1. Iehova ena dina amo baita roho mauri totona dahaka baita kara be namo?

 BAIBUL ese “Iehova ena dina” e herevalaiamu neganai, una na Iehova ese inaina baine hahemaoro henidia bona ena taunimanima baine hamauridia negana e herevalaiamu. Gunaguna, Iehova ese bese haida e hahemaoro henidia. (Isa. 13:1, 6; Esek. 13:5; Sef. 1:8) Hari ina negai, “Iehova ena dina” na Babulono Badana be haoreamu negana ai be matamamu bona Aramagedono tuarina ai be dokomu. Una “dina” amo baita roho mauri totona, hari baita heḡaeḡae na namo. Iesu ese e hadibadamu ‘hisihisi bada hereana’ dainai baita “noho heḡaeḡae,” anina na hanaihanai baita heḡaeḡae.​—Mat. 24:21; Luka 12:40.

2. Dahaka dainai 1 Tesalonika ese ita be durudamu?

² Aposetolo Paulo ese Tesalonika e tore henidia revareva ginigunana ai, haheitalai idauidau amo Kristen taudia e durudia, Iehova ena hahemaoro dinana badana dainai bae noho heḡaeḡae. Paulo na dibana Iehova ena dina na dia una nega ai baine kau. (2 Tes. 2:1-3) To, tadikakana e hagoadadia una dina totona bae heḡaeḡae, vaitani una dina na kerukeru baine kau, bona ita ese danu iena sisiba baita badinaia. Mani Paulo ese ini henanadai e herevalai daladia aita lalo: (1) Iehova ena dina be ede be mai tomamu? (2) Daidia be una dina amo basie roho maurimu? Bona (3) edena dalai baita heḡaeḡae unu amo baita roho mauri?

3. Edena dalai Iehova ena dina na henao tauna hanuaboi ai e maimu na heto? (Laulau danu ba itaia.)

³ “Henao tauna hanuaboi ai e maimu na heto.” (1 Tes. 5:2) Una na Paulo ese Iehova ena dina ena mai e herevalaia neganai e ḡaukaralaia haheitalai ginigunana. Nega momo henao taudia na  e kara haraḡamu bona taunimanima asie dibamu negadiai e loamu. Iehova ena dina danu be kau haraḡamu, bona taunimanima momo be hahoadiamu. Kristen korikoridia danu reana be hoamu badina ḡau iboudiai na be vara haraḡamu. To ita na dika ta basita davariamu, dia kara dika taudia heḡereḡeredia.

4. Edena dalai Iehova ena dina na hekamonai o mara hisihisina na heto?

⁴ “Hekamonai ese rogorogo hahinena e lasia taomu na heto.” (1 Tes. 5:3) Rogorogo hahinena na baine hekamonai negana na asi dibana. To, mai dibana una na be varamu. Bona be hekamonaimu neganai, una na be vara haraḡamu, hisihisina na bada herea, bona asi ikouna dalana. Una heḡereḡerena, Iehova ena dina be matamamu dinana bona horana na asi dibada. To, ta dibamu una na be maimu bona Dirava ese kara dika taudia be hahemaoro henidia haraḡamu bona ta basine roho maurimu.

5. Edena dala ai hisihisi bada hereana na daba e reremu na heto?

⁵ Daba e reremu na heto. Paulo ese henao taudia hanuaboi ai e henaohenaomu haheitalaina ma e herevalaia lou. To una haheitalai lalonai Iehova ena dina na daba e reremu karana ida e haheḡereḡerea. (1 Tes. 5:4) Hanuaboi ai e henaohenaomu taudia na e henaomu ḡaudia e lalomu dainai, nega na se laloamu. Bena daba diarina ese e lasidia taomu bona taunimanima ese e itadiamu. Una heḡereḡerena, Dirava ese se moalelaimu karadia e karamu taudia na hisihisi bada hereana ese baine lasidia tao. A ita ese Iehova se moalelaimu karadia baita dadarai bona ‘lalohadai namodia, kara maoromaorodia bona hereva momokanidia’ baita badina, unu amo baita heḡaeḡae diba. (Efe. 5:8-12) Paulo na haheitalai ma rua amo basie roho mauri taudia e herevalaidia.

