1. Dahaka dainai Satana na labana tauna ta ida baita heḡereḡerea diba?

LABANA tauna ta na e uramu animal ta baine abia eiava baine hamasea. Ia ese tarapu idauidau be ḡaukaralaimu. Iobu turana ta ese danu tarapu unu bamodia e herevalai. (Iobu 18:8-10) Labana tauna ta ese animal be ede e tarapua tomamu? Ia ese animal e stadilaia namonamomu. Heḡereḡere ia be edekaha e laomu? Iena ura ḡauna be dahaka? Bona edena idoa amo be idoaiamu? Satana na una labana tauna heḡereḡerena. Ia ese ita na e stadilaida namonamomu. E itaiamu ita be edekaha ta laomu bona dahaka ta ura henimu. Bena asi dibada negana ta ai idoa ta amo be idoadamu. To, Baibul ese e hadibadamu ena be iena idoa ai baita morumu, to baita roho mauri dibamu. Danu, e hadibadamu unu idoa idauidau be ede baita dadaraidia toma.

2. Satana ese e ḡaukaralaimu idoa badadia rua be dahaka?

² Satana ese e ḡaukaralaimu idoa badadia rua na, hekokoroku bona mataḡaniḡani karana. * Laḡani tausen momo lalodiai, Satana ese unu kara ruaosi amo momo e hamorudia. Ia na manu tahu tauna ta na heto, idoa ta amo animal ta e idoaiamu eiava e tarapuamu. (Sal. 91:3) To ita na Satana ese basine tarapudamu. Dahaka dainai? Badina Iehova ese Satana ena koikoi karadia na ita e hadibada.​—2 Kor. 2:11.

3. Dahaka dainai Iehova ese Baibul ai hekokoroku bona mataḡaniḡani taudia sivaraidia e herevalai danu?

³ Iehova ese e hadibadamu hekokoroku bona mataḡaniḡani na mai edia dika. Bona ia ese ena hesiai taudia ediai e vara ḡauna amo e hadibadamu, unu kara baita dadaraidia na namo. Baita itaiamu edena dalai laḡani daudau Iehova e hesiai  henia taudia haida na Satana ese e tarapudia. Una anina be hekokoroku bona mataḡaniḡani karadia be basita dadarai dibamu, a? Lasi. Iehova ese ini sivarai na Baibul ai e tore ita “isisibalai-henida.” (1 Kor. 10:11) Ia na mai dibana ita na unu sivarai amo diba baita abimu, bena Diabolo ena idoa amo baita roho maurimu.

4. Bema baita hekokorokumu dahaka be varamu?

⁴ Satana na e uramu ita na baita hekokoroku. Ia na dibana bema baita hekokorokumu, ita na ia heḡereḡerena ai baita laomu bona mauri hanaihanai helarona baita haboioamu. (Her. 16:18) Una dainai aposetolo Paulo na e gwa, bema ta na baine hekokoroku, ia na “diabolo ena hedibaḡani ese baine butua tao” diba. (1 Tim. 3:6, 7) Una na baine vara diba ita iboudai edai, herevana ita na mamatamata hereva momokani ai eiava laḡani momo Iehova vada ta hesiai henia.

5. Kohelete 7:16, 20 heḡereḡerena, ta be edena dalai hekokoroku karana be hahedinaraiamu?

⁵ Hekokoroku taudia na sibodia e helalomu. Satana na e uramu hekwakwanai ta davarimu neganai siboda eda namo baita lalo, a Iehova be basita laloa. Heḡereḡere, ta ese nega ta oi e habadelaimu koikoi, a? Eiava oi se kara namo henimu, a? Satana na e uramu oi ese Iehova o tadikakamu ba badu henidia. Danu ia na e uramu ba laloa hekwakwanai ihamaoromaorona dalana tamona na, sibomu emu ura ba badinaia bona Iehova ese ena Hereva amo e henimu hahekau dalana ba dadaraia.​—Kohelete 7:16, 20 ba duahi.

