1. Edena dala ai Salamo 15:​1-5 ese be durudamu?

 STADI atikol 23 ai ta herevalaia heḡereḡerena, Iehova e gwauhamata henia taudia na iena ruma ai bae noho, anina na ia turana ai baela diba. To ita be dahaka baita kara Iehova turana ai baitala totona? Salamo karoa 15 ese una be haerelaiamu. (Salamo 15:​1-5 ba duahidia.) Ina karoa ai Dirava turana ai baitala daladia baita dibamu.

2. David ese Iehova ena kalaga e herevalaia neganai ia be dahaka e lalo?

² Salamo karoa 15 na henanadai amo e hematama, eto: “Iehova e, daika oiemu ḡuriḡuri kalagana ai baine noho? Daika na oiemu ororo helaḡana ai baine taruha?” (Sal. 15:1) Salamo e torea tauna David ese Iehova ena “kalaga” e herevalaia neganai, ia na Gibeon ai kalaga helaḡana e laloa. Danu Dirava ena “ororo helaḡana” e herevalaia neganai, reana Ierusalem ai Siona ororona e laloa. Una ororo na Gibeon ena saut kahanai, bona ena daudau na kahirakahira kilomita 10, unuseniai David na maua helaḡana totona kalaga ta e karaia bona una maua na unuseniai e noho ela bona dubu helaḡa e haginia.—2 Sam. 6:17.

3. Dahaka dainai ta uramu Salamo 15 baita lalopararalaia? (Laulau danu ba itaia.)

³ Israel taudia haida mo una kalaga helaḡana ai e ḡaukarava bona haida mo maua helaḡana e atoa gabunai e vareaiva. To Iehova ena ruma ai be iena abidadama hesiai taudia iboudiai bae noho diba. Ita iboudai danu unu ta ura tomamu. Salamo karoa 15 ai, David ese baita kara diba ḡaudia haida e herevalai unu amo Iehova turana ai baitala hanaihanai.

 BA RAKA ḠOEVAḠOEVA BONA BA KARA MAOROMAORO

4. Iehova baita hetura henia totona, dahaka dainai bapatiso mo na dia heḡereḡere? (Isaia 48:1)

⁴ Salamo 15:2 ai Dirava turana na ini e herevalaia toma, “e raka ḡoevaḡoevamu,” bona “kara maoromaoro e karamu.” Ini hereva “e rakamu” bona “e karamu” anidia na hanaihanai baita kara ḡaudia e herevalaimu. To ita be baita ‘raka ḡoevaḡoeva’ diba, a? Oibe. Ena be ita na dia ḡoḡoevadae, to bema Iehova baita badinaiamu ia ese ita na be gwauraidamu “e raka ḡoevaḡoevamu taudia.” Dirava enai eda mauri ta gwauhamatalaiamu bona ta bapatisomu neganai, ita na Ia ida ta raka matamamu. Heḡereḡere Baibul negadiai, ta na Israel tauna dainai ia na dia maoromaoro Iehova turana ai bainela diba. Haida na Dirava ladana e gwauraiava to dia ‘hereva momokani ai bona kara maoromaoro ai.’ (Isaia 48:1 ba duahia.) Israel taudia na Iehova ena taravatu e dibadiava bona e badinadiava amo e hahedinaraiava idia na e urava Iehova turana ai baela. Una heḡereḡerena, hari ita ese danu Iehova baita hetura henia dibamu, bema baita bapatisomu bona Kristen kongrigeisin baita bamoamu, to una mo na dia heḡereḡere. Namona na hanaihanai ‘kara maorodia’ baita kara. Una be ede baita hahedinaraia toma?

5. Ḡau iboudiai lalodiai Iehova baita badinaia anina be dahaka?

