1-2. Lot heḡereḡerena, Kristen taudia ese hari e varamu ḡaudia be ede e lalodia tomamu?

 INA tanobada ai e varamu kara dikadia daidiai, iseda hemami na kara maoromaoro tauna Lot ena hemami heḡereḡerena. Ia na “lalona e hesiku, kara dika taudia edia lebulebu karadia daidiai,” badina mai dibana Tamada guba ai e nohomu ese kara dikadia na e inai henidiamu. (2 Pet. 2:7, 8) Lot na Dirava e gari henia bona e lalokau henia dainai, taunimanima edia kara dikadia na e inai henidia. Ita danu Iehova ena taravatu asie lalodia badamu o asie matauraidiamu taudia bogaraḡidiai ta nohomu. To, eda kara na bae ḡoeva diba bema Dirava baita lalokau heniamu bona baita gari heniamu.​—Her. 14:2.

² Iehova na Hereva Lada-isidia bukana amo e hagoadadamu unu baita kara toma. Una buka ai e hetore aonega sisibadia ese Kristen taudia iboudiai, tatau, ha’hine, matamata taudia bona burukadia na be durudiamu.

3. Hereva Lada-isidia 17:3 heḡereḡerena, kudouda baita gimaia badina ta be dahaka? (Laulau danu ba itaia.)

³ Kudouda baita gimaia badina badana ta na ina: Iehova ese kudouda na e itaiamu. Anina na ia ese eda lalohadai, hemami bona ura na e itamu, bona mai dibana ita be taunimanima ede bamodia. (Hereva Lada-isidia 17:3 ba duahia.) Ia ese ita na be lalokau henidamu bema iena aonega sisibadia baita badinamu. (Ioa. 4:14) Unu baita kara tomamu neganai, Satana bona ena tanobada edia kara dikadia bona hereva koikoidia ese basie  hadikadamu. (1 Ioa. 5:18, 19) Iehova baita raka henia kahimu neganai, iseda lalokau bona hemataurai ia enai na be badamu. Asita uramu Tamada lalona baita hahisia dainai, kara dika ikarana urana danu baita dadaraiamu. Hedibaḡani ta, ta davariamu neganai baita henanadai, ‘Dahaka dainai ina kerere baina karaia bena e lalokau henigu badamu Tauna lalona baina hahisia?’​—1 Ioa. 4:9, 10.

4. Edena dalai taihu ta na Iehova igari henina karana ese e durua hedibaḡani e dadaraia?

⁴ Croatia ai, taihu ta ladana Marta na matabodaḡa ikarana hedibaḡanina e davaria. Ia na eto: “Egu ai na e auka baina lalo maoromaoro bona una kara dika ikarana urana baina dadaraia. To Iehova igari henina karana ese e durugu.” b Edena dala ai? Marta na abi hidi kererena ese baine havara ḡaudia dikadia e lalodia dobu. Ita danu unu baita kara toma. Bema kara dikana ta baita karaiamu, Iehova lalona baita hahisiamu bona ia itomadiho henina karana baita rakataniamu.​—Gen. 6:5, 6.

5. Leo ena ekspiriens amo dahaka o dibamu?

⁵ Iehova baita gari heniamu neganai, hebamo dikadia na baita dadaraimu. Congo ai, Leo ese una na e lalopararalaia. Ia na e bapatiso bena laḡani 4 muridiai hebamo dikana lalonai e vareai. E laloava dika ḡauna ta do se karaia dainai Iehova matanai ia na asi ena kerere. To se daudau, bamona edia hebamo dikadia dainai, e inu kekerova bona matabodaḡa karadia e karava. Gabeai, ia ese guna e abia moalena bona tamana sinana ese e hadibaia ḡaudia e lalodia lou. Una dainai dahaka e vara? Ena kara e haidaua. Elda taudia edia heduru amo ena hetura karana Iehova ida e hanamoa. Hari, ia na spesol painia bona elda ḡaukarana e karaiamu mai moalena ida.

