1, 2. (a) Kristen tama sina haida be dahaka e lalomu bema natudia e uramu baine bapatiso? (b) Dahaka dainai bapatiso bae abi taudia na e nanadaidiamu bema edia mauri na Iehova enai vada e gwauhamatalaia? (Rau 3 ai laulau ba itaia.)

KEKENI ta ladana Maria na bapatiso bae abi taudia ma haida ida gigini bona tamana sinana​—Kristen taudia​—na ia e itaiamu. Tok heni tauna ese henanadai rua e heni neganai, ia na mai gado badana ida e haere. Una murinai bapatiso e abi.

² Maria tamana sinana na e moale badina natudia na Iehova enai ena mauri e gwauhamatalaia bona baine bapatiso. To, matamanai Maria sinana na e daradara. Sibona e henanadai: ‘Maria na maraḡi dainai ia be heḡereḡere baine bapatiso, a? Ia ese ena gwauhamata badina e lalopararalaiamu, a? Do baine nari sisina bena gabeai baine bapatiso be namo, a?’ Tama sina momo na natudia ta e uramu baine bapatiso neganai unu e henanadai tomamu. (Koh. 5:5) To, ta na Kristen tauna ai bainela totona ena mauri baine gwauhamatalaia bona baine bapatiso na mai anina bada.​—Maua ladana “Iehova Enai Emu Mauri O Gwauhamatalaia, A?” ba itaia.

3, 4. (a) Edena dala ai aposetolo Petro ese e hahedinaraia bapatiso na mai anina bada? (b) Dahaka dainai bapatiso karana na Noa ese lagatoi e haginia karana ida e haheḡereḡerea?

 ³ Aposetolo Petro ese bapatiso e herevalaia neganai, Noa ese lagatoi e karaia ḡaukarana ida e haheḡereḡerea, eto: “Una heḡereḡerena be bapatiso, harihari umui eme hamaurimui.” (1 Petro 3:20, 21 ba duahi.) Noa na lagatoi e karaia amo taunimanima vairadiai e hamomokania ia na mai lalona idoinai ida Dirava ena ura e karaia. Noa na mai ena abidadama ida Iehova ese e henia ḡaukarana e haḡuḡurua. Oibe, Noa na ena abidadama karana dainai ena ruma bese ida Abata amo e roho mauri. Petro ese e gwauraia haheitalaina amo dahaka ta dibamu?

⁴ Noa ese lagatoi e karaia amo ena abidadama e hamomokania, una heḡereḡerena ta na taunimanima vairadiai e bapatisomu karana amo ena gwauhamata e hamomokaniamu. Una ese dahaka e hahedinaraiamu? Kristen hahediba tauna ese ena mauri na Iehova enai e gwauhamatalaia badina ia ese e toreisi lou tauna Keriso e abidadama heniamu. Noa heḡereḡerena, bapatiso taudia na mai edia kamonai ida Dirava ese e henidia ḡaukarana e karaiamu. Noa na Abata amo e roho mauri heḡereḡerena, Dirava e badinaiamu bapatiso taudia na tanobada dikana baine ore neganai bae roho mauri. (Mar. 13:10; Apok. 7:9, 10) Una ese e hahedinaraiamu gwauhamata bona bapatiso na mai anidia bada. Bema ta na bapatiso iabina karana ai baina halahe ia na mauri hanaihanai baine abia dalana e kouamu.

5. Ina atikol ai dahaka baita herevalaimu?

⁵ Bapatiso karana na mai anina bada dainai, ini henanadai toi baita lalodia na namo: Baibul ese bapatiso karana be ede e herevalaia toma? Ta be dahaka baine kara na namo bapatiso baine abi totona? Dahaka dainai  Kristen tauna ese natuna eiava Baibul stiuden ta e hadibaiamu neganai baine helalotao bapatiso na mai anina bada?

