1-2. Salamo 25:14 heḡereḡerena, Iehova turana ai baitala totona dahaka baita kara be namo?

 BEMA oi na o uramu ta ida emu hetura karana baine namo, o laloamu ededia kara ba hahedinarai be namo? Reana bo gwaumu tura namodia na bae helalokau heheni bona bae heduru heheni. Reana basio laloamu gari karana ese hetura namona baine havaraia. To, ina atikol ena siri badana ese e hahedinaraiamu, Iehova turana namona ai e uramu baela taudia ese ‘ia garina bae gari’ na namo.​—Salamo 25:14 ba duahia.

² Ena be ede daudauna Iehova vada ta hesiai henia, to dounu ia baita gari henia na namo. Dirava baita gari henia anina be dahaka? Ia igari henina karana be ede baita dibaia toma? Bona Dirava igari henina ai hesiai tauna Obadia, Hahelaḡa Tauna Badana Iehoiada, bona King Iehoasa edia amo be dahaka baita dibamu?

3. Gari karana ese be durudamu dahaka baita kara?

³ Bema ta dibamu dika baita davarimu, ita na baita garimu. Una gari karana ese be durudamu mai aonegada ida baita kara. Heḡereḡere, hagahaga badina amo baita daudaumu baita moru garina. O dika amo baita heau ohomu baita bero garina. Eiava ta lalokau heniamu tauna ida eda hetura karana baine dika garina eda hereva o kara nahuadia baita tohomu.

4. Satana na e uramu Iehova igari henina karana be ede baita laloa toma?

 ⁴ Satana na e uramu badi kereredia daidiai Iehova baita gari henia. Ia na e uramu ita ese Elifasa e gwauraia herevana baita abia dae, eto Iehova na dika davana e henimu, badu Diravana bona ihamoalena na auka. (Iobu 4:18, 19) Satana ena ura na unu badi daidiai Iehova baita gari henia bena ihesiai henina karana baita hadokoa. Una basine vara totona, namona na badi maorona dainai Dirava baita gari henia.

5. Dirava baita gari henia anina be dahaka?

⁵ Dirava e gari heniamu o e matauraiamu tauna ese ia e lalokau heniamu bona se uramu kara ta amo ena hetura karana Ia ida baine hadikaia. Iesu na “Dirava garina e gariva.” (Heb. 5:7) Ia na dia ḡau dikana ta enai baine vara garina dainai e gari. (Isa. 11:2, 3) To, Iehova e lalokau henia bada bona e ura baine badinaia. (Ioa. 14:21, 31) Iesu heḡereḡerena, ita ese Iehova baita matauraia bada, badina ia na lalokau, aonega, hahemaoro maoromaoro bona siahu idoinai Diravana. Danu, ta dibamu Iehova ese ita na e lalokau henida badamu, bona ia ese e laloa badamu ḡauna na, ita be iena hereva ta badinamu eiava lasi. Oibe, eda kara amo Iehova lalona baita hahisia o baita hamoalea diba.​—Sal. 78:41; Her. 27:11.

6. Dirava igari henina karana baita dibaia dalana ta be dahaka? (Salamo 34:11)

⁶ Iehova igari henina o imatauraina karana na asita varalaia, una dainai una kara baita dibaia na namo. (Salamo 34:11 ba duahia.) Dala ta na, ia ese e kara ḡaudia baita stadilai. Dirava “e kara ḡaudia” amo ena aonega, siahu bona ena lalokau ita edai baita dibamu neganai, eda hemataurai bona lalokau ia enai na be badamu. (Roma 1:20) Taihu ta ladana Adrienne na eto: “Iehova e kara ḡaudia amo ena aonega na lalopararalaiamu neganai, na hoamu bona na dibamu ia ese egu namo na e laloamu.” Taihu na e lalo dobu dainai, eto: “Asina uramu egu kara ta amo Iehova, mauri e henigumu Diravana, ida emai hetura karana baina hadikaia.” Mani ina wiki lalonai nega bavato Dirava ese e karaia ḡauna ta ba haeroa. Unu bo kara tomamu neganai, emu hemataurai bona lalokau Iehova enai na be badamu.​—Sal. 111:2, 3.

