1. Dahaka dainai nega haida Iehova ena hesiai taudia na e hemamimu idia na sibodia?

NEGA haida ita momo na ta mamiamu ita na siboda ta nohomu. Haida ediai una hemami na se mia daudaumu, to ma haida ediai be e mia daudaumu. Ena be taunimanima momo bogaraḡidiai ta nohomu, to reana baita hemamimu ita na siboda. Haida na kongrigeisin matamatanai e hekwarahimu ma haida bae hetura henidia. Haida be ruma bese ida e noho manada dainai, gabu daudaudia e laomu neganai, e hemamimu idia na sibodia. Haida be edia lalokau taudia e mase dainai, edia hebamo karana na e reaiamu. Bona vanegai mo hereva momokani ai e vareai Kristen taudia haida na e hemamimu idia na sibodia badina edia ruma bese bona turadia ese e dadaraidiamu eiava e daḡedaḡe henidiamu.

2. Ededia henanadai baita haerelaimu?

² Iehova na mai dibana ita bona e lalopararalaidamu. Bema ta hemamimu ita na siboda ta nohomu, ia na mai dibana, bona e uramu ita baine duruda una hemami baita haheaukalaia. Edena dalai Iehova ese e durudamu? Ita be dahaka baita kara heduru baita abi totona? Bona kongrigeisin ai bema haida na e hemamimu idia na sibodia e nohomu, edena dalai baita durudia? Mani unu henanadai haeredia aita herevalai.

3. Iehova be edena dalai e hahedinaraia Elia na e laloa bada?

³ Iehova na e uramu ia e tomadiho heniamu taudia iboudiai bae moale. Ia na ita ta ta dekedekedai, bona ta lalohisihisimu o ta lalomanokamu neganai, ia na mai dibana. (Sal. 145:18, 19) Iehova ese peroveta tauna Elia e durua dalana mani a laloa. Israel edia negai, una abidadama tauna na nega  aukana lalonai e nohova. Iehova e tomadiho heniava taudia na daḡedaḡe bada e davariva, bona Dirava asie lalokau heniava taudia na e urava Elia bae alaia. (1 Han. 19:1, 2) Danu, Elia na e laloava ia sibona mo Iehova e hesiai heniava, una dainai e lalomanoka. (1 Han. 19:10) Dirava na haraḡa herea Elia e durua. Iehova ese aneru ta e siaia Elia baine hamaoroa ia na dia sibona, badina Israel taudia momo na dounu Iehova e hesiai heniava!​—1 Han. 19:5, 18.

4. Edena dalai Mareko 10:29, 30 ese e hahedinaraiamu Iehova ese ena hesiai taudia na e lalodia badamu?

⁴ Iehova na mai dibana ita haida na ḡau momo ta dadarai ia baita hesiai henia totona. Danu, ruma bese taudia haida bona turada na Iehova asie hesiai heniamu dainai ita na asie durudamu. Aposetolo Petro na reana e lalohekwarahiva dainai, Iesu e nanadaia, eto: “Ai na ḡau iboudiai vada a rakatani, oi vada a ḡavamu; ai na dahaka baia abi?” (Mat. 19:27) Iesu ese ena hahediba e hamaorodia kongrigeisin na edia ruma bese ai be laomu. (Mareko 10:29, 30 ba duahi.) Bona Iehova, Tamada gubai e nohomu na e gwauhamata ia e uramu bae hesiai henia taudia na be durudiamu. (Sal. 9:10) Iehova ese baine durumu sibomu o nohomu hemamina ba dadaraia totona, mani ba kara ḡaudia haida aita herevalai.

5. Dahaka dainai Iehova ese e durumumu dalana ba laloa?

⁵ Iehova ese e durumumu dalana ba laloa. (Sal. 55:22) Una ese oi na be durumumu lalohadai maorona bo abiamu. Singul taihu ta ladana Carol, * ena ruma bese na dia hereva momokani ai, na e gwa: “Iehova ese nega aukadiai lau e durugu dalana na laloamu neganai, na mamiamu lau na dia sibogu. Bona na abia dae momokanimu Iehova ese hanaihanai lau na be durugumu.”

