1. Petro Ginigunana 5:2 heḡereḡerena, elda taudia edia maduna be dahaka?

 KRISTEN elda taudia na Iehova ese maduna e henidia iena mamoe bae naridia. Idia ese tadikaka taihu ihesiai henidia ḡaukarana na e laloa badamu, bona e ḡaukara goadamu “Dirava ena mamoe” bae reḡudia. (Ier. 23:4; 1 Petro 5:2 ba duahia.) Ta moalemu badina tadikaka unu bamodia na iseda kongrigeisin lalodiai e nohomu.

2. Elda taudia haida be dahaka hekwakwanai e davari?

² Elda taudia na edia maduna e huamu lalodiai, hekwakwanai idauidau e davarimu. Vaia, kongrigeisin inarina na ḡaukara badana. United States ai, elda ta ladana Tony na e abi dae ḡaukaradia momo daidiai baine manau na namo. Ia na ini e gwau toma: “COVID-19 pandemic e matama neganai, hebou bona haroro ḡaukara iheḡaeḡaelaidia ai ḡau momo na karava. To dounu ḡaukara na bada herea. Una dainai, asi egu nega Baibul baina duahia, sibogu egu stadi baina karaia, bona baina ḡuriḡuri.” Kosovo ai, elda ta ladana Ilir ena hekwakwanai be ma idau. Tuari gabuna ta ai e nohova neganai, enai na e auka Dirava ena orea ena hahekau daladia baine badina. Ia na e gwa: “Brens ofesi ese asainmen ta e henigu, dika e vara gabuna ta ai tadikaka taihu baina durudia neganai, egu lalo goada na e tohoa. Na gari, bona na lalo edia hahekau herevana ese lau na basine durugumu.” Asia ai, misinari tauna Tim na e laloparara dina ta ta ai ḡau iboudiai baine kara na auka. Ia na eto: “Nega haida na mamiava egu goada na e oreva.” Hekwakwanai unu bamodia e davarimu elda taudia be dahaka ese baine durudia diba?

3. Hahemaoro Tauna Gideon ena haheitalai baita haeroa karana ese ede be duruda tomamu?

 ³ Elda taudia na Hahemaoro Tauna Gideon ena haheitalai amo diba bae abi. (Heb. 6:12; 11:32) Gideon na Dirava ena taunimanima e gimadia bona e reḡudia. (Hah. 2:16; 1 Sis. 17:6) Gideon heḡereḡerena, elda taudia na Dirava ese e abidia hidi hekwakwanai negadiai iena taunimanima bae reḡudia. (Apos. 20:28; 2 Tim. 3:1) Una dainai, elda taudia na Gideon ena manau, kamonai, bona haheauka karana amo ḡau momo be dibamu. Danu, elda ḡaukara asie karaiamu taudia na Gideon ena haheitalai bae haeroa karana ese baine durudia, elda taudia bae lalodia bada bona bae durudia.​—Heb. 13:17.

4. Gideon ese manau karana be ede e hahedinaraia toma?

⁴ Gideon na manau tauna. b Iehova ena aneru ese Gideon e hamaoroa ia na e abia hidi Midian taudia goadadia amo Israel taudia baine hamauridia neganai, ia na eto: “Lauegu doḡoro na ogoḡami herea Manase ai, bona lau danu maraḡi herea tamagu [ena] ruma ai.” (Hah. 6:15) Gideon na e lalo ia na dia heḡereḡere, to Iehova na mai dibana Gideon ese una maduna na baine huaia diba. Iehova ena heduru amo Gideon ese ena maduna na e huaia.

5. Elda ta ena manau karana be dahaka ese baine tohoa diba?

⁵ Elda taudia na e hekwarahimu ḡau iboudiai lalodiai bae manau. (Mika 6:8; Apos. 20:18, 19) Idia ese bae kara diba ḡaudia eiava e haḡuḡuru ḡaudia na asie heaḡilaimu. Bona ena be kerere haida e karamu to asie lalomu idia na dia heḡereḡere edia ḡaukara bae kara. To, nega haida elda ta ese manau karana be hahedinaraiamu na auka. Heḡereḡere, asainmen momo be abi daemu, to gabeai be mamiamu ia enai na auka unu iboudiai baine haḡuḡuru. Eiava ena asainmen e karamu daladia daidiai haida ese be hanamoamu o be gwauraia dikamu. Nega unu bamodiai Gideon ena haheitalai ese elda taudia be ede baine durudia toma?

