1. Iehova ese helalo-kerehai taudia be dahaka hahegoada herevana e henidia?

 ENA be Iehova na Ihavarada Tauna, Taravatu Ihenina Tauna, bona Hahemaoro Tauna, to ia na ita Tamada lalokauna danu. (Sal. 100:3; Isa. 33:22, NWT) Ia vairanai ta kara dikamu bona ta helalo-kerehai momokanimu neganai, ia na mai ena ura ida eda dika e gwautaomu. (Sal. 86:5) Peroveta tauna Isaia amo, Iehova ese ina hahegoada herevana e heni: “Ena be emui dika na paira na heto, to bae huroka-kuroka snow heḡereḡerena.”​—Isa. 1:18.

2. Bema ta uramu ma haida ida maino ai baita noho, dahaka baita kara be namo?

² Ita iboudai na dia ḡoevadae tauda dainai, eda hereva bona kara amo haida ta hahisidiamu. (Iak. 3:2) To una anina na da dia ida ida basita hetura namonamomu, lasi, to baita hetura namonamo dibamu bema eda dika baita hegwautao hehenimu. (Her. 17:9; 19:11; Mat. 18:21, 22) Bema ta ese ḡau maraḡidiai laloda e hahisimu, Iehova na e uramu dika baita gwautao. (Kol. 3:13) Ita na badi namona dainai unu baita kara toma. Badina Iehova ese eda “dika idoinai” na e gwauataomu.​—Isa. 55:7.

3. Ina atikol ai dahaka baita herevalaimu?

³ Ina atikol ai, dia ḡoevadae taudia ese dika igwautaona karana ai Iehova bae tohotohoa diba dalana baita herevalaiamu. Ededia kara dikadia be elda taudia ediai baita gwaurai hedinarai  na namo? Dahaka dainai Iehova ese e hagoadadamu haida edia dika baita gwautao? Bona haida edia kara dikadia daidiai e hisihisi bada herea tadikaka bona taihu edia amo dahaka baita dibamu?

4. (a) Iehova ena hesiai tauna ta ese kara dika badana ta baine karaia neganai, dahaka baine kara na namo? (b) Elda taudia ese kerere tauna bae hereva henia neganai, edia maduna be dahaka?

⁴ Namona na kara dika badadia na elda taudia ediai baita gwaurai hedinarai. Unu kara dikadia haida na 1 Korinto 6:9, 10 ai e herevalai. Kara dika badadia na Dirava ena taravatu e utumu kara dika rohorohodia. Bema Kristen tauna ta na una kara dikana ta baine karaia, namona na Iehova Dirava baine ḡuriḡuri henia, bona bainela kongrigeisin elda taudia baine hereva henidia. (Sal. 32:5; Iak. 5:14) Elda taudia edia maduna be dahaka? Iehova sibona na mai ena maoro kara dikadia iboudiai baine gwautao totona, bona una na mauri idavalaina boubouna dainai baine karaia diba. * To, Iehova ese elda taudia na maduna e henidia, Baibul ena hereva heḡereḡerena ai abi hidi bae karaia bema kara dika tauna na dounu kongrigeisin ai baine noho eiava lasi. (1 Kor. 5:12) Una bae karaia totona, namona na ini henanadai haeredia bae haerodia: Ia be mai lalona idoinai ida una kara e karaia, a? E karaia kara na be e hunia haida amo eiava? Ia ese una kara be nega daudau lalonai e karaia loulou, eiava? Mai anina bada ḡauna na, ia ese helalo-kerehai momokani toana be e hahedinaraiamu, a?​—Apos. 3:19.

5. Elda taudia edia ḡaukara amo dahaka hahenamo be varamu?

⁵ Elda taudia ese kerere tauna e hereva heniamu neganai, bae laloa ḡauna na, Iehova ese kerere tauna ihahemaoro henina totona vada e atoa dalana heḡereḡerenai bae hahemaoro. (Mat. 18:18) Una dala ese kongrigeisin be ede e durua tomamu? Asie helalo-kerehaimu kara dika taudia na kongrigeisin murimurinai e atodiamu neganai, una ese kongrigeisin e gimaiamu unu amo Iehova ena mamoe na basie hekwakwanai. (1 Kor. 5:6, 7, 11-13; Tito 3:10, 11) Danu kara dika tauna e duruamu baine helalo-kerehai bona Iehova ese ena dika baine gwauatao. (Luka 5:32) Elda taudia na helalo-kerehai tauna dainai bae ḡuriḡuri bona Iehova bae noia baine durua lauma dalanai baine goada lou totona.​—Iak. 5:15.

