1. Edena dala ai aonega baita abia, bona dahaka namo baita davaria?

IEHOVA na aonega Badina, bona ena aonega na ma haida e henidiamu. Iakobo 1:5 na e gwaumu: “Umui ta aonega ai bema dabu, ia ese taunimanima iboudiai e henidia dudu kaumu bona se gwaugwaumu Diravana na baine noia.” Dirava ena aonega baita abia dalana ta na, ena hahediba herevadia eiava matahakani baita abi dae. Bona una aonega ese baine gimada diba kara dikadia basita kara bona Dirava baita hetura henia namonamo. (Her. 2:10-12) Unu amo “Dirava ena lalokau ai [baita] noho. . . . Ia ese mauri hanaihanai” baine henida.​—Iuda 21.

2. Edena dala ai Dirava ena matahakani baita laloa bada?

² To, tauanida ena ura dikadia, eda mauri dalana, eiava ḡau ma haida daidiai matahakani iabi daena na auka eiava basita lalo badamu. To bema Dirava ena matahakani ena namo baita abiamu neganai, baita laloa badamu, bona baita dibamu Ia ese ita na e lalokau henidamu. Hereva Lada-isidia 3:11, 12 na eto: “Natugu e, Iehova ena mata-hakani basio dadaraia, . . . badina be Iehova ese e lalokau heniamu tauna na e sisiba heniamu.” Oibe, baita helalotao  Iehova ese iseda namo na e laloa badamu. (Heberu 12:5-11 ba duahi.) Dirava na ita e dibada namonamo dainai, iena matahakani na nega iboudiai maoromaoro bona baine duruda diba. Hari, matahakani daladia hani baita herevalai: (1) siboda baita hebiagu karana, (2) tama sina ese natudia e matahakani henidia karana, (3) Kristen kongrigeisen amo ta abimu matahakani, bona (4) matahakani ena hisihisi e hereaiamu ḡauna dika rohorohona.

3. Edena dala ai natu ta ese sibona baine hebiagu karana baine hahedinaraia? Haheitalai a gwauraia.

³ Siboda baita hebiagu anina na, eda kara bona lalohadai na baita biagu. Una kara na asita varalaia ḡauna dainai, namona na baita dibaia. Haheitalai bina: Natu ta na baskele itarina e diba matamamu neganai, nega momo tamana ese baskele e dogoatao namonamomu, basine moru totona. To natu e manada e laomu neganai, tamana ese baskele na taina ruana e kahua negemu. Gabeai natu e manadamu neganai tamana ese vada e kahua negemu. Una heḡereḡerena, tama sina na mai haheaukadia ida hanaihanai natudia na Iehova “ena hahediba herevadia bona ena sisiba herevadia” e ubulaidiamu neganai, idia ese natudia e durudiamu sibodia bae hebiagu karana bae hahedinaraia bona bae aonega totona.​—Efe. 6:4.

4, 5. (a) Dahaka dainai sibo hebiagu karana na “tau matamatana” ena kaha ta? (b) Dahaka dainai basita hesiku ena be ta kereremu?

⁴ Iehova e dibaiamu taunimanima badadia ese una hahekau tamona bae badinaia na namo. Reana sibodia e hebiagumu karana na e hahedinaraiamu, to lauma dalana ai idia na lo taudia ai do asiela. A Keriso ena kara eiava “tau matamatana” bae hahedokilaia neganai, lo taudia ai baela diba. (Efe. 4:23, 24) Lo taudia ai baitala totona, siboda baita hebiagu na mai anina bada. Badina unu amo, “Dirava idadaraina karadia bona tanobada ena lebulebu karadia baita rakatani, ina tanobada ai baita noho migomigo, baita kara maoromaoro, Dirava baita badinaia.”​—Tito 2:12.

⁵ To, ita iboudai na kara dika tauda. (Koh. 7:20) Una dainai, ta kereremu neganai, baitato ita na dia heḡereḡere eiava sibo hebiagu karana baita hahedinaraia na auka, a? Hereva Lada-isidia 24:16 na etomu: “Kara maoromaoro tauna na nega hitu e ketomu, ma e tore isimu.” Dahaka ese baine durua baine tore isi totona? Dia sibona ena goada amo, to Dirava ena lauma helaḡa ese baine durua. (Filipi 4:13 ba duahia.) Una lauma helaḡa ena huahua ta na boga auka, ia na sibo hebiagu karana ida heḡereḡere.

