1. Iehova be ita ta ta daidai dahaka e kara?

IEHOVA ese ita ta ta na e verida mai ia baita dibaia. (Ioa. 6:44) Mani a laloa, tanobada heḡeḡemadai taunimanima bilion momo bogaraḡidiai Iehova ese oi na e itamu mai momokanimu ida ia bo lalokau heniamu, bona una na e laloa bada. (1 Sis. 28:9) Iehova na mai dibana oi, e lalopararalaimumu bona e lalokau henimumu. Una na hahegoada hereva namona, ani?

2. Edena dalai Iesu ese e hahedinaraia Iehova ese ena mamoe ta ta na e lalodia badamu?

² Iehova ese oi bona emu Kristen tadikaka taihu na e lalomui badamu. Una baita lalopararalaia totona, Iesu ese Iehova na mamoe ireḡuna tauna ta ida e haheḡereḡerea. Bema mamoe 100 amo tamona baine boio, mamoe ireḡuna tauna be dahaka be karamu? Ia ese mamoe 99 be rakatanidiamu bona una e boio mamoena be ha tahuamu. Una mamoe be davariamu neganai basine badu heniamu, to be moalelaiamu. Dahaka ta dibamu? Iehova ese ena mamoe ta ta na e lalodia badamu. Iesu na e gwa: “Tamamui guba ai e nohomu na se uramu ini memero-memero ta baine mase.”​—Mat. 18:12-14.

3. Ina atikol ai dahaka baita herevalaimu?

³ Vaia, ita na asita uramu eda hereva o kara ta dainai eda tadikaka o taihu bae lalomanoka. Edena dalai haida basita hahekwakwanaidia? Bona dahaka baita kara bema ta ese e hahisidamu? Unu henanadai na ina atikol ai baita haerelaimu. To, namona na ina baita dibaia guna, Mataio karoa 18 ai e gwauraidia “ini memero-memero” be daidia?

4. “Ini memero-memero” be daidia?

⁴ “Ini memero-memero” na Iesu ena hahediba taudia iboudiai  e herevalaidia. Herevana idia laḡanidia na babada o mamaraḡi, to idia na “memero-memero” na heheto, badina e ura dikadikamu Iesu amo diba bae abi. (Mat. 18:3) Ena be edia bese, kastom, o lalohadai bona kara na idauidau, to idia iboudiai na Keriso e abidadama heniamu. Bona Keriso ese idia na e lalokau henidia badamu.​—Mat. 18:6; Ioa. 1:12.

5. Ta ese Iehova ena taunimanima e hahisidiamu neganai, Iehova ena hemami be ede bamona?

⁵ “Ini memero-memero” iboudiai na Iehova ese e lalodia badamu. Iena hemami baita lalopararalaia totona, natu maraḡidia ta lalodiamu dalana mani aita herevalaia. Idia na ta lalodia badamu. Bona ta uramu baita gimadia badina edia goada, diba bona aonega na dia taunimanima badadia heḡereḡeredia. Taunimanima ta ese ma ta e hahisiamu neganai, ta lalohisihisimu, to bema ta ese natu maraḡina ta e hahisiamu, ta badu dikadikamu. Una heḡereḡerena, Iehova na e uramu ita baine gimada. Bema ta ese iena taunimanima e hahekwakwanaidiamu o e hahisidiamu, Ia na e lalohisihisimu bona e badumu.​—Isa. 63:9; Mar. 9:42.

6. Korinto Ginigunana 1:26-29 heḡereḡerena, tanobada taudia ese Iesu ena hahediba be ede e lalodia tomamu?

⁶ Ededia dala ma haida ai Iesu ena hahediba na “memero-memero” na heheto? Tanobada taudia ese daidia e lalodia badamu? Idia ese taḡa taudia, mai ladadia taudia bona mai edia dagi bada taudia e lalodia badamu. To Iesu ena hahediba na dia taunimanima unu bamodia dainai, asie lalodia badamu. (1 Korinto 1:26-29 ba duahia.) To Iehova be dia unu bamona, ia ese idia na e lalodia badamu.

