1. Taunimanima ese e garilaimu ḡaudia haida be dahaka?

 MANI ini e vara momokani sivaraidia a lalodia. Nestor bona adavana María na e urava pablisa dia momo gabuna ai ba ha haroro. * To, unu bae kara toma totona edia mauri dalana bae haidaua na namo. To e gariva badina bema edia moni na dia heḡereḡere, reana basie moalemu. Biniam na eda ḡaukara e taravatua tanona ta ai Iehova ena Witnes ta ai ela neganai, e laloparara ia na Dirava ena taunimanima ta dainai bae daḡedaḡe henia diba. Una dainai e gari. To ena gari e habadaia ḡauna na, bema ena ruma bese ese iena tomadiho matamatana be dibaiamu neganai, idia be ede be kara tomamu. Valérie na kensa dikana ta e abia, bona e hekwarahiva bae ivaia neganai rara basine ḡaukaralaia diba doktana ta baine davaria. Ta lalopararamu, ia na reana baine mase garina e gariva.

2. Dahaka dainai baita hekwarahi eda gari karana baita hanaia na namo?

² Oi danu emu ai ḡau unu bamona ta e vara dainai o gari, a? Ita momo edai una na e vara. Bema eda gari ibiaguna karana basita dibaiamu, abi hidi kereredia baita karamu dainai una ese eda hetura karana Iehova ida be hadikaia dibamu. Satana na unu e ura tomamu. Danu ia na e uramu eda gari karana baine ḡaukaralaia Iehova ena taravatu baita utudia, heḡereḡere sivarai namona basita harorolaia. (Apok. 12:17) Satana na dika herea, se hebogahisimu, bona mai ena siahu. To sibomu na iena amo ba hegima diba. Edena dalai?

3. Dahaka ese baine duruda eda gari karana baita hanaia diba?

 ³ Bema baita abia dae Iehova na ita e lalokau henidamu bona ia na ita eda kahai, Satana na baita hadarerea dibamu. (Sal. 118:6) Haheitalai ta na ina, Salamo 118 e torea tauna na hekwakwanai idauidau e davari. Inaina na momo herea, idia haida na dagi bada taudia (siri 9, 10). Nega momo, e lalohekwarahi bada hereava (siri 13). Bona Iehova ena amo matahakani aukana e abia (siri 18). To, una salamo itorena tauna na ena ane lalonai e gwa: “Lau na asina garimu.” Dahaka dainai ia na se gari bona e mamia ḡau ta ese basine hadikaia? Mai dibana ena be Iehova ese e sisiba henia, to Tamana gubai e nohomu ese ia na e lalokau henia badava. Una salamo itorena tauna na e abia dae momokani ena be dahaka hekwakwanai baine davari, to ia e lalokau heniamu Diravana na hanaihanai noho heḡaeḡae ia baine durua.​—Sal. 118:29.

4. Bema baita abia daemu Dirava ese ita na e lalokau henidamu, dahaka ḡau daidiai basita gari dibamu?

⁴ Namona na baita abia dae Iehova ese ita ta ta na e lalokau henidamu. Unu baita kara tomamu neganai, una ese be durudamu ini ḡau toi daidiai basita garimu: (1) Eda ruma bese basita ubua diba garina; (2) taunimanima igari henidia, bona (3) mase garina. Paragraf ginigunanai tame herevalaidia taudia ta ta ese edia gari karana na e hahanaia, badina e abia dae Dirava ese idia na e lalokau henidiamu.

5. Dahaka ḡau ese ruma bese kwarana ta lalona baine hahekwarahia diba? (Rau 1 laulauna ba itaia.)

⁵ Kristen ruma bese kwarana ese ena ruma bese inarina madunana na e laloa badamu. (1 Tim. 5:8) Bema oi na ruma bese kwarana ta, reana vanegai e vara pandemic dainai o lalohekwarahiva emu moni ḡaukara na ba haboioa diba. Reana o lalohekwarahiva badina o laloamu ruma anianidia bona renti davadia eiava banka ai ruma davana ihalouna daidiai bo hekarahimu. Danu reana o gari badina bema emu ḡaukara bo haboioamu neganai, ma ta basio davaria dibamu. Eiava Nestor bona María, matamanai tame herevalaidia taudia heḡereḡeredia, reana o daradaramu bema emu moni ḡaukara bo haidauamu neganai tauani dalanai basio heḡereḡeremu. Satana ese ḡau unu bamodia ilalohekwarahilaidia eiava igarilaina karana e ḡaukaralaia momo de hamorudia.