6. Elda taudia na Gideon ena manau karana amo dahaka e dibamu? (Laulau danu ba itaia.)

⁶ Heduru ba noi. Manau tauna na mai dibana ena goada na mai hetoana. Gideon na e  manau dainai, mai ena ura ida ma haida edia heduru e noi. (Hah. 6:27, 35; 7:24) E lalo namonamomu elda taudia na unu e kara tomamu. Matamanai tame herevalaia tadikakana, Tony na eto: “Lau na maraḡigu ai e hadibagu dalana dainai, na urava ḡaukara momo baina abi dae, ena be haida na basina haḡuḡuru diba. Una dainai na lalo emai ruma bese tomadihona ai manau karana baia herevalaia na namo, bona adavagu na nanadaia lau ese una kara na hahedinaraiamu eiava lasi. Danu, jw.org ai vidio ladana Train, Trust, and Empower Others, as Jesus Does na itaia.” Tony ese ma haida e noidia ena ḡaukara haida bae kara. Bena dahaka e vara? Tony na eto: “Kongrigeisin ai ḡaukara iboudiai na e hekara, bona lau na mai egu nega egu hetura karana Iehova ida baina hagoadaia.”

7. Elda taudia be edena dalai Gideon bae tohotohoa bema bae gwauraidia dika? (Iakobo 3:13)

⁷ Haida ese bae gwauraimu dika negadiai, mai manaumu ida ba hereva. Elda taudia ediai e varamu hahetoho ma ta na, haida ese e gwauraidia dikamu neganai. To, Gideon ena haheitalai ese baine durudia diba. Ia na mai dibana dia ḡoevadae dainai, Efraim taudia ese e gwauraia dika neganai, mai manauna ida e hereva. (Hah. 8:1-3) Gideon na se badu. To edia lalo hekwarahi herevadia e kamonai, bona mai aonegana ida e hereva dainai, edia badu e hakerua. Elda taudia ese Gideon e tohotohoamu dalana na, haida ese e gwauraidia dikamu neganai, e hakala namonamomu bona mai manaudia ida e herevamu. (Iakobo 3:13 ba duahia.) Unu amo kongrigeisin lalonai maino e havaraiamu.

8. Elda taudia be dahaka bae kara bema haida ese e hanamodiamu? Haheitalai ta a gwauraia.

⁸ Iehova ba imodaia. Gideon na Midian taudia e hadareredia dainai taunimanima ese e hanamoa neganai, ia na Iehova e imodaia. (Hah. 8:22, 23) Elda taudia ese Gideon be ede bae tohotohoa toma? Namona na e haḡuḡurumu ḡaudia daidiai Iehova bae imodaia. (1 Kor. 4:6, 7) Heḡereḡere, bema elda ta na ena hahediba dalana dainai haida ese bae hanamoa, baine gwa diba Dirava ena Hereva bona iena orea ese e hadibadamu ḡaudia ta herevalaimu. Nega haida reana elda taudia na bae lalo bema edia hahediba dalana amo idia be sibodia e heimodaimu eiava Iehova e imodaiamu. Elda ta ladana Timothy ena ekspiriens mani aita laloa. Elda maduna e abia matama neganai, pablik tok ihenidia karana na e moalelaiava. Ia na eto: “Nega momo egu hereva na hamatamava neganai na lalata bona haheitalai idauidau na ḡaukaralaiva, una dainai momo ese e hanamoguva. Unu amo idia na lau e lalogu badava, to dia Baibul eiava Iehova.” Gabeai, Timothy na e laloparara, ena hahediba dalana baine haidaua na namo, unu amo taunimanima ese e imodaiamu karana baine dadaraia. (Her. 27:21) Bena dahaka e vara? Ia na eto: “Momo ese e hamaoroguva egu tok ese idia be ede e durudia toma hekwakwanai o hahetoho ta e haheaukalaia, eiava edia hetura karana Iehova ida e hanamoa. Hereva unu bamodia na kamonai neganai na moale bada, dia guna heḡereḡerena.”