6. Bema ta na e hemamimu ia na sibona, edena dalai 1 Petro 5:9, 10 ese baine hagoadaia diba?

⁶ Iehova ese sibodia e nohomu hemamina e abiamu tadikaka taihu e durudiamu dalana ba laloa. (1 Petro 5:9, 10 ba duahi.) Hiroshi ena ruma bese lalonai ia sibona na Witnes. Ia na e gwa: “Kongrigeisin lalonai, tadikaka taihu iboudiai na hekwakwanai e davarimu. To, ita iboudai na ta hekwarahimu Iehova ta hesiai heniamu, una ese ai haida na e hagoadamaimu badina emai ruma bese na dia hereva momokani ai.”

7. Ḡuriḡuri karana ese oi be ede e durumu tomamu?

 ⁷ Hanaihanai ba ḡuriḡuri, Baibul ba duahia, bona hebou baola. Emu hemami korikori na Iehova enai ba gwauraia hedinarai. (1 Pet. 5:7) Massiel na ini e gwau toma: “Sibogu na nohomu hemamina baina haheaukalaia totona, lau e durugu ḡauna badana na hanaihanai Iehova na ḡuriḡuri heniava.” Una matamata taihu na lalona e hadaia Iehova baine hesiai henia neganai, e hemami ia na sibona badina ena ruma bese na Iehova asie hesiai heniamu. Ia na ma e gwa: “Lauegu ai Iehova na Tama korikorina ta na heto, hanaihanai na ḡuriḡuri heniamu bona egu hemami na ienai na gwaurai hedinaraimu.”

8. Dirava ena Hereva iduahina bona ilalo dobuna karana ese oi be ede e durumu tomamu?

⁸ Dirava ena Hereva ba duahia hanaihanai, bona Iehova ena lalokau oiemu ai e hamomokaniamu sivaraidia ba lalodia dobu. Taihu Bianca na ena ruma bese amo haheisi herevadia e haheaukalai. Ia na e gwa: “Baibul ese e herevalaidia taudia bona Iehova ena hesiai taudia ese hekwakwanai unu bamodia e hanai sivaraidia na duahimu bona na lalo dobumu karana ese lau na e durugumu.” Kristen taudia haida na idia e hagoadadiamu siridia e lalodiataomu heḡereḡere Salamo 27:10 bona Isaia 41:10. Haida be edia hebou ḡaudia e heḡaeḡaelaimu eiava edia Baibul duahiduahi na audio rekodin ai e kamonaimu, una ese e durudiamu sibodia e nohomu hemamina bae haheaukalaia.

9. Hebou ilao henina karana ese oi be ede e durumu tomamu?

⁹ Ba hekwarahi hebou baola hanaihanai. Hebou ai e gwauraimu herevadia ese oi na be hagoadamumu, bona tadikaka taihu bo dibadiamu. (Heb. 10:24, 25) Matamanai tame herevalaia taihuna, Massiel na e gwa: “Ena be lau na hemarai kekenigu, to lalogu na hadaia kongrigeisin heboudia iboudiai bainala bona haere baina heni. Una ese lau na e durugu bona na mamia lau na tadikaka taihu dekedekediai.”

10. Dahaka dainai kongrigeisin ai tadikaka taihu ibamodia karana na mai anina bada?

¹⁰ Tadikaka taihu ba bamodia. Bema kongrigeisin ai burukadia eiava matamatadia bo bamodiamu, edia haheitalai namona amo diba bo abimu. Baibul ese ita e hadibadamu “aonega na taunimanima burukadia  ediai.” (Iobu 12:12) To, iahudia danu Dirava e badinaiamu matamata taudia amo diba be abimu. Ena be David laḡanina na maraḡi bona Ionatan laḡanina na bada, to idia na tura namodia ai ela. (1 Sam. 18:1) David bona Ionatan na e heduru heheniva, nega aukadiai Iehova bae hesiai henia. (1 Sam. 23:16-18) Irina ena ruma bese ai ia sibona mo Witnes, ia na e gwa: “Eda tadikaka taihu na vaitani tamada, sinada, kakada bona tadida na heto. Iehova ese idia na e ḡaukaralaidiamu ita bae duruda totona.”

