1. Aposetolo edia negai Kristen taudia be dahaka hekwakwanai e davariva?

LAḠANI 62 bona 64 C.E. padanai, aposetolo Petro ese “Ponto ai bona Galatia ai bona Kapadokia ai bona Asia ai bona Bitunia ai” e noho hedoava taudia e tore henidia. (1 Pet. 1:1) Asia Minor ai unu kongrigeisen idauidau taudia na ta ese baine hagoadadia bona baine hakaudia na namo. Idia na daḡedaḡe e davariva bona haida ese e gwauraidia dikava. E davari hisihisidia na “lahi na heto.” Bona nega aukadia ai e nohova. Petro na eto: “Ḡau iboudiai dokodia vada be kaumu.” Oibe, laḡani 10 do se abia neganai Iuda taudia edia daḡedaḡe karadia na bae ore. Dahaka ese Kristen taudia gabu idauidau ai baine durudia bae haheauka totona?​—1 Pet. 4:4, 7, 12.

2, 3. Dahaka dainai Petro ese tadikakana e hadibadia heabidae karana bae hahedinaraia? (Rau 14 ai laulau ba itaia.)

² Danu, Petro ese tadikakana e hadibadia: “Ba heabi dae heheni, basio maumau.” (1 Pet. 4:9) Grik gado ai ina hereva “heabidae” anina na “idau taudia ba lalokau henidia, eiava ba kara namo henidia.” To mani a laloa, Petro ese ena Kristen tadikaka bona taihu e hadibadia bae heabidae “heheni,” ena be vada e hemanada  heheni bona e ḡaukara heboumu. Edena dala ai heabidae karana ese baine durudia?

³ Una ese edia hebamo karana baine hanamoa. Mani emu ai e vara ḡauna ba laloa. Ta ese nega ta e boirimu ena ruma ola neganai, nega namona o moalelaia, a? Una nega dounu o laloataomu, a? Emu kongrigeisen taudia haida o boiridia neganai, emu hetura karana idia ida e hagoadaia, a? Heabidae karana baita hahedinaraiamu neganai, eda tadikaka bona taihu baita dibadia namonamomu. Petro ena negai, hekwakwanai na e badava dainai Kristen taudia ese edia hebamo karana bae habadaia na namo. Ina “dina gabedia ai” Kristen taudia danu unu bae kara toma.​—2 Tim. 3:1.

4. Ina atikol ai ededia henanadai baita herevalaimu?

⁴ Ededia dala ai heabidae “heheni” karana baita hahedinaraia? Dahaka dainai heabidae karana ihahedinaraina na auka, bona edena dala ai una baita hanaia diba? Dahaka ese baine duruda diba heabidae taudia namodia ai baitala totona?

5. Edena dala ai eda Kristen heboudia ai heabidae karana baita hahedinaraia diba?

⁵ Hebou ai: Eda Kristen heboudia e maimu taudia iboudiai baita welkam henidia. Iehova bona ena orea ese ita e boirida. (Roma 15:7) Kamonai taudia matamatadia danu Iehova ese e boiridia, una dainai baita welkam henidia na namo, herevana toadia eiava edia heḡoeva daladia na idau. (Iak. 2:1-4) Bema vadivadi tauna ta na sibona ela, ba boiria diba badimu ai baine helai. Ia na be moalemu bema bo duruamu program baine badinaia bona bae duahi siridia na Baibul ai ba itadia hebou. Una na “heabi-dae karadia” baita hahedinarai dala namona ta.​—Roma 12:13.

6. Daidia baita abidia dae na namo?

⁶ Aniani hebou: Baibul negadia ai, ta ese heabidae karana baine hahedinaraia totona, ma haida e boiridiava ena ruma ai bae aniani hebou. (Gen. 18:1-8; Hahe. 13:15; Luka 24:28-30) Aniani hebou karana ese edia hebamo karana e hanamoava bona maino ai e nohova. Daidia baita abidia dae? Iseda kongrigeisen tadikaka bona taihu. Hekwakwanai negadia ai, baita heduru heheni na namo. Idia na ita turada korikoridia bona idia ida maino ai baita noho na namo. Laḡani 2011 ai, Gavanin Bodi ese United States ena Betele famili edia Gima Kohorona Stadi horana na adorahi 6:45 amo e haidaua 6:15. Dahaka dainai? Hahediba herevana ai na eto, una dala amo hebou murinai Betele taudia ese heabidae karana bae hahedinaraia diba. Brens ofesi ma haida danu unu e kara toma. Una dala ese Betele famili edia hetura karana e hanamoamu.

