1-2. Iehova ese ia e tomadiho heniamu taudia be dahaka invateisin e henidiamu?

 BEMA ta ese be nanadaimumu, Iehova be ede o laloa tomamu? Reana bo gwaumu, ‘Iehova na lau Tamagu, lauegu Dirava, bona lau Turagu.’ Danu Iehova na mai ena dagi idauidau dainai, reana unu danu bo gwauraidiamu. To bo gwau dibamu, Iehova na oi e boirimumu iena ruma ai ba noho, a?

² King David ese Iehova ena hetura karana ia e tomadiho heniamu taudia ida na ini e haheitalaia toma: Iehova be ruma biaguna, bona ia e tomadiho heniamu taudia be vadivadi taudia. King David na e gwa: “Iehova e, daika oiemu ḡuriḡuri kalagana ai baine noho? Daika na oiemu ororo helaḡana ai baine taruha?” (Sal. 15:1) Una siri amo ta dibamu ita na Iehova ena ruma ai baita noho diba anina na ia turana ai baitala diba. Una na hahenamo badana.

IEHOVA NA E URAMU IENA RUMA AI BAITA NOHO

3. Iehova ese ena ruma ai daika e boiria guna, bona edia hemami be ede bamona?

³ Iehova ese ḡau iboudiai do se havara neganai, ia na sibona e nohova. To gabeai natuna vara edeana e havaraia, Iehova na ruma biaguna ta na heto, ia natuna be e boiria tauna ginigunana na heto. Baibul na e gwa Iehova na Natuna ese ‘e hamoaleava’. Bona ia natuna danu e gwa, “lau na [Iehova] vairanai na moaleva nega idoinai.”—Her. 8:30.

4. Iehova be daidia danu e boiridia ena ruma ai bae noho?

⁴ Gabeai, Iehova ese aneru e karadia, bona idia danu e boiridia  ena ruma ai bae noho. Baibul ese aneru na e gwauraidiamu “Dirava natuna” bona e hahedinaraiamu idia na Iehova ida e nohomu dainai e moalemu. (Iobu 38:​6, 7; Dan. 7:10) Laḡani momo lalodiai, Dirava na ia ida guba ai e nohova anerudia mo ia turana ai e halaodia. Gabeai, ia ese taunimanima e karadia, bona idia danu iena ruma ai bae noho diba. Idia haida na Enok, Noa, Abraham, bona Iobu. Baibul ese e hahedinaraiamu, idia na Iehova e badinaia dainai, ia turana ai ela.—Gen. 5:24; 6:9; Iobu 29:4; Isa. 41:8.

5. Esekiel 37:​26, 27 ena peroveta herevana amo dahaka ta dibamu?

⁵ Laḡani handred momo lalodiai Iehova ese turana e boiridiamu iena ruma ai bae noho. (Esekiel 37:​26, 27 ba duahidia.) Una peroveta herevana amo ta dibamu, Dirava na e uramu ia e badinaiamu taudia edia hetura karana ia ida na baine goada. Ia na e gwauhamata eto, “idia ida baia herohemaino.” Una peroveta herevana na nega ta e gwauraiamu, una nega ai guba helarona e abia taudia, bona tanobada helarona e abia taudia na mai lalotamonadia ida iena ruma ai bae noho, orea tamona lalonai. (Ioa. 10:16) Hari una na e varamu!

DIRAVA ESE E NARIDAMU, ENA BE GABU IDAUIDAU AI TA NOHOMU

6. Edena dala ai ta na Iehova ena ruma ai baine noho, bona Iena ruma be edeseniai baita davaria?

⁶ Baibul negadiai, kalaga na laḡa-ani bona dika amo ta e gimaiava gabuna. Kalaga ai e abia daeva tauna na e dibava kalaga biaguna ese ia na be nariamu. Ita ese eda mauri Iehova enai ta gwauhamatalaiamu neganai, una na vaitani ita na iena ruma ai ta noho matamamu. (Sal. 61:4) Ita ese lauma aniani ta moalelaidiamu, bona e durudamu eda hetura karana Iehova ida baine goada. Danu, Iehova ese ena ruma ai e abidia dae taudia ma haida ida hetura karana namona ta moalelaiamu. Iehova ena ruma na gabu tamona ai basio davariamu. Reana oi na spesol hebouhebouna ta dainai, gabu ta ola bona unuseniai Iehova e badinaiamu taudia haida ida o hedavari, una na vaitani Iehova ena ruma ai o hedavari. Bema Iehova baita badinaia namonamomu iena ruma ai baita nohomu, ena be gabu idauidau ai ta nohomu.—Apok. 21:3.