11. Eda hetura karana baita hagoadaia totona, dahaka baita kara?

¹¹ Bema oi na hemarai tauna reana oiemu ai na be aukamu haida ba hetura henidia. Ratna na hemarai taihuna, bona hereva momokani e dibaia neganai, haida ese e daḡedaḡe henia, ia na ini e gwa toma: “Launa na laloparara kongrigeisin ai haida edia heduru baina abi na namo.” Ena be ta enai emu hemami igwauraina na auka, to emu hemami bo gwauraiamu neganai ia na oi turamu namona ai be laomu. Turamu na e uramu bae hagoadamu bona bae durumu, to namona na oi sibomu ese edia heduru ba noia.

12. Edena dalai haroro ḡaukarana ese be durudamu tura namodia baita davari?

¹² Tura namodia idavarina dalana namona ta na, haroro ḡaukara ai tadikaka taihu haida ida baita ḡaukara hebou. Matamanai tame herevalaia taihu, Carol na ini e gwau toma: “Haroro ḡaukara ai bona tiokratik ḡaukaradia ma haida ai taihu na bamodiamu neganai, idia na lau turagu namodia ai e laomu. Laḡani momo lalodiai Iehova na ini tura namodia amo lau e durugu.” Abidadama Kristen taudia baita bamodiamu neganai, namo baita davarimu. O lalomanokamu eiava o mamiamu oi na sibomu neganai, Iehova ese tura unu bamodia amo be hagoadamumu.​—Her. 17:17.

13. Kongrigeisin ai ita iboudai eda maduna be dahaka?

¹³ Kongrigeisin ai ita iboudai eda maduna na lalokau baita hahedinaraia, unu amo ta basine hemami ia na sibona e nohomu. (Ioa. 13:35) Eda kara bona hereva ese ta na baine hagoadaia diba! Taihu ta na e gwa: “Hereva momokani na dibaia neganai, tadikaka taihu na egu ruma bese ai ela. Edia heduru dainai lau na Iehova ena Witnes ta ai nala.” Haida edia ruma bese na dia hereva momokani ai dainai, edena dalai baita durudia unu amo bae mamia tadikaka taihu ese idia na e lalokau henidiamu?

14. Dahaka ba kara ma haida turadia namodia ai baola?

¹⁴ Ba hekwarahi ma haida ba hetura henidia. Baita karaia dalana ta na, kongrigeisin e maimu taudia matamatadia baita welkam henidia. (Roma 15:7) Dia hahenamo herevadia mo baita gwaurai, to kara ma haida danu baita kara. Ita na ta uramu idia turadia namodia ai baitala dainai, baita kara namo henidia bona baita hahedinaraia idia na ta lalodia badamu. Idia bae hahemaraidia henanadaidia na basita gwaurai, to edia hekwakwanai baita lalopararalai toho. Reana haida ediai na auka edia hemami bae gwaurai hedinarai, una dainai basio doridia bae hereva totona. To, mai aonegamu ida ba henanadai bona idia e herevamu neganai ba hakala namonamo. Heḡereḡere ba nanadaidia, ‘Hereva momokani be ede o diba toma?’

15. Edena dalai lo Kristen tauna ta ese kongrigeisin ai ma haida baine durudia?

¹⁵ Kongrigeisin na be goadamu bema lo  Kristen taudia, heḡereḡere elda taudia ese be lalodia badamu. Melissa na hereva momokani ai sinana ese e durua, ia na ini e gwau toma: “Na moalemu badina laḡani haida lalodiai tadikaka na tama heḡereḡeredia nega e atova lau bae durugu bona egu namo e lalova. Bona lau na herevava neganai idia na e hakalava.” Matamata tadikaka ta ladana Mauricio, na e lalohisihisi badina ia e stadi heniava tauna na hereva momokani e rakatania, ia na e gwa: “Elda taudia ese lau na e lalogu bada bona una ese lau na e durugu. Hanaihanai e hereva heniguva. Haroro ḡaukara ai a ḡaukara hebouva, sibodia edia stadi ai e dibava ḡaudia na lau ida a herevalaiva, bona a gadara hebouva.” Melissa bona Mauricio na fultaim hesiai ḡaukara e karaiamu.

