1. (a) Iehova ese ita be edena helaro e henida? (b) “Iehova ba naria” anina be dahaka? (“Hereva Anina” mauana ba itaia.)

 IEHOVA ese ia e lalokau heniamu taudia iboudiai ediai helaro namo hereana ta e henidia. Kahirakahira ia ese gorere, hisihisi, bona mase be haorediamu. (Apok. 21:3, 4) Ia ese ia e nariamu “manau taudia” be durudiamu tanobada na paradaiso ai be halaoamu. (Sal. 37:9-11) Bona ia ese dala be kehoamu ita ta ta ese Ia ihetura henina dalana namo hereana, hari basita moalelaia dibamu dalana, na baita moalelaia dibamu. Una na helaro hereadaena! To ita be ededia badi daidiai ta abi daemu Dirava ena gwauhamata iboudiai na be vara momokanimu? Iehova ese e gwauraimu ḡaudia na nega iboudiai na e hamomokanidiamu. Ita na badi namona dainai ‘Iehova ta nariamu.’ * (Sal. 27:14) Una baita hahedinaraia dalana na, mai haheaukada bona mai moaleda ida baita nari, Dirava ese ena gwauhamata iboudiai na be haḡuḡurudiamu.​—Isa. 55:10, 11.

2. Iehova be dahaka vada e kara?

² Iehova na vada e hamomokania, ia na ena gwauhamata iboudiai baine haḡuḡurudia. Mani ina haheitalai namo hereana ta a laloa. Apokalupo bukana ai, Iehova na e gwauhamata iseda negai, Ia ese bese, iduhu, bona gado idauidau taudia baine haboudia bona idia na mai lalotamonadia ida ia bae tomadiho henia. Hari ina negai, idia na e gwauraidiamu “hutuma bada herea”  taudia. (Apok. 7:9, 10) Ena be tanobada heḡeḡemadai ai idia na bese, iduhu, bona gado idauidau tatau, ha’hine, bona natu, to idia iboudiai na maino ai e nohomu ruma bese badana ta. (Sal. 133:1; Ioa. 10:16) Una hutuma bada hereana na haroro ḡaukarana e goadalaiamu taudia. Idia na nega iboudiai e heḡaeḡaemu edia helaro tanobada matamatana totona na idia e kamonai henidiamu taudia ediai e herevalaiamu. (Mat. 28:19, 20; Apok. 14:6, 7; 22:17) Bema oi na idia ta, oi ese ḡau namodia bae vara negana na o laloa badamu.

3. Satana be e uramu dahaka baine kara?

³ Diabolo na se uramu oi ese vaira nega helarona bavabia. Ia na e uramu oi na bavabia dae Iehova ese oi na se lalomumu bona Ia ese ena gwauhamata iboudiai na basine hamomokanidiamu. Bema Satana ese eda helaro baine hadikaia, baita manokamu, bona danu Iehova ihesiai henina ḡaukarana baita hadokoamu. Ina stadi ai baita itaiamu, Diabolo na e ura Iobu ena helaro baine hadikaia bona e ura Iobu ese Iehova ihesiai henina karana baine hadokoa.

4. Ina atikol ai dahaka baita herevalaimu? (Iobu 1:9-12)

⁴ Ina atikol ai, Satana ese Iobu ena abidadama Iehova enai baine hadikaia totona e ḡaukaralai daladia baita herevalaimu. (Iobu 1:9-12 ba duahi.) Danu, Iobu ena haheitalai amo baita dibamu ḡaudia bona dahaka dainai baita helalotao Dirava ese ita e lalokau henidamu bona ena gwauhamata iboudiai na be haḡuḡurudiamu, baita herevalaimu.

5-6. Nega kwadoḡi lalonai Iobu enai be dahaka e vara?

⁵ Iobu ena mauri na namo herea. Iehova ida ena hetura karana na namo herea. Ena ruma bese na bada, to e lalotamonamu, bona ena kohu na momo herea. (Iobu 1:1-5) Dina tamona lalonai, Iobu ese kahirakahira ḡau iboudiai e haboio. Ena kohu iboudiai e haboiodia guna. (Iobu 1:13-17) Bena, natuna lalokaudia iboudiai e mase. Mani nega sisina lalonai unu e vara dikadia a lalodia. Tama sina na natudia ta e masemu neganai, e lalohisihisi bada hereamu. Una dainai, mani Iobu bona adavana ese natudia gwauta-osi e mase neganai e abia hemamina a laloa, idia na e hoa, e lalohisihisi bona e daradoko bada herea. Una dainai, ta dibamu Iobu na natuna daidiai e taitaiva neganai, ena dabua e darea bona tano ai e moru!​—Iobu 1:18-20.

