Iehova baita hamoalea totona, baita abidadama na namo. To, Baibul na e gwa “haida mo mai edia abidadama.” (2 Tes. 3:2) Una hereva amo Aposetolo Paulo ese ia e daḡedaḡe heniava “kara dika taudia” e gwauraidia, bona ia na e ura Dirava ese idia imadia amo baine hamauria. To iena hereva na ma haida danu e gwauraidia. Idia na asie uramu bae abia dae Dirava ese ḡau iboudiai e havara. (Roma 1:20) Bona idia haida na e gwaumu ḡau ta o siahu herea tauna ta e abidadama heniamu. To una na dia abidadama korikorina.

Namona na baita abia dae Iehova na e maurimu bona Ia e abidadama heniamu taudia na “davadia namodia baine henidia.” (Heb. 11:6) Abidadama na lauma huahuana ta. Bona lauma helaḡa baita abia totona Dirava baita noia na namo. (Luka 11:​9, 10, 13) Bona baita abia dalana ma ta na Baibul baita duahia, badina e torea taudia na Dirava ena lauma helaḡa amo e hakaudia. Una dainai, ta duahimu ḡaudia na baita lalodia dobu bona baita hekwarahi eda mauri ai baita badinadia. Bema unu baita kara tomamu, Iehova ena lauma ese be durudamu eda mauri dalana amo baita hahedinaraiamu ita na mai eda abidadama.