7, 8. Edena dala ai eda kongrigeisen ai tok ihenidia totona e maimu tadikakadia baita abidia dae diba?

⁷ Kongrigeisen ma haida amo pablik tok bae heni taudia, seket taudia, bona nega haida, brens ena gwaukau tadikaka e vadivadimu neganai, ita ese heabidae karana baita hahedinaraia diba. (3 Ioane 5-8 ba duahi.) Una baita karaia dala namona ta na, baita boiridia eda ruma ai baita aniani hebou. Una ba karaia diba, a?

⁸ United States ai, taihu ta na eto: “Laḡani momo lalodiai, lau bona adavagu ese tok heni tadikakadia momo bona adavadia a boiridiava emai ruma ai. Edia ekspiriens ese emai abidadama na e hagoadaia bona moale karadia a karava danu. Unu nega na a moalelaidia.”

9, 10. (a) Daidia baita abidia dae diba eda ruma ai bae noho? (b) Ena be haida edia ruma na dia bada to bae heduru diba, a? Haheitalai ta a gwauraia.

⁹ Emu ruma ai bae noho vadivadi taudia: Baibul negadia ai, nega momo taunimanima ese vadivadi taudia na e abidia daeva  edia ruma ai bae noho. (Iobu 31:32; File. 22) Hari inai negai danu, unu baita kara toma na namo. Nega momo seket taudia na kongrigeisen e vadivadidiamu neganai, tadikaka taihu ese e abidia daemu edia ruma ai bae noho. Tiokratik sikulidia ai e vareai stiuden taudia bona konstraksen volentia taudia baita abidia dae eda ruma ai bae noho totona. Disasta ese edia ruma e hadika ruma besedia baita boiridia eda ruma ai bae noho diba ela bona edia ruma bae hanamodia lou. Dia namo baita lalo ruma namodia ai e nohomu taudia ese bae durudia na namo; idia na reana nega momo e hedurumu. Ena be emu ruma na maraḡi eiava toana na dia namo momokani, to ta ba boiria diba emu ruma ai baine noho totona, a?

¹⁰ South Korea ai, tadikaka ta ese tiokratik sikulidia ai e vareai stiuden taudia e abidia dae negana na e laloataomu. Ia na eto: “Matamanai na asina ura badina ai na headava matamata bona emai ruma na dia bada. To stiuden na emai ruma ai e noho neganai a moale bada. Ai na headava matamata dainai, a itaia headava taudia ese Iehova bae hesiai henia bona lauma ḡaudia bae ato guna neganai, bae moale diba.”

11. Dahaka dainai emu kongrigeisen ai tadikaka bona taihu matamatadia ediai heabidae karana ba hahedinaraia?

¹¹ Kongrigeisen ai tadikaka bona taihu matamatadia: Tadikaka bona taihu eiava ruma bese haida na edia kongrigeisen amo ela emu gabu ai e nohomu. Ma haida na pablisa dia momo gabudia ai e haroromu. Painia taudia na e siaidia emu kongrigeisen bae durua totona. Idia na gabu matamatana ai, kongrigeisen matamatana, bona reana gado eiava kastom ma ta be dibamu. Ba boiridia diba emu ruma ai bavaniani hebou, eiava ba loaloa hebou, una ese be durudiamu tura matamatadia bae dibadia bona emu gabu ena mauri dalana bae manadalaia.

12. Edena ekspiriens ese e hahedinaraiamu heabidae karana ai ḡau momo baita heḡaeḡaelai na asi anina?

¹² Heabidae karana ai dia ḡau momo herea baita heḡaeḡaelai. (Luka 10:41, 42 ba duahi.) Tadikaka ta na adavana ida misinari ai ela matama neganai e vara ḡauna e laloatao, ini e gwau toma: “Ai na mamatamata, emai diba na dia bada, bona emai ruma bese a rakatanidia dainai a helalova. Adorahi ta ai adavagu na e helalova, bona na hekwarahiva baina hamoalea totona. Bena 7:30 p.m ai, emai iduara ai pidipidi reḡena a kamonai. Baibul stadi ta na oransi toi e mailai. Ia na ema ai baine hedavari henimai. A boiria vareai bona ranu a henia. Bena ti bona hot chocolate a kara. Ai na Swahili gado na asi dibamai, bona ia danu English gado na asi dibana. To una ese emai hetura karana una gabu tadikakadia ida e hanamoa bona a moale.”