9. Dahaka ese Gideon ena kamonai karana bona lalo goada e tohoa? (Rau 1 laulauna ba itaia.)

⁹ Gideon na hahemaoro tauna ai ela murinai, ḡau haida ese ena kamonai karana bona lalo goada na e tohoa. Ia na Dirava ese asainmen aukana ta e henia, tamana ena bala ihaboulaina patana baine hadikaia. (Hah. 6:25, 26) Gabeai, tuari oreana ta e haboua murinai, Dirava ese nega rua e hamaoroa una orea na baine hamaraḡia. (Hah. 7:2-7) Danu, e hamaoroa  inaina na hanuaboi ai baine tuari henidia.​—Hah. 7:9-11.

10. Dahaka ese elda ta ena kamonai karana baine tohoa diba?

¹⁰ Elda taudia na mai manaudia ida kamonai karana bae hahedinaraia na namo. (Iak. 3:17) Kamonai karana e hahedinaraiamu elda tauna na Baibul bona Dirava ena orea amo e maimu hahekau herevadia e badinamu. Una dainai, ia na haheitalai namona ma haida ediai. Reana ḡau haida ese ena kamonai karana be tohoamu. Heḡereḡere, reana be abimu hahekau herevadia na momo eiava matamatadia dainai be badinadiamu na auka. Nega haida ai, reana be lalomu unu hahekau herevadia haida be mai anidia o lasi. Eiava reana asainmen ta be abiamu bona una ikarana ai bae hadiburaia diba. Nega unu bamodiai elda taudia ese Gideon ena kamonai karana be ede bae tohotohoa toma?

11. Dahaka ese elda baine durudia kamonai karana bae hahedinaraia?

¹¹ Hahekau herevadia ba kamonai namonamo bona ba badina. Dirava ese Gideon e hamaoroa, tamana ena ihaboulaina patana be ede baine hadikaia toma, Iehova ena boubou patana matamatana be edekahai baine haginia, bona edena animal baine bouboulaia. Gideon na se daradara, to Iehova ena hereva e badinaia. Hari ina negai, elda taudia na Iehova ena orea ese revareva, hahediba bona hahekau herevadia amo lauma bona tauanina dalanai ita bae duruda daladia e hadibadiamu. Elda taudia na ta lalokau henidiamu, badina mai edia abidadama ida Dirava ena hahekau daladia e badinamu, bona kongrigeisin na namo e davarimu.​—Sal. 119:112.

12. Dirava ena orea ese sensi e karamu neganai, elda taudia ese Heberu 13:17 be ede bae badinaia toma?

¹² Mai emu ura ida orea ese e karamu sensi bavabi dae. Ba laloatao Iehova ese Gideon na e hamaoroa, ena tuari taudia momo baine siaidia lou. (Hah. 7:8) Ia na reana bema lalo: ‘Ina sensi ese namo ta be havaraiamu eiava?’ To, Gideon na Iehova ena hereva e badinaia. Hari ina negai elda taudia na Gideon heḡereḡerena, Dirava ena orea ese sensi e karamu ḡaudia na e badinamu. (Heberu 13:17 ba duahia.) Heḡereḡere, laḡani 2014 ai Gavanin Bodi ese kontribiusen amo Kingdom Hall bona Assembly Hall ihaginidia ḡaukaradia inaridia daladia na e haidau. (2 Kor. 8:12-14) Guna orea ese kongrigeisin moni e henidiava Kingdom Hall bae hagini, bena gabeai kongrigeisin ese unu moni e halouva. To hari, orea ese tanobada heḡeḡemadai ena kontribiusen e ḡaukaralaiamu, Kingdom Hall bona Assembly Hall bae hagini, ena be kongrigeisin ta ta edia kontribiusen na dia bada. José na una dala matamatana e diba neganai, e daradara bona eto: ‘Kingdom Hall ta basine gini dibamu. Ina na se varamu ḡauna.’ Dahaka ese José e durua una dala matamatana e badinaia? Ia na eto: “Hereva Lada-isidia 3:5, 6 ena hereva amo na diba Iehova baina abidadama  henia na ḡau badana. Bona una dala matamatana ese namo na e havaraia! Hari, Kingdom Hall momo a haginimu, bona kontribiusen iḡaukaralaina dalana matamatana dainai, kongrigeisin na namo e davarimu.”

13. (a) Gideon be dahaka e diba momokani? (b) Elda taudia ese Gideon be ede bae tohotohoa toma? (Laulau danu ba itaia.)