6. Netherlands ai taihu ta ena ekspiriens amo dahaka o dibamu?

⁶ Netherlands ai, taihu ta aita laloa. Ia na haida edia kerere e lalova dainai se moaleva. Bona se urava unu taunimanima baine bamodia. Ia na e gwa: “Na mamiava lau na sibogu, bona asina urava unu tadikaka bona taihu edia dika baina gwautao. Adavagu na hamaoroa kongrigeisin ma ta baiala na namo.” Una taihu ese March 2016 JW Broadcasting^® program e itaia. Una program ese ma haida edia  kerere baita gwautao daladia haida e herevalai. Taihu na e gwa: “Na itaia namona na baina manau bona sibogu egu kerere hari baina lalo, dia kongrigeisin ai tadikaka bona taihu edia kerere baina lalo. Una program ese e durugu Iehova bona ena lohia siahuna baina lalodia bada.” Una taihu ena sivarai amo oi be dahaka o dibamu? Hekwakwanai ta o davariamu neganai, Iehova ba laloa. Ba noia oi baine durumu iena lalohadai heḡereḡerenai taunimanima ba lalodia. Tamamu guba ai ese edia kerere na e itamu to ia na mai ena ura ida edia dika e gwautaomu, bona e uramu oi danu unu ba kara toma.​—1 Ioa. 4:20.

7. King Usia enai be dahaka e vara?

⁷ Iuda ena King Usia na e hekokoroku dainai sisiba e dadarai bona basine karaia karana ta e karaia. Usia na mai aonegana. Ia na tuari momo ai e kwalimu, hanua momo e hagini bona uma momo e kara. “Dirava ese ena namo e habadaia.” (2 Sis. 26:3-7, 10) Baibul na e gwa: “A e goada negana ai, ena heaḡi e vara, unu amo e dika.” Iehova na matamanai e haheḡani, hahelaḡa taudia sibodia mo dubu helaḡa ai muramura mai bonana bae gabua. To King Usia na e hekokoroku dainai, dubu helaḡa ai e vareai bona muramura mai bonana e gabua, ena be ia na asi ena maoro unu baine kara toma. Iehova na se moale bona una hekokoroku tauna na lepra gorere amo e hahisia. Usia ena lepra na se ore ela bona e mase.​—2 Sis. 26:16-21.

8. Edena dalai 1 Korinto 4:6, 7 ese e durudamu hekokoroku karana baita dadaraia?

⁸ Hekokoroku ena idoa ese Usia e idoaia heḡereḡerena, ita edai danu unu be vara toma dibamu, a? José ena haheitalai mani aita laloa. Ia na bisnes tauna ta, kongrigeisin ai elda ḡaukarana e karaiava, bona momo ese e matauraiava. Ia na hebou badadiai tok e heniva, bona seket taudia ese danu e noiava baine durudia. Ia na ini e gwau toma: “To lau na sibogu egu aonega ai bona na diba ḡaudia ai na tabekauva. A Iehova enai na asina tabekauva. Na laloava launa na goadava dainai Iehova ena hahediba herevadia bona sisiba na asina kamonaiva.” José na kara dika badana ta e karaia bona orea amo e atoa siri. Laḡani haida gunadiai, ia na orea ai ma e vareai lou. Hari ia na e gwaumu: “Iehova ese e hadibagu mai anina bada ḡauna na, dia dagi iabina, to ia ese e noidamu ḡaudia na baita  kara.” Namona na baita helalotao iseda diba bona kongrigeisin ai ta abimu hahenamodia na Iehova ena amo e maimu. (1 Korinto 4:6, 7 ba duahi.) Bema baita hekokorokumu, Iehova ese basine ḡaukaralaidamu.

9. Mataḡaniḡani karana dainai Satana bona Heva be dahaka e kara?

⁹ Mataḡaniḡani karana baita laloamu neganai, Satana Diabolo ena kara baita laloamu. Guna ia na Iehova ena aneru namona ta dainai, reana hahenamo namodia momo e abi. To ia na e urava ḡau ma haida danu baine abi. E urava taunimanima ese ia bae tomadiho henia, dia Iehova. Satana na e uramu ia baita tohotohoa, una dainai laloda e verimu ḡau momo herea baita ura heni. Ia ese Heva e hereva henia neganai unu e kara toma. Iehova ese mai lalokauna ida Heva bona adavana na aniani momo herea o “imea audia iboudiai huahuadia” e henidia bae ani, to tamona mo e taravatua. (Gen. 2:16) To, Satana ese Heva e koia unu amo baine lalo una e taravatua huahuana baine ania na namo. Heva na dekenai mimia ḡaudia na se lalodia bada, to ia na e urava ḡau momo baine abi. E vara ḡauna na mai dibada. Heva na e kara dika bona gabeai e mase.​—Gen. 3:6, 19.