6. Bema ta na kongrigeisin murimurinai bae atoa, ena dika bae hegwautao diba, a?

⁶ Bema e kara dika tauna na elda taudia ese bae hereva henia, to basine helalo-kerehai be ede bamona? Ia na kongrigeisin murimurinai bae atoa. Bema ia na gavamani ena taravatu ta e utua dainai ena dika davana baine abia, elda taudia ese una na basie koua. Iehova ese gavamani na gwaumaoro e henidia hahemaoro bae karaia bona taravatu baine utua tauna bae panisia​—ena be una tau na e helalo-kerehai eiava lasi. (Roma 13:4) To, bema ta na gabeai baine laloparara e karaia karana na kerere bona baine helalo-kerehai momokani bona ena kara baine haidaua, Iehova na mai ena ura ida ena dika be gwauataomu. (Luka 15:17-24) Una na momokani, ena be e karaia karana na kara dika badana.​—2 Sis. 33:9, 12, 13; 1 Tim. 1:15.

7. Ita e hahisida tauna ena dika be edena dalai baita gwauatao diba?

⁷ Ta moalemu badina ta dibamu ita ese abi hidi na basita karamu bema Iehova ese kara dika tauna ena dika baine gwauatao eiava lasi! To, ḡau ta na ita siboda ese baita abia hidi. Una be dahaka? Nega haida, ta ese ita na be hahisida bada hereamu, bena reana be sori  henidamu bona be noidamu ena dika baita gwauatao. To nega haida, ia na unu na basine kara tomamu o basine sorimu. To ita ese abi hidi baita karaia diba iena dika baita gwauatao, bona basita badu noho badu noho. Momokani, bema be hahisida bada hereamu, ena dika igwautaonai na baita halahemu bona basita karaia haraḡamu. The Watchtower, September 15, 1994 ḡauna, na e gwa: “Bema ta ena dika o gwauataomu, una anina na dia iena kara dika o abia daemu. Kristen tauna ese dika baine gwauatao anina na una hekwakwanai na Iehova imana ai baine atoa. Iehova na hahemaoro maoromaoro tauna hereadaena, bona ia ese nega korikori ai hahemaoro maorona baine karaia.” Dahaka dainai Iehova ese e hagoadadamu dika baita gwautao bona hahemaoro karana na Ia imana ai baita rakatania?

8. Edena dalai dika ta gwautaomu karana ese e hahedinaraiamu Iehova ena hebogahisi karana na ta laloa badamu?

⁸ Dika ta gwautaomu karana ese e hahedinaraiamu Iehova ena hebogahisi karana na ta laloa badamu. Parabole ta ai, Iesu ese Iehova na hanua pavapavana ta ida e haheḡereḡerea; una tau ese ena hesiai tauna ena abitorehai na bada herea bona basine haloua diba dainai e gwauatao. To, una hesiai tauna ese bamona hesiai tauna ma ta, ienai moni maraḡina e abia torehai tauna, na se bogaia hisi. (Mat. 18:23-35) Iesu be dahaka ita e hadibadamu? Bema Iehova ena hebogahisi karana ita edai baita laloa badamu, una ese be doridamu ma haida edia dika baita gwautaomu. (Sal. 103:9) Laḡani momo gunadiai, The Watchtower ese ini e herevalaia toma: “Herevana nega hida bamoda edia dika baita gwautaomu, to una ese Dirava na Keriso amo eda dika e gwautao bona e bogada hisi karana na basine haheḡereḡere diba.”

9. Iehova be daidia ediai hebogahisi karana e hahedinaraiamu? (Mataio 6:14, 15)

⁹ Dika e gwautaomu taudia na edia dika be hegwautaomu. Iehova ese hebogahisi taudia na e bogadia hisimu. (Mat. 5:7; Iak. 2:13) Iesu ese ena hahediba taudia ḡuriḡuri dalana e hadibadia neganai, una e hahedinaraia. (Mataio 6:14, 15 ba duahi.) Guna, Iehova ese una poin tamona na iena hesiai tauna Iobu e hereva henia neganai e hahedinaraia danu. Una abidadama tauna na tatau tatoi Elifasa, Bildad, bona Sofara edia hegwau heni herevadia dainai e hisihisi bada. Iehova ese Iobu e hamaoroa idia daidiai baine ḡuriḡuri. Iobu na unu e kara toma murinai, Iehova ese e hanamoa.​—Iobu 42:8-10.