⁶ Gabeai Satana ese Iobu e hagorerea bona e hahemaraia. (Iobu 2:6-8; 7:5) Guna, Iobu na ena gabu ai taunimanima ese e matauraia badava tauna. Taunimanima na heduru totona ia dekena e laova. (Iobu 31:18) Hari na da asie urava ia dekena baela. Ia na da ta ese se ura heniava, tadikakana, bamona namodia, bona ena hesiai taudia ese e dadaraia!​—Iobu 19:13, 14, 16.

7. (a) Iobu be e laloava ena hisihisi badina be dahaka, to se ura dahaka baine kara? (b) Edena dalai Kristen tauna ta ese be davariamu hahetohona na Iobu bona adavana ese e davaria hahetohona ida baita haheḡereḡerea diba?

⁷ Satana na e ura Iobu na baine abia dae ia e hisihisiva badina na Iehova ena lalonamo e haboioa dainai. Heḡereḡere, Satana ese lai gubana ta e hatoaia Iobu natuna gwauta-osi e aniani hebouva rumana e hadikaia. (Iobu 1:18, 19) Danu, ia ese guba amo lahi e hadihoa dia Iobu ena ubu-ubu ḡaudia mo e hamasedia, to unu ubu-ubu ḡaudia e naridiava hesiai taudia danu. (Iobu 1:16) Lai bona lahi na guba amo e diho dainai, Iobu na e lalo unu na Iehova Dirava ese e Havaradia. Una dainai, Iobu na e abia dae reana ena kara ta dainai Iehova na e habadua. Ena be unu e lalo toma, to Iobu na se ura Tamana gubai e nohomu baine gwauraia dika. Iobu ese e hahedinaraia laḡani momo lalodiai  Iehova amo ḡau namodia momo e abia. Una dainai, ia na e lalo bema Dirava ese e henia ḡau namodia na mai ena moale ida e abi dae, ḡau dikadia e heniamu danu baine abidia dae. Una dainai, ia na e gwa: “Iehova ladana bae imodaia.” (Iobu 1:20, 21; 2:10) Una negai, Iobu na hekwakwanai bada herea moni dalanai, hemami dalanai, bona tauanina ai e haheaukalai. To, Satana ena hahetoho na unuseniai se doko.

8. Satana ese Iobu be edena dalai ma e tohoa?

⁸ Satana ese dala ma ta ai Iobu e tohoa; ia ese tura koikoidia e ḡaukaralaidia Iobu bae hahemaraia totona. Unu tatau ese Iobu e hamaoroa ia e hisihisiva karana ese e hahedinaraia ia na kerere haida e kara. (Iobu 22:5-9) Idia ese e hamaoroa ena be ia na dia kerere tauna, to Dirava ihamoalena totona be karamu ḡaudia na asi anidia. (Iobu 4:18; 22:2, 3; 25:4) Idia na e urava Iobu bae hadaradaraia, baine laloa Dirava ese ia na se lalokau heniamu, basine nariamu, bona iena hesiai ḡaukara Dirava enai na asi anina. Edia hereva dainai reana Iobu na be laloamu ia na asi iduruna.

9. Dahaka ese Iobu e durua baine boga auka bona baine goada?

⁹ Mani ina a laloa. Iobu na kahu ai helai, hisihisi bada herea e animu. (Iobu 2:8) Turana ese e gwau heniamu bona ladana e hadikaiamu. E davari hahetohodia na vaitani nadi metaudia na heto ia latanai, a natuna e haboioa hisihisina be vaitani ḡau ta ese kudouna bema gwadaia bamona. Matamanai Iobu na ḡau ta se gwauraia. (Iobu 2:13–3:1) Bema Iobu turana na Iobu ḡau ta se gwauraia dainai bae laloa ia na da e uramu Dirava baine rakatania, edia lalohadai na kerere. Bamona koikoidia ese e hereva heniava lalonai, reana Iobu na e gaga isi bena idia e hamaorodia eto: “Harihari ela bona baina mase, egu lalo-maoromaoro basina negea!” (Iobu 27:5) Dahaka ese Iobu e durua baine boga auka bona baine goada, ena be e hisihisi bada herea? Ena be unu hahetoho ese e  hametaua bada herea, to e abia dae momokani ia e lalokau heniamu Diravana ese ia na baine durua. Mai dibana ena be baine mase, to Iehova ese baine hatorea isi lou.​—Iobu 14:13-15.