6. Satana be e uramu ita be dahaka baita abia dae?

⁶ Satana na e uramu baita abia dae Iehova ese ita ta ta na se lalodamu bona basine durudamu eda ruma bese baita naria totona. Una dainai, reana baita laloamu herevana dahaka baine vara, to eda moni ḡaukara na basita rakatania, ena be una ese Baibul ena hahekau herevadia na baine utu.

7. Iesu ese dahaka hahegoada herevana e henida?

⁷ Iesu, Tamana e dibaia namonamo tauna ese e hagoadadamu, eda Dirava na mai dibana eda dabu ḡaudia be dahaka, do asita noia negana ai. (Mat. 6:8) Bona Iesu na mai dibana Iehova na noho heḡaeḡae eda dabu ḡaudia baine havaradia. Ita na Kristen tauda dainai, ita na Dirava ena ruma bese taudia. Ta dibamu Iehova na ruma bese Kwarana dainai, ia ese 1 Timoteo 5:8 ai e gwauraia hahekau herevana na be badinaiamu.

8. (a) Dahaka ese baine duruda diba eda ruma bese baita naria karana basita lalohekwarahilaia? (Mataio 6:31-33) (b) Laulau ai e hedinarai heḡereḡerena, tau ta adavana ida ese aniani na taihu ta dekena e laohai, edena dala edia haheitalai baita tohotohoa diba?

⁸ Bema baita abia daemu Iehova ese ita bona eda ruma bese na e lalokau henidamu, basita daradaramu ia ese eda dabu ḡaudia na be havara henidamu. (Mataio 6:31-33 ba duahi.) Iehova na e uramu eda dabu ḡaudia baine heni, bona ia na mai ena lalokau ida eda dabu  ḡaudia e henimu Tauna hereadaena! Tanobada e karaia neganai, dia eda mauri iduruna ḡaudia haida mo e heni. To mai ena lalokau ida tanobada na ita eda mauri iduruna ḡaudia amo e hahonua, unu amo baita moalelaidia diba. (Gen. 2:9) Ena be nega haida ada na dina tamona ai baita ania ḡauna heḡereḡerena mo, to namona na baita abia dae una dina ai ita na mai ada. Iehova ese una dina totona ada na e havara. (Mat. 6:11) Namona baita helalotao tauanina dalanai ta dadaraimu ḡaudia na Iehova ese hari ina negai e henidamu bona vaira neganai be henidamu ḡaudia ida basita haheḡereḡeredia dibamu. Nestor bona María ese una na e lalopararalaia.​—Isa. 65:21, 22.

9. Nestor bona María edia haheitalai amo dahaka ome diba?

⁹ Colombia ai, Nestor bona María na tauanina dalanai edia mauri na namo herea. Idia na e gwa: “A lalova emai mauri ai ḡau haida baia dadarai bena emai hesiai ḡaukara baia habadaia. To a gariva badina bema emai moni na dia heḡereḡere, reana basia moalemu.” Dahaka ese e durudia una gari karana e hahanaia? Iehova ese dala momo ai idia ediai ena lalokau e hahedinaraia karadia na idia ese e lalodia lou. E abia dae Iehova ese idia na be naridiamu dainai, edia dava bada moni ḡaukaradia na e rakatani. Edia ruma e hoihoilaia bona edia tano ai pablisa dia momo gabuna ta ela. E karaia abi hidina dainai edia hemami be ede bamona? Nestor na e gwa: “Mataio 6:33 ena hereva e momokani karana na a itaia. Tauanina dalanai ḡau ta ai asia dabumu. Bona hari na a moalemu.”

10. Dahaka dainai ta lalopararamu taunimanima ta ese ma ta garina na be garimu?

¹⁰ Idaunega amo, taunimanima ese taunimanima ma haida na e hahisidiamu. (Koh. 8:9) Heḡereḡere, mai edia dagi taudia ese taunimanima e hahisidiamu, raskol taudia ese daḡedaḡe karadia e karamu, skuli ai e daḡedaḡemu taudia ese bamodia hahisidiamu, bona taunimanima haida ese edia ruma bese taudia e daḡedaḡe henidiamu. Una dainai taunimanima ese taunimanima ma haida e gari henidiamu! Edena dalai Satana ese taunimanima igari henidia karana e ḡaukaralaiamu ita baine hamoruda?

11-12. Edena dalai Satana ese taunimanima igari henidia karana e ḡaukaralaiamu ita baine hamoruda?

