1. Salamo 18:46 ai David ese Iehova be ede e gwauraia toma?

 NEGA haida hekwakwanai daidiai eda mauri na e aukamu, eiava e idau haraḡamu. Ta moalemu badina Iehova Dirava enai heduru baita abi diba! Stadi atikol 25 ai ta itaia, Iehova na mauri Diravana bona hanaihanai ia na noho heḡaeḡae ita baine duruda. Iena heduru ta abiamu neganai, una ese e hadibadamu “Iehova na e maurimu!” (Salamo 18:46 ba duahia.) David na una hereva e gwauraia murinai, ia ese Dirava na dia mauri ḡauna ta ida e haheḡereḡerea. Ia na e gwa, Iehova na egu “Nadi-gini.” Una anina be dahaka?

2. Ina atikol ai dahaka baita herevalaimu?

² Ina atikol ai dahaka dainai Iehova na e gwauraia nadi-gini bona iena kara baita dibadiamu. Danu baita itaiamu edena dala ai Ia na eda Nadi-gini ai baita halaoa. Dokonai, ita ese Iena kara baita tohotoho daladia baita herevalaimu.

EDENA DALA AI IEHOVA NA NADI-GINI?

3. Edena dala ai Baibul ese ina hereva “nadi” e ḡaukaralaia? (Rau 1 laulauna ba itaia.)

³ Baibul ese Iehova na “nadi” ida e haheḡereḡerea, unu amo iena kara haida baita lalopararalai. Nega momo Iehova ena hesiai taudia ese iena kara namodia e herevalai neganai Ia na e gwauraia nadi-gini. Nega ginigunana na Deuteronomi 32:4 ai, Iehova na e gwauraia “Nadi-gini.” Hana ena ḡuriḡuri lalonai e gwa, “asi nadi-gini ta emai Dirava heḡereḡerena.” (1 Sam. 2:2) Habakuku ese Iehova na e gwauraia ‘egu Nadi-gini.’ (Hab. 1:12) Salamo 73 e torea tauna ese Dirava na e  gwauraia ‘egu nadi-gini.’ (Sal. 73:26) Iehova danu sibona e hegwaurai ia na nadi-ginina. (Isa. 44:8) Mani Iehova ena kara toi aita herevalai, unu ese e hahedinaraiamu ia na nadi-gini bona be durudamu ia na “eda Nadi-ginina” ai baita halaoamu.—Deu. 32:31.

4. Edena dala ai Iehova na eda roho-mauri nadi-ginina? (Salamo 94:22)

⁴ Iehova na eda roho-mauri nadi-ginina. Lai gubana lalonai ta na nadi badana ta metaina be laomu, una ese baine gimaia totona. Una heḡereḡerena nega aukadia ai Iehova ese ita na e gimadamu. (Salamo 94:22 ba duahia.) Ia ese be durudamu eda hetura karana ia ida na ḡau ta ese basine hadikaia. Danu e gwauhamata, vaira nega ai ita e hahisidamu ḡaudia iboudiai na be haoredia vaitanimu.—Esek. 34:​25, 26.

5. Edena dala ai Iehova na eda Roho-Mauri nadi-ginina ai baita halaoa?

⁵ Iehova na eda Roho-Mauri nadi-ginina ai baita halaoa dalana ta na ia baita ḡuriḡuri henia. Baita ḡuriḡurimu neganai Iehova ese “ena maino” be henidamu una ese kudouda bona darada be gimadiamu. (Fili. 4:​6, 7) Mani ena abidadama dainai dibura ai e atoa tadikakana Artem ena sivarai aita laloa. Dibura ai e nohova neganai, pulisi ta ese e nanadaia loulouva, to danu e kara auka heniava bona e hagariava. Artem na e gwa: “E hereva heniguva negadia ai na lalohekwarahiva. . . . To hanaihanai Iehova na ḡuriḡuri heniava. Na noiava maino bona aonega baine henigu. Una daḡedaḡe karana ese lau na se hagarigu. . . . Iehova ena heduru dainai, lau na vaitani stone wall ta metainai gini.”

