1. Dahaka dainai Iehova ena taunimanima na dounu ia e tomadiho heniamu, ena be hekwakwanai e davarimu?

 BAIBUL ese iseda nega na e gwauraiamu “nega dikadia.” (2 Tim. 3:1) Ina tanobada dikana ai Iehova ena Witnes na taunimanima ese e davarimu hekwakwanaidia e davarimu, to danu idia na Iehova e hesiai heniamu dainai e daḡedaḡe henidiamu bona e inai henidiamu. Dahaka ese e durudamu dainai ena be hekwakwanai ta davarimu to dounu Iehova ta tomadiho heniamu? Badina ta na ita ese Iehova ena heduru ta mamia bona mai dibada ia na “mauri Diravana.”—Ier. 10:10; 2 Tim. 1:12.

2. Ede ta diba tomamu Iehova na mauri Diravana?

² Iehova na Dirava korikorina bona hekwakwanai negadiai ia na dala e tahumu ita baine duruda. (2 Sis. 16:9; Sal. 23:4) Bema baita helalotaomu Iehova na mauri Diravana una ese be durudamu hekwakwanai idauidau baita haheaukalaimu. King David enai e vara ḡaudia mani aita haerodia.

3. David na e gwa “Iehova na e maurimu” anina be dahaka?

³ David na mai dibana Iehova bona ia enai e tabekau. King Saulo bona ma haida na e urava David bae alaia neganai, David na ḡuriḡuri amo Iehova ena heduru e noia. (Sal. 18:6)  Dirava ese ena ḡuriḡuri e haerelaia bona e hamauria murinai, David na e gwa: “Iehova na e maurimu.” (Sal. 18:46) David ena hereva anina be dahaka? Buka ta na e gwa, David na ena hereva amo e hahedinaraia Iehova na Dirava momokanina bona ena hesiai taudia na hanaihanai e durudiamu. Oibe, David na ena mauri ai e vara ḡaudia amo e diba iena Dirava na e maurimu, una dainai lalona e hadaia ia baine hesiai henia, bona ladana baine imodaia.—Sal. 18:​28, 29, 49.

4. Bema ta abia daemu Iehova na mauri Diravana, dahaka namo baita davarimu?

⁴ Bema ta abia daemu Iehova na mauri Diravana, una ese be durudamu mai moaleda ida ia baita hesiai heniamu. Bena una ese be hagoadadamu hahetoho baita haheaukalaimu, bona Dirava ena hesiai ḡaukara na dounu baita goadalaiamu. Danu, baita uramu Iehova badibadinai baita noho.

MAURI DIRAVANA ESE BAINE HAGOADAMU

5. Hahetoho ta davarimu negadiai, dahaka ese baine hagoadada diba? (Filipi 4:13)

⁵ Ita ese hahetoho badadia o maraḡidia na baita haheaukalaimu, bema baita helalotaomu Iehova na e maurimu bona hanaihanai ita na be durudamu. Ia enai hekwakwanai ta na dia auka. Ia na Siahu Idoinai Diravana dainai goada be henidamu baita haheauka. (Filipi 4:13 ba duahia.) Oibe hahetoho na baita haheaukalai diba. Hahetoho maraḡidia lalodiai Iehova ese e durudamu dainai, ta dibamu hahetoho badadiai danu be durudamu.

6. David meronai enai be dahaka e vara bona una ese ena abidadama Iehova enai e hagoadaia?

⁶ Mani David enai e vara ḡaudia rua aita herevalai, bona unu ese ena abidadama Iehova enai e hagoadaia. David na tamana ena mamoe e reḡudiava lalonai, bea ta ese mamoe ta e abia bona ma nega ta be leona ese mamoe ta e abia. To unu nega ruaosi ai, David na asi garina ida unu animal e havadia bena mamoe na e hamauridia. To, ia na se lalo una na ena goada amo e karaia. Ia na e diba Iehova ese goada e henia. (1 Sam. 17:​34-37) David ese unu nega na se lalodia boio. E vara ḡaudia e lalodia dobu neganai, e hagoadaia bona e diba vaira negai danu mauri Diravana ese be duruamu.

7. David be dahaka e lalo, bona edena dala ai una ese e durua Goliata e tuari henia?

⁷ Gabeai, David laḡanina 20 do se abia neganai, Israel tuari oreana edia kamepa ela. Bena e itaia tuari taudia na e gariva badina Filistia edia tau badana Goliata na e gwauva: “Israel tuari oreadia na hare henidiamu.” (1 Sam. 17:​10, 11) Unu tuari taudia na Goliata bona ena hereva e lalova dainai e gari. (1 Sam. 17:​24, 25) To David ena lalohadai be idau, ia na e diba Goliata na dia Israel tuari taudia mo e hare henidiava, to ia na ‘Mauri Diravana e hare heniava.’ (1 Sam. 17:26) David na Iehova e laloa. Ia na e abia dae, mamoe e nariva neganai Iehova ese e durua heḡereḡerena, ina negai danu be duruamu. Una dainai ia ese Goliata e tuari henia bona e kwalimu!—1 Sam. 17:​45-51.