7. Edena dalai ḡuriḡuri karana ese baine duruda Iehova baita gari henia?

⁷ Dirava baita gari henia dalana ma ta na, hanaihanai ia baita ḡuriḡuri henia. Baita ḡuriḡuri louloumu neganai, ia baita dibaia namonamomu. Hahetoho ta ihaheaukalaina totona, ia enai goada ta noimu negadia ta ta ai, ta dibamu ena siahu na bada herea. Ia ese Natuna e henida dainai ta tenkiu heniamu neganai, ta helalotaomu Iehova ese ita na e lalokau henida badamu. Bona hekwakwanai ta dainai Iehova ena heduru ta noiamu neganai, ta helalotaomu ena aonega na bada herea. Ḡuriḡuri unu bamodia ese e durudamu eda hemataurai karana Iehova enai ta habadaiamu. Bona e hagoadadamu eda hetura karana Iehova ida baine hadikaia ḡaudia baita dadarai.

8. Dahaka baita kara unu amo hanaihanai Dirava garina baita gari?

⁸ Baibul lalonai haheitalai namodia bona dikadia baita stadilaimu neganai, una ese be durudamu hanaihanai Dirava garina baita garimu. Mani Iehova e abidadama henia hesiai taudia rarua aita herevalaidia, idia na King Ahaba ena ruma ireḡuna tauna Obadia bona Hahelaḡa Tauna Badana Iehoiada. Danu Iuda edia King Iehoasa baita herevalaiamu; ia  na matamanai Iehova e badinaia to gabeai e rakatania.

9. Iehova igari henina karana ese Obadia be ede e durua toma? (1 Hanua Pavapavadia 18:3, 12)

⁹ Baibul ese Obadia b na ini e herevalaia toma: “Obadia ese Iehova e matauraia bada.” (1 Hanua Pavapavadia 18:3, 12 ba duahidia.) Edena dala ai Dirava imatauraina o igari henina karana ese Obadia e durua? Dala ta na, ia na mai momokanina ida e kara bona taunimanima ese e abidadama henia. Una dainai king ese ena ruma ireḡuna tauna ai e halaoa. (Nehemia 7:2 ba haheḡereḡerea.) Danu, Obadia na Dirava e gari henia dainai, ena lalo goada karana na e habadaia. Una kara na mai anina bada badina ia na King dikana Ahaba ena lohia negana lalonai e nohova; Ahaba na “Iehova vairanai e kara havara; e gunalaia [king] taudia iboudiai na ia ese e hereadia.” (1 Han. 16:30) Danu, Ahaba adavana Iesebel na Baal e tomadiho heniava, bona Iehova e inai henia bada dainai, e ura not basileiana ai tomadiho momokani baine haorea vaitani. Dirava ena peroveta taudia momo e hamasedia danu. (1 Han. 18:4) Momokani, Obadia na nega aukana lalonai Iehova e tomadiho heniava.

10. Edena dala ai Obadia ese lalo goada karana e hahedinaraia?

¹⁰ Edena dala ai Obadia ese lalo goada karana e hahedinaraia? Iesebel na Dirava ena peroveta taudia baine hamasedia totona e tahudiava neganai, Obadia ese idia 100 e abidia bona ‘imahui imahui amo kohua ai e hunidia, bona aniani bona ranu e henidia.’ (1 Han. 18:13, 14) Bema ia na Iesebel ese bema davaria, bema hamasea diba. Vaia, Obadia na reana e gari bona se ura baine mase. To ia ese Iehova bona ena hesiai taudia e lalokau henidia bada dainai, sibona ena mauri na se laloa.