13. Heabidae karana ba hahedinaraia ena namo haida be dahaka?

¹³ Nega ta so ura heabidae karana ba hahedinaraia, a? Bema oibe, oi ese nega namodia bona bae mia hanaihanai hebamodia na vada o readia. Heabidae karana bo hahedinaraiamu neganai bo mamiamu oi na dia sibomu o nohomu. To reana bo lalomu, ‘Dahaka dainai ta na se uramu heabidae karana baine hahedinaraia?’ Reana badi haida daidiai.

14. Dahaka baita kara diba bema eda nega eiava goada na dia heḡereḡere heabidae karana baita hahedinaraia?

¹⁴ Nega bona goada: Iehova ena hesiai taudia na e bisi bada hereamu bona edia maduna na momo. Haida na e mamiamu idia na asi edia nega eiava edia goada na dia heḡereḡere heabidae karana bae hahedinaraia. Bema emu hemami na unu heto, namona na emu sediual ba sekea namonamo. Ḡau haida ba haidau diba, unu amo emu nega  bona goada na heḡereḡere heabidae karana ba hahedinaraia totona. Baibul ese Kristen taudia e hagoadadiamu heabidae karana bae hahedinaraia na namo. (Heb. 13:2) Una kara ba hahedinaraia totona nega bavato na asi ena kerere, bona una na kara maorona. To, una ba karaia totona, ḡau asi anidia ai emu nega na basio haorea.

15. Heabidae karana ai haida be dahaka e lalohekwarahilaimu?

¹⁵ Emu hemami: Nega haida heabidae karana o uramu ba hahedinaraia to o mamiamu oi na dia heḡereḡere, a? Haida na e hemaraimu eiava e garimu dahaka hereva bae gwaurai eiava edia vadivadi bae hesiku garina. Haida edia davari na maraḡi bona e laloamu bae heni ḡaudia na dia kongrigeisen taudia ma haida ese e henimu ḡaudia heḡereḡeredia. To ba helalotao, mai anina bada ḡauna na emu ruma na ḡoeva, ḡau iboudiai na o atodia namonamomu bona oi na heabidae tauna.

16, 17. Dahaka ba kara diba bema vadivadi taudia iabi daedia totona o lalohekwarahimu?

¹⁶ Bema oi na vadivadi taudia daidiai o lalohekwarahimu, ma haida danu unu bamodia. Britain ai elda ta na eto: “Nega haida vadivadi taudia daidiai baita lalohekwarahimu. To Iehova ihesiai henina karana ai ḡau iboudiai baita karamu neganai, ena namo bona moale ese ta lalohekwarahilaimu ḡaudia na be hereadiamu. Lau na vadivadi taudia ida a helaimu, kofi a inumu bona a herevaherevamu karana na na moalelaiamu.” Baita helalotao, vadivadi taudia edia namo baita lalo na namo. (Fili. 2:4) Momo na edia ekspiriens e herevalai heboumu neganai e moalemu. Moale hebou negadia na nega namodia ma haida edia ekspiriens baita kamonai totona. Elda ma ta na ini e gwau toma: “Kongrigeisen taudia haida na boiridiamu egu ruma ai neganai, una ese e durugumu baina dibadia namonamo, bona hereva momokani ai e vareai daladia baina diba.” Eda vadivadi taudia edia namo baita lalomu neganai, baita moalemu.

¹⁷ Tiokratik sikuli idauidau ela stiuden taudia e abidia dae painia taihuna ta na eto: “Matamanai na lalohekwarahiva badina egu ruma na dia bada bona egu kohu na gunadia. Instrakta tadikakana ta adavana ena hereva ese e durugu. Ia na eto ia bona adavana na seket ḡaukara e karaiava neganai, lauma ḡaudia e lalo badava taudia ida e nohova wikidia na e moalelai, idia na Iehova ihesiai henina karana e laloa badava bona kohu momo asie tahuva. Una hereva amo sinagu ese e hamaorolaimaiva herevana na laloa: ‘Aniani asi ianimaina lalokau e miamu gabuna ai na namo herea.’” (Her. 15:17) Namona na lalokau dainai heabidae karana ba hahedinaraia, bona basio lalohekwarahi.

18, 19. Edena dala ai heabidae karana ese baine duruda ma haida basita lalodia kerere?

