TAIHU ta ladana Lisa na e gwa: “Kristen tadikaka bona taihu edia hebogahisi karana ese egu mauri na e haidaua.” * Una na ia ese hereva momokani e abia dae negana ginigunana e herevalaiamu. Anne enai danu unu e vara toma, ia na e gwa: “Lau na tadikaka bona taihu ese e hahedinaraia hebogahisi karana dainai hereva momokani na abia dae, dia Baibul ena hahediba herevadia amo.” Hari, unu taihu raruosi ese Baibul iduahina bona ilalo dobulaina karana na e moalelaiamu, to edia mauri na hebogahisi karana ese e haidaua momokani.

Edena dalai hebogahisi karana baita hahedinaraia, unu amo ma haida baita hagoadadia? Dala rua aita herevalai, ginigunana be eda hereva bona iharuana be eda kara. Bena baita itaiamu, daidiai ediai hebogahisi karana baita hahedinaraia.

Hereva Lada-isidia karoa 31 ai hahine namona e herevalaia, “hebogahisi ihahedibalaina” na ia malana ai. (Her. 31:26) Anina na ia ese e gwauraimu herevadia bona ena hereva dalana na nahuana e tohoamu. Tama danu una hahediba bae badinaia na namo. Tama sina momo na mai dibadia bema natudia be ere dika henidiamu neganai, natudia na be hahisidiamu bona natu na basie uramu idia bae kamonai henidia. Una dainai, bema tama sina na e uramu natudia ese edia hereva bae kamonai bona bae badina, namona na mai edia hebogahisi bona gado namo ida natudia bae hereva henidia.

Bema oi na dia tama ta eiava dia sina ta, to edena dalai emu hereva amo hebogahisi karana ba hahedinaraia? Haerena na Hereva Lada-isidia 31:26 ena kaha ginigunana ai baita davariamu, e gwaumu: “Uduna e hapapaiamu mai aonegana ida.” Una anina na eda hereva bona eda hereva daladia nahuadia baita toho. Unu baita kara toma dibamu bema siboda baita henanadaimu, ‘Ba gwauraiamu herevana ese egu hereva be kamonaiamu taudia be habadudiamu, eiava ediai maino be havaraiamu?’ (Her. 15:1) Oibe, do asita hereva neganai eda hereva nahuadia baita toho na aonega karana.

Aonega herevana ma ta na ini e gwau tomamu: “E hereva haraḡa-haraḡamu tauna ena hereva na dare e hegwadamu na heto.” (Her. 12:18) Ta itaiamu eda hereva bona eda hereva daladia ese haida e hagoadadiamu eiava e hamanokadiamu neganai, be duruda dibamu ta gwauraimu herevadia nahuadia baita toho. Oibe, hebogahisi karana baita hahedinaraiamu neganai, una ese be durudamu haida ihahisidia herevadia basita gwauraimu bona ere dika dalanai na basita herevamu. (Efe. 4:31, 32) Lalohadai dikadia bona hereva dikadia gabudiai na hebogahisi herevadia baita gwaurai bona hahegoada dalanai baita gwauraia. Una dala na Elia, Iehova ena hesiai tauna e gari neganai, Iehova ese e hereva henia dalana amo e hagoadaia. Aneru ta ese Iehova ena hereva na “ere maimu-maimuna” o gado namo dalanai e gwauraia. (1 Han. 19:12) To, dia eda hereva amo mo hebogahisi karana baita hahedinaraia. Namona na eda kara amo hebogahisi karana baita hahedinaraia danu. Edena dalai?

Iehova baita tohotohoamu neganai, hebogahisi dalanai baita herevamu bona hebogahisi dalanai baita karamu. (Efe. 4:32; 5:1, 2) Matamanai tame herevalaia taihu ladana Lisa, na Witnes taudia  ese hebogahisi e hahedinaraia dalana e herevalaia, ia na e gwa: “Ai na nega kwadoḡina lalonai e dorimai ma gabu ta baiala baia noho neganai, kongrigeisin ai tadikaka rarua mai adavadia ida na edia moni ḡaukara amo ofu e abi ai bae durumai emai kohu bae habou. Una negai, lau na Baibul na do asina stadilaiava!” Unu hebogahisi karadia ese Lisa na e durua hereva momokani baine dibaia namonamo totona.

Anne, matamanai tame herevalaia taihuna, na Witnes taudia ese enai e hahedinarai kara namodia dainai e moale. Ia na e gwa: “Tanobada ai, Iehova asie hesiai heniamu taudia danu e nohomu dainai, na daradara taunimanima baina abidadama henidia eiava lasi.” Bona ma e gwa: “Witnes taudia ida na hedavari neganai, asi na abidadama henidiava. Na lalo, ‘Dahaka dainai idia ese lau na e lalogu badamu?’ To e stadi heniguva taihuna ese mai momokanina ida e hahedinaraia kara namona dainai e hagoadagu ia baine abidadama henia totona.” Bena dahaka e vara? Anne na e gwa: “Gabeai, lau ese na dibadiava ḡaudia na na lalodia badava.”