6. Edena dala ai taunimanima momo na e mahutamu? (1 Tesalonika 5:6, 7)

⁶ “Mahuta taudia.” (1 Tesalonika 5:6, 7 ba duahidia.) Paulo ese Iehova ena dina amo basie roho mauri taudia na e mahutamu taudia ida e haheḡereḡeredia. Idia na badidia ai e varamu ḡaudia o nega e hanaimu na asie dibamu. Una dainai, ḡau mai anidia be varamu eiava ede bae kara toma na asi dibadia. Hari ina negai taunimanima momo na lauma dalanai e mahutamu. (Roma 11:8) Idia na asie dibamu e varamu ḡaudia ese e hahedinaraimu, ita na “dina gabedia ai” ta nohomu, bona hisihisi bada hereana na kahirakahira be varamu. Tanobada ai ḡau badadia e varamu neganai, haida na vaitani lauma dalanai e hanogadiamu bona e uramu Basileia sivaraina bae kamonai. To, momo na ma e mahuta loumu. Danu ena be haida na mai dibadia hahemaoro dinana be varamu, to e laloamu una na do daudau. (2 Pet. 3:3, 4) To, ita na ta lalopararamu dina ta ta ai baita noga na mai anina bada.

7. Edena dalai Dirava ese baine haoredia taudia na kekero taudia na heheto?

⁷ “Kekero taudia.” Dirava ese baine haoredia taudia na Paulo ese kekero taudia ida e haheḡereḡeredia. E kekeromu taudia na badidiai e varamu ḡaudia daidiai kara ta asie karaia haraḡamu, bona abi hidi kereredia e karamu. Una heḡereḡerena, kara dika taudia ese Dirava ena hahediba herevadia na asie badina haraḡamu. Idia na mase e lao heniamu dalana e abia hidimu. To Baibul ese Kristen taudia e hamaorodiamu nega iboudiai bae lalo maoromaoro. (1 Tes. 5:6, NWT) Baibul mai dibana namonamo tauna ta na e gwa, e lalo maoromaoromu tauna na “ḡau e haeromu, bona e lalo namonamomu dainai abi hidi maorodia e karamu.” Dahaka dainai baita lalo maoromaoro na mai anina bada? Badina unu amo politikol o heiriheiri karadia ai basita vareai. Iehova ena dina e kahikahimu lalonai taunimanima ese be doridamu unu kara lalodiai baita vareai bona edia hedori karana na be habadaiamu. To, ede baita kara toma na basita lalohekwarahilaia. Badina Dirava ena lauma helaḡa ese be durudamu, baita lalo maoromaoromu bona abi hidi maorodia baita karamu.​—Luka 12:11, 12.

8. Tesalonika Ginigunana 5:8 ai, ededia kara ese be durudamu baita noga bona baita lalo maoromaoro? (Laulau danu ba itaia.)

⁸ “Kemeda ena auri dabua . . . bona . . . kwara ḡauna baita atoa.” Paulo ese ita na tuari dabuadia e hahedokilai bona e gimamu tuari taudia ida e haheḡereḡereda. (1 Tesalonika 5:8 ba duahia, NWT.) Tuari tauna na hanaihanai tuari totona baine heḡaeḡae na namo. Una heḡereḡerena, Iehova ena dina dainai baita heḡaeḡae totona, hanaihanai abidadama bona lalokau na keme auri dabuana bamona baita atoa, bona hahemauri helarona na kwara ḡauna bamona baita atoa. Unu kara ese ita na be duruda badamu.

9. Abidadama ese ita be ede e gimada tomamu?

⁹ Keme auri dabuana ese tuari tauna kemena e gimaiamu heḡereḡerena, abidadama bona lalokau ese laulau dalanai kudouda e gimaiamu. Unu kara ruaosi ese be durudamu dounu Dirava baita hesiai henia bona Iesu baita badinaia. Abidadama dainai ta dibamu mai kudouda ibounai ida Iehova baita tahuamu neganai ia ese davada namona be henidamu. (Heb. 11:6) Danu, abidadama ese be hagoadadamu Igunalaida Tauna, Iesu, baita badinaia hanaihanaimu, metau baita davarimu negadiai danu. Hari ina negai daḡedaḡe o moni ena hekwakwanai lalodiai Dirava e badinaia tarika-tarikamu taudia edia haheitalai amo eda abidadama baita hagoadaia,  unu amo hekwakwanai baita haheaukalai. Danu, edia mauri lalonai Basileia e atoa gunamu taudia edia haheitalai baita tohotohoamu neganai, moni bona kohu iura henidia hedibaḡanina na baita dadaraia dibamu. b