6, 7. (a) Ioane ena bapatiso anina ba herevalaia. (b) Ioane ese edena mai anina bada bapatisona e karaia?

⁶ Baibul ai Ioane Bapatiso ese e karaia bapatisona e herevalaia. (Mat. 3:1-6) Ioane ese e ha bapatisodia taudia na e hahedinaraia idia na Mose ena Taravatu iutuna karadia amo e helalo-kerehai. To, Ioane ese mai anina bada bapatisona ta e karaia bona una na dia helalo-kerehai karana ihahedinaraina bapatisona. Ioane ese Iesu, Dirava Natuna ḡoevadaena, e ha bapatisoa na hahenamo badana. (Mat. 3:13-17) Iesu na asi ena kara dika, una dainai baine helalo-kerehai na asi anina. (1 Pet. 2:22) Iena bapatiso ese e hahedinaraia, ia na ena mauri e heni Dirava ena ura baine karaia.​—Heb. 10:7.

⁷ Iesu na tanobada ai e harorova neganai, ena hahediba ese danu taunimanima e bapatisodiava. (Ioa. 3:22; 4:1, 2) Ioane ese e karaia bapatisona heḡereḡerena, unu bapatiso e abiva taudia ese e hahedinaraia, idia na Mose ena Taravatu iutuna karadia amo e helalo-kerehai. To, Iesu e mase bona e toreisi lou murinai, ia e urava bae badinaia taudia na badi idauna ta dainai e bapatisova.

8. (a) Iesu e toreisi lou murinai, ena hahediba be dahaka haheḡani e henidia? (b) Kristen bapatiso anina ba herevalaia.

⁸ Laḡani 33 C.E. ai, e toreisi lou tauna Iesu na taunimanima 500 mai kahana​—tatau, hahine, bona natu​—vairadiai e hedinarai. Reana una negai Iesu na eto: “Taunabunai baola, bese iboudiai hahediba ai ba halaodia, bona Tamana, Natuna, Lauma Helaḡa ladana ai ba ha bapatisodia. Ba hadibadia danu, na henimui haheḡanidia iboudiai bae badina.” (Mat. 28:19, 20; 1 Kor. 15:6) Oibe, Iesu ese hahediba ihalaodia haheḡanina e gwauraia neganai, toana na ena hahediba momo na unuseniai. Una dainai Iesu ese e hahedinaraia, hahediba ihalaodia ḡaukarana ena maduna e abia daemu taudia ese bapatiso bae abia na namo. (Mat. 11:29, 30) E uramu Dirava bae hesiai henia taudia ese Iesu ena ḡaukara Iehova ena ura ihaḡuḡuruna karana ai bae lalopararalaia bona bae abia dae na namo. Una murinai bae bapatiso diba. Unu bamona ranu bapatisona na Dirava ese e abia daemu. Baibul ese e hahedinaraiamu Kristen ginigunadia edia negai, Keriso ena hahediba taudia matamatadia ese bapatiso anina na e lalopararalaia. Bona bapatiso iabina karana ai asie halahe.​—Kara 2:41; 9:18; 16:14, 15, 32, 33.

9, 10. Eunuko tauna bona aposetolo Paulo edia bapatiso karana amo dahaka ta dibamu?

⁹ Kara 8:35, 36 ba duahi. Iuda tomadihona e abia dae Eunuko tauna na tomadiho totona Ierusalem ela bena e lou laova ai, e vara ḡauna mani aita laloa. Iehova ena aneru ese Filipo e siaia dainai, ia na una Eunuko tauna dekena ela bona “Iesu sivaraina namona e hadibalaia.” Eunuko tauna be dahaka e kara? Ia na e diba hereva momokanidia e moalelai, bona e ura Iehova ena dala baine badinaia dainai, se halahe to e bapatiso.