11. Hari Iehova ena hesiai taudia ese Obadia be ede e tohotohoa tomamu? (Laulau danu ba itaia.)

¹¹ Hari ina negai, Iehova ena hesiai taudia momo na gavamani ese eda ḡaukara e taravatua tanodia ai e nohomu. Ena be idia  ese siahu taudia e matauraidiamu, to Obadia heḡereḡerena, Iehova sibona e tomadiho heniamu. (Mat. 22:21) Idia ese Dirava e gari heniamu dalana na, ia e badinaiamu to dia taunimanima. (Apos. 5:29) Heḡereḡere, mai aonega ida sivarai namona dounu e harorolaiamu bona edia hebou e abimu. (Mat. 10:16, 28) Danu, e laloa badamu ḡauna na, tadikaka taihu ese lauma aniani bae abi na namo. Mani Henri aita laloa, ia na Africa ai guna eda ḡaukara e taravatua tanona ta ai e nohomu. Eda ḡaukara e taravatua negana lalonai, Henri na e volentia tadikaka taihu edia pablikeisin e laohai. Ia na eto: “Lau na hemarai tauna. To na diba momokanimu Iehova na matauraia bada dainai na lalo goada.” Oi danu Henri bamona o lalo goadamu, a? Oibe, bo lalo goada dibamu bema Dirava bo matauraiamu.

12. Edena dalai Hahelaḡa Tauna Badana Iehoiada bona adavana ese Iehova e badinaia?

¹² Hahelaḡa Tauna Badana Iehoiada na Iehova garina e gariva dainai e badinaia bona ma haida e hagoadadia Iehova bae tomadiho henia. Ia na unu e kara toma, ena be Iesebel natuna kekenina, Atalia na Iuda ai sibona kwini ai e hahelao. Taunimanima ese Atalia na e gari heniava, badina ia na daḡedaḡe hahinena, bona lohia dagina e mataḡaniḡani henia dainai, tubuna memerodia iboudiai e hamasedia. (2 Sis. 22:10, 11) To Iehoasa mo se hamasea, badina Iehoiada adavana Iehosabea ese e hamauria. Idia ese Iehoasa na e hunia bona e naria. Unu amo Iehoiada bona Iehosabea ese David ena bese amo bae vara pavapavadia na e gimadia. Iehoiada na Iehova e badinaia bona Atalia garina na se gari.​—Her. 29:25.

13. Iehoasa laḡanina 7 neganai, Iehoiada ese Dirava ibadinana karana be ma ede e hahedinaraia toma?

¹³ Iehoasa laḡanina 7 neganai, Iehoiada ese Dirava ibadinana karana na ma e hahedinaraia. Ia ese plen ta e karaia. Bema una plen baine ḡuḡuru, Iehoasa na mai ena maoro David ena king dagina baine abia. To basine ḡuḡuru neganai, Iehoiada na baine mase. Iehova ena heduru dainai, una plen na e ḡuḡuru. Iehoiada na iduhu kwaradia bona Levi taudia ese e durua dainai, Iehoasa na king ai e halaoa bona Atalia e hamasea. (2 Sis. 23:1-5, 11, 12, 15; 24:1) Bena Iehoiada ese “Iehova bona hanua pavapavana bona taunimanima na e haherohedia maino, idia na Iehova ena orea taudia ai baela totona.” (2 Han. 11:17) Iehoiada ese “danu ikoukou igimadia taudia na Iehova ena dubu ikoukoudia ai e atodia, se haheḡoeva tauna ta basine raka vareai heloareana.”​—2 Sis. 23:19.

14. Iehoiada na Iehova e matauraia dainai Iehova ese ede e hanamoa toma?

¹⁴ Iehova na eto: “E matauraigumu taudia na baina matauraidia.” Momokani, ia ese Iehoiada na e matauraia o e hanamoa. (1 Sam. 2:30) Heḡereḡere, Iehoiada sivaraina na Baibul ai e torea ita ihadibalaida. (Roma 15:4) Bona Iehoiada e mase neganai, “David ena hanua ai e guria, pavapava bogaraḡidiai, badina be ia na kara namodia e karava Israel ai, bona Dirava enai, bona ena dubu enai.”​—2 Sis. 24:15, 16.