10. Iobu sivaraina ese be dahaka e hadibadamu?

¹⁰ Iobu sivaraina ese e hadibadamu Satana ese ita na basine dorida dibamu Iehova baita rakatania bona Iehova na ḡau iboudiai e itamu. Danu Iobu enai e vara ḡaudia ese mai anina bada ḡaudia ma haida e hadibadamu. Mani Iobu amo baita dibamu ḡaudia haida aita herevalai.

11. Bema Iehova baita abidadama henia nohomu, dahaka baita karamu? (Iakobo 4:7)

¹¹ Iobu ese e hamomokania bema Iehova baita abidadama henia nohomu, hahetoho idauidau baita haheaukalaimu bona Satana baita koua dibamu. Dahaka be varamu? Baibul ese e hadibadamu Diabolo ese be heautanidamu.​—Iakobo 4:7 ba duahia.

12. Edena dalai toreisi lou helarona ese Iobu e hagoadaia?

¹² Namona na toreisi lou helarona baita abidadama henia momokani. Atikol matamanai tame herevalaia heḡereḡerena, Satana ese nega momo mase igari henina karana e ḡaukaralaiamu eda abidadama baita rakatania totona. Satana na e gwa Iobu ese ḡau iboudiai, ena abidadama Dirava enai danu baine rakatani diba, unu amo ena mauri basine haboioa. Satana na kerere. Ena be Iobu na e laloa ia na be masemu, to ena abidadama Iehova enai na se rakatania. Ia na e abia dae Iehova na kara namo Diravana bona e diba momokani Iehova ese gabeai ḡau iboudiai baine hamaoromaoro diba, una ese e durua e haheauka. Iobu na e abidadama bema e maurimu lalonai Iehova ese hekwakwanai basine hamaoromaoro, vaira negai Dirava ese Iobu baine hatorea isi lou diba. Iobu ese toreisi lou helarona na e abia dae momokani. Bema una helaro baita abia dae momokanimu, ena be dibada baita masemu, to una ese eda abidadama Dirava enai na basine hadikaia dibamu.

13. Dahaka dainai Satana ese Iobu enai e ḡaukaralai koikoi daladia baita diba namonamo na namo?

¹³ Namona na Satana ese Iobu ena e ḡaukaralai koikoi daladia baita diba namonamo na namo badina ia ese hari ina negai dala unu bamodia e ḡaukaralaimu ita baine hamoruda. Mani Satana ese e gwauraia herevana a laloa: “Tau ta [dia Iobu mo] ese ena orea bona ena kohu iboudiai baine heni, ena mauri ibodohilaina.” (Iobu 2:4, 5) Satana ena hereva anina na, ita ese Iehova Dirava na asita lalokau henia momokanimu, bona bema ḡau ta ese eda mauri be hadikaia dibamu neganai ita na Iehova na baita rakataniamu. Bona ma e gwa Dirava ese ita na se lalokau henidamu bona ia totona ta karamu ḡaudia na se lalodiamu. Satana ena kara na da e hadibada gunamu dainai, ita Iehova ta abidadama heniamu tauda na Satana ena koikoi karadia ese basine hamoruda diba.

14. Edena dalai hahetoho ese baine hahedinaraia ita be taunimanima ede bamona? Haheitalai ta a gwauraia.

¹⁴ Namona na hahetoho na baita lalodia be durudamu eda kara baita dibadia namonamo dalana. Iobu ese e davari hahetohodia ese e durua ena manoka ḡaudia baine dibadia bona baine hamaoromaorodia. Ia e dibaia ḡauna ta na, manau karana baine hahedinaraia badabada na namo. (Iobu 42:3) Ita danu hahetoho baita davarimu neganai, siboda eda kara baita diba namonamomu. Tadikaka ta ladana Nikolay, * ena be ena gorere na bada to dibura ruma ai e atoa, na e gwa: “Dibura ruma na X-ray ta heḡereḡerena, Kristen tauna ena kara namodia baine hahedinarai diba.” Eda manoka ḡaudia baita dibamu neganai, baita hamaoromaorodia dibamu.