Lisa bona Anne na kongrigeisin taudia ese e hahedinarai kara namodia ese e durudia dainai, e ura hereva momokani bae diba. Kongrigeisin  taudia edia kara namodia ese e durudia Iehova bona ena taunimanima e abidadama henidia.

Haida na hereva namodia be gwauraimu eiava be kirimu, badina una na edia kara eiava kastom. Bema haida na edia kara eiava kastom dainai kara namodia e hahedinaraimu, una na asi ena kerere. To, bema ita ese kara namo ta hahedinaraiamu badina una na eda kara eiava kastom dainai, ita na dia Iehova ena kara ta tohotohoamu.​—Aposetolo Edia Kara 28:2 ida ba haheḡereḡerea.

Momokani, hebogahisi o kara namo na Dirava ena lauma helaḡa huahuana ta. (Gal. 5:22, 23) Hebogahisi karana baita hahedinaraia totona, namona na Iehova baita noia, ena lauma helaḡa ena heduru amo eda lalohadai dalana bona kara baita hanamo. Unu baita kara tomamu neganai, ita ese Iehova bona Iesu baita tohotohodiamu. Momokani, ita na Kristen tauda dainai, ma haida edia namo na ta lalo badamu. To, ita na unu ta kara tomamu badina Iehova bona dekeda taudia na ta lalokau henidiamu. Bona ta hahedinaraiamu, ita na kudouda amo hebogahisi karana ta hahedinaraiamu bona Dirava ese una na e abia daemu.

Ita edai na basine aukamu e kara namo henidamu taudia eiava mai dibada taudia ediai hebogahisi baita hahedinaraia. (2 Sam. 2:6) Dala ta na baita tenkiu henidia. (Kol. 3:15) To, bema oi na o laloamu oi mai dibamu tauna ta enai hebogahisi karana basio hahedinaraia na namo, una be ede bamona?

Mani ina a laloa: Hebogahisi karana ai Iehova ese haheitalai hereadaena e hahedinaraia, iena Hereva amo una kara ai mai anina bada ḡauna ta baita dibaiamu. Ina hereva “hebogahisi hereadaena” na Kristen Grik Revarevadia ai na e ḡaukaralaia momo. Dirava ese ita edai, edena dalai hebogahisi hereadaena e hahedinaraiamu?

Mani a laloa, Iehova ese taunimanima iboudiai ediai hebogahisi karana e hahedinaraiamu dalana na bae mauri totona, ia ese edia mauri iduruna ḡaudia e henimu. (Mat. 5:45) Danu, taunimanima ese Iehova do asie dibaia, to Ia ese ediai hebogahisi e hahedinaraia. (Efe. 2:4, 5, 8) Heḡereḡere, ia ese Natuna vara-edeana e heni taunimanima iboudiai daidiai. Aposetolo Paulo na e gwa, Iehova ese mauri davana e heni na “ena harihari-bada ḡoevadaena.” (Efe. 1:7) Bona, ena be ta kara dikamu bona Iehova lalona ta hahisiamu, to Ia ese dounu ita na e hakaudamu bona e hadibadamu. Iena hahediba herevadia bona ena hereva na “medumedu na heto.” (Deu. 32:2) Ia ese ita daidai e hahedinaraia hebogahisina na basita haloua dibamu. Bona hereva momokanina na ina, bema Iehova ese hebogahisi hereadaena basinema hahedinaraia edai, ita na asi eda vaira nega helarona.​—Petro Ginigunana 1:13 ida ba haheḡereḡerea.

Momokani, Iehova ena hebogahisi karana ese ita na baine duruda bona baine hagoadada diba. Una dainai, dia haida ediai mo hebogahisi baita hahedinaraia, to Iehova baita tohotohoa totona, eda mauri ai taunimanima iboudiai ediai hebogahisi baita hahedinaraia. (1 Tes. 5:15) Hanaihanai hebogahisi baita hahedinaraiamu neganai, ita na lahi na heto paraka dinana ai tauanida e hasiahuamu. Bona eda ruma bese taudia, tadikaka taihu, ḡaukara, bona skuli turadia, bona dekeda taudia baita hagoadadiamu.

Mani a laloa, emu ruma bese taudia bona tadikaka taihu na goada be abimu badina emu hereva bona kara namodia dainai. Reana kongrigeisin ai, tadikaka eiava taihu ta na heduru e uramu; ruma eiava uma ba haḡoeva, o iena ura ḡaudia stoa ai ba hoi. Danu, haroro ḡaukara ai, o davariamu tauna ta na heduru e uramu, oi ese ia be bo duruamu, eiava?

Iehova baita tohotohoa, hanaihanai “hebogahisi ihahedibalaina” na eda hereva bona kara amo baita hahedinaraia.