10. Dahaka dainai hemaka karana ese dika baine havaraia diba? (Efeso 4:31, 32)

¹⁰ Hemaka karana ese dika baine havaraia diba. Iehova na e uramu hemaka karana baita hadokoa karana amo baine vara hemami namona baita moalelaia. (Efeso 4:31, 32 ba duahi.) Ia ese e hagoadadamu “badu” bona “daḡedaḡe” baita rakatania. (Sal. 37:8) Una sisiba baita badinaia na aonega karana. Hemaka karana ese baine hagorereda diba bona laloda baine hahekwarahia diba. (Her. 14:30) Baita badu noho badu nohomu karana ese e hahisida tauna na basine hadikaiamu, una na vaitani ita ta inuamu poisina ese ta badu heniamu tauna basine hadikaiamu heḡereḡerena. Una dainai, haida edia dika ta gwautaomu neganai, ita siboda eda namo ta havaraiamu. (Her. 11:17) Laloda bona kudouda be mainomu, bona Iehova ena hesiai ḡaukara na dounu baita karaiamu.

11. Baibul ese dika davana ihalouna karana be ede e herevalaia toma? (Roma 12:19-21)

¹¹ Dika davana iheni louna na Iehova sibona ese baine karaia ḡauna. Iehova ese maoro na se henida e hahisidamu tauna ena dika davana baita haloua. (Roma 12:19-21 ba duahi.) Ita  na dia ḡoevadae dainai, hahemaoro maoromaoro na basita karaia dibamu, Dirava e karamu heḡereḡerena. (Heb. 4:13) Bona nega haida, eda hemami ese eda hahemaoro karana na baine hadikaia diba. Iehova ena lauma helaḡa ena heduru amo Iakobo ese ina hereva e torea: “Taunimanima edia badu ese Dirava ena kara maoromaoro se havaraiamu.” (Iak. 1:20) Baita abia dae diba Iehova ese kara maorona bona hahemaoro maoromaorona baine karaia diba.

12. Edena dalai Iehova ena hahemaoro maoromaoro karana baita abidadama henia diba?

¹² Kara dika igwautaona karana ese be hahedinaraiamu, Iehova ena hahemaoro karana na ta abidadama heniamu. Hekwakwanai na Iehova imanai baita atoa karana ese e hahedinaraiamu, ta abia daemu Iehova ese e vara kereredia iboudiai baine hamaoromaorodia diba. Ia ese e gwauhamatalaia tanobada matamatana lalonai, hemami e hadikamu ḡaudia iboudiai na “basie lalodia tao bona basie lalodia une” ela bona hanaihanai. (Isa. 65:17) To bema ta ese e hahisida dikadika neganai, momokani kudouda amo badu bona lalohisihisi karana baita kokia diba, a? Mani haida ese una e karaia diba dalana aita herevalaia.

13-14. Dika igwautaona karana ai Tony bona José edia ekspiriens amo dahaka ome diba?

¹³ Kristen tadikaka bona taihu momo na, ena be haida ese e hahisidia bada herea, to edia dika na e gwautao. Unu e kara toma dainai dahaka hahenamo e davari?

¹⁴ Tony, * Philippines ai e nohomu tauna, na hereva momokani do se abia dae neganai, e diba kakana badana ta na tau ta ladana José ese e alaia. Una negai, Tony na badu dikadika bona daḡedaḡe tauna, bona e ura kakana e alaia tauna baine alaia. José na pulis ese e arestia bona ena kerere dainai e hadiburaia. Gabeai, José na dibura amo e halasia neganai, Tony na e gwauhamata baine tahua ela bona baine hamasea. Una dainai ipidi ta e hoia. Gabeai Tony na Iehova ena Witnes taudia ida Baibul e stadilaia matama. Ia na e gwa: “Na stadiva neganai, na diba egu kara baina haidaudia na namo, bona una anina egu badu karana baina hadokoa danu.” Se daudau, Tony na e bapatiso bena gabeai kongrigeisin elda ta ai ela. Mani ena hemami da laloa, ia na e kamonai José danu Iehova ena bapatiso hesiai tauna ta  ai dela! Raruosi e hedavari neganai, e herosi bona Tony ese José e hamaoroa ena dika na de gwauatao. Tony na e gwa una dika e gwauatao neganai moale bada mamina e abia, bona una hemami namo hereana na hereva amo basine gwauraia hedinarai dibamu. Oibe, Tony na mai ena ura dia dika e gwauatao dainai, Iehova ese e hanamoa.

15-16. Dika igwautaona karana ai Peter bona Sue edia ekspiriens amo dahaka ome diba?