15. Daika baita kamonai henia na namo, bona dahaka dainai?

 ¹⁵ Namona na Iehova baita kamonai henia, dia ita inaida. Iobu na Iehova ese e hereva henia neganai e kamonai namonamo. Dirava na Iobu e hereva henia neganai, vaitani Dirava na e gwa: ‘Na kara ḡaudia o itadiamu, a? Emu ai e vara ḡaudia iboudiai na mai dibagu. O laloamu lau ese oi basina narimu diba, a?’ Iobu na mai manauna ida e haere bona Iehova ena kara namodia e lalodia bada. Ia na e gwa: “Gunaguna taiagu amo sivaraimu na kamonai, a harihari matagu ese e itamumu.” (Iobu 42:5) Oi o helalotaomu Iobu ese unu hereva e gwaurai neganai, ia be edekahai? Ia na kahu ai helai, tauanina na totototo ese e daea, bona natuna e mase daidiai e lalohisihisi bada hereamu. Ena be Iobu enai unu e vara, to Iehova ese e hamomokania Iobu na e lalokau henia bona e hadibaia ia na e lalonamo heniava.​—Iobu 42:7, 8.

16. Isaia 49:15, 16 ena hereva heḡereḡerena, hahetoho ta davarimu neganai dahaka baita laloatao na namo?

¹⁶ Hari ina negai danu, taunimanima ese be gwau henidamu, bona be kara auka henidamu, vaitani ita na asi anida. Ita ta ta ladada eiava eda orea ladana be hadikaiamu bona be ‘gwau henida koikoimu.’ (Mat. 5:11) Iobu sivaraina amo tame diba, Iehova na mai dibana hahetoho baita davarimu neganai, Ia na dounu baita badinaiamu. Iehova ese ita na e lalokau henidamu bona Ia e abidadama heniamu taudia na basine rakatanidia dibamu. (Isaia 49:15, 16 ba duahi.) Dirava e inai heniamu taudia ese e gwauraimu hegwau heni herevadia na basita lalodia bada! Tadikaka ta ladana James, Turkey amo, ena ruma bese na hahetoho badadia e  davari, na e gwa: “A laloparara Dirava ena taunimanima e sivarailaidia koikoimu herevadia baia kamonaimu neganai, emai abidadama na be hamanokaiamu. Una dainai, ai ese emai Basileia helarona a laloa bada bona Iehova ihesiai henina ḡaukarana a goadalaia. Unu amo emai moale na asia haboioa.” Iobu heḡereḡerena, Iehova baita kamonai henia! Inaida edia koikoi herevadia ese eda helaro na basie hadikaia.

17. Heberu karoa 11 ai e gwauraidia abidadama tatau bona hahine edia haheitalai amo dahaka o dibamu?

¹⁷ Iehova ena hesiai taudia padadiai, Iobu na hahetoho badadia lalodiai e boga auka bona e goada tauna ta. To, aposetolo Paulo ese Heberu Kristen taudia e tore henidia neganai, ia ese ma abidadama taudia momo e herevalaidia, e gwauraidia Witnes taudia “hutuma bada.” (Heb. 12:1) Idia danu hahetoho badadia e davari; to Iehova e abidadama henia. (Heb. 11:36-40) Edia haheauka bona edia hekwarahi be asi anina, a? Lasi! Ena be edia mauri lalonai Iehova ena gwauhamata iboudiai e ḡuḡuru na asie ita, to dounu Iehova e abidadama henia. Bona mai dibadia Iehova ese idia na e lalonamo henidiamu dainai, e abia dae momokani unu gwauhamata bae ḡuḡuru na baitadia. (Heb. 11:4, 5) Edia haheitalai ese be hagoadada dibamu dounu Iehova baita abidadama henia.

18. Lalomu ba hadaia dahaka ba kara na namo? (Heberu 11:6)

¹⁸ Hari ina negai, ta noholaiamu tanobadana ai kara dika na e bada hereamu bona e dika e laomu. (2 Tim. 3:13) Satana na doini Dirava ena taunimanima na e tohodiamu. Ena be vaira negana ai dahaka hahetoho baita davari, namona na laloda baita hadai Iehova totona baita ḡaukara goada, badina ta abia dae momokanimu ita na “Mauri Diravana ta abidadama heniamu.” (1 Tim. 4:10) Ba helalotao, Dirava ese Iobu e kara henia karana amo e hahedinaraiamu Iehova ‘ena hebogahisi bona ena harihari-bada na bada herea.’ (Iak. 5:11) Iobu heḡereḡerena, namona na dounu Iehova baita badinaia, baita abia dae Iehova ese Ia “e tahuamu taudia davadia namodia baine henidia.”​—Heberu 11:6 ba duahia.