¹¹ Satana ese taunimanima igari henidia karana e ḡaukaralaiamu ita baine dorida haroro ḡaukara baita hadokoa totona. Satana ena  siahu henunai, gavamani ese eda ḡaukara e taravatuamu bona e daḡedaḡe henidamu. (Luka 21:12; Apok. 2:10) Satana ena tanobada ai, taunimanima momo ese Iehova ena Witnes taudia e sivarailaidia koikoimu herevadia e halasimu. Unu koikoi herevadia e abi daemu taudia ese ita na e kirikirilaidamu, e daḡedaḡe henidamu bona e dadaraidamu. (Mat. 10:36) Ita be Satana ena koikoi daladia ai ta hoamu, a? Lasi. Kristen ginigunadia edia negai ia ese unu koikoi daladia na de ḡaukaralai! (Apos. 5:27, 28, 40) Satana na dia gavamani edia daḡedaḡe karadia igari henidia karana mo e ḡaukaralaiamu.

¹² Haida na daḡedaḡe bae davari garina e garimu, to edia gari e habadaiamu ḡauna na, hereva momokani dainai edia ruma bese be ede be kara tomamu. Idia ese varavaradia na e lalokau henidiamu bona e uramu idia danu Iehova bae dibaia bona bae lalokau henia. E lalohisihisimu bema varavaradia ese Dirava momokanina bona ia e tomadiho heniamu taudia e gwauraidia dikamu. To, nega haida, matamanai e daḡedaḡe varavara haida na gabeai hereva momokani e abia dae. To bema ta abi daemu ḡaudia daidiai eda ruma bese taudia ese bae dadaraida be ede bamona? Dahaka baita kara diba?

13. Edena dalai Dirava ena lalokau ita edai baita abia dae karana ese baine duruda diba bema eda ruma bese ese bae dadaraida? (Salamo 27:10)

¹³ Salamo 27:10 ena hereva namona ese ita baine hagoadada diba. (Ba duahia.) Bema baita helalotaomu, Iehova ese ita na e lalokau henida badamu, bae daḡedaḡe henida garina na basita garimu. Bona ta diba momokanimu eda haheauka karana dainai Iehova ese be hanamodamu. Iehova ese tauanina dalanai, eda hemami ai, bona lauma dalanai baine narida diba, taunimanima ta na unu na basine kara toma dibamu! Matamanai tame herevalaia tauna, Biniam enai una na e vara.

14. Biniam ena haheitalai amo dahaka ome diba?

¹⁴ Biniam na Iehova ena Witnes ta ai ela, ena be mai dibana daḡedaḡe na baine davari diba. Biniam na Iehova ena lalokau e dibaia karana ese e durua taunimanima igari henidia karana e hahanaia dalana aita itaia. Ia na e gwa: “Na davaria daḡedaḡe karana na dika herea. To na garilaiava ḡauna badana na, dia gavamani edia daḡedaḡe karana, to egu ruma bese ena daḡedaḡe karana. Na gari, Iehova ena Witnes ai bainala karana ese tamagu, murimuri tauna, lalona baine hahisia bona egu ruma bese ese basie lalonamo henigumu.” To, Biniam na e abia dae momokani Iehova ese na  nega iboudiai Ia e lalokau heniamu taudia na e naridiamu. Biniam na e gwa: “Lau ese haida na moni dalanai e hekwakwanai, edia bese dainai haida ese e hahisidia, bona momo ese e daḡedaḡe henidia neganai, Iehova ese e durudia bae haheauka dalana na lalodia. Na diba bema Iehova baina badinaia ia ese be hanamogumu. Pulis ese nega momo e arestigu bona e hahisiguva neganai, lau ese nega unu bamodiai bema Iehova baita abidadama henia nohomu neganai be durudamu karana na mamia momokani.” Biniam enai Iehova na Tamana korikori ai ela bona Iehova ena taunimanima na ena ruma bese korikori ai ela.

15. Dahaka dainai taunimanima momo ese mase garina na e garimu?

¹⁵ Baibul na e gwa mase na ita inaida. (1 Kor. 15:25, 26) Bema ita eiava eda lalokau taudia na gorere badana ta e abia neganai, ta lalohekwarahimu badina asita uramu bae mase. Dahaka dainai mase garina ta garimu? Badina Iehova ese ita e karada neganai mauri hanaihanai urana na lalodai e atoa. (Koh. 3:11) Baita mase garina baita abiamu karana ese be durudamu eda mauri baita gimaia. Heḡereḡere, una ese baine duruda abi hidi maorodia baita kara dahaka baita ani, dahaka eksasais baita kara, ededia dokta itadia bona dahaka muramura baita inu, bona eda mauri ihadikana karadia na basita kara.