¹⁰ Haheitalai ma ta na, Kristen taudia e hahisidiava Iuda tauna ta. Ia na Dirava e badinaiava besena ai e vara. To, Iuda taudia ese edia hetura karana namona Iehova ida na e hadikaia. Una Iuda tauna ese Iuda edia sene karadia na e goadalaiava, to ḡau namona ta e dibaia. Ia na e toreisi lou tauna Iesu Keriso ese e hereva henia. Bona dahaka e kara? Ia ese Kristen hahediba tauna  Anania ena heduru e abia dae. Baibul na eto: “Bena e tore isi, bapatiso e abia.” (Kara 9:17, 18; Gal. 1:14) Gabeai, una Iuda tauna na e gwauraia aposetolo Paulo. To mani a laloa, Paulo ese Iesu ena ḡaukara Dirava ena ura ihaḡuḡuruna karana ai e lalopararalaia neganai, ia na kara ta e karaia. Ia na se halahe to e bapatiso.​—Kara 22:12-16 ba duahi.

11. (a) Hari negai dahaka ese Baibul stiuden e hagoadadiamu bapatiso bae abi? (b) Ta e bapatisomu neganai eda hemami be ede bamona?

¹¹ Hari ina negai Baibul stiuden taudia danu unu bamona, ena be idia na matamata taudia eiava burukadia. Baibul ena hereva momokani e abia daemu bona e laloa badamu taudia na e ura dikadikamu edia mauri bae gwauhamatalaia bona bae bapatiso. Hebouhebou negadia ai e henimu bapatiso herevana na mai anina bada unu bapatiso bae abi taudia ediai. Baibul stiuden ta ese hereva momokani e abia daemu bona e uramu baine bapatiso neganai, Iehova ena Witnes taudia na e moalemu. Kristen tama sina ese natudia e itadiamu hahediba taudia matamatadia ma haida ida bapatiso e abimu neganai, e moalemu. Hesiai laḡanina 2017 ai, kudou maoro taudia 284,000 na ranu bapatisona amo edia gwauhamata Iehova enai e hamomokania. (Kara 13:48, NWT) E hahedinaraiamu, unu hahediba taudia matamatadia na e laloparara Kristen taudia ese bapatiso bae abia na namo. To, idia be dahaka e kara unu amo bapatiso e abi?

12. Baibul stiuden ta na do se bapatiso neganai dahaka baine kara na namo?

¹² Baibul stiuden ta na do se bapatiso neganai, namona na Dirava, Iena ura, bona Iena hahemauri dalana baine dibadia namonamo, unu amo ena abidadama baine habadaia. (1 Tim. 2:3-6) Una abidadama ese baine hagoadaia Dirava ese se moalelaimu karadia baine dadarai bona Iehova ena kara maoromaoro taravatudia baine badina. (Kara 3:19) Una na mai anina bada, badina ta ese ena mauri Dirava enai na basine gwauhamatalaia diba, bema ia na Dirava ese se moalelaimu karadia dounu e karamu. (1 Kor. 6:9, 10) To, Iehova ena kara maoromaoro taravatudia baine badina totona kara ma haida danu baine kara na namo. Kara maoromaoro e tahuamu tauna na kongrigeisen heboudia bainela bona haroro bona hahediba taudia ihalaodia ḡaukarana baine karaia hanaihanai. Iesu na eto una ḡaukara na iena hahediba taudia momokanidia ese bae karaia. (Kara 1:8) Hahediba tauna matamana na unu baine kara toma murinai, sibona ena ḡuriḡuri ai Iehova baine gwauhamata henia bona taunimanima vairadiai una gwauhamata na bapatiso baine abi karana amo baine hamomokania.

13. Dahaka dainai baita helalotao Kristen tauna ese bapatiso baine abia na namo?

¹³ Natuda bona Baibul stiuden ma haida ta durudiamu abi hidi badadia bae kara neganai, baita helalotao hahediba taudia ai e uramu baela taudia bae bapatiso na namo. Bema una baita laloataomu, eda stiuden baita durudia namonamomu. Nega maorodia ai idia ediai gwauhamata bona bapatiso anidia baita herevalai namonamo. Oibe, ta uramu natuda bona Baibul stiuden ma haida na bae goada ela bona bapatiso bae abi!