10. Edena dalai Dirava bona taunimanima ilalokau henidia karana ese be durudamu baita haheauka?

¹⁰ Lalokau karana ese danu be durudamu hanaihanai baita noga bona baita lalo maoromaoro. (Mat. 22:37-39) Dirava ilalokau henina karana ese e durudamu mai eda haheauka ida ta haroromu, ena be hahetoho ta davarimu. (2 Tim. 1:7, 8) Dirava asie hesiai heniamu taudia ta lalokau henidiamu dainai, eda teritori ai haroro ḡaukarana na dounu ta karaiamu, telefon bona revareva amo danu ta haroromu. Namona na baita abia dae taunimanima na nega ta edia kara be haidaumu bona kara maorodia be karamu.​—Esek. 18:27, 28.

11. Eda tadikaka taihu ilalokau henidia karana ese ita be ede e duruda tomamu? (1 Tesalonika 5:11)

¹¹ Eda tadikaka taihu danu baita lalokau henidia. Una lalokau ta hahedinaraiamu dalana na, ‘ta hahealo hehenimu’ bona ‘ta hahegoada hehenimu.’ (1 Tesalonika 5:11 ba duahia.) Tuari lalonai tuari taudia na e ḡaukara heboumu bona e heduru hehenimu heḡereḡerena, ita danu ta hahegoada hehenimu. Vaia, tuari ai tuari tauna ta na reana aksiden ai bamona be haberoamu. Una heḡereḡerena, ita danu asita dibamu tadikaka taihu na ta hahisidiamu eiava edia dika ta hadavamu. (1 Tes. 5:13, 15) Eda lalokau baita hahedinaraia dalana ma ta na, kongrigeisin e gunalaiamu tadikakadia baita matauraidia. (1 Tes. 5:12) Paulo ese 1 Tesalonika e torea neganai, Tesalonika kongrigeisin na matamata. E abidia hidi tataudia edia diba na dia bada bona ḡau haida na asie kara namonamova. To, kongrigeisin taudia ese bae matauraidia na maoro. Hisihisi bada hereana e kahikahimu lalonai, namona na iseda elda taudia edia hahekau daladia baita badina namonamo. Badina una dina be kaumu neganai, hedkota bona brens ofesi tadikakadia amo hahekau herevadia na basita abi dibamu; una dainai hari na nega namona elda taudia baita  lalokau henidia bona baita matauraidia. Herevana dahaka baine vara, to namona na baita lalo maoromaoro, bona unu abidadama tadikakadia edia kerere basita lalodia bada, to Iehova ese Keriso amo idia e hakaudiamu dalana baita laloa.

12. Edena dala ai eda helaro ese eda lalohadai e gimaiamu?

¹² Tuari tauna na kwara ḡauna ese e gimaiamu heḡereḡerena, eda hahemauri helarona ese eda lalohadai e gimaiamu. Helaro goadana dainai, ta dibamu ina tanobada ena lalohadai na asi anina. (Fili. 3:8) Eda helaro ese be durudamu basita lalohekwarahimu bona baita lalo mainomu. Wallace bona Laurinda ediai una na e vara; idia na Africa ai hesiai ḡaukara e karamu. Wiki toi lalodiai, Wallace tamana bona Laurinda sinana na e mase. Idia na Betele ai e nohomu bona COVID-19 pandemic dainai, edia bese ihagoadadia totona baela na auka. Wallace na eto: “Tore isi lou helarona ese e durugumu dainai, idia do se mase negana na asina laloamu to tanobada matamatana ai bae tore isi lou negana na laloamu. Idia na lalodiamu bona na lalohisihisimu negadiai, tore isi lou helarona ese lalomaino e henigumu.”