¹⁸ Ma haida o lalodiamu dalana: Emu kongrigeisen ai ta ese lalomu e hahisiamu, a? Bema ena kara dainai bo lalohisihisimu bona una basio hamaoromaoroamu, emu badu na basine ore haraḡamu. Ma haida edia kara basio moalelaimu neganai, basio uramu bavabidia dae. Eiava ta ese guna lalomu e hahisia, bona una ilaloboiona na auka.

¹⁹ Emu hetura karana ma haida ida, inaimu ida danu, ba hanamoa totona, Baibul na e gwaumu heabidae karana ba hahedinaraia. (Hereva Lada-isidia 25:21, 22 ba duahi.) Ma ta enai heabidae karana bo hahedinaraiamu neganai, una ese lalohadai kereredia eiava badu na be laodia ahumu. Iena kara namodia bo ita dibamu, unu kara na Iehova ese e ita dainai hereva momokani ai e hakaua vareai. (Ioa. 6:44) Bema lalokau dainai ta bo invaitiamu, una ese emui hetura karana na be hanamoamu. Ede bo diba tomamu oi na lalokau dainai o uramu heabidae karana ba hahedinaraia? Dala ta na Filipi 2:3 ena  hahegoada herevana ba badinaia: “Ta ta sibomui ba hahemanau, bamomui ba imodaidia.” Dala idauidau ai eda tadikaka eiava taihu edia kara​—reana edia abidadama, haheauka, gari lasi karana, eiava Kristen kara namona ma ta​—daidiai baita hanamodiamu neganai, eda lalokau idia ediai be badamu bona dala be kehoamu heabidae karana baita hahedinaraia totona.

20. Dahaka dainai bona edena dala ai ta ena boiboi ta abia daemu neganai baita laloa bada?

²⁰ Salamo itorena tauna David na e henanadai: “Iehova e, daika oiemu ḡuriḡuri kalagana ai baine noho?” (Sal. 15:1) Una murinai, Dirava ese e ura henimu kara namodia e herevalai. Una kara ta na eda gwauhamata baita haḡuḡurua karana, Baibul na e gwaumu: “Ia sibona ihadikana gwauhamatana e gwauraiamu negana ai ma se idaumu.” (Sal. 15:4) Bema heabidae tauna ena boiboi ta abia daemu, dia namo badi asi anidia ai eda lalohadai baita haidaua. Ita e boirida tauna na reana ḡau haida vada e heḡaeḡaelai bona basita laomu neganai, ena hekwarahi na da asi anina. (Mat. 5:37) Haida na e boiridia tauna ena boiboi na asie abia daemu to e manadaia tauna ena boiboi hari e abia daemu. Una be lalokau bona hemataurai karana, a? Ta ese e boiridamu neganai, mai moaleda ida ena boiboi baita abia dae na namo. (Luka 10:7) Bona bema basita lao dibamu, namona na e boirida tauna baita hadibaia haraḡa, una na lalokau karana bona ia ta laloamu karana.

21. Edena dala ai ma haida edia kastom baita matauraia karana amo vadivadi taudia namodia ai baitala?

²¹ Gabu ta ta taudia edia kastom baita mataurai na mai anina bada. Tano haida ai, vadivadi taudia na se hahedibamu to e laomu neganai e abidia daemu; tano ma haida ai, ta e uramu bainela neganai e hahediba gunamu. Tano haida ai, heabidae tauna ese ena vadivadi na aniani namodia e henidia gunamu, a iena ruma bese be gabeai; tano ma haida ai be iboudiai e aniani heboumu. Tano haida ai, vadivadi taudia danu ḡau haida e abi kaumu; tano ma haida ai, heabidae tauna na basine uramu ena vadivadi tauna baine hametaua. Bona tano haida edia kastom ai, vadivadi tauna ese ta ena boiboi ginigunana eiava iharuana na mai hematauraina ida se abia daemu; tano ma haida ai, bema ta na unu e kara tomamu, una na dia hemataurai karana. Namona na baita ḡaukara goada e boiridamu taudia baita hamoaledia totona.

22. Dahaka dainai baita “heabi dae heheni” na mai anina bada?

²² Petro na eto: “Ḡau iboudiai dokodia vada be kaumu.” (1 Pet. 4:7) Ita na hisihisi badana negana lalonai ta nohomu. Hekwakwanai e bada e laomu lalonai, eda tadikaka bona taihu ilalokau henidia karana baita habadaia na namo. Petro ena sisiba Kristen taudia ediai baita badinaia: “Ba heabi dae heheni, basio maumau.” Una kara ese moale e havaraiamu bona baita hahedinaraia hanaihanai na namo!​—1 Pet. 4:9.