⁵ Iehova vairanai “e raka ḡoevaḡoevamu” bona “kara maoromaoro e karamu” anina na dia hanaihanai kingdom hall ai baita hebou karana e herevalaiamu. (1 Sam. 15:22) To anina na eda mauri ibounai lalonai bona siboda ta nohomu negadiai baita hekwarahi Dirava baita badinaia. (Her. 3:6; Koh. 12:​13, 14) Danu ḡau maraḡidiai dounu Iehova baita badinaia. Unu baita kara tomamu neganai baita hahedinaraiamu Iehova na ta  lalokau heniamu, bona ia ese danu ita na be lalo namo henidamu.—Ioane 14:23; 1 Ioane 5:3.

6. Heberu 6:​10-12 ese e hahedinaraia dia guna ta kara kara namodia mo, to dahaka danu mai anina bada?

⁶ Iehova ese guna ita ta kara kara namodia na e lalodia badamu. To anina na dia guna kara namodia ta kara dainai ita na Iehova turana ai baitala hanaihanai. Heberu 6:​10-12 (ba duahidia) ai una na e hahedinaraia. Iehova ese guna ta kara kara namodia na se lalo boiomu. To Ia na e uramu dounu Ia baita hesiai henia mai kudouda ibounai ida “ela bona dokona.” ‘Bema ita basita manokamu’ Iehova na baita hetura henia hanaihanaimu.—Gal. 6:9.

LALOMU AI HEREVA MOMOKANI BA GWAURAI

7. Laloda ai hereva momokani baita gwaurai anina be dahaka?

⁷ Bema ta na e uramu Iehova ena ruma ai baine noho bona turana ai bainela, ia na ‘lalona amo hereva momokani baine gwaurai.’ (Sal. 15:2) Anina na basita koikoi. To danu, Iehova na e uramu ḡau iboudiai lalodiai kara momokani baita hahedinarai. (Heb. 13:18) Una na mai anina bada, “badina be kara heḡui-heḡui tauna na Iehova ese e inai henia badamu, a kara maoromaoro taudia na ia ese e abidadama henidiamu.”—Her. 3:32.

8. Ededia kara baita dadarai?

⁸ Bema ta na taunimanima vairadiai Dirava ena taravatu e badinamu, to hehuni ai be Iena taravatu e utudiamu, baita gwau dibamu ia na ‘lalona amo hereva momokani e gwauraimu,’ a? Lasi. (Isa. 29:13) Edena dala ai Kristen tauna ta na unu be kara tomamu? Reana ia ese Dirava ena taravatu haida na be daradaralai matamamu. (Iak. 1:​5-8) Bona reana mai anidia bada ḡaudia ai Iehova na basine badinaiamu, badina be laloamu unu na ḡau maraḡidia. Toana na ia ese ena kara dika davana na se abiamu dainai, be uramu Dirava ena taravatu ma haida baine utudia. Ena be ia ese Dirava be hesiai heniamu, to ena tomadiho karana na basine abia daemu. (Koh. 8:11) To ita na ta uramu ḡau iboudiai lalodiai baita kara momokani.

9. Iesu ese Natanael e hedavari henia neganai dahaka e vara, bona dahaka ta dibamu? (Laulau danu ba itaia.)

 ⁹ Ita ese mai kudouda ibounai ida hereva momokani baita gwaurai na mai anina bada. Filipo ese turana Natanael e laohaia Iesu baine hedavari henia neganai, e vara ḡauna amo una na baita dibaiamu. Ena be Iesu ese Natanael na nega ta do se hedavari henia to Iesu na e gwa: “Israel tauna korikorina ta a itaia; ia na asi ena koikoi.” (Ioa. 1:47) Iesu na mai dibana ena hahediba taudia na kara momokani taudia, to Natanael enai na ḡau idauna ta danu e itaia. Ena be Natanael na ita heḡereḡereda, dia ḡoevadae, to ia na ḡau iboudiai lalodiai e kara momokani. Iesu ese una na e laloa bada dainai Natanael na e hanamoa. Oibe ita iboudai na ta uramu Iesu ese unu baine laloda toma!