16-17. Ededia dala ma haida ai haida baita durudia?

¹⁶ Dala ma haida ai heduru baita heni. (Gal. 6:10) Leo na tano ma ta ai misinari ḡaukara e karaiamu dainai, ena famili amo na daudau. Ia na e gwa: “Nega momo nega maorona ai ta ese oi be kara namo henimumu neganai, una ese oi na be hagoadamumu. Na helalotaomu nega ta lau na car accident ai na vareai. Bena rumai na kau neganai na hesiku bada herea. To, tadikaka ta adavana ida ese e invaitigu edia ruma ai baia aniani hebou. Asina helalotaomu ai be dahaka ani, to na laloataomu ḡauna na, lau na herevava neganai idia na e hakalava. Una murinai egu hemami na e namo!”

¹⁷ Hebou badadia na ta moalelaimu badina unuseniai tadikaka taihu ida ta hebamomu bona program ai ta kamonaimu ḡaudia na ta herevalai heboumu. To, matamanai tame herevalaia taihuna, Carol na e gwa: “Hebou badadiai na mamiamu lau na sibogu.” Dahaka dainai? Ia na ma eto: “Ena be lau na tadikaka taihu hutuma padadiai to idia momo na edia ruma bese ida e helai heboumu. Na itadiamu neganai na hemamimu lau na sibogu.” Haida be adavadia e mase dainai matamanai na be aukamu hebou badadia baela. Oi mai dibamu tauna ta be hekwakwanai unu bamodia e davarimu, a? Ba invaitia diba emu ruma bese ida hebou unu bamona ta ba lao henia.

18. Heabidae karana ta hahedinaraiamu neganai, edena dalai 2 Korinto 6:11-13 baita badinaia?

 ¹⁸ Nega bavato haida ba bamodia. Tadikaka taihu idauidau bona e hemamimu sibodia e nohomu taudia ida ba moale hebou. Eda lalokau na taunimanima unu bamodia ediai baita habadaia. (2 Korinto 6:11-13 ba duahi.) Matamanai tame herevalaia taihuna, Melissa na e gwa: “Tadikaka taihu ese e boirimaiva edia ruma a laova eiava a loaloa hebouva neganai, a moale bada herea.” Namona na emu kongrigeisin amo tadikaka taihu ediai heabidae karana ba hahedinaraia.

19. Ededia nega ma haida ai tadikaka taihu baita bamodia?

¹⁹ Nega haida eda tadikaka taihu na be moalemu bema baita bamodiamu. Haida na e mamiamu idia na sibodia badina edia murimuri varavara na tanobada ena dina badadia e moalelaimu. Haida be edia lalokau taudia e mase dinana be laloamu neganai, be lalohisihisimu. Hekwakwanai unu bamodia e davarimu tadikakadia bona taihudia baita durudiamu neganai, ta hahedinaraiamu idia na ta lalodia badamu.​—Fili. 2:20.

20. Bema ta hemamimu ita na siboda ta nohomu, edena dalai Iesu ena hereva Mataio 12:48-50 ese baine duruda?

²⁰ Nega haida Kristen tauna ta na badi momo dainai be hemamimu ia na sibona. To, namona na baita helalotao Iehova na e lalopararamu. Una dainai Ia ese tadikaka taihu e ḡaukaralaidiamu ita bae duruda. (Mataio 12:48-50 ba duahi.) Bema baita hekwarahimu tadikaka taihu baita durudiamu neganai, ta hahedinaraiamu Iehova ese e henimu heduruna na ta laloa badamu. Ena be ta mamiamu ita na siboda ta nohomu to baita laloatao ḡauna na ina, Iehova na nega iboudiai ita dekedekedai!