ese e dibaḡanidia neganai, unu henanadai haeredia na e hedinarai.

9. Genese 2:16, 17 bona 3:1-5 ai, Iehova ese headava taudia ginigunadia be dahaka e hamaorolaidia, bona edena dala ai Satana ese hereva momokani e moḡea?

 ⁹ Genese 2:16, 17 bona 3:1-5 ba duahi. Satana ese gaigai e ḡaukaralaia bena Heva e nanadaia, eto: “Momokani Dirava eto umui na imea audia ta huahuana basio ani a?” Una henanadai lalonai koikoi herevana ta na mia bona una na poisin ta bamona. Dirava na e gwa idia na imea audia iboudiai huahuadia bae ani, to tamona mo basie ania. Adam bona Heva na au huahua momo herea bona idauidaudia bae ani diba. (Gen. 2:9) Momokani, Iehova na hariharibada Diravana. To, Ia ese Adam bona Heva e hamaorodia au tamona huahuana na basie ania. Una dainai Satana ena henanadai ese hereva momokani na e moḡea. Satana na ena hereva amo e hahedinaraia toana na Dirava na dia hariharibada tauna. Heva na reana e lalo, ‘Dirava be ḡau namona ta lauegu amo e huniamu, a?’

10. Edena dala ai Satana ese Dirava ladana e hadikaia bona dahaka e vara?

¹⁰ Una negai Heva na dounu Iehova e badinaiava. Heva ese Satana e haere henia neganai, Dirava ese e gwauraia herevana na ma e gwauraia lou. Bona una au basie daua toho herevana danu e gwauraia. Ia na mai dibana Dirava ena taravatu bae utua neganai idia na bae mase. To Satana na eto: “Momokani, umui na basio mase.” (Gen. 3:2-4) Satana na unu e hereva toma neganai ena koikoi na e hedinarai. Una neganai ia ese Dirava ladana e hadikaia bona Heva e hamaoroa Iehova ena hereva na koikoi. Una dainai Satana na diabolo o lada e hadikamu tauna ai ela. Heva na e koia; ia ese Satana ena hereva na e abia dae. (1 Tim. 2:14) Ia ese dia Iehova to Satana e abidadama henia. Una dainai ia na abi hidi dikana e karaia. Ia ese Iehova e gwau-edeede henia. Bena ia na Iehova ese e taravatua basine ania au huahuana e ania matama. Una murinai Adam danu e henia.​—Gen. 3:6.

11. Ita tamada sinada ginigunadia be dahaka bema kara, to idia be dahaka e kara?

¹¹ Mani Heva ese Satana bema hamaoroa herevana a laloa. Heva na ini bema gwau toma: “Lau na asi dibagu oi be daika, to lau na mai dibagu lau Tamagu na Iehova bona ia na na lalokau heniamu bona na abidadama heniamu. Ia ese lau bona Adam na ḡau iboudiai e henimai. Dahaka dainai oi ese ia na o gwauraia dikamu? Dauha aola!” (Her. 27:11) To Heva ese Iehova na se lalokau henia, Adamu danu unu bamona. Tamadia na asie lalokau henia dainai, ia ladana ihanamona karana na e dadaraia.

12. Edena dala ai Satana ese Heva e hadaradaraia, bona Adam bona Heva be dahaka asie kara?

¹² Tame herevalaia guna heḡereḡerena, Satana ese Heva lalona ai daradara e havaraia matama. Iehova ladana ihadikana totona Satana na e ura Heva na baine lalo Iehova be Tama namona eiava lasi. Una neganai Adam bona Heva na ḡau ta asie karaia Iehova ladana baine namo helaoreana. To Satana  ena hereva e kamonai bona Tamadia e gwau-edeede henia. Hari, Satana na dala unu bamodia e ḡaukaralaimu. Ia ese Iehova e sivarailaia koikoimu amo Ia ladana e hadikaiamu. Unu koikoi herevadia e abi daemu taudia na unu hereva ese e hakaudia kerere haraḡamu, bena Iehova ena lohia dalana maorona e dadaraiamu.

13. Edena dala ai Esekiel 36:23 ese Baibul ena hereva badana e hahedinaraiamu?

¹³ Iehova ese ladana ihadikana herevadia be e haheaukalaimu mo, eiava? Lasi. Baibul ese e hahedinaraiamu Iehova na ḡau haida e kara, unu amo Eden ai ia ladana e hadikaia herevadia baine hakoikoidia. (Gen. 3:15) Baibul ena hereva badana na ini baita gwauraia toma diba: Iehova na Natuna ese e lohiaiamu Basileiana amo ladana be hahelaḡaiamu bona tanobada ai kara maoromaoro bona maino be havaraiamu. Baibul ai e gwaurai herevadia ese be durudamu Iehova ese ladana baine hahelaḡaia dalana baita lalopararalaia totona.​—Esekiel 36:23 ba duahia.

14. Eden ai e vara gwau-edeede karana dainai Iehova be dahaka e kara ladana baine hahelaḡaia totona?

¹⁴ Satana na ḡau idauidau e karamu Iehova baine koua, unu amo Ena ura basine haḡuḡurua. To Satana na se kwalimumu. Baibul ese e hahedinaraiamu Iehova na ḡau haida e kara, bona unu ese e hahedinaraimu ia na Tama lalokauna bona Lohia hereadaena. Momokani, Satana ena gwau-edeede karana bona ia e badinaiamu taudia ese Iehova lalona na e hahisia bada. (Sal. 78:40) Ia na Satana ese ladana e hadikaia karana baine hamaoromaoroa totona, mai ena aonega, haheauka, bona hahemaoro maoromaoro ida e kara. Bona ena siahu hereadaena na dala idauidau ai e hahedinaraia. Bada hereana na, e karamu ḡaudia iboudiai lalodiai ena lalokau e hahedinaraiamu. (1 Ioa. 4:8) Iehova na hanaihanai e ḡaukaramu ladana baine hahelaḡaia totona.