14. Dahaka dainai ta na basita doria bapatiso baine abi totona?

¹⁴ Momokani, tama eiava sina, stiuden e stadi heniamu tadikaka o taihu, eiava kongrigeisen tauna ta ese ta na basie doria bapatiso baine abi totona. Iehova ena dala na dia unu heto. (1 Ioa. 4:8) Ma haida ta hadibadiamu neganai, namona na baita durudia  edia hetura karana Dirava ida bae hagoadaia na mai anina bada. Bema stiuden ese hereva momokani baine moalelaia bona baine ura Kristen maduna baine huaia, una ese baine hagoadaia bapatiso baine abia totona.​—2 Kor. 5:14, 15.

15, 16. (a) Ta be laḡanina baine bada bena baine bapatiso diba, a? Ba herevalaia. (b) Dahaka dainai Baibul stiuden ta na Iehova Witnes ai bainela totona baine bapatiso na namo, ena be guna tomadiho ta ai e bapatiso?

¹⁵ Ta na dia laḡanina baine bada bena baine bapatiso. Stiuden na idauidau, haida be hereva momokani ai e tubu haraḡamu to ma haida na metairametaira. Momo na maraḡidia ai e bapatisomu, bona dounu Iehova e badinaiamu. Stiuden ma haida na laḡanidia e bada neganai, Baibul ena hereva momokani e dibaia bona bapatiso e abi​—idia haida laḡanidia na 100 mai kahana!

¹⁶ Baibul stiuden burukana ta na e stadi heniava taihuna e nanadaia bapatiso baine abia lou be namo eiava; ia na laḡani haida gunadia ai tomadiho idauidau ai e bapatiso. Stiuden bona ena stadi taihuna ese Baibul amo siri haida e riviulai. Una stiuden na hari Baibul ena hereva e lalopararalaia, bona una murinai e bapatiso. Ena be laḡanina na 70 heḡereḡerena, to e diba bapatiso baine abia na mai anina bada. Oibe, ta na Iehova ena ura baine diba maoromaoro neganai, baine bapatiso na maoro. Una dainai, hahediba taudia matamatadia ese bapatiso bae abia na namo, ena be guna tomadiho ma ta ai e bapatiso.​—Kara 19:3-5 ba duahi.

17. Ta na ena bapatiso dinana ai dahaka baine lalo na namo?

¹⁷ Ta e bapatisomu dinana na moale bada negana. Danu una na gwauhamata bona bapatiso anidia baine lalodia negana. Ta na ena gwauhamata ihaḡuḡuruna totona baine ḡaukara goada na namo. Una dainai Iesu ese hahediba ḡaukarana na maduna ihuana auna ta ida e haheḡereḡerea. Namona na Iesu ena hahediba taudia na “sibodia ediai basie mauri, to idia daidiai e mase ma e tore isi lou tauna enai bae mauri.”​—2 Kor. 5:15; Mat. 16:24.

18. Stadi gabena ai ededia henanadai baita herevalaimu?

¹⁸ Maria sinana na paragraf matamana ai e herevalai henanadaidia e heni neganai, gwauhamata bona bapatiso anidia e lalodia. Bema oi na tama eiava sina, reana bo lalomu: ‘Lau natugu be heḡereḡere bapatiso baine abi, a? Iena diba be heḡereḡere gwauhamata baine kara totona, a ? Edukeisen bona moni ḡaukara be ede bamona? Bema bapatiso baine abi bena gabeai kara dika badana ta baine karaia be ede bamona?’ Stadi gabena ai, unu henanadai baita herevalaimu bona Kristen tama sina ese bapatiso karana ai lalohadai maorona bae abia dalana baita dibamu.