7. Iehova be e uramu eda tadikaka bona taihu be ede baita lalodia toma?

⁷ Iehova ese ena hesiai taudia iboudiai na e lalokau henidiamu, herevana idia na laḡani momo ia e hesiai henia eiava harihari mo hereva momokani ai e vareai. Iehova ese iseda tadikaka bona taihu iboudiai na e lalodia badamu, una dainai namona na ita ese danu idia na baita lalodia bada. Ita na ta uramu iseda “orea taudia” iboudiai baita lalokau henidia. (1 Pet. 2:17) Namona na baita hekwarahi mai eda ura ida idia baita gimadia bona baita durudia. Bema oi na o dibamu emu kara o hereva amo ta o hahisia, namona na basioto emu dika be gwauataomu bona be laloaboiomu dainai ḡau ta basio karaia. Dahaka dainai haida na e lalohisihisimu? Reana idia e tubu dae dalana dainai, haida edia hereva bona kara dainai be lalohisihisi haraḡamu. Haida be harihari mo hereva momokani ai e vareai dainai, do asi dibadia namonamo taunimanima edia kerere be ede bae gwautao toma. Herevana ita ese ma haida ta hahisidiamu o haida ese ita e hahisidamu, to namona na baita hekwarahi maino ai baita noho. Danu e badu haraḡamu tauna na baine hekwarahi una kara baine dadaraia totona. Unu be kara tomamu neganai, tadikakana ida edia hetura karana be namomu bona be moalemu.

8. Iesu ena hahediba taudia be edena lalohadai ese e hakaudia kerere?

⁸ Dahaka dainai Iesu na e gwa “ini memero-memero”? Ena hahediba ese ia e nanadaia eto: “Daika na guba basileiana lalonai baine herea?” (Mat. 18:1) Una negai Iuda taudia momo na e urava dagi bae abi bona ma haida ese bae imodaidia. Diba bada tauna ta na eto: “Idia na ma haida ese bae matauraidia bona ladadia bae abi isi karana na e laloa badava.”

9. Iesu ena hahediba be dahaka bae kara?

⁹ Iesu na mai dibana Iuda taudia momo na e laloava idia ese ma haida na e hereadia,  una dainai ena hahediba e hamaorodia bae hekwarahi una lalohadai kererena bae dadaraia. E hamaorodia eto: “Umui bogaraḡimui ai tau guna na tau muritai ai bainela, bona hahekau tauna danu hesiai tauna ai bainela.” (Luka 22:26) Bema baita lalomu ita na ma haida ese e hereada, ita na tau muritai heḡereḡerena. (Fili. 2:3) Siboda baita hahemanaumu neganai, ma haida basita hahekwakwanaidiamu.

10. Paulo ese e gwauraia sisibana be ede baita badinaia toma?

¹⁰ Eda tadikaka bona taihu ese ita na dala idauidau ai e hereada. Una na baita lalopararalaia haraḡamu bema edia kara namodia mo baita lalomu. Namona na aposetolo Paulo ese Korinto taudia e henidia sisibana baita badinaia. Eto: “Daika ese oi mo e ha-idaumu? Bona dahaka ḡau oi dekemu ai, a tau ta ese e henimu? A bema ta ese e henimu, dahaka dainai o heaḡilaiamu, ta basinema henimu na heto?” (1 Kor. 4:7) Una dainai, dia namo siboda baita heaḡi eiava baita lalo ita ese ma haida ta hereadia. Bema tadikaka ta na tok namo hereadia e henimu eiava taihu ta na Baibul stadi momo e hamatamamu, namona na unu e karamu ḡaudia daidiai Iehova baine hanamoa.