15. Edena dala ai hari Satana ese Dirava ladana e hadikaiamu, bona una dainai dahaka e varamu?

¹⁵ Hari Satana na doini Dirava ladana e hadikaiamu. Ia na taunimanima e koidiamu unu amo idia na Dirava ena siahu, hahemaoro  maoromaoro, aonega, bona lalokau karadia bae daradaralai. Heḡereḡere, Satana na taunimanima e hakaudia kereremu unu amo bae laloa Iehova na dia ḡau iboudiai e Havara Tauna. Bona bema taunimanima na e hamomokaniamu Dirava na e nohomu, Satana na e hekwarahimu unu amo idia na bae abia dae Dirava na kara auka Tauna bona ena taravatu na dia mamaoro. Bona taunimanima e hadibadiamu Iehova na daḡedaḡe Diravana, badina taunimanima na hel lahina ai e gabudiamu. Taunimanima ese unu hereva koikoidia be abi daemu neganai, idia ediai na be haraḡamu Iehova ena lohia dalana maorona bae dadaraia totona. Iehova ese Satana do se hamasea lalonai, Satana na dounu Iehova ladana be hadikaiamu bona dala be tahumu oi danu Iehova ba dadaraia totona. To ia be kwalimumu, a?

16. Oi be dahaka ba kara diba, una na Adam bona Heva ese asie karaia ḡauna?

¹⁶ Iehova na dala e kehoa dia ḡoevadae taudia na ia ladana ihahelaḡana karana ai bae heduru. Una dainai, Adam bona Heva ese asie karaia ḡauna na oi ese ba karaia diba. Ena be tanobada na Iehova ladana e hadikaiamu taudia amo e honu, to oi ese Iehova ladana na ba hahelaḡaia diba bona taunimanima ba hadibadia Iehova na helaḡa, kara maoromaoro, kara namo bona lalokau Diravana. (Isa. 29:23) Ba hahedinaraia oi na o uramu ia na oiemu Lohia ai bainela. Taunimanima ba durudia bena bae laloparara, Iehova ena lohia dalana na maoro bona una lohia dalana sibona ese maino bona moale baine havaraia.​—Sal. 37:9, 37; 146:5, 6, 10.

17. Edena dala ai Iesu ese Iehova ladana e hahedinaraia?

¹⁷ Iehova ladana baine namo totona ḡau haida ta karamu neganai, ita ese Iesu Keriso ta tohotohoamu. (Ioa. 17:26) Iesu ese Tamana ladana e ḡaukaralaia bona ena kara korikoridia e hahedibalai. Heḡereḡere, Farisea taudia ese e hahedinaraia Iehova na kara auka Diravana, taunimanima na se bogadia hisimu. Iesu ese taunimanima e durudia bae laloparara Iehova na haheauka, lalokau, bona dika e gwautaomu Diravana. Bona dina ta ta ai Tamana ena kara e tohotohova dalana amo taunimanima e durudia Iehova bae dibaia.​—Ioa. 14:9.

18. Dahaka baita kara unu amo baita hahedinaraia Iehova ladana e hadikaiamu herevadia na koikoi?

 ¹⁸ Iesu heḡereḡerena, taunimanima baita hadibadia Iehova na lalokau bona hebogahisi Diravana. Unu baita kara tomamu neganai, Iehova ladana e hadikaiamu herevadia baita hakoikoidiamu. Bena taunimanima vairadiai Iehova ladana baita hahelaḡaiamu. Ita danu Iehova baita tohotohoa diba. Ena be ita na dia ḡoḡoevadadae to unu baita kara toma diba. (Efe. 5:1, 2) Eda hereva bona kara amo Iehova ena kara korikoridia ta hahedinaraimu neganai, ita na ia ladana ta hahelaḡaiamu. Dia una mo to taunimanima baita durudia hahediba koikoidia bae dadarai, unu amo Dirava sivaraina momokanina bae dibaia. Bona baita hamomokaniamu dia ḡoevadae taudia ese Dirava bae abidadama henia diba.​—Iobu 27:5.

19. Edena dala ai Isaia 63:7 ese baine duruda eda hahediba hereva badana baita lalopararalaia totona?

¹⁹ Iehova ladana ihahelaḡana totona baita karaia ḡauna ma ta aita herevalaia. Baibul ena hereva momokani na ma haida ta hadibalaidiamu neganai, nega momo Dirava ena lohia siahuna ta herevalaiamu, ta hahedinaraiamu Iehova na mai ena maoro iunives baine lohiaia, bona una na momokani. Ena be Dirava ena taravatu baita hahedibalaia na mai anina bada, to ita baita karaia ḡauna badana na taunimanima baita durudia ita Tamada, Iehova bae lalokau henia bona bae badinaia. Namona na Iehova ena kara badadia baita gwaurai hedinarai, bena idia na bae diba Iehova be Dirava ede bamona. (Isaia 63:7 ba duahia.) Unu amo ma haida baita durudiamu Iehova bae lalokau henia bona bae kamonai henia badina na idia na e uramu ia bae badinaia.

20. Atikol 24 ai, dahaka baita herevalaimu?

²⁰ Edena dala ai baita hahedinaraia eda kara bona eda hahediba dalana ese ma haida baine durudia Iehova bae matauraia bona bae hetura henia? Stadi atikol 24 ese una henanadai be haerelaiamu.