10. Dahaka dainai eda hereva nahuadia baita toho na namo? (Iakobo 1:26)

¹⁰ Salamo 15 ese ma haida baita kara henidia daladia momo e herevalai. Salamo 15:3 ese Iehova ena ruma ai baine noho tauna ena kara na ini e gwaurai toma: “Ia malana amo haida se hadikadiamu, turana ihadikana karana ta se karaiamu, bona dekena tauna ihadikana herevana ta se gwauraiamu.” Bema eda hereva amo haida baita hadikadiamu Iehova ese ena ruma ai basine abida daemu.—Iakobo 1:26 ba duahia.

11. Haida ladadia e hadikamu, bona se helalo-kerehaimu tauna enai be dahaka be varamu?

¹¹ Salamo itorena tauna ese ma haida ladadia e hadikamu tauna e herevalaia. Una tau na haida e sivarailaidia koikoimu. Unu e kara tomamu taudia basie helalo-kerehaimu neganai, Kristen kongrigeisin murimurina ai bae atodia diba.—Ier. 17:10.

12-13. Ededia nega ai turada ladadia baita hadika dibamu? (Laulau danu ba itaia.)

¹² Salamo 15:3 ese danu e hadibadamu, Iehova turana ai e laomu taudia na turadia ihadikadia karana ta eiava herevana ta basie  gwauraiamu. Edena dala ai ita ese turada ladadia baita hadika dibamu?

¹³ Bema asita lalo namonamomu bena ta ta sivarailaiamu, una ese ia ladana na be hadikaia dibamu. Heḡereḡere: (1) taihu ta na ena painia ḡaukara e hadokoa, (2) tadikaka ta adavana ida na Betele e rakatania, eiava (3) tadikaka ta na ena elda eiava hesiai madunana e atoa diho. Ita ese idia edia asainmen e idau badidia baita herevalai bona ma haida vairadiai baita gwaurai be namo, a? Lasi, badina unu sensi e vara badidia momo na asi dibada. Danu, Iehova ena ruma ai baine noho tauna na “turana ihadikana karana ta se karaiamu bona dekena tauna ihadikana herevana ta se gwauraiamu.”

IEHOVA E GARI HENIAMU TAUDIA BA HANAMODIA

14. Edena dala ai Iehova turana ese ‘kara gageva-gageva tauna e ihi-ihiraiamu’?

¹⁴ Salamo 15:4 na e gwaumu Iehova turana ese ‘kara gageva-gageva tauna e ihi-ihiraiamu.’ Ita ese ta na basita gwauraia dibamu ia na kara gageva-gageva tauna. Dahaka dainai? Badina ita na dia ḡoevadae bona haida be baita ura henidiamu a haida be basita ura henidiamu. Una dainai Iehova ese edia kara e ihi-ihiraimu taudia baita dadaraidia. (1 Kor. 5:11) Idia na kara dikadia e karamu bona se helalo-kerehaimu, ita ta abi daemu ḡaudia na se matauraimu bona e uramu eda hetura karana Iehova ida na bae hadikaia.—Her. 13:20.

15. “Iehova garina e garimu taudia” baita hanamodia anina be dahaka?

¹⁵ Salamo 15:4 na ma e gwaumu, namona na “Iehova garina e garimu taudia” baita hanamodia. Dala baita tahu Iehova turana baita kara namo henidia bona baita matauraidia. (Roma 12:10) Dala ta na Salamo 15:4 ai e hedinarai Iehova ena ruma ai e nohomu tauna na ‘e karaia gwauhamatana e badinaiamu, ena be ihaḡuḡuruna na auka.’ Bema eda gwauhamata basita haḡuḡurumu ma haida baita hahisidiamu. (Mat. 5:37) Heḡereḡere, Iehova na e uramu iena ruma ai e nohomu taudia ese edia headava gwauhamatadia na bae badina. Danu, Ia na e moalemu bema tama sina ese natudia ediai e gwauhamatalai ḡaudia e badinamu. Iehova Dirava bona ma haida ta lalokau henidiamu dainai baita hekwarahi eda gwauhamata na baita haḡuḡurudia.