10. Edena dalai King David na mataḡaniḡani ena idoa ai e moru?

¹⁰ Iehova ese King David na ḡau momo e henia, heḡereḡere taḡa, king dagina, bona tuari ai e duruava inaina e hadareredia. David ese unu harihari ḡaudia dainai Dirava e hanamoa bona e gwa unu harihari ḡaudia na momo herea dainai ‘basine duahidia diba.’ (Sal. 40:5) To gabeai, David na e mataḡaniḡani bona e ura ḡau ma haida danu baine abi. Ena be David adavana na momo, to ia na tau ma ta adavana danu e ura heniava. Una hahine na Bataseba, bona ia adavana na Uria, Hiti tauna. David na Bataseba ida e mahuta hebou bona una hahine na e rogorogo. David na e heudahanai bona dala e karaia Uria e hamasea. (2 Sam. 11:2-15) David be e lalo ia e karaia karana na Iehova ese se itaia, a? Ena be David na laḡani momo Iehova e hesiai heniava, to ena mataḡaniḡani karana dainai hisihisi bada e davari. Gabeai, David na ena kara dika e gwaurai hedinarai bona e helalo-kerehai. Ia na e moale badina Iehova ese ena dika e gwauatao.​—2 Sam. 12:7-13.

11. Efeso 5:3, 4 heḡereḡerena, dahaka ese baine duruda mataḡaniḡani karana baita dadaraia?

 ¹¹ David ena sivarai amo dahaka ta dibamu? Ta dibaiamu ḡauna na, Iehova ese e henida ḡaudia iboudiai baita lalo badamu neganai, mataḡaniḡani karana baita dadaraiamu. (Efeso 5:3, 4 ba duahi.) Namona na dekedai mimia ḡaudia na baita moalelai. Ta ta stadi heniamu neganai, ta hadibaiamu Iehova ese ia e henia ḡau namona ta baine laloa bona baine tenkiu henia. Bema ta na wiki ta lalonai dina ta ta unu be kara tomamu, anina na ia na ḡau idauidau iboudiai 7 be ḡuriḡurilaimu. (1 Tes. 5:18) Oi danu unu o kara tomamu, a? Bema Iehova ese oi daimu ai e kara ḡaudia iboudiai bo lalodia dobumu, una ese oi be durumumu ia ba tenkiu henia. Bona unu bo kara tomamu neganai, dekemu ai mimia ḡaudia na bo moalelaimu. Una ese be durumumu, mataḡaniḡani karana bo dadaraiamu.

12. Mataḡaniḡani karana dainai Iuda Iskariote be dahaka e kara?

¹² Iuda Iskariote na e mataḡaniḡani dainai Iesu taona e tore. To matamanai ia na tau namona. (Luka 6:13, 16) Iesu ese e abia hidi ena aposetolo tauna ta ai ela. Iesu ese ia na e abidadama henia dainai moni mauana e henia baine naria. Iesu bona ena aposetolo ese unu moni e ḡaukaralaiva edia haroro ḡaukara bae durua totona. Unu moni na vaitani hari ina negai tanobada heḡeḡemadai ḡaukarana ta duruamu kontribiusin heḡereḡerena. To gabeai Iuda na e henaohenao, ena be mai dibana Iesu na nega momo taunimanima e hadibadiava basie mataḡaniḡani. (Mar. 7:22, 23; Luka 11:39; 12:15) Iuda ese unu sisiba herevadia na e dadarai.

13. Edena negai Iuda ena mataḡaniḡani karana e hedinarai?

¹³ Iesu bae hamasea negana e kahirakahirava ai, e vara ḡauna ta ese Iuda ena mataḡaniḡani karana e hahedinaraia. Iesu bona ena hahediba taudia, bona Maria kakana Mareta ida, na lepra tauna Simona ese e abidia dae. E anianva lalonai, Maria na e toreisi bona dava bada dehoro namona amo Iesu e horoa. Iuda bona hahediba ma haida na e badu. Hahediba haida na e lalo una dehoro monina na haroro ḡaukara ai bema ḡaukaralaia. To Iuda na ma badi idauna ta dainai e badu. Ia na henaohenao tauna bona e urava maua amo moni baine henao. Gabeai, Iuda na e mataḡaniḡani bona moni dainai Iesu taona e tore.​—Ioa. 12:2-6; Mat. 26:6-16; Luka 22:3-6.