7. Ede ta diba tomamu Iehova e badinaia ela bona e mase taudia na doini iena ruma ai e nohomu? (Laulau danu ba itaia.)

⁷ Iehova e badinaia ela bona e mase taudia be ede bamona? Baita gwau diba idia be doini Iehova ena ruma ai e nohomu, a?  Oibe! To edena dala ai? Badina Iehova ese idia na e lalodia taomu, ia enai idia na doini mamauri. Iesu ese una na e hahedinaraia, e gwa: “Mase amo e tore isi lou herevana na Mose ese au ginigini sivaraina lalonai vada e hamaoroda, Lohiabada vada e gwauraia: Abraham ena Dirava, Iakob ena Dirava. Benaini, ia na dia mase taudia edia Dirava, to mauri taudia edia; badina be taunimanima iboudiai na ia dainai e maurimu.”—Luka 20:​37, 38.

HAHENAMO BONA MADUNA

8. Iehova ena ruma ai baita noho ena namo be dahaka?

⁸ Kalaga ai ta na baine laḡa-ani diba bona dika basine davari heḡereḡerena, Iehova ena ruma ai e nohomu taudia na ia ese e gimadiamu bona helaro e henidiamu, unu amo edia hetura karana ia ida na basine dika. Iehova baita badinaiamu neganai, Satana ese basine hadikada vaitanimu. (Sal. 31:23; 1 Ioa. 3:8) Tanobada matamatana ai danu, Iehova ese ia e badinaiamu taudia na dounu be gimadiamu, unu amo edia hetura karana na ḡau ta ese basine hadikaiamu.—Apok. 21:4.

9. Iehova be e uramu iena ruma ai e abidia daemu taudia be dahaka bae kara?

⁹ Iehova ese ena ruma ai ita e abida dae na hahenamo badana bona ia ida eda hetura karana na baita moalelaiamu ela bona hanaihanai. Dahaka baita kara unu amo iena ruma ai baita noho hanaihanai? Bema oi na ta ese e boirimu iena ruma baola, oi na ia e uramu ḡaudia bo karamu. Heḡereḡere, ia na be uramu iena ruma ai do so vareai lalonai emu tamaka na ba koki, bona oi na unu bo kara tomamu. Una heḡereḡerena, Iehova ena ura baita badinamu neganai, iena ruma ai baita noho hanaihanai dibamu. Iehova ta lalokau heniamu dainai, eda kara iboudiai lalodiai ‘ia baita hamoalea.’ (Kol. 1:10) Momokani Iehova na ita Turada, to danu ia na iseda Dirava bona Tamada. (Sal. 25:14) Namona na una na baita laloatao bona hanaihanai ia na baita matauraia. Una ese be durudamu, ia ese se uralaimu karadia baita dadarai. Ita na ta uramu hanaihanai eda Dirava ida baita ‘raka mai manauda ida.’—Mika 6:8.

IEHOVA ESE ISRAEL TAUDIA IBOUDIAI NA E KARA HENIDIA HEḠEREḠERE

10-11. Sinai tano ḡaḡaena ai, Iehova ese Israel taudia be ede e kara henidia toma?

¹⁰ Iehova ese ena ruma ai e abidia daemu taudia iboudiai na e kara henidia heḡereḡeremu. (Roma 2:11) Unu ta gwau tomamu badina Iehova ese Sinai tano ḡaḡaena ai Israel taudia e kara henidia dalana amo una ta dibaiamu.

¹¹ Iehova ese ena taunimanima na Aigupto ena iḡui amo e hamauridia murinai, ia ese hahelaḡa taudia e abidia hidi kalaga helaḡana ai bae ḡaukara. Bona Levi taudia danu ḡaukara haida e henidia. Una anina be kalaga helaḡana ai e ḡaukarava, eiava kalaga badinai e nohova taudia mo Iehova ese e naridia, a? Lasi, Iehova ese idia bona Israel besena orena ibounai e naridia.

12. Iehova ese Israel taudia be ede e kara henidia toma, unu amo e hahedinaraia taunimanima iboudiai na e kara henidia heḡereḡeremu? (Esodo 40:38) (Laulau danu ba itaia.)