6. Dahaka dainai hanaihanai Iehova enai baita tabekau? (Isaia 26:​3, 4)

⁶ Iehova na hanaihanai ita e durudamu bona se rakatanidamu. Nadi badana ta na basine marere diba heḡereḡerena, Iehova na hanaihanai noho heḡaeḡae ita baine duruda. Ia na baita abidadama henia diba badina ia na “mia-hanaihanai nadi-ginina.” (Isaia 26:​3, 4 ba duahidia.) Ia na hanaihanai e maurimu ena gwauhamata baine badinadia, eda ḡuriḡuri baine kamonaidia, bona baine duruda totona. Danu ita na Iehova enai baita tabekau diba badina ia e abidadama heniamu taudia na ia ese e ‘abidadama henidiamu.’ (2 Sam. 22:26) Ta karamu ḡaudia danu basine lalodia boiomu bona hanaihanai be hanamodamu.—Heb. 6:10; 11:6.

7. Iehova enai baita tabekaumu neganai ita edai dahaka be varamu? (Laulau danu ba itaia.)

⁷ Iehova enai baita tabekaumu neganai, ia na eda Nadi-ginina ai baita halaoamu. Ta abia daemu bema nega aukadia Ia baita badinaiamu, namo baita davarimu. (Isa. 48:​17, 18) Iena heduru ta abimu negadiai, eda abidadama na e goadamu. Bona ta abia daemu Iehova sibona ese ita baine duruda diba hahetoho auka hereadia lalodiai baita kwalimu. Danu ta lalopararamu hanaihanai Iehova enai baita tabekau diba. Vladimir na e gwa: “Dibura ai na nohova neganai egu hetura karana Iehova ida na e  goada bona na diba namona na egu abidadama ia enai baina hagoadaia bona ia sibona ese baine durugu, baina haheauka totona.”

8. (a) Dahaka dainai baita gwau diba Iehova na se idaumu? (b) Bema Iehova na eda Nadi-ginina ai baita halaoamu, dahaka namo baita davarimu? (Salamo 62:​6, 7)

⁸ Iehova na se idaumu. Iehova na nadi badana ta na heto, se idaumu. Iena kara bona ura na asie idaumu. (Mal. 3:6) Eden ai gwau-edeede e vara neganai, Iehova ese ena ura na se haidaua. Aposetolo Paulo na e gwa, Iehova na “sibona basine heḡore.” (2 Tim. 2:13) Anina na herevana dahaka baine vara eiava haida be dahaka bae kara, to Iehova ena kara, ura, bona taravatu na basie idau. Iehova na se idaumu dainai, ta dibamu nega aukadiai ia ese be durudamu bona nega vaira ai ena gwauhamata na be haḡuḡurudiamu.—Salamo 62:​6, 7 ba duahidia.

9. Tatyana ena expiriens amo dahaka o dibamu?

⁹ Iehova na eda Nadi-ginina ai baita halaoamu bema iena kara bona ura baita lalodia badamu. Unu baita kara tomamu neganai hahetoho lalodiai basita lalo hekwarahimu to baita haheaukamu. (Sal. 16:8) Taihu ta ladana Tatyana enai na unu e vara toma. Ia na ena abidadama dainai dibura ai e atoa. Ia na e gwa: “Lau na sibogu, una dainai matamanai egu ai na e auka. Nega momo na lalo manokava.” To Iehova bona ena ura e lalodia dobu neganai, una ese e durua baine haheauka. Ia na ma e gwa: “Una hahetoho egu ai e varava badina na lalopararalaia neganai, e durugu baina helalotao lau na Iehova dainai unuseni ai e atogu. Bona na diba sibogu na basina helalo.”

