LAḠANI momo lalodiai, Israel taudia na tomadiho momokanina bae durua totona, moni e heniva. To Iesu ena negai, Iuda taudia edia mauri na e auka badina tax idauidau e heniva.

Dirava ena dubu ai tomadiho bae durua totona, Iuda taudia iboudiai na sikele kahana ta e heniva (drachma rua). Iesu ena negai, una tax monina na e ḡaukaralaiava boubou ḡaudia bae heni bona Herod ese e haginia dubuna bae naria totona. Iuda taudia haida na Petro e nanadaia bema Iesu na tax monina e heniva eiava. Iesu na e gwa tax monina ihenina karana na asi ena kerere. Una dainai Iesu ese Petro e hamaoroa edeseniai koin ta baine abia bena tax davana baine heni.​—Mat. 17:24-27.

Idaunegai Dirava ena taunimanima na edia uma anianidia bona moni na e karoadiava karoa gwauta, bona karoa ta na e heniva. (Lev. 27:30-32; Num. 18:26-28) Tomadiho igunalaina taudia na e hamaorodiava “aniani avadia maraḡi-maraḡidia iboudiai” bae karoadia bona karoa ta na boubou ḡauna totona bae heni. Iesu na se gwa ḡau karoadia ten amo karoa ta ihenina karana na kerere, lasi, to ia na e gwa itorena taudia bona Farisea taudia ese taravatu na dala kererenai e ḡaukaralaiava.​—Mat. 23:23.

Una negai, Roma gavamanina e lohiava dainai, Iuda taudia ese tax monidia momo e heniva. Heḡereḡere, tano biagudia ese moni eiava kohu amo tax davana e heniva. Anina na edia moni eiava kohu amo 20 o 25 pesen na gavamani bae henia. Danu Iuda taudia ta ta na tax monina e heniva. Una tax monina dainai, Farisea taudia ese Iesu e nanadaia. Iesu ena haere amo e hahedinaraia tax monina ihenina karana be ede baita laloa toma. Eto: “Kaisara ena, Kaisara ba henia; Dirava ena, Dirava ba henia.”​—Mat. 22:15-22.

Taunimanima ese edia hoihoi kohudia na hanua ai e vareailaiva eiava e lasilaiva negadiai danu tax monidia e heniva. Unu tax monidia na bouti e hetuva gabuda, nese, dala, eiava taoni o makedi vareai gabudiai e gogova.

Roma gavamanina henunai e nohova taudia na tax monina ihenina karana ese e hametaudiava. Roma ena histori e torea tauna ta Tacitus ena hereva heḡereḡerena, Emperor Tiberius e lohiava neganai, “Suria bona Iudea taudia na e noinoi tax davana bae hamaraḡia badina ediai na e auka.”

Tax monidia e gogova daladia ese taunimanima edia mauri na e ha-aukava. Tax gogo ḡaukarana na moni bada e heniva tauna e heniava. Bena una tau ese haida ma e abidia hidiva tax monidia bae gogo. Bona idia iboudiai na e hekwarahiva moni bae habadaia eiava profit bae kara. Sakaio danu unu tax gogo taudia biagudia ta. (Luka 19:1, 2) Una dainai taunimanima ese tax e gogoava dalana na asie moalelaiava, bona tax e gogova taudia na e inai henidiava.