6. Edena dala ai Dirava ena Hereva baita stadilaia namonamo diba? (Rau 28 ai laulau ba itaia.)

⁶ Danu siboda baita hebiagu totona, namona na baita ḡuriḡuri, Baibul baita stadilaia, bona baita lalo dobu. To bema o davariamu Dirava ena Hereva istadilaina na auka be ede bamona? Reana neḡa bada so atomu ba stadi eiava ba duahiduahi totona. To, ba helalotao, Iehova ena heduru bo noiamu neganai be durumumu. Ia ese baine durumu iena Hereva “ba ura henia” dikadika totona. (1 Pet. 2:2) Ḡau ginigunana na, Iehova ba noia baine durumu sibomu ba hebiagu, unu amo iena Hereva ba stadilaia. Bena emu ḡuriḡuri heḡereḡerena ba kara, reana emu stadi negana na ba hakwadoḡia. Taina ruana, emu stadi karana na bo moalelaiamu! Momokani, gabu asi reḡereḡedia ai Iehova ena lalohadai bo haerodiamu neganai, bo moalemu.​—1 Tim. 4:15.

7. Edena dala ai sibo hebiagu karana ese baine duruda Dirava ihesiai henina ḡaukaradia baita haḡuḡuru?

⁷ Sibo hebiagu karana ese baine duruda Dirava ihesiai henina ḡaukaradia baita ato  guna bona baita haḡuḡuru. Haheitalai ta bina, tama ta na e mamiava ena hesiai ḡaukara urana na se goadava. Una dainai, palani e kara baine regula painia bona eda magasin ai una topik e herevalaia atikol e duahiva. Dia unu mo e kara toma, to e ḡuriḡurilaia danu, bona una ese ena hetura karana Dirava ida na e hagoadaia. Bona palani e kara heduru painia ḡaukara baine karaia. Dahaka e vara? Herevana dahaka hekwakwanai e davariva, to ia ese regula painia ḡaukara na e laloa bada bona e haḡuḡurua.

8-10. Dahaka ese Kristen tama sina baine durudia natudia bae hadibadia Iehova bae hesiai henia totona? Haheitalai a gwauraia.

⁸ Kristen tama sina na Dirava ese hahenamo namona ta e henidia​—natudia na Iehova “ena hahediba herevadia bona ena sisiba herevadia” bae ubulaidia. (Efe. 6:4) Hari ina tanobada ai, unu bae kara toma na mai hekwarahina. (2 Tim. 3:1-5) Momokani, natu e varamu neganai maoro bona kerere na asi dibadia. Idia na mai lalodia, to bae hadibaia namonamo na namo. (Roma 2:14, 15) Baibul e herevalaia bukana ta na eto, Grik gado ai “matahakani” e hahanaia anina na natu ta ba hadibaia namonamo unu amo ia na taunimanima namona ai bainela.

⁹ Bema tama sina na mai edia lalokau ida natudia bae hadibadia, natu na be mamiamu idia na e lalodia badamu. Idia na be dibamu ura kwalimu na mai hetoana bona edia abi hidi eiava be karamu ḡaudia ese namo eiava dika be havaraiamu. Una dainai, Kristen tama sina ese Iehova ena hahekau dalana bae badinaia na mai anina bada. Ba helalotao, tano ta ta ai natu ihadibadia daladia na idauidau. Tama sina ese Dirava bae kamonai henia neganai, natudia ihadibadia dalana na basie daradaralaiamu, bona tanobada ena aonega ai basie tabekau.

¹⁰ Noa ena sivarai amo una baita dibamu. Iehova ese e hamaoroa lagatoi baine karaia neganai, Noa na sibona ena aonega ai se tabekau. Ia na nega ta lagatoi ta do se karaia. Una dainai Iehova enai e tabekau, bona Iehova ese e hamaoroa heḡereḡerena “unu e kara toma.” (Gen. 6:22) Dahaka e vara? Lagatoi ese Noa bona ena ruma bese e hamauridia. Danu, Noa na tama ta dainai ena maduna na e huaia namonamo, badina Dirava ena aonega ai e tabekau. Ia ese natuna na e hadibadia namonamova bona haheitalai namona e hahedinaraia, una na mai hekwarahina Utu-utu do se vara negana ai.​—Gen. 6:5.