13. Dahaka baita kara diba lauma helaḡa baita abia totona?

¹³ “Lauma helaḡa ena lahi basio habodoa.” (1 Tes. 5:19, NWT) Paulo ese lauma helaḡa na lalodai e hururumu lahina ida e haheḡereḡerea. Dirava ena lauma helaḡa baita abiamu neganai, baita uramu kara maorodia baita kara bona Iehova ena ḡaukara baita goadalaia. (Roma 12:11) Dahaka baita kara lauma helaḡa baita abia totona? Namona na baita ḡuriḡuri, Dirava ena Hereva baita stadilaia, bona iena lauma helaḡa ese e hakauamu oreana baita badinaia. Unu baita kara tomamu neganai, be durudamu “lauma huahuana” baita hahedinaraiamu.​—Gal. 5:22, 23.

14. Dahaka basita kara bema ta uramu Dirava ena lauma helaḡa baita abia? (Laulau danu ba itaia.)

¹⁴ Dirava ese ena lauma helaḡa e henidamu murinai, namona na nahuada baita toho, ‘lauma helaḡa ena lahi basita habodoa.’ Lalohadai  namodia e abimu bona kara namodia e karamu taudia na Dirava ese ena lauma helaḡa e henidiamu. A bema lalohadai mirodia baita abimu bona kara dikadia baita karamu lauma helaḡa na basine henidamu. (1 Tes. 4:7, 8) Danu, lauma helaḡa baita abia totona, “peroveta herevadia” basita dadarai na namo. (1 Tes. 5:20) “Peroveta herevadia” anina na Dirava ese ena lauma helaḡa amo e henidamu herevadia, idia haida na Iehova ena dina bona iseda nega oromana dokona. Basita lalo Aramagedono na dia iseda negai be varamu. To, una na kahirakahira be kaumu, una dainai hanaihanai Dirava ibadinana karadia baita hahedinarai bona eda kara na bae ḡoeva.​—2 Pet. 3:11, 12.

15. Edena dalai sivarai koikoidia bona demoni edia lalo veri herevadia baita dadarai? (1 Tesalonika 5:21)

¹⁵ Kahirakahira, Dirava e inai heniamu taudia na ina hereva ‘maino bona noho namo’ be gwauraiamu. (1 Tes. 5:3) Demoni edia lalo veri hereva koikoidia ese momo be hakaudia kereremu. (Apok. 16:13, 14) To ita be dahaka baita kara? Bema ‘ḡau iboudiai baita diba tohomu’ o baita hetahulai namonamomu, unu koikoi herevadia ese basie koida dibamu. (1 Tesalonika 5:21 ba duahia.) Greek gado ai ina hereva “ba diba toho” e hahanaia neganai, una na vaitani taunimanima ese gold eiava silver auridia e tohomu, unu amo bae diba idia be ḡau korikoridia eiava lasi. Una heḡereḡerena, ta kamonaimu eiava ta duahimu herevadia na baita tohodia o baita tahudia namonamo unu be hereva momokanidia eiava lasi. Tesalonika taudia ediai una na mai anina bada, bona hari negai hisihisi bada hereana e kahikahimu lalonai ita edai danu una na mai anina bada. Haida edia hereva na basita abi dae kava, to darada baita ḡaukaralaia, ta duahimu bona ta kamonaimu herevadia na Baibul bona Iehova ena orea amo e maimu herevadia ida baita haheḡereḡere. Unu baita kara tomamu neganai demoni edia lalo veri hereva koikoidia baita dadarai dibamu.​—Her. 14:15; 1 Tim. 4:1.

16. Eda helaro be dahaka, bona laloda baita hadai dahaka baita kara?

¹⁶ Ta dibamu Dirava ena hesiai taudia na hisihisi bada hereana amo be roho maurimu. To ita ta ta, na asi dibada kerukeru be dahaka baine vara. (Iak. 4:14) Ena be hisihisi bada hereana amo baita roho maurimu o hisihisi bada hereana do lasi ai baita masemu, to bema Dirava baita badinaia hanaihanaimu, ia ese mauri hanaihanai be henidamu. Horoa taudia na Keriso ida guba ai be nohomu. Bona mamoe idaudia be tanobada paradaisona ai be nohomu. Una dainai laloda baita hadai eda helaro namona baita laloa bada, bona Iehova ena dina totona baita noho heḡaeḡae!