16. Iehova turana baita hanamodia dalana ma ta be dahaka?

¹⁶ Dirava turana baita hanamodia dalana ma ta na, baita abidia dae. (Roma 12:13) Laḡa-ani negadiai tadikaka taihu ida baita hebamomu neganai, eda hetura karana idia ida bona Iehova ida baita hagoadaiamu. Danu heabidae karana ta hahedinaraiamu neganai, ita ese Iehova ta tohotohoamu.

MONI IURA HENINA KARANA BA DADARAIA

17. Dahaka dainai Salamo 15 ese moni e herevalaia?

¹⁷ Salamo 15:5 ese e hahedinaraia Iehova turana na “moni se heni torehaimu davana iabina totona, bona asi ena kerere tauna ihadikana monina danu ia se abiamu.” (Sal. 15:5) Dahaka dainai Salamo 15 ese moni e herevalaia? Badina bema moni baita laloa badamu eda hetura karana ma haida ida bona Iehova ida na be hadikaiamu. (1 Tim. 6:10) Baibul negadiai haida ese tadikakadia, ogoḡami taudia na asie kara henidia namonamova badina idia ese moni e henidia torehaiva bona ato-kaudia danu e gwauraiva. Danu hahemaoro taudia haida na laloveri monidia e abidaeva, bena asi edia kerere taudia e hahemaoro henidiava. Iehova ese kara unu bamodia na e inai henimu.—Esek. 22:12.

18. Moni baita laloa maoromaoro totona ededia henanadai baita lalo? (Heberu 13:5)

 ¹⁸ Ita siboda ese moni ta laloamu dalana na baita haeroa namonamo. Siboda baita henanadai: ‘Lau be nega momo moni bona baina hoi ḡaudia na lalomu, a? Bema moni na abi torehaimu, ihalouna be asina haraḡamu badina na laloamu e heni tauna na mai ena moni, a? Lau be mai egu moni dainai na laloamu haida na na hereadia bona harihari karana na asina goadalaiamu, a? Na laloamu tadikaka taihu na mai edia moni momo badina moni mo e lalomu, to Iehova na se laloamu, a? Lau be na uramu taḡa taudia mo baina hetura henidia to ogoḡami taudia be basina hetura henidia, a?’ Unu henanadai baita lalodia na mai anina bada badina ita na Iehova ese e boirida iena ruma ai baita noho. Iehova na baita hetura henia hanaihanai diba, bema moni iura henina baita dadaraiamu. Unu baita kara tomamu neganai, Iehova ese basine rakatanidamu!—Heberu 13:5 ba duahia.

IEHOVA ESE TURANA NA E LALOKAU HENIDIAMU

19. Dahaka dainai Iehova na e uramu Salamo 15 ai e ato ḡaudia baita badina?

¹⁹ Salamo 15 ena siri dokona na e gwa: “Unu e kara tomamu tauna na do basine marere ela bona hanaihanai.” (Sal. 15:5) Una hereva amo salamo itorena tauna ese Iehova baita badinaia badina e hahedinaraia. Ia na e uramu ita na baita moale. Una dainai ena hahekau daladia ta badinamu neganai eda mauri na e namomu bona Ia ese na e gimadamu.—Isa. 48:17.

20. Iehova turana be dahaka ḡau namodia e narimu?

²⁰ Iehova turana na vaira negai bae vara ḡau namodia e narimu. Iesu ese e heḡaeḡaelaia gabuna guba ai bae noho. (Ioa. 14:2) Tanobada helarona bae abia taudia be Apokalupo 21:3 ena gwauhamata herevana e nariamu. Momokani Iehova ese e boirida iena ruma ai baita noho eiava hanaihanai ia turana ai baitala na hahenamo badana!