10. Edena dala ai hari Iehova na eda Nadi-ginina ai baita halaoa?

¹⁰ Vaira negadiai, hahetoho badadia baita davarimu dainai namona na Iehova enai baita tabekau. Hari eda abidadama na baita hagoadaia bona baita abia dae Iehova ese ita na be durudamu Ia baita badinaia totona. Edena dalai unu baita kara toma? Namona na Baibul sivaraidia bona hari ina negai Iehova e hesiai heniamu taudia sivaraidia baita duahi. Mani ba lalo edena dalai Iehova ese ena hesiai taudia e durudia. Unu sivarai na ba lalodia dobu. Unu bo kara tomamu ese oi na be durumumu Iehova na emu Nadi-ginina ai bo halaoamu.

IEHOVA ENA KARA BA TOHOTOHO

11. Dahaka dainai ta uramu Iehova ena kara baita tohotoho? (Ina maua “ Tadikaka Matamatadia Edia Tahua Ḡaudia” danu ba itaia.)

¹¹ Ita ese Iehova ena kara tame herevalaidia, unu amo tame laloparara Ia na eda nadi ginina. Hari be baita itaiamu edena dala ai Iena kara baita tohotohodia. Bema ita na baita hekwarahimu Iehova baita tohotohoamu neganai, tadikaka taihu na baita hagoadadia dibamu. Iesu ese Simona ladana ma ta e heni Kefa (e hahanaia na “Petro”), anina na “Papapapa.” (Ioa. 1:42) Una ese e hahedinaraia Petro na kongrigeisin ai haida edia abidadama baine hagoada. Baibul ese kongrigeisin elda taudia na e gwauraidiamu “nadi-gini badana  ikerukeruna.” Anina na idia ese kongrigeisin taudia e gimadiamu. (Isa. 32:2) Oibe, bema tadikaka bona taihu ese Iehova ena kara be tohotohomu, kongrigeisin ibounai na namo be davarimu.—Efe. 5:1.

12. Edena dala ai hekwakwanai negadiai haida baita durudia?

¹² Dika negadiai haida ba durudia. Tadikaka taihu na disasta eiava tuari daidiai edia ruma e heautani dainai, eda ruma ai baita abidia dae. Ini “dina gabedia” ai nega na e dika e laomu dainai, baita heduru heheni na namo. (2 Tim. 3:1) Danu eda tadikaka bona taihu baita hagoadadia bona tauhalo baita henidia. Unu baita kara toma dalana ta na Kingdom Hall ai baita welkam henidia, unu amo bae mamia kongrigeisin na lalokau bona hahegoada iabina gabuna. Ita na lalokau asie hahedinaraimu taudia bogaraḡidiai ta nohomu dainai, namona na baita hagoadadia bona eda lalokau idia ediai baita hahedinaraia.

13. Dahaka dainai elda taudia na dika negadia ai haida bae durudia na mai anina bada? (Laulau danu ba itaia.)

¹³ Elda taudia ese tadikaka taihu na dika negadia ai bae durudia na namo. Disasta bona medikol hedurudia negadia ai, elda taudia ese dala bae kara tadikaka taihu bae durudia na namo. Danu Baibul amo bae hagoadadia. Elda tauna na e hebogahisimu bona e uramu ma haida edia hereva baine hakala neganai, tadikaka taihu na be uramu ia bae hereva henia. Kara unu bamodia daidiai tadikaka taihu na be mamiamu idia na e lalodia badamu, bona ediai na be haraḡamu elda ese Baibul ena hereva heḡereḡerena e henimu herevadia bae badina.—1 Tes. 2:​7, 8, 11.