15. Iehoiada sivaraina amo dahaka ta dibamu? (Laulau danu ba itaia.)

¹⁵ Iehoiada sivaraina ese e durudamu Iehova garina baita gari. Elda taudia ese Iehoiada bae tohotohoa dalana na, hanaihanai nahuadia bae toho bona Dirava ena mamoe serina bae gimaia namonamo. (Apos. 20:28) Burukadia na Iehoiada amo e dibamu, Iehova bae gari henia bona bae badinaia neganai, ia ese  baine ḡaukaralaidia ena ura bae haḡuḡurua, bona basine rakatanidiamu. Matamata taudia na Iehova ese Iehoiada e kara henia dalana bae laloa bona bae tohotohoa, heḡereḡere tadikaka taihu burukadia, laḡani daudau Iehova e hesiai henia taudia, bae kara henidia mai hematauraidia ida. (Her. 16:31) Danu, Iehoiada e durua iduhu kwaradia bona Levi taudia amo ta dibaiamu ḡauna na, ‘ihakauda taudia’ baita kamonai henidia.​—Heb. 13:17.

16. Dahaka ese e hahedinaraiamu King Iehoasa na e manoka?

¹⁶ King Iehoasa na Iehoiada ese e durua taunimanima namona ai bainela. (2 Han. 12:2) Una dainai, king na matamatana negana ai e urava Iehova baine hamoalea. To Iehoiada e mase murinai, Iehoasa ese aposteit lohiadia e kamonai henidia. Bena dahaka e vara? Ia bona e lohiadia taudia ese “Asera kaivakukudia bona kaivakuku haida isiaidia e lao heni.” (2 Sis. 24:4, 17, 18) Iehova na se moale bona “ia ese peroveta taudia na bogaraḡidiai e siaidia lao, . . . bae haloudia totona . . . to asie kamonai.” Idia ese Iehoiada natuna Sekaria c danu asie kamonai henia; Sekaria na Iehova ena peroveta tauna, hahelaḡa tauna, bona Iehoasa ena kasen. King Iehoasa ese Sekaria na e hamasea, ena be ia na Sekaria ena ruma bese ese e hamauria.​—2 Sis. 22:11; 24:19-22.

17. Iehoasa enai be dahaka e vara?

 ¹⁷ Iehoasa ese Iehova igari henina karana na se hahedinaraia, una dainai dika e davari. Iehova na eto: “E dadaraigumu taudia na basina lalodia bada.” (1 Sam. 2:30) Suria tuari orea maraḡina ese Iehoasa ena “tuari oreana bada-hereana” e hadarerea bona ia na “mai bero bada-hereana” ida e rakatania. To Suria taudia e raka oho murinai, Iehoasa na ena hesiai taudia ese e hamasea badina ia ese Sekaria e alaia. Taunimanima na e laloa ia na king dikana dainai “pavapava edia gara ai asie guria.”​—2 Sis. 24:23-25.

18. Ieremia 17:7, 8 heḡereḡerena, edena dala ai Iehoasa basita tohotohoa?

¹⁸ Iehoasa sivaraina amo dahaka ta dibamu? Iehoasa e durua tauna, Iehoiada e mase bona Iehoasa na aposteit taudia e kamonai henidia matama neganai, Iehova na se badinaia. Una na heḡereḡere au ta ramuna na se dobu dainai, au maoromaorona ta ese e imudaia, una au maoromaorona na lasi neganai lai ese baine odaia oho. Una ese e hahedinaraiamu, dia tadikaka taihu bona eda ruma bese taudia daidiai Dirava garina baita gari. To siboda eda stadi, lalo dobu, bona ḡuriḡuri amo eda lalokau bona hemataurai Dirava enai baita hagoadaia, unu amo eda hetura karana ia ida na baine goada.​—Ieremia 17:7, 8 ba duahidia; Kol. 2:6, 7.

19. Iehova be e uramu ita be dahaka baita kara?

¹⁹ Iehova ese ita na se noidamu ḡau momo baita kara. To e uramu baita karaia ḡauna na Kohelete 12:13 ai e gwauraia, eto: “Dirava garina ba gari, bona ena haheḡani ba badinadia; badina be una na taunimanima ena kara korikori idoinai.” Oibe, Dirava garina baita garimu neganai, vaira negai bae vara hahetohodia lalodiai dounu Ia baita badinaiamu, Obadia bona Iehoiada e kara heḡereḡerena. Bona ḡau ta ese eda hetura karana Iehova ida na basine hadikaiamu.