¹⁵ Laḡani 1985 ai, Peter bona Sue na Kingdom Hall ai e hebouva lalonai bomu ta e pou. Tau ta ese una bomu na Kingdom Hall lalonai e atoa! Una bomu e pou dainai Sue ena roharoha bona kamona karana na e hadikadia. Bona ḡau bonadia iharudia karana danu. * Peter bona Sue na nega momo sibodia e henanadaiva, ‘Dahaka dainai taunimanima haida na kara dika unu bamodia e karamu?’ Laḡani momo muridiai, una kerere e karaia tauna, dia Iehova ena hesiai tauna ta, na pulis ese e arestia bona dibura ai e atoa ena mauri dinadia iboudiai unuseniai baine noho. Peter bona Sue na e nanadaidiamu bema una tau ena dika na de gwauatao eiava lasi neganai, idia na e gwa: “Iehova ese e hadibamai ta baia badu henia noho badu henia noho karana ese tauanimai emai hemami bona emai lalohadai karana baine hadikaia diba. Una dainai, una ḡau e vara murinai, Iehova a noia baine durumai una tau ena dika baia gwauatao bona maino ai baia noho.”

¹⁶ Idia ediai una tau ena dika baie gwautao be ḡau haraḡana, a? Lasi. Idia na ma e gwa: “Sue ena bero daidiai a hekwarahimu negadiai, a habadumu. To una hekwakwanai na asia laloa noho laloa nohomu dainai, karaharaḡa una badu mamina na e boiomu. Baia gwa diba, bema una bomu e atoa tauna na nega ta tadikakamai ai bainela neganai, baia abia dae diba. Ina ekspiriens ese e hadibamaimu Baibul ena hahekau herevadia ese bae ruhada diba; ita ese asita lalodiamu daladia ai danu be ruhada dibamu! Bona a dibamu Iehova ese e vara dikadia iboudiai kahirakahira be hanamodia loumu dainai, una ese e hagoadamaimu.”

17. Dika igwautaona karana ai Myra ena ekspiriens amo dahaka ome diba?

 ¹⁷ Myra na hereva momokani e abia neganai, ia na da de headava bona natuna na rarua bona idia na do mamaraḡi. Adavana ese hereva momokani na se abia dae. Adavana na gabeai e heudahanai bona ena ruma bese na e rakatania. Myra na e gwa: “Adavagu ese e rakatanimai neganai, lau ese vaevae adavadia ese e rakatanidia taudia ese e mamimu hemamidia na abi​—heḡereḡere na hoa, asina hamomokania, na lalohisihisi, na laloava una na lauegu kerere bona na baduva.” Ena be edia headava na da e doko, to adavana ese e rakatania karana dainai e vara hisihisina na dounu mia. Myra na ma e gwa: “Unu hemami ese hua momo lalodiai egu mauri na e hadikaia, bona na laloparara una ese egu hetura karana Iehova bona ma haida ida na e hadikaia.” Hari, Myra na e gwa ia ese adavana gunana ibadu heni nohona karana na da e hadokoa. E ura dikadikamu adavana gunana ese nega ta Iehova baine hetura henia. Myra na vairai bae vara ḡaudia e lalodia badamu. Ia sibona ese natuna raruosi e naridia ela bona idia danu Iehova ena hesiai taudia ai ela. Hari, Myra bona natuna bona edia ruma bese na mai moaledia ida Iehova e hesiai heniamu.

18. Iehova na Hahemaoro Tauna Heredaena dainai, baita abia dae diba ia be dahaka baine kara diba?

¹⁸ Ta moalemu badina ta dibamu taunimanima ta ta ihahemaoro henidia maduna na dia ita ese ta huaiamu! Iehova na Hahemaoro Tauna Hereadaena dainai, una mai anina bada ḡaukarana be karaiamu. (Roma 14:10-12) Baita abia dae momokani diba, ia be hahemaoromu neganai, hanaihanai hahemaoro maoromaoro dalanai be hahemaoromu. (Gen. 18:25; 1 Han. 8:32) Ia na basine kara kereremu!

19. Iehova ena hahemaoro ḡoevaḡoeva karana dainai dahaka baine haḡuḡurua diba?

¹⁹ Ta ura dikadikamu Iehova ese taunimanima na dia ḡoevadae taudia bona mai edia kara dika dainai e kara ḡau dikadia iboudiai baine hanamodia lou negana baita itaia. Una negai, tauani bona eda hemami e hadikamu ḡaudia iboudiai na be ore vaitanimu. (Sal. 72:12-14; Apok. 21:3, 4) Ma basita lalodia lou dibamu. Una nega namona ta nariamu lalonai, ta moalemu badina Iehova ese e hagoadadamu ia baita tohotohoa diba bona ma haida edia dika baita gwautao.