¹² Israel taudia iboudiai ese Iehova na bae hetura henia diba, ena be idia haida na kalaga helaḡana ai se ḡaukarava eiava badinai se nohova. Heḡereḡere, Iehova ese ori bona lahi na kalaga helaḡana daenai e hahedinaraiava neganai, Israel taudia iboudiai ese e itaiava. (Esodo 40:38 ba duahia.) Ori e marereva neganai, ena be haida na kalaga amo na daudau herea to idia ese danu e itaiava, edia  kohu e habouva, kalaga e kokidiava, bena Israel taudia oredia ida ori e badinaiava. (Num. 9:​15-23) Danu Israel taudia na silver amo e karadia kibi rua reḡedia e kamonaiva neganai e rakava. (Num. 10:2) Una ese e hahedinaraiamu, dia kalaga helaḡana badinai e nohova taudia mo Iehova e hetura heniava, to gabu daudauna ai e nohova taudia danu. Una dainai, Israel taudia iboudiai na Iehova ena ruma ai bae noho diba, bona ia ese baine hakaudia bona baine gimadia diba. Hari danu, ena be ita na gabu idauidau ai ta nohomu, to Iehova ese e lalokau henidamu, e naridamu, bona e gimadamu.

HARI IEHOVA ESE TAUNIMANIMA IBOUDIAI E KARA HENIDIA HEḠEREḠEREMU

13. Dahaka dainai baita gwa diba hari Iehova ese taunimanima iboudiai na e kara henidia heḡereḡeremu?

¹³ Hari Dirava ena taunimanima haida na edia hedkota eiava brens ofesi badidiai e nohomu. A haida be unuseniai e ḡaukaramu. Una dainai, idia na unu gabu ai e varamu ḡaukaradiai e vareaimu, bona hegunalai taudia ida e ḡaukara heboumu. Haida be seket ḡaukara e karamu, eiava spesol ful-taim hesiai ḡaukara ma haida e karamu. Ena be oi na ful-taim hesiai ḡaukara ta so karaiamu, namona na ba diba oi na dounu Iehova ese e boirimu tauna, bona oi na e lalokau henimumu. Danu ia ese oi na e dibamu namonamo, bona emu dabu ḡaudia na ia ese be henimu. (1 Pet. 5:7) Oibe, Iehova ese ena hesiai taudia iboudiai na lauma aniani e henidiamu, e hakaudiamu bona e gimadiamu.

14. Iehova ese taunimanima iboudiai e kara henidia heḡereḡeremu dalana ta be dahaka?

¹⁴ Iehova ese taunimanima iboudiai e kara henidia heḡereḡeremu dalana ma ta na, dala e kehoa tanobada heḡeḡemadai taunimanima ese Baibul bae duahia diba. Guna Toretore Helaḡadia na Heberu, Aramia, bona Greek gado ai e torea. Una anina be unu gado ai Baibul e duahiava taudia sibodia mo Iehova e hetura heniava, a? Lasi.—Mat. 11:25.

15. Dahaka ese e hamomokaniamu Iehova ese taunimanima iboudiai e kara henidia heḡereḡeremu? (Laulau danu ba itaia.)

 ¹⁵ Iehova na dia skuli badadia ela taudia, eiava guna Baibul e torea gadona mai dibadia taudia mo turana ai e halaodiamu. To Iehova ese ena aonega na taunimanima iboudiai ediai e hahedinaraiamu, ena be ta na skuli badana ela eiava lasi. Iena Hereva, Baibul, na gado tausen momo lalodiai e hahanaia, bona taunimanima ese ena hahediba herevadia amo namo bae davari, bona ia turana ai baela dalana bae dibaia.—2 Tim. 3:​16, 17.

HANAIHANAI IEHOVA ESE BAINE “LALO NAMO” HENIMU

16. Aposetolo Edia Kara 10:​34, 35 heḡereḡerena, edena dala ai hanaihanai Iehova ese baine lalo namo henida?

¹⁶ Iehova ese ena ruma ai e abida dae na hahenamo badana ta. Ia na hebogahisi, lalokau, bona heabidae Diravana. Danu, ia ese taunimanima iboudiai na e kara henidia heḡereḡeremu, ena be edia noho gabudia, mauri daladia, edukeisin, tano, iduhu, mauri laḡanidia na idauidau. Eiava ena be tau, hahine, mero o kekeni, to dounu e abidia daemu. To, Iehova na ia e badinaiamu taudia mo e lalo namo henidiamu.—Aposetolo Edia Kara 10:​34, 35 ba duahidia.

17. Atikol gabena ai dahaka baita herevalaimu?

¹⁷ Salamo 15:1 ai e torea bamona, David ese ini henanadai e gwaurai: “Iehova e, daika oiemu ḡuriḡuri kalagana ai baine noho? Daika na oiemu ororo helaḡana ai baine taruha?” Iehova ese David amo Salamo 15 ai e gwaurai henanadaidia e haerelaidia. Hanaihanai Iehova ena lalo namo baita abia totona baita kara ḡaudia haida na atikol gabena ai baita herevalaimu.