14. Tau ta adavana ida ese Luka 16:13 ena sisiba be ede e badinaia toma?

¹⁴ Iesu ese ia murinai e raka taudia e hadibadia, eto: “Dirava bona Taḡa isiaidia basio lao heni diba.” (Luka 16:13 ba duahia.) Una na momokani. Mani Romania ai tau ta adavana ida ese Iesu ena sisiba e badinaia dalana aita laloa. Idia na taḡa hanuana ta ai moni ḡaukara namona ta e davaria. Idia na e gwa: “Ai na banka ai mai emai abitorehai badana ta dainai, matamanai a lalova una moni ḡaukara na Iehova ena hahenamo ta.” To hekwakwanai na, una moni ḡaukara ese edia hesiai ḡaukara Iehova enai baine hadikaia diba. Idia ese August 15, 2008 ena Watchtower ai atikol ladana, “Maintain Loyalty With a Unified Heart” e duahia murinai, abi hidi e karaia. Idia na e gwa: “Bema moni momo iabina totona tano ma ta baia laomu, emai hetura karana Iehova ida na dia ḡau badana ai baia halaoamu. Ai na a diba una ese emai hetura karana Iehova ida na be hadikaiamu.” Una dainai una moni ḡaukara na se abia dae. To dahaka e vara? Tau ese ena tano ai moni ḡaukara ta e davaria, bona e abiava monina na heḡereḡere edia dabu ḡaudia bae hoi. Hahine na e gwa: “Iehova ese  nega iboudiai ena hesiai taudia na e durudiamu.” Idia na e moalemu badina Biagudia Iehova e hesiai heniamu, to dia moni.

15. Dahaka dainai ta dibamu Satana ena idoa na baita dadarai dibamu?

¹⁵ Dahaka baita kara bema ta itaiamu ita na ta hekokorokumu eiava ta mataḡaniḡanimu? Eda kara baita haidaua na namo. Paulo na e gwa, Diabolo ese “vada e abidia mauri” taudia na ena idoa amo bae roho mauri diba. (2 Tim. 2:26) David enai una na e vara, ia ese Natan ena sisiba e kamonai, ena mataḡaniḡani karana amo e helalo-kerehai, bona ena hetura karana Iehova ida e hanamoa lou. Baita helalotao, Iehova ena siahu ese Satana na e hereaia. Una dainai Iehova ena heduru baita abia daemu neganai, Diabolo ena idoa amo baita heau mauri dibamu.

16. Dahaka ese baine duruda Satana ena idoa baita dadarai?

¹⁶ Momokani, namona na Satana ena idoa amo baita heau mauri bona baita dadaraia vaitani. Dirava ena heduru amo unu baita kara toma diba. To basitato ita na ta goadamu dainai basita morumu. Laḡani daudau Iehova e hesiai henia taudia haida na hekokoroku o mataḡaniḡani ena idoa ai e moru. Una dainai, dina ta ta Iehova ba ḡuriḡuri henia baine durumu, unu amo ba diba emu lalohadai bona kara amo hekokoroku eiava mataḡaniḡani karana o hahedinaraiamu eiava. (Sal. 139:23, 24) Namona na ba hekwarahi unu kara ba dadarai.

17. Kahirakahira ita inaida Diabolo enai be dahaka be varamu?

¹⁷ Satana na laḡani tausen momo lalodiai labana tauna heḡereḡerena momo e tarapudiamu. To kahirakahira ia na be ḡuiamu bona una murinai be hamaseamu. (Apok. 20:1-3, 10) Una nega ta nariamu lalonai Satana ena idoa nahuadia baita toho. Namona na ba hekwarahi hekokoroku bona mataḡaniḡani karadia ba dadarai. Bona lalomu ba hadaia ‘Diabolo ba ginia ahu, bena ia ese baine heautanimu.’​—Iak. 4:7.