14. Edena dala ai baita hahedinaraia ma haida ese ita na bae trastida diba?

¹⁴ Namona na ma haida ese bae trastimu. Ita na ta uramu haida ese bae trastida, nega aukadiai danu. (Her. 17:17) Dahaka baita kara  unu amo haida ese bae trastida? Namona na baita hekwarahi hanaihanai Dirava ena kara baita tohotoho, heḡereḡere eda gwauhamata baita haḡuḡurudia bona nega korikori ai baita gini dae. (Mat. 5:37) Bema ta na heduru e uramu namona na baita durua. Danu kongrigeisin ai ta abimu ḡaukaradia na e henimu hahekau herevadia heḡereḡerediai baita kara.

15. Edena dala ai kongrigeisin na namo baine davari bema elda taudia na baita trastidia diba?

¹⁵ Edena dala ai kongrigeisin na namo baine davari bema elda taudia na baita trastidia diba? Tadikaka taihu na e dibamu edia metau negadiai elda bae hereva henidia diba neganai, basie lalohekwarahimu. Danu be mamiamu elda taudia ese idia na e lalokau henidiamu badina e dibamu elda na e uramu idia bae durudia. Bona elda taudia ese Baibul bona pablikeisin amo heduru herevadia e henimu neganai, tadikaka taihu ese idia na e trastidiamu. Danu tadikaka taihu ese elda e trastidiamu, badina edia hehuni herevadia na ma haida se hamaorolaidiamu bona edia gwauhamata na e badinadiamu.

16. Bema hanaihanai Iehova ena hereva baita badinamu, edena dala ai ita bona ma haida ese namo baita davarimu?

 ¹⁶ Hanaihanai Iehova ena hereva baita badina. Bema ḡau iboudiai lalodiai Iehova baita badinaiamu bona Baibul ena hereva heḡereḡerena abi hidi baita karamu, ita na haheitalai namodia ai baita laomu. Baibul baita stadilaiamu bona Iehova enai eda abidadama baita hagoadaiamu neganai, ia bona ena taravatu na baita badinadiamu. Ita ese hahediba herevadia o lalohadai koikoidia na baita dibadiamu bona unu ese basie hakauda kereremu. (Efe. 4:14; Iak. 1:​6-8) Iehova bona ena gwauhamata ta abidadama henimu dainai sivarai dikadia ta kamonaimu neganai asita garimu. (Sal. 112:​7, 8) Danu hahetoho e davarimu taudia na baita durudia dibamu.—1 Tes. 3:​2, 3.

17. Elda taudia be dahaka ese baine durudia Iehova ibadinana karana ai haheitalai namodia ai baela totona?

¹⁷ Namona na elda taudia na edia kara bae biagu, bae lalo namonamo, dala maorona bae badinaia, bona bae lalo maoromaoro. Idia ese haida bae durudia basie gari to edia abidadama Iehova enai bae hagoadaia dalana na ‘hereva momokani bae dogoatao auka.’ (Tito 1:​9, NWT; 1 Tim. 3:​1-3) Elda taudia ese edia haheitalai namona bona mamoe vadivadi ḡaukarana amo pablisa bae durudia, hanaihanai bae hebou, bae haroro bona sibodia edia stadi bae kara. Tadikaka taihu na hekwakwanai daidiai e lalohekwarahimu neganai, elda taudia ese e durudiamu Iehova enai bae tabekau bona iena gwauhamata bae lalodia.

18. Dahaka dainai ta uramu Iehova baita hanamoa bona baita hakahikahia? (Ina maua “ Iehova ba hakahikahia dalana” danu ba itaia.)

¹⁸ Ita ese Iehova ena kara namodia baita haerodiamu neganai, King David heḡereḡerena baita gwau dibamu: “Iehova, egu nadi-gini, na hanamoamu.” (Sal. 144:1) Ita na hanaihanai Iehova enai baita tabekau diba. Eda mauri lalonai, baita buruka neganai danu, baita abia dae Iehova ese ita na dounu be durudamu ia baita hakahikahia, bona baita gwa: “Ia na egu Nadi-gini.”—Sal. 92:​14, 15.