11. King ta bona ena hesiai tauna parabolena amo Iesu ese dahaka e hadibada?

¹¹ Iesu ese ena hahediba e sisiba henidia ma haida basie hahekwakwanaidia murinai, ia ese king ta bona ena hesiai tauna parabolena e gwauraia. King ese hesiai tauna ena abitorehai badana e gwauatao. Gabeai, una hesiai tauna na se ura bamona ena abitorehai maraḡina baine gwauatao. Una dainai king ese una se hebogahisi hesiai tauna na dibura ruma ai e atoa. Una parabole amo dahaka ta dibamu? Iesu na e gwa: “Benaini, Tamagu guba ai e nohomu na unu baine karamui toma, umui ta ta lalomui ai tadikakamui edia dika basio gwau tao negadia ai.”​—Mat. 18:21-35.

12. Bema dika basita gwautaomu, edena dalai haida baita hahisidiamu?

¹² Hesiai tauna ena kara ese dia ia sibona mo, to ma haida danu e hahisidia. Ginigunana na, una hesiai tauna ese bamona na se bogaiahisi, badina “dibura rumana ai e doria vareai, unuseni ai baine noho ela bona ena abi-torehai davana baine haḡuḡurua.” Iharuana na, ia ese una kara e itaia hesiai taudia ma haida e hahisidia. Baibul na e gwaumu: “Idia ida hesiai e lao heni hebouva taudia na una kara e itaia negana ai, idia lalodia e hisihisi bada.” Una heḡereḡerena, iseda kara ese ma haida bae hahisidia diba. Bema ta ese baine kara auka henida bona ena dika basita gwautao, dahaka baine vara diba? Ginigunana na, lalona baita hahisiamu badina asita uramu ena dika baita gwautao, bona reana basita uramu baita bamoa eiava basita lalokau heniamu. Iharuana na, kongrigeisin lalonai haida baita hahekwakwanaidiamu, badina be itaiamu ita na una tadikaka o taihu ida asita herohemaino.

13. Painia ta ena ekspiriens amo dahaka o dibamu?

¹³ Bema eda tadikaka bona taihu edia dika baita gwautaomu, ita bona ma haida na baita moalemu. Painia ta ladana Crystal enai una na e vara. Ia na kongrigeisin ai taihu ta ese e hahisia. Crystal na e gwa: “Nega haida iena hereva na a’auka, mamidia na vaitani kaia amo bema gwadagu na heto. Haroro ḡaukara ai, asina urava ia ida baina ḡaukara hebou. Una ese egu haroro urana e hamaraḡia bona asina moaleva.” Crystal na e laloava ia e baduva na maoro. To ia na se ura baine badu noho badu noho eiava sibona baine helalo. Ia na mai manauna ida Watchtower October 15, 1999 ena atikol ta ladana “Forgive From Your Heart” lalonai  e duahia Baibul sisibana e badinaia. Ia ese una taihu ena dika e gwauatao. Crystal na gwa: “Hari na lalopararamu ita iboudai na ta hekwarahimu eda kara baita haidau bona Iehova na heḡaeḡae dina ta ta ai eda dika baine gwautao. Na mamiamu maduna metauna ta na paḡagu amo e hekoki bamona. Hari na moalemu.”