16. Edena dalai Satana ese mase garina ta garimu karana baine ḡaukaralaia diba eda abidadama baine hadikaia?

¹⁶ Satana na mai dibana ita ese eda mauri na ta laloa badamu. To, ia na e gwa, ita ese ḡau iboudiai baita dadarai diba​—eda hetura karana Iehova ida danu​—eda mauri basita mase totona. (Iobu 2:4, 5) To Satana na kerere! Ia na “mase biaguna” o mase ihavarana tauna dainai, baita mase garina ta garimu karana e ḡaukaralaiamu Iehova baita rakatania totona. (Heb. 2:14, 15) Nega haida, Satana ena taunimanima ese Iehova e tomadiho heniamu taudia ialadia herevadia be gwauraimu edia abidadama bae rakatania totona. Nega haida be, Satana ese eda gorere dainai eda mauri baita haboioa diba karana be ḡaukaralaiamu eda abidadama baita rakatania. Dokta eiava murimuri varavara ese be doridamu rara baita abi, unu amo Dirava ena taravatu baita utua. Eiava ta ese be doridamu Baibul ena hahekau herevadia e utumu heduru daladia baita lalodia totona.

17. Roma 8:37-39 ena hereva heḡereḡerena, dahaka dainai mase garina basita gari na namo?

¹⁷ Ena be asita uramu baita mase, to mai dibada baita masemu neganai Iehova ese ita na dounu be lalokau henidamu. (Roma 8:37-39 ba duahi.) Iehova turana e masemu neganai, ia ese idia na dounu e lalodiataomu, vaitani idia na dounu mamauri. (Luka 20:37, 38) Ia na e ura dikadikamu baine hamauridia lou. (Iobu 14:15) Iehova ese ita na dava bada amo e hoida baita “mauri hanaihanai” totona. (Ioa. 3:16) Ta dibamu Iehova ena lalokau ita edai na bada herea bona e laloda badamu. Una dainai ta goreremu eiava kahirakahaira baita mase neganai Iehova na basita rakatania to iena tauhalo, aonega, bona goada baita tahu. Valérie bona adavana na unu e kara toma.​—Sal. 41:3.

18. Valérie ena haheitalai amo dahaka ome diba?

¹⁸ Valérie na laḡanina e 35 neganai, kensa idauna bona dika hereana e davaria. Mani lalokau karana ese e durua mase garina basine gari dalana aita herevalaia. Ia na e gwa: “Egu gorere e davaria neganai, emai mauri na haraḡa herea e idau. Baina mauri totona heiva badana baina abia na namo. Bae ivagu dokatdia momo na hereva henidia neganai, idia iboudiai na e ura bae ivagu neganai rara bae ḡaukaralaia. Na gari, to Dirava ena taravatu na  laloa neganai, lalogu na hadaia rara na basina abi! Egu mauri ibounai lalonai, Iehova ena lalokau egu ai na bada herea. Hari na nega namona egu lalokau ia enai baina hahedinaraia. Dokta edia amo sivara dikadia na kamonaiva negadia ai, una ese e hagoadaguva Iehova baina hamoalea, dia Satana. Gabeai e ivagu neganai kensa na e kokia ena be rara na asie ḡaukaralaia. Ena be lau na doini gorere, to Iehova ese hanaihanai emai dabu ḡaudia na e henimu. Heḡereḡere, egu gorere do asie hadibagu wikena ai, emai kongrigeisin hebouna ai atikol ladana ‘Meeting Today’s Adversities With Courage’ a herevalaia. * Una atikol ese e durumai bada. A duahia loulouva. Atikol unu bamodia bona hanaihanai lauma ḡaudia ikaradia karana ese lalomaino e henimai, e durumai ḡau baia haero namonamo, bona abi hidi maorodia baia kara.”

19. Kahirakahira dahaka be varamu?

¹⁹ Tanobada heḡeḡemadai ai Kristen taudia na Iehova ena heduru dainai, hekwakwanai idauidau e hahanaidiamu bona Diabolo na e dadaraiamu. (1 Pet. 5:8, 9) Oi danu unu ba kara toma diba. Kahirakahira, Iehova ese Iesu bona ia ida be lohiamu taudia be haḡanidiamu “diabolo ena kara dika” bae haore. (1 Ioa. 3:8) Una murinai, tanobada ai Dirava ena hesiai taudia na ḡau ta garina basie garimu bona ḡau ta ese basine hagaridiamu. (Isa. 54:14; Mika 4:4) To, una do se vara neganai, namona na baita ḡaukara goada eda gari karana baita hahanaia.

20. Dahaka ese be durudamu eda gari karana baita hahanaia?

²⁰ Eda gari karana baita hahanaia totona, Iehova ese ena hesiai taudia e lalokau henidiamu bona e gimadiamu karana na baita abia dae momokani. Una baita karaia totona, guna Iehova ese ena hesiai taudia e gimadia daladia baita lalodia dobu bona baita herevalai. Bona eda hekwakwanai lalodiai Ia ese ita ta ta e duruda daladia baita lalodiatao. Iehova ena heduru dainai, ita ese gari karana baita hahanaia diba!​—Sal. 34:4.