8. Dahaka ese baine duruda bena baita abia dae hahetoho negadiai Iehova ese ita na be durudamu? (Laulau danu ba itaia.)

⁸ Ita danu hahetoho na baita hanai dibamu bema baita helalotaomu, mauri Diravana na noho heḡaeḡae ita baine duruda. (Sal. 118:6) Iehova ese guna e kara ḡaudia baita lalomu neganai eda abidadama na be goadamu. Iehova ese ia e tomadiho henia taudia e hamauridia sivaraidia na Baibul ai ba duahi. (Isa. 37:​17, 33-37) Danu, hari Iehova ese tadikaka taihu e durudiamu sivaraidia na jw.org ai ba duahi o ba ita. Bona Iehova ese emu mauri ai e kara ḡaudia ba haerodia. Reana Iehova ese  bea o laion ta amo se hamaurimu, to ia na oiemu mauri ai ḡau momo e kara! Ia ese oi na e boirimu ia turana ai baola. (Ioa. 6:44) Bona hari danu, Iehova ena heduru dainai, oi na doini ia o hesiai heniamu. Iehova ba noia emu ḡuriḡuri e haerelai negadia, nega maoronai bona nega aukadiai e durumu daladia ba lalo. Nega unu bamodia bo lalodiamu neganai bo abia daemu Iehova ese oi na doini be durumumu.

9. Hahetoho ta davarimu neganai dahaka baita lalo? (Hereva Lada-isidia 27:11)

⁹ Hahetoho ta davarimu neganai mai anina bada ḡaudia baita lalo. Diabolo na e gwaumu hahetoho ta davarimu neganai Iehova na baita rakataniamu. Una dainai hahetoho lalonai ta karamu ḡaudia ese Iehova be habaduamu eiava be hamoaleamu. (Iobu 1:​10, 11; Hereva Lada-isidia 27:11 ba duahia.) Hahetoho negadiai, Iehova ta badinaiamu neganai ta hahedinaraiamu ia na ta lalokau heniamu bona ta hamomokaniamu Diabolo na koikoi tauna. Reana emu gabu ai, gavamani ese Iehova ena taunimanima e daḡedaḡe henidiamu, moni hekwakwanaina o davariamu, taunimanima ese sivarai namona na asie abia daemu, eiava hekwakwanai ma haida o davarimu. Ba helalotao nega unu bamodia ai Iehova kudouna na ba hamoalea diba. Danu ba helalotao, ia ese oi na be durumumu o davarimu hahetohodia ba haheaukalai. (1 Kor. 10:13) Oibe, ia ese goada be henimumu ba haheauka.

MAURI DIRAVANA ESE BE HANAMOMUMU

10. Mauri Diravana ese ia e tomadiho heniamu taudia be ede be hanamodia tomamu?

¹⁰ Iehova na hanaihanai ia e tomadiho heniamu taudia na e hanamodiamu. (Heb. 11:6) Hari ina negai ita na iena hahenamo dainai maino ai ta nohomu bona vaira neganai mauri hanaihanai be henidamu. Ita na ta abia dae momokanimu Iehova na e uramu ita baine hanamoda bona ia na mai ena siahu unu baine kara toma. Una dainai ita na ta uramu iena hesiai ḡaukaradia ai baita bisi, guna iena hesiai  taudia e kara bamona. Kristen ginigunadia edia nega ai Timoteo na unu e kara toma.—Heb. 6:​10-12.

11. Dahaka ese Timoteo e durua kongrigeisin ai baine ḡaukara goada totona? (1 Timoteo 4:10)

¹¹ 1 Timoteo 4:10 ba duahia. Timoteo na mauri Diravana e abidadama henia. Una dainai e ḡaukara goada. Edena dala ai? Aposetolo Paulo ese e hagoadaia haroro ḡaukara bona kongrigeisin ai ena hahediba dalana baine hanamoa. Bona Timoteo na matamatadia bona burukadia ediai haheitalai namona e hahedinaraia. To ia na ḡaukara badadia haida danu e henia, heḡereḡere kongrigeisin taudia baine sisiba henidia, to lalokau dalana ai. (1 Tim. 4:​11-16; 2 Tim. 4:​1-5) Ena be haida ese Timoteo ena ḡaukara na se ita o se lalo bada, to ia na e diba Iehova ese be hanamoamu.—Roma 2:​6, 7.

12. Dahaka ese elda taudia baine durudia kongrigeisin ai bae ḡaukara goada? (Laulau danu ba itaia.)

¹² Hari, elda taudia danu e dibamu Iehova ese edia ḡaukara na e itamu bona e laloa badamu. Idia na kongrigeisin taudia e vadivadidiamu, e hadibadiamu, bona e haroromu. Idia momo na konstraksen ḡaukaradia bona disasta gabudia ai e hedurumu. A haida be Patient Visitation Groups eiava Hospital Liaison Committees ḡaukaradiai e hedurumu. Elda taudia na mai dibadia kongrigeisin na Iehova ena, dia taunimanima ta ena. Una dainai, idia na mai kudoudia ibounai ida hesiai ḡaukara e karamu. Bona e abia dae momokanimu, Iehova ese idia na be hanamodiamu.—Kol. 3:​23, 24.

