Momokani, hari ina negai ta na asi dibana Paulo toana be ede bamona. Eda pablikeisen ai e hedinaraimu laulaudia momo na artist taudia ese e toremu gaudia, dia akioleji edia hetahu amo e davarimu ḡaudia.

To, ḡau haida ese Paulo toana e herevalaia. Heḡereḡere, March 1, 1902 ena Zion’s Watch Tower na eto: “Paulo toana na . . . ‘Acts of Paul and Thecla’ . . . laḡani 150 A. D. ai e torea bukana, ese Paulo toana bona ena kara e herevalai. Eto, Paulo na ‘tau kwadoḡina, kwarana na kebere, aena na taidia ḡaḡageva, bona mai goadana, ibunina huidia na momo herea; udu baubauna na lata.’”

The Oxford Dictionary of the Christian Church (1997 edition) ese una buka gunana na ini e herevalaia toma: “Una ‘Acts’ bukana ese idaunegai sivarai momokanidia haida e gwaurai.” Kristen ginigunadia edia negai, taunimanima ese The Acts of Paul and Thecla bukana na e laloa badava, badina una buka ena Grik maniuskrip 80 na doini mimia, bona gado ma haida ai danu e hahanaidia. Una dainai, aposetolo tauna laulauna na unu buka gunadia ese toana e herevalaia heḡereḡerena e torea.

To, Paulo toana baita laloa na dia ḡau badana. Paulo ese ena hesiai ḡaukara e karaiava neganai, haida ese ia na ini e gwauraia tomava, “tau-anina na manoka-manoka bona uduna herevadia danu asi mamidia.” (2 Kor. 10:10) To baita helalotao, Paulo na Iesu ena amo e ita hoa karana ta dainai ia na Kristen tauna ta ai ela. Danu Paulo ese e haḡuḡurua ḡaudia baita laloa diba, ia na Keriso ese vada e abia hidi, “bese idau-idau taudia . . . vairadiai” Iesu ladana baine gwauraia. (Kara 9:3-5, 15; 22:6-8) Bona Paulo ese Iehova ena lauma helaḡa ena siahu amo e tore Baibul bukadia amo namo baita davari dibamu.

Paulo na Kristen tauna ai do sela neganai e karava ḡaudia na se heaḡilaiva, bona ia sibona ese toana na se herevalaiva. (Kara 26:4, 5; Fili. 3:4-6) Ia na eto: “Aposetolo iboudiai ese lau e hereagumu; lau na dia namo aposetolo bae gwauraigu.” (1 Kor. 15:9) Gabeai ma eto: “Helaḡa taudia iboudiai lau mo sibogu maraḡi-maraḡi herea; to ia ese vada e harihari henigu, bese idau-idau vairadiai Keriso ena taḡa, iduahina ta asi dibana taḡana, baina harorolaia.” (Efe. 3:8) Una hereva baita laloa bada be namo, Paulo toana baita laloa karana e hereaia.