Tanobada Tuarina Iharuana lalonai tamagu bona sinagu na Estonia e rakatania bona Germany ela; lau na unuseni ai na vara. Una negana ai idia na e heḡaeḡae Canada baela. Canada ena siti ta, Ottawa ai, a nohova gabuna badinai na kokoroku maḡuna ta danu. Ena be ai na ogoḡami, to dabai na gatoi a aniva.

Dina ta, Iehova ena Witnes na sinagu enai Apokalupo 21:3, 4 e duahia. Sinagu na e dibaia ḡauna ese kudouna e hamarerea dainai e tai. Tamagu bona sinagu na Baibul e stadilaia matama bona se daudau e bapatiso.

Ena be tamagu bona sinagu na English gado na asi dibadia namonamo, to hereva momokani na e laloa bada. Sudbury, Ontario ai, tamagu na auri e haveveva gabunai e ḡaukarava, bona ena be e ḡaukara hanuaboiva, to Saturday momo na ia, lau bona tadigu Sylvia a harorova. Danu wiki ta ta ai Gima Kohorona a stadilaiava. Tamagu bona sinagu ese Dirava ilalokau henina karana e hadibagu. Una dainai laḡani 1956 ai, laḡanigu 10 neganai, egu mauri na Iehova enai na gwauhamatalaia. Tamagu bona sinagu edia lalokau Iehova enai ese e hagoadagu egu mauri lalonai Ia baina hesiai henia.

Haiskuli amo na gradueit murinai, Iehova ihesiai henina karana na, na laloa maraḡi. Na lalo bema baina painia, egu moni na basine heḡereḡeremu plein amo tano ma ta bainala. Lau na reidio steisin ta ai ḡaukara ta na davaria bona rekodi miusikidia na gadaralaiva. Una ḡaukara na, na ura henia bada. To hanuaboi ai na ḡaukarava dainai, hanaihanai hebou na readiava bona Dirava asie lalokau heniava taudia na bamodiava. To Baibul amo na diba ḡaudia daidiai ḡau haida na haidau.

Lau na Oshawa nala, una na Ontario ai. Unuseni ai Ray Norman, taihuna Lesli, bona painia taudia ma haida na hedavari henidia. Idia ese lau na e lalogu badava. Idia na itadia e moaleva neganai, lau na egu mauri ai baina kara ḡaudia na haerodia lou. Idia ese e hagoadagu painia ḡaukara baina karaia, bona September 1966 ai na painia. Egu mauri na, na moalelaiava. To, ḡau haida ese egu mauri na e haidaua.

Haiskuli ai na skuliva neganai, Betele aplikeisin ta na hahonua bona na siaia Toronto, Canada ai.  Gabeai na painiava neganai, e boirigu Betele ai laḡani 4 baina ḡaukara. To Lesli na, na ura heniava, bona na lalohekwarahi bema Betele ba laomu ia na vada basina itaia loumu. Una na ḡuriḡurilaia loulou murinai, lalogu na hadaia Betele bainala bona Lesli na bamahuta henia.

Betele ai lau na laundry ai na ḡaukara bona gabeai seketere ḡaukarana na karaia. A Lesli na e spesol painiava Gatineau, Quebec ai. Nega momo na lalova ia be da dahaka e karamu bona lau be disisin maorona na karaia eiava. To moale ḡauna na, Lesli taihuna Ray na e boiria Betele ai bona lau ida daiutu tamona ai a nohova! Una ese dala e kehoa Lesli ida ma a herevahereva lou. Ai na February 27, 1971 ai a headava, una na Betele ai na ḡaukara dinana ginigabena.

Lau bona Lesli na French gado kongrigeisin ta e siaimai lao, Quebec ai. Laḡani haida muridiai, e boirigu seket ḡaukara baina karaia, una negai laḡanigu na 28. Lau na eregabe dainai na lalo lau na dia heḡereḡere, to Ieremia 1:7, 8 ena hereva ese e hagoadagu. Danu, Lesli na motuka aksiden haida e davari bona se mahuta namonamova. Una dainai a lalo seket ḡaukarana baia karaia na auka. To, Lesli na e gwa, “Bema Iehova ese e hamaorodamu ḡau ta baita karaia, namona na baita karaia toho.” Una asainmen na a abia dae bona laḡani 17 lalodiai seket ḡaukarana a moalelaia.

Seket ḡaukarana ai na bisiva dainai, egu nega na dia heḡereḡere Lesli ida baia herevahereva bona baia hebamo heheni. To ḡau ta na dibaia. Monday daba ta ai, iduara ai pidipidi reḡena ta a kamonai. Iduara a kehoa neganai ta lasi to pikineki boseana ta, lalonai na teibolo dabuana, fruit, sisi, parao, wain kavabuna ta, galasi, bona nouti ta, e hetore herevana bina, “Adavamu ba laohaia pikineki”; asia diba unu be daika ese e ato. Una dina na dina hereana. To, Lesli na hadibaia egu tok baina heḡaeḡaelaia dainai basiala. Ia na e laloparara to taina e lalohisihisi. Egu stadi teibolona ai na helai neganai, lalogu mamina na se namo. Efeso 5:25, 28 ena hereva na laloa. Unu siri ai Iehova ese e hahelalogu une adavagu ena hemami baina laloa. Na ḡuriḡuri murinai, Lesli na hamaoroa, “Aitala,” bona una ese e hamoalea. Motuka amo ala sinavai ta badinai, bena gabu namona ta ai teibolo dabuana a tahoa, bona una dina na a moalelaia hebou. Bona egu tok na dounu na heḡaeḡaelaidia.

Emai seket ḡaukarana na a moalelaia bona gabu momo ala, British Columbia amo ela bona Newfoundland. Guna na ura baina loaloa urana na vada e vara. Egu ura na Gilead Skuli bainala to asina ura tano idauna ta ai misinari ḡaukarana baina karaia. Toana na misinari taudia edia diba na bada, bona na laloa lau na dia heḡereḡere. Danu na gari hari be siaimai laomu Africa  tanona ta, tuari bona daihanai goreredia e varamu gabuna. Egu mauri Canada ai na, na moalelaiava.

Laḡani 1992 ai Soviet tanodia ai eda haroro ḡaukara e kehoa lou neganai, tadikaka ese e nanadaimai bema ai na a uramu Estonia baiala bona misinari ḡaukarana baia karaia. A daradara, to a ḡuriḡurilaia. Bona ma a lalo, ‘Bema Iehova ese e hamaorodamu ḡau ta baita karaia, namona na baita karaia toho.’ Una asainmen na a abia dae, bona na lalo, ‘Namo, ai na dia Africa baia laomu.’

Ai na maoromaoro Estonia gado a dibaia matama. Bena hua haida muridiai, e noimai seket ḡaukarana baia karaia. Ai ese Baltic tanodia toi bona Kaliningrad, Russia ai, kongrigeisin 46 heḡereḡeredia bona grup haida baia vadivadidia. Una dainai Latvia, Lithuania, bona Russia gado baia dibadia. Una na mai hekwarahina. To, tadikaka taihu na mai moaledia ida ai e durumai edia gado baia dibaia. Laḡani 1999 ai, Estonia ai brens ofesi ta e kehoa, bona lau, Toomas Edur, Lembit Reile, bona Tommi Kauko na brens komiti.

Ai ese guna Siberia e siaidia lao Witnes taudia momo a dibadia. Ena be idia na dibura ruma ai daḡedaḡe bada e davari bona edia ruma bese amo e hapararadia, to unu na asie badulai. Idia na dounu mai moaledia ida edia hesiai ḡaukara e goadalaiava. Una ese e durumai metau negadiai baia haheauka mai moalemai ida.

Laḡani momo lalodiai a ḡaukara goadava bona asi emai nega baia laḡa-ani, una dainai Lesli tauanina na e manoka herea. Bona asia diba haraḡa ia na gorere ta ladana fibromyalgia e abia. Una dainai a lalo baia lou lao Canada. Patterson, New York, U.S.A. ai brens skuli totona e boirimai neganai, na daradara baiala eiava. To, a ḡuriḡurilaia murinai, una boiboi na a abia dae. Bona Iehova ese emai abi hidi na e hanamoa. Una skuli ala neganai, unuseniai Lesli na medikol heduruna e abia. Una dainai, emai ḡaukara na ma a karaia lou.

Laḡani 2008, Estonia ai, adorahi ta ai hedkota amo tadikaka ese e rini henimai bona e noimai Congo baiala. Na hoa dikadika, badina idia na e ura murina dinana ai haere baina heni. Matamanai, asina ura Lesli baina hamaoroa, badina be dibamu neganai hanuaboi ai basine mahutamu. A ḡau be lau hari asina mahuta, badina Africa baiala lalohekwarahidia na ḡuriḡurilaiva.

Murina dinana ai Lesli na hamaoroa neḡanai, raruosi a gwa: “Iehova ese e hamaorodamu Africa baitala. Bema basita laomu ede baita diba tomamu una na baita karaia diba bona baita moalelaia?” Una dainai Estonia ai laḡani 16 a noho murinai, plein amo Kinshasa ala, una na Congo ai. Brens ofesi ena uma gabu na mai hairaina bona gabu asi reḡereḡena. Lesli ese Canada a rakatania neganai, e abia kau kadina ta na emai daiutu ai e atoa. Una kadi ai ini hereva e hetore,  “O laomu gabudia ai ba moale.” Tadikaka a hedavari henidia, Baibul stadi a karadia, bona misinari ḡaukarana a karaia murinai, emai moale na e bada. Gabeai, ai na brens vadivadi ḡaukarana a karaia bona Africa tanodia 13 heḡereḡerena a vadivadidia. Taunimanima idauidau bona mai hairaidia a itadia. Matamanai na abia lalohekwarahina na e ore, bona Iehova a tenkiu henia badina Africa e siaimai lao.

Congo ai, aniani idauidau, heḡereḡere biluga, kwadi o unu bamona ḡaudia (insects) e henimaiva, unu na matamanai asia ura baia ani. To, tadikaka a itadiava unu aniani e moalelaiva neganai, a ura baia tohodia bona a moalelaidia.

Ai na ist kahana tanodia ala, lauma dalanai tadikaka baia hagoadadia bona edia dabu ḡaudia baia henidia. Unu gabu ai, gwau-edeede oreadia (guerrilla groups) na hanua ai e vareaiva bona ha’hine bona natu e daḡedaḡe henidiava bona e hahisidiava. Tadikaka momo na asi edia kohu momo. To, edia helaro tore isi lou ai na goada, edia lalokau Iehova enai, bona iena orea ibadinana karana ese ai na e hagoadamai. Bona e durumai Iehova a hesiai heniamu badina baia laloa lou bona emai abidadama baia hagoadaia. Tadikaka haida na edia ruma bona uma anidia e haboiodia. Una ese e hadibagu kohu na bae boio haraḡa diba, to eda hetura karana Iehova ida na mai anina bada. Ena be tadikaka na hekwakwanai momo e davari, to asie maumauva. Una ese e hagoadamai emai hekwakwanai bona gorere na mai emai lalo goada ida baia haheaukalaidia.

Hahenamo ma ta a davaria. Ai na e noimai Hong Kong brens baiala. Asi a lalo ai na Asia tanona ai baia ha noho! To emai asainmen ma haida ai Iehova ena lalokau a mamia dainai, una asainmen danu a abia dae. Laḡani 2013 ai, mai iruru matamai ida, turamai lalokaudia bona gabu mai hairaina, Africa a rakatania, bona asi a diba vairamai ai be dahaka be varamu.

Hong Kong na bisi gabuna bona gabu idauidau amo ema taudia e nohomu, una dainai aiemai ai  una na sensi badana. China gado idibana na mai hekwarahina. To tadikaka ese mai moaledia ida e abimai dae, bona edia aniani na a moalelai. Ḡaukara na e bada haraḡava dainai, brens na e ura gabu badana ta bae abia, to tano bona bildin davadia na bada herea. Una dainai Gavanin Bodi na abi hidi e karaia brens ena tano bona bildin momo bae hoihoilai. Se daudau, laḡani 2015 ai, lau bona Lesli na South Korea e siaimai lao, unuseniai doini emai hesiai ḡaukarana a karaiamu. Ena be Korea gado idibana na auka, to tadikaka taihu ese e hamaoromai una gado ai a herevamu na namo herea, una ese e hagoadamai.

Tura matamatadia idibadia na auka, to a lalo bema baia abidia daemu, idia baia dibadia haraḡamu. A laloparara eda tadikaka iboudiai na heḡereḡere bona Iehova ese ita e karada na lalokau baita hahedinaraia, unu amo tura momo baita dibadia.​—2 Kor. 6:11.

Namona na taunimanima baia abidia dae Iehova e karamu heḡereḡerena, bona emai mauri lalonai Iehova ena lalokau bona hahekau daladia baia lalodia. A lalomanokamu eiava tadikaka taihu ese ai ede e lalomai tomamu dalana a daradaralaiamu negadiai, turamai ese e henimai hahegoada kadidia o revarevadia a duahidia loumu. A mamia Iehova ese emai ḡuriḡuri na e haerelaidia, una ese e hagoadamai.

Laḡani momo lalodiai, lau bona Lesli na a diba ena be a bisimu to nega baia ato ai raruosi baia hebamo na mai anina bada. Danu gado matamatana idibana ai mistake a karamu neganai baia kiri ena namo a lalopararalaia. Bona hanuaboi ta ta ai, a moalelaia ḡauna ta a laloamu, unu amo Iehova baia tenkiu henia.

Guna na lalo, misinari ta ai na basinala diba eiava tano ma haida ai na basina noho. To, na dibaia ḡauna na, Iehova ena heduru amo unu iboudiai na baina karadia diba. Peroveta tauna Ieremia ena hereva na laloa, etomu: “Iehova e, oi ese . . . vada o koigu.” (Ier. 20:7) Oibe, ia ese ḡau namodia momo herea bona asina lalo hahenamodia e henimai, plein amo baina loaloa urana danu e haḡuḡurua. Ai na plein amo gabu momo ala, unu na maraḡigu ai asina lalodia gabudia, bona brens vadivadi ḡaukarana ai tano momo a vadivadidia. Na moalemu badina emai asainmen iboudiai lalodiai, Lesli na mai ena ura ida lau e durugu.

Nega iboudiai a helalotaomu, ḡau iboudiai a karamu badina na Iehova a lalokau heniamu. Bona hari a moalelaimu hahenamodia ese e hahedinaraimu, vaira negana ai Iehova ese ‘imana baine kehoa, mauri ḡaudia iboudiai bogadia baine hakunudia’ neganai, mauri hanaihanai baia moalelaiamu.​—Sal. 145:16.