6. Ededia ha’hine rarua baita herevalaidiamu?

 ⁶ Hereva Lada-isidia karoa 9 ai, ha’hine rarua baita herevalaidiamu. Ta be aonega e laulaulaia, bona ma ta be kavakava e laulaulaia. (Roma 5:14; Galatia 4:24 ba haheḡereḡere.) Unu ta herevalaidiamu lalonai, baita helalotao Satana ena tanobada ai momo ese matabodaḡa karadia bona ponografi na e ura henidia badamu. (Efe. 4:19) Una dainai, hanaihanai Dirava garina baita gari bona kara dikadia amo baita raka oho na mai anina bada. (Her. 16:6) Ita iboudai na Hereva Lada-isidia karoa 9 ese e herevalai ḡaudia amo namo baita davarimu. Unu ha’hine ese ‘asi aonegadia’ o ‘asi daradia’ taudia e boiridia. Idia na vaitani e gwaumu, ‘Aoma egu ruma ai ame vareai bona bavaniani.’ (Her. 9:1, 5, 6, 13, 16, 17) To unu ha’hine raruosi edia boiboi e abi daemu taudia ediai e varamu ḡaudia na i’idau.

7. Hereva Lada-isidia 9:13-18 heḡereḡerena, kavakava hahinena ena boiboi e abia daemu taudia ediai be dahaka e vara? (Laulau danu ba itaia.)

⁷ Mani “kavakava hahinena” ena boiboi aita laloa. (Hereva Lada-isidia 9:13-18 ba duahidia.) Ia na asi daradia taudia e boiridiamu ena ruma ai bae vareai bona ia ida bae aniani. Idia ediai be dahaka e vara? Idia na vaitani “mase ena dobu gabudia ai” e vareai. Hereva Lada-isidia ena karoa ginigunadia ai unu bamona laulau herevadia bo itamu. Unu karoa ai, “lebulebu” bona “ariara hahinena” e herevalaia. Bona e gwaumu: “Ena ruma na mase idiho-henina gabuna.” (Her. 2:11-19) Hereva Lada-isidia 5:3-10 ai “lebulebu hahinena” ma ta e herevalaia, ia “aena ese mase e diho heniamu.”

8. Ita be dahaka abi hidi baita kara?

⁸ “Kavakava hahinena” ena boiboi e kamonaimu taudia na abi hidi ta bae karaia: Idia be iena boiboi bae abia dae eiava lasi? Ita danu abi hidi unu bamona ta baita karaia. Bema ta ese e doridamu matabodaḡa karana ta baita karaia o bema media ai, heḡereḡere televisen bona intanet ai ponografi laulaudia e hedinaraimu, dahaka baita kara?

9-10. Dahaka dainai matabodaḡa karadia baita dadarai?

⁹ Badi namodia daidiai matabodaḡa karadia baita dadarai na namo. Baibul na e gwaumu “kavakava hahinena” na e tomu: “E henaoa ranuna na mai gaihona.” Una “e henaoa ranuna” anina be dahaka? Baibul ese headava taudia e mahuta heboumu karana na ranu ḡoevana ida e haheḡereḡerea. (Her. 5:15-18) Taravatu heḡereḡerena ai e headava taudia  sibodia ese mahuta hebou karana bae moalelaia. To, “e henaoa ranuna” anina na matabodaḡa karadia e herevalaimu. Nega momo unu kara na hehuni ai e karamu, henaohenao tauna na hehuni ai ḡau e henaomu na heto. Matabodaḡa karadia e karamu taudia na be lalomu ta ese basie davaridiamu, una na vaitani “e henaoa ranuna” na mai gaihona. To idia na sibodia e hekoimu! Badina Iehova ese ḡau iboudiai na e itamu. Bema Iehova ena lalo namo baita haboioamu, una na dika herea, idita o asi gaihona. (1 Kor. 6:9, 10) Dia una mo, to dika ma haida danu be varamu.