13. Iehova ese ia dainai ta karamu ḡaudia be ede e lalo tomamu?

¹³ Ita iboudai ese elda ḡaukarana na basita karaia dibamu. To ita iboudai na ḡau ta Iehova baita henia diba. Iseda Dirava na be moalemu bema mai kudouda ibounai ida ia baita hesiai heniamu. Ia ese ta atomu kontribiusin monina na e abi daemu, ena be bada eiava maraḡi. Hebou ai, ena be ta hemaraimu to imada ta abi isimu bona ta haeremu, bona e  hahisidamu taudia edia dika ta gwau taomu neganai ia na e moalemu. Ena be ta lalomu Iehova dainai ta karamu ḡaudia na dia bada, to baita abia dae momokani ia ese ia dainai ta karamu ḡaudia na e lalo badamu. Ia ese ita na e lalokau henidamu bona be hanamodamu—Luka 21:​1-4.

MAURI DIRAVANA DEKEDEKENAI BA NOHO

14. Edena dala ai Iehova ihetura henina karana ese baine durumu ia ba badinaia? (Laulau danu ba itaia.)

¹⁴ Bema eda hetura karana Iehova ida na goada, ia ibadinana na be haraḡamu. Iosef na unu e kara toma. Ia na mai lalogoadana ida matabodaḡa karana e dadaraia. Badina e diba ia be karaiamu karana ese Iehova be hamoaleamu eiava be habadua dibamu, bona ia na se ura ia lalona baine hahisia. (Gen. 39:9) Iehova ida eda hetura karana baine goada totona, namona na nega baita ato ia baita ḡuriḡuri henia bona ena Hereva baita stadilaia. Iosef heḡereḡerena bema eda hetura karana Iehova ida na be goadamu, ita na basita uramu ia ihabaduna karana ta baita karaia.—Iak. 4:8.

15. Tano ḡaḡaena ai e nohova Israel taudia edia amo dahaka ta dibamu? (Heberu 3:12)

¹⁵ Bema ta ese mauri Diravana, Iehova, be laloaboiomu, Iehova na be rakataniamu. Tano ḡaḡaena ai e nohova Israel taudia ediai e vara ḡauna mani a laloa. Idia na mai dibadia Iehova na e nohomu, to idia na e daradarava bema Iehova ese edia dabu ḡaudia na baine heni diba. Bona ma e gwauva: “Iehova na dekedekeda ai eiava lasi?” (Eso. 17:​2, 7) Una dainai Iehova na e gwau edeede henia. Oibe namona na edia gwau edeede karana na basita badinaia.—Heberu 3:12 ba duahia.

16. Dahaka ese eda abidadama baine tohoa diba?

¹⁶ Tanobada taudia ese eda abidadama Iehova enai na bae tohoa diba. Idia momo na e laloamu Dirava na se nohomu. Toana na Dirava asie badinaiamu taudia edia mauri na e moalelaiamu. Una ese eda abidadama na baine  tohoa diba. Ena be ta abia daemu Dirava na e nohomu, to reana iena heduru baita daradaralaiamu. Salamo 73 e torea tauna na nega ta unu e lalo toma. Ia na e itaia ia dekena taudia ese Dirava ena taravatu na e dadaraiava, to edia mauri na e moalelaiava. Una dainai ia na e daradarava Dirava baine hesiai henia be namo eiava.—Sal. 73:​11-13.

17. Dahaka ese baine duruda Iehova dekedekenai baita noho?

¹⁷ Salamo itorena tauna be dahaka ese e durua ena lalohadai e hamaoromaoroa? Ia ese Iehova e laloaboiomu taudia ediai e varamu ḡauna e laloa. (Sal. 73:​18, 19, 27) Bona Iehova ihesiai henina ai ta davarimu hahenamodia e lalo. (Sal. 73:24) Ita danu, Iehova ese e henida hahenamodia baita lalodia. Bona mani ba lalo bema Iehova basitama hesiai henia eda mauri be ede bema heto. Unu baita kara tomamu neganai be durudamu Iehova baita badinaiamu bona Salamo e tore tauna heḡereḡerena baita gwaumu: “Dirava badibadinai na nohomu be namo.”—Sal. 73:28.

18. Dahaka dainai vaira negana na basita garilaia?

¹⁸ Ini dina gabediai e varamu hekwakwanaidia na baita hanaidia dibamu, badina ita na “Dirava Mauri, Dirava Momokani” ta hesiai heniamu. (1 Tes. 1:9) Iseda Dirava na Dirava korikorina, ia e tomadiho heniamu taudia na e lalodiamu bona e durudiamu. Guna, ia na e hamomokania ia na ena hesiai taudia dekedekediai, bona hari danu ia na ita dekedekedai. Kahirakahira ina tanobada ai hisihisi bada hereana be varamu. To una nega ai ita na siboda basita nohomu, badina Iehova na ita dekedekedai. (Isa. 41:10) Namona na “mai goadada ida baitato, Lohiabada be egu hekaha, Lau na basina gari.”—Heb. 13:​5, 6.