¹³ Mai lalo goadamu ida Iehova ena ura ba karaia. Gideon na Iehova e badinaia, ena be e gari bona baine karaia ḡaukarana dainai ena mauri baine haboioa diba. (Hah. 9:17) Iehova ese e hagoadaia murinai, Gideon na e diba momokani Iehova ese be duruamu ena taunimanima baine gimadia. Eda ḡaukara e taravatua gabudiai e nohomu elda taudia na Gideon e tohotohoamu. Mai edia lalo goada ida hebou bona haroro ḡaukara e gunalaimu, ena be pulisi ese bae arestidia, bae nanadaidia, edia moni ḡaukara bae haboio, eiava daḡedaḡe bae davari. c Hisihisi bada hereana lalonai, elda ese hahekau herevadia bae badina totona bae lalo goada na namo, ena be dika bae davari. Reana unu hahekau herevadia na, hahemaoro hereva aukana baita harorolaia, bona dahaka baita kara Gog, Magog tauna ena tuari amo baita roho mauri totona.​—Esek. 38:18; Apok. 16:21.

14. Dahaka ese Gideon ena haheauka karana e tohoa?

¹⁴ Gideon na ena hahemaoro ḡaukarana ai baine goada na namo. Midian taudia na hanuaboi ai tuari lalonai e heau neganai, Gideon ese e ḡavadia Iesrele kourana amo ela bona Ioridane Sinavaina, una gabu na uda. (Hah. 7:22) To Gideon be Ioridane amo de lou, a? Lasi! Ena be ia bona ena tatau 300 na e hesiku, to Ioridane e hanaia bona dounu Midian taudia e ḡavadia ela bona e davaridia, bona e hadareredia.​—Hah. 8:4-12.

15. Dahaka dainai nega haida elda ta enai na be aukamu baine haheauka?

¹⁵ Nega haida elda ta na kongrigeisin bona  ena ruma bese inaridia ḡaukaradiai tauanina na be hesikumu. Nega unu bamodiai, elda taudia ese Gideon be ede bae tohotohoa toma?

16-17. Dahaka ese Gideon e durua e haheauka, bona elda taudia be dahaka e dibamu? (Isaia 40:28-31) (Laulau danu ba itaia.)

¹⁶ Bavabidadama Iehova ese oi na be hagoadamumu. Gideon na e abidadama Iehova ese goada baine henia, bona unu e vara toma. (Hah. 6:14, 34) Nega ta, Gideon bona ena tatau na Midian pavapavadia rarua e hahavadia aedia amo, a unu pavapava be kamelo ai e gui. (Hah. 8:12, 21) To, Dirava ese Gideon bona ena tatau e durudia dainai, idia na e kwalimu. Elda taudia danu Iehova enai bae tabekau, badina ia na “tauna se manorimu, se boeramu” Diravana. Ia ese idia na goada be henidiamu.​—Isaia 40:28-31 ba duahidia.

¹⁷ Mani Hospital Liaison Committee tadikakana ta, Matthew ena ekspiriens a laloa. Dahaka ese e durua e haheauka? Matthew na eto: “Filipi 4:13 ena hereva na lau ese na mamia. Nega momo egu goada e oremu neganai, Iehova na noia louloumu, goada baine henigu, unu amo tadikakagu baina durudia. Bona Iehova ena lauma helaḡa ese e durugumu dainai na haheaukamu.” Gideon heḡereḡerena, elda taudia na e ḡaukara goadamu Iehova ena taunimanima e naridiamu, ena be mai hekwarahina. Vaia, edia goada hetoana bae lalopararalaia na namo, bona bae kara diba ḡaudia bae kara. To, bae abidadama Iehova ese edia ḡuriḡuri na be kamonaimu bona goada be henidiamu bae haheauka.​—Sal. 116:1; Fili. 2:13.

18. Elda taudia be ededia dala ai Gideon bae tohotohoa?

¹⁸ Elda taudia na Gideon amo ḡau momo e dibamu. Idia ese edia ḡaukara ena bada e haeroamu bona haida ese e gwauraidia dikamu eiava e hanamodiamu neganai, manau karana bae hahedinaraia. Danu, ina nega oromana dokona e kahikahimu lalonai, kamonai karana bae hahedinaraia bona bae lalo goada na namo. Bona bae abidadama Dirava ese be hagoadadiamu, herevana dahaka hekwakwanai bae davari. Momokani, elda taudia na baita lalodia bada bona baita “matauraidia.”​—Fili. 2:29.