¹⁰ Matabodaḡa karadia e karamu taudia na be hemaraimu, be mamiamu idia na asi anidia, haida na be rogorogo kavamu, bona ruma bese be pararamu. Momokani, kavakava hahinena ena “ruma” na basitala bona ia ida basita aniani hebou na aonega karana. Matabodaḡa karadia e karamu taudia momo na edia hetura karana Dirava ida e hadikaiamu, bona daihanai goreredia amo e mase haraḡamu. (Her. 7:23, 26) Hereva Lada-isidia karoa 9 siri 18 na e gwaumu: “Hahine vadivadina na mase ena dobu gabudia ai.” To, dahaka dainai momo ese iena boiboi na e abia daemu, ena be dika bae davari diba?​—Her. 9:13-18.

11. Dahaka dainai ponografi i’itadia karana ese dika bada e havaraiamu?

¹¹ Momo e hamorudiamu ḡauna badana ta na, ponografi. Haida na e laloamu ponografi i’itadia karana na dia kerere. To, una na mai ena dika, bona e itamu taudia na sibodia edia mauri se matauraiamu, ma haida asie matauraidiamu bona una kara idadaraina na auka. Danu, matabodaḡa laulaudia bae lalodia boio na auka. Dia una mo, to ponografi i’itadia karana ese ta lalona ai ura dikadia e habadamu. (Kol. 3:5; Iak. 1:14, 15) Oibe, ponografi laulaudia e itamu taudia momo na kara bodaḡadia e karamu.

12. Edena dalai baita hahedinaraia matabodaḡa lalohadaidia e havaramu laulaudia na ta dadaraimu?

¹² Ita na Kristen taudia dainai, dahaka baita kara bema eda fon o tablet ai ponografi laulauna ta e hedinaraimu? Basita itaia to baita dadaraia haraḡa na namo. Unu baita kara tomamu bema eda hetura karana Iehova ida na ta laloa badamu. Ena be laulau haida na dia ponografi laulaudia, to unu ese matabodaḡa lalohadaidia bae havara diba. Dahaka dainai baita dadaraidia? Badina asita uramu lalohadai dikadia baita abi bona karadia baita kara. (Mat. 5:28, 29) Thailand ai, elda ta ladana David na e gwaumu: “Lau na sibogu na henanadaimu: ‘Ena be laulau haida na dia ponografi laulaudia, to dounu ba itamu neganai Iehova be moalemu eiava?’ Henanadai unu bamona ese e durugumu kara maorona baina karaia.”

13. Dahaka ese be durudamu kara maorona baita karaia?

¹³ Kara maorona baita karaia totona Iehova garina baita gari bona ihabaduna karana ta basita karaia. Dirava igari henina na “aonega matamana.” (Her. 9:10) Hereva Lada-isidia karoa 9 matamana kahanai una e hahedinaraia, una karoa ai laulau dalanai e herevalaia hahine iharuana na e gwauraia “aonega” korikorina.

14. Hereva Lada-isidia 9:1-6 ai, edena boiboi ma ta e herevalaia?

¹⁴ Hereva Lada-isidia 9:1-6 ba duahidia. Ini siri ai Iehova, Ihavarada Tauna bona aonega ibounai Badina, ena boiboi e herevalaia. (Her. 2:6; Roma 16:27) Danu, e ḡaukaralaia laulau herevana na, ruma badana ta mai ena du 7. Una ese e hahedinaraiamu Iehova na  hariharibada Diravana bona ena aonega herevadia e uramu bae badina taudia na e abidia daemu.

