Baibul ese badina na se gwauraia. To e herevalai ḡaudia haida amo e hahedinaraiamu dahaka dainai idia na Nasaret asie lou lao.

Aneru ta ese Maria e hamaoroa ia na baine rogorogo bona mero ta baine havaraia. Aneru ese una hereva e gwauraia negana ai, Maria bona Iosef na Nasaret ai e nohova, una na Iosef ena hanua Galilea ai. (Luka 1:26-31; 2:4) Gabeai, idia na Aigupto amo e lou neganai, Nasaret ela. Bena Iesu na unuseniai e tubu dae bona e gwauraia Nasaret tauna. (Mat. 2:19-23) Una dainai Iesu, Iosef bona Maria ta herevalaidiamu neganai Nasaret ta laloamu.

Maria varavarana ta ladana na Elisabeta, ia na Iuda ai e nohova. Elisabeta na hahelaḡa tauna Sakaria adavana bona Ioane Bapatiso sinana. (Luka 1:5, 9, 13, 36) Maria na Elisabeta e vadivadia bona ia ida Iuda ai hua toi e noho. Una murinai e lou lao Nasaret. (Luka 1:39, 40, 56) Una dainai Maria na Iuda ena tano momo na mai dibana.

Gabeai, Roma gavamani na e haheḡani “taunimanima iboudiai ese ladadia itoredia totona ena hanua ena hanua” bae lou heni. Una dainai Iosef na Nasaret amo ela Betelehem, una na “David ena hanua” bona peroveta herevana heḡereḡerena Mesia baine vara gabuna. (Luka 2:3, 4; 1 Sam. 17:15; 20:6; Mika 5:2) Maria ese Iesu e havaraia murinai, Iosef na se ura Maria na vara matamata beibina ida gabu daudauna amo baela Nasaret. Una dainai idia na Betelehem ai e noho; ena daudau Ierusalem amo na 9 kilomita (6 mile) heḡereḡerena. Unu amo idia ediai na se auka edia beibi na Ierusalem ena dubu helaḡa bae laohaia bona boubou ḡauna maorona bae heni.​—Lev. 12:2, 6-8; Luka 2:22-24.

Matamanai Dirava ena aneru na Maria e hamaoroa baine havaraia merona na “David ena terono” ai baine lohia. Reana Iosef bona Maria na e laloparara Iesu na David ena hanua ai e vara na mai anina bada. (Luka 1:32, 33; 2:11, 17) Danu, reana e laloa aonega karana na una hanua ai bae noho bona bae itaia Dirava ena ura be dahaka idia ediai.

Ita na asi dibada hisiu istadilaina taudia ela neganai, Iosef bona Maria be ede daudauna Betelehem ai vada e noho. To una nega ai, idia na ruma ta ai e nohova, bona natudia na “mero maraḡina,” dia beibi. (Mat. 2:11) Toana na idia na Nasaret asie lou henia, to Betelehem ai taina e noho daudau bona una na edia hanua ai ela.

Herod na e haheḡani “laḡanidia rua bona gabeai e vara memerodia iboudiai na Betelehem ai” bae aladia. (Mat. 2:16) Dirava ena aneru ese Iosef e hadibaia dainai, ia bona Maria ese Iesu e abia bona Aigupto e heau lao, unuseni ai e noho ela bona Herod e mase. Gabeai, Iosef ese ena ruma bese na e laohaidia Nasaret. To dahaka dainai Betelehem asie lou lao? Badina una nega ai Herod natuna Akelao, daḡedaḡe tauna na Iudea e lohiaiava, bona Iosef na Dirava ena hereva e badinaia. Nasaret ai, Iosef ese Iesu e naria bona ia na Dirava itomadiho henina tauna ai ela.​—Mat. 2:19-22; 13:55; Luka 2:39, 52.

Toana na Iosef e mase murinai, Iesu ese dala e kehoa haida na guba baela. Una dainai Iosef na tanobada ai be tore isi loumu. Bona momo ese be hedavari heniamu neganai, ia ese be hadibadiamu dahaka dainai ia bona Maria na Iesu e vara murinai Betelehem ai dounu e noho.