14. Mataio 18:21, 22 heḡereḡerena, aposetolo Petro ena hekwakwanai be dahaka, bona Iesu ena haere amo dahaka ta dibamu?

¹⁴ Ita na mai dibada haida edia dika baita gwautao na namo, bona una na kara maorona. To reana ta hekwarahimu unu baita kara toma. Aposetolo Petro na nega haida unu e hemami tomava. (Mataio 18:21, 22 ba duahi.) Dahaka ese baine durumu diba? Ḡau ginigunana na Iehova ese emu dika e gwauatao dalana ba laloa dobu. (Mat. 18:32, 33) Ia na mai ena hebogahisi ida eda dika e gwauatao. (Sal. 103:8-10) Danu, ia na e uramu ita ta ta “baita heura heheni.” Una dainai dika igwautaona karana na basita laloa maraḡi. Namona na mai kudouda idoinai ida eda tadikaka bona taihu edia dika baita gwautao. (1 Ioa. 4:11) Iharuana be, dika baita gwautaomu neganai be varamu ḡaudia baita lalodia dobu. Ita ese e hahisida tauna baita duruamu, kongrigeisin ena lalotamona karana baita havaraiamu, eda hetura karana Iehova ida baita gimaiamu bona baita moalemu. (2 Kor. 2:7; Kol. 3:14) Dokonai, dika igwautaona totona e noidamu Diravana baita ḡuriḡuri henia. Satana ena dala na basio kehoa emu hetura karana tadikakamu ida baine hadikaia garina. (Efe. 4:26, 27) Namona na Iehova enai baita tabekau, ia ese baine duruda Satana ena idoa ai basita moru totona.

15. Kolose 3:13 heḡereḡerena, dahaka baita kara diba bema tadikaka o taihu ta ena kara o hereva ese e hahekwakwanaidamu?

¹⁵ Bema tadikakamu ena kara o hereva ta ese baine hahekwakwanaimu be ede  bamona? Dahaka ba kara be namo? Namona na ba hekwarahi tadikakamu ida ba herohemaino. Iehova ba ḡuriḡuri henia. Ba noia ia ese oi e hahisimu tauna baine durua, bona oi danu baine durumu una tadikaka o taihu ena kara namodia ba lalo​—unu kara namodia dainai ia na Iehova ese e lalokau heniamu. (Luka 6:28) Bema oiemu ai na auka tadikakamu ese e karaia karana ba laloaboio, namona na ia ba hereva henia dala namona ta ba laloa. Basio laloa tadikakamu na mai ena ura ida e hahisimu, reana una na mistake ai e vara. (Mat. 5:23, 24; 1 Kor. 13:7) O hereva heniamu neganai, ena kara badina ba lalopararalaia. To bema se uramu oi ida ba maino be ede bamona? Namona na “ba haheauka” bona basio hesiku. (Kolose 3:13 ba duahia.) Mai anina bada ḡauna na, basio badu henia, badina una ese emu hetura karana Iehova ida baine hadikaia diba. Ḡau ta ese basine hahekwakwanaimu. Unu amo bo hamomokaniamu oi na Iehova o lalokau heniamu.​—Sal. 119:165.

16. Ita ta ta eda maduna be dahaka?

¹⁶ Ta moalemu badina eda tadikaka bona taihu ida mai lalotamonada ida Iehova ta hesiai heniamu. (Ioa. 10:16) Organized to Do Jehovah’s Will bukana ena rau 165 na ini e gwau tomamu: “Una lalotamona karana o moalelaiamu dainai, emu maduna na ba hekwarahi una lalotamona karana ba gimaia.” Danu, namona na eda tadikaka bona taihu na Iehova ese e lalodiamu dalana heḡereḡerena baita lalodia. Iehova ese ita iboudai na e laloda badamu. Oi danu emu tadikaka bona taihu o lalodia badamu, a? Idia o durudiamu bona o naridiamu karadia na Iehova ese e itamu bona e lalo badamu.​—Mat. 10:42.

17. Laloda baita hadai dahaka baita kara?

¹⁷ Eda tadikaka taihu na ta lalokau henidiamu. Una dainai “laloda ini baita hadai toma: varavarada ena dala ai hekwakwanai ḡauna eiava idoa basita atoa.” (Roma 14:13) Baita laloa eda tadikaka bona taihu ese ita na e hereada, bona ta uramu mai kudouda idoinai ida edia dika baita gwautao. Haida ese basie hahekwakwanaida na namo. To “maino daladia baita tahu, bona baita hahegoada heheni.”​—Roma 14:19.