15. Dirava na ita e boiridamu dahaka baita kara?

¹⁵ Iehova na hariharibada Diravana. Una kara na Hereva Lada-isidia karoa 9 ai “aonega” e laulaulaia hahinena ese e hahedinaraia. Baibul na e gwaumu, una hahine na ena ruma ai vamu e heḡaeḡaelaia, wain e miksia, bona ena teibolo ai e dabaraia. (Her. 9:2) Danu, siri 4 bona 5 na e gwaumu: “Asi darana tauna na ia [aonega] ese e hereva heniamu, e tomu: Aoma, egu dabara bavania.” Dahaka dainai una hahine ena boiboi na baita abia dae? Badina Iehova na e uramu ia natuna na bae aonega bona bae moale. Ia na se uramu abi hidi kereredia daidiai baita lalohisihisi. Una dainai ia ese “aonega namona e habouamu kara maoromaoro taudia edia.” (Her. 2:7) Iehova baita gari heniamu neganai, baita uramu ia baita hamoalea. Iena sisiba baita kamonaimu, bona mai moaleda ida baita badinamu.​—Iak. 1:25.

16. Dirava igari henina karana ese Alain be ede e durua toma, bona dahaka e vara?

¹⁶ Mani Alain aita laloa, ia na Dirava igari henina karana ese e durua abi hidi maorona e karaia. Alain na Kristen elda ta bona skuli hahedibana. Ia na eto: “Teacher momo na e laloamu ponografi laulaudia amo idia sibodia na mahuta hebou daladia bae diba.” To Alain ese una kara na e dadaraia. Eto: “Dirava na gari heniamu dainai asina ura laulau unu bamodia baina ita. Bona a ḡaukara heboumu taudia ediai una kara na dadaraia badina na gwauraia.” Alain na “aonega” korikorina e badinaia dainai, ‘lalo-parara dalana ai e raka.’ (Her. 9:6) Alain ena gini goada karana ese teacher ma haida e durudia dainai, hari idia na Baibul e stadilaiamu bona Kristen heboudia e laomu.

17-18. “Aonega” ena boiboi e abia daemu taudia be dahaka hahenamo e moalelaimu, bona vaira negai dahaka be davarimu? (Laulau danu ba itaia.)

¹⁷ Iehova ese laulau dalanai e herevalaidia hahinedia raruosi amo ita edai bae vara ḡaudia e hadibadamu. “Kavakava hahinena” ena boiboi e abia daemu taudia na e uramu matabodaḡa karadia bae kara. To, asie dibamu una ese edia vaira nega maurina na be hadikaiamu. Edia kara daidiai idia na “mase ena dobu gabudia” e lao henimu na heto.​—Her. 9:13, 17, 18.

¹⁸ To, “aonega” korikorina e laulaulaia hahinena ena boiboi e abia daemu taudia ediai e varamu ḡauna be ma idau. Idia na e moalemu badina lauma aniani momo amo edia hetura karana Iehova ida e hagoadaiamu. (Isa. 65:13) Iehova na peroveta tauna Isaia amo eto: “A kamonai henigu balaheni, ḡau namodia  bavani, aniani gaihona ba moalelaia.” (Isa. 55:1, 2) Ita na Iehova ese e ura henimu ḡaudia ta ura henimu bona e inai henimu ḡaudia ta inai henimu. (Sal. 97:10) Danu ta moalemu badina ma haida ta boiridiamu “aonega” korikorina amo namo bae davari. Una na vaitani ‘hanua lalonai atai gabudia amo ta boiboimu, ta tomu: Daika na asi aonegana, ia na iniseni ai baine raka vareai.’ Ita bona una boiboi e abia daemu taudia ese baita abimu hahenamodia na be mia daudaumu dainai, ‘laloparara dalana ai baita rakamu’ unu amo baita “mauri” hanaihanaimu.​—Her. 9:3, 4, 6.

19. Kohelete 12:13, 14 heḡereḡerena, laloda baita hadai dahaka baita kara? (Maua ladana “ Dirava Igari Henina Ena Namo,” ba itaia danu.)

¹⁹ Kohelete 12:13, 14 ba duahidia. Ina nega dikana dokona lalonai, Dirava igari henina karana ese baine gimada, kara maorodia baita kara bona eda hetura karana Ia ida baita hagoadaia. Danu, Dirava igari henina karana ese baine hagoadada, momo baita durudia “aonega” korikorina bae tahua bena namo bae davari.