11. Dahaka dainai tama sina na bae ḡaukara goada natudia bae hadibadia?

¹¹ Tama sina e, edena dala ai Dirava matanai ḡau iboudiai ba kara namonamo? Iehova ba kamonai henia. Natumui ba hadibaia totona iena Hereva bona ena orea amo e henimu hahekau herevadia ba badinadia. Gabeai, una kara dainai natumui ese be tenkiu henimumu! Tadikaka ta na eto: “Na moalemu  badina tamagu bona sinagu ese e hadibagu namonamo. Idia na e ḡaukara goada hereva momokani baina dibaia namonamo totona. Edia heduru dainai lauma dalana ai na goada.” Nega haida ena be tama sina na e ḡaukara goadamu, to natu haida ese Iehova na e rakataniamu. To, natudia kudoudia ai hereva momokani e atoamu tama bona sina lalodia mamina na namo. Danu, e dibamu nega ta natudia na Iehova baine lou henia diba.

12, 13. (a) Bema natu ta na orea amo e atoa siri, edena dala ai Kristen tama sina ese Dirava bae badinaia? (b) Edena dala ai tama sina ta ese Iehova e badinaia dainai namo e davaria?

¹² Tama sina haida natudia na orea amo e atodia sirimu neganai, una ese Dirava bae badinaia karana na e tohoamu. Mani sina ta aita laloa, natuna kekenina na orea amo e atoa siri neganai ruma e rakatania. Sina na eto: “Eda pablikeisen ai dala na tahuva, natugu bona tubugu baina bamodia totona.” Ma eto: “To adavagu ese e durugu baina laloparara natumai na vada Iehova imana ai bona Dirava ese natumai e matahakani henia dalana na basia hadikaia.”

¹³ Laḡani haida muridiai, natudia na orea ai e abia vareai lou. Sinana na eto: “Hari ia na hanaihanai e rini henigumu eiava teks meseij e siaimu! Bona ia ese lau bona adavagu na e matauraimaimu badina mai dibana ai ese Dirava a badinaia. Natumai ida hetura karana namona a moalelaiamu.” Bema natumu na orea amo e atoa siri, oi be “Iehova bavabidadama henia mai lalomu idoinai” bona “sibomu emu lalo-parara basio abidadama henia,” a? (Her. 3:5, 6) Ba helalotao, Iehova ena matahakani ese ena aonega bona lalokau e hahedinaraiamu. Ia ese taunimanima iboudiai, natumu danu, daidiai Ia Natuna e heni. Dirava na se uramu ta baine mase. (2 Petro 3:9 ba duahia.) Una dainai Iehova ena matahakani bona hahekau dalana bavabidadama henia. Ena be nega haida na auka Iehova ena hereva ba badinadia totona. Oibe, Dirava ena matahakani dalana ba badinaia, basio dadaraia.

14. Edena dala ai Iehova ese “kohu ireḡuna tauna mai ena kamonai” amo e henimu hahediba herevadia ese bae duruda?

¹⁴ Iehova na e gwauhamata Kristen kongrigeisen baine naria, baine gimaia, bona baine hadibaia. Dala momo ai unu e kara tomamu. Heḡereḡere, ia ese Natuna e abia hidi kongrigeisen baine naria, bona Iesu ese “kohu ireḡuna tauna mai ena kamonai” e abia hidi nega korikori ai lauma aniani baine heni totona. (Luka 12:42) Dala idauidau ai, unu lauma aniani amo hahediba herevadia, eiava matahakani ta abimu. Sibomu ba henanadai, ‘Edena dala ai tok ta eiava eda magasin ena atikol ta ese e durugu egu lalohadai eiava kara na haidaua?’ Bema emu kara na o haidau, ba moale! Iehova ese emu namo dainai matahakani e henimu na bavabi dae.​—Her. 2:1-5.

15, 16. (a) Edena dala ai elda taudia edia heduru amo namo baita davari diba? (b) Edena dala ai elda baita durudia edia ḡaukara bae moalelaia?

¹⁵ Danu, Keriso ese kongrigeisen na “herahia” ḡaudia​—Dirava ena mamoe ireḡudia totona elda taudia​—e heni. (Efe. 4:8, 11-13) Edena dala ai unu elda taudia amo namo baita davari diba? Dala ta na, elda edia abidadama bona haheitalai namona baita tohotohoa. Dala ma ta na, e henidamu Baibul sisibadia baita badina. (Heberu 13:7, 17 ba duahi.) Ba helalotao, elda taudia ese ita na e lalokau henidamu bona e uramu lauma dalana ai baita goada. Heḡereḡere, bema e itaiamu hebou ta readiamu eiava eda hesiai ḡaukara urana na e maraḡi e laomu, haraḡa herea be durudamu. Be kamonai henidamu bona be uramu Baibul ena sisiba namodia amo bae hagoadada. O abia daemu edia  heduru amo Iehova ese ena lalokau e hahedinaraiamu, a?

¹⁶ Ba helalotao, nega haida elda ediai na auka sisiba bae henida totona. Mani ina haheitalai a laloa, King David ese ena kara dika e hunia neganai, reana peroveta tauna Natan enai na auka David baine hereva henia totona. (2 Sam. 12:1-14) Una heḡereḡerena, Petro​—aposetolo taudia 12 ta​—ese Iuda tadikakadia mo e hanamodiava neganai, aposetolo Paulo na mai ena boga auka ida Petro ena kerere e hamaoromaoroa. (Gal. 2:11-14) Una dainai, edena dala ai emu kongrigeisen elda taudia edia ḡaukara ba haharaḡaia diba? Namona na ba manau, ba hetura henidia, bona edia ḡaukara dainai ba tenkiu henidia. Bavabia dae edia heduru amo Dirava ese ena lalokau emu ai e hahedinaraia. Una ese be durumumu bona elda taudia danu edia ḡaukara be moalelaiamu.

17. Edena dala ai kongrigeisen elda taudia ese taihu ta e durua?

¹⁷ Taihu ta na guna enai e vara ḡaudia dainai, Iehova baine lalokau henia na auka. Ia na eto: “Egu ai guna e vara ḡaudia bona hekwakwanai ma haida dainai na lalomanoka neganai, na diba elda taudia baina hereva henidia na namo. Idia ese se gwau henigu, to e hagoadagu. Nega momo kongrigeisen heboudia muridiai, ena be e bisiva, to idia ta na lau e nanadaiguva bema lau na namo eiava. Egu ai guna e vara ḡaudia dainai, na mamiava lau na dia heḡereḡere Dirava ese baine lalokau henigu. To, hanaihanai Iehova ese kongrigeisen bona elda taudia amo e hamomokaniava ia ese lau na e lalokau heniguva. Na noiamu baine durugu basina rakatania totona.”

18, 19. Matahakani ena hisihisi e hereaia ḡauna be dahaka? Haheitalai a gwauraia.

¹⁸ Ena be matahakani iabina na mai hisihisina, to matahakani idadaraina karana ena dika ihuana na ḡau dika rohorohona. (Heb. 12:11) Kain bona King Sedekia edia sivarai aita laloa. Kain ese Abel e badu henia neganai, Dirava ese Kain e sisiba henia, eto: “Badina be dahaka o badumu? Dahaka dainai vairamu o huaiamu? Boma kara namo, basinama abimu dae a? Basioma kara namo, kara havara be iduara badinai e narimumu; e ura henimumu, to oi ese ba hadarerea.” (Gen. 4:6, 7) Kain na se kamonai. Ia ese tadina e alaia. Una dainai ena mauri ibounai lalonai hisihisi e davari! (Gen. 4:11, 12) Kain ese Iehova ena sisiba bema kamonai neganai, hisihisi na basinema davari.

¹⁹ Sedekia na lohia tauna manokana bona dikana, bona ia e lohiava lalonai Ierusalem ai na dika bada herea e varava. Peroveta tauna Ieremia ese Sedekia na e hadibaia loulouva ena dala dikadia baine rakatani, to king na se kamonaiva. Una dainai, dika bada e davari. (Ier. 52:8-11) Iehova na se uramu baita hisihisi!​—Isaia 48:17, 18 ba duahi.

20. Dirava ena matahakani e abi daemu taudia bona e dadaraimu taudia ediai be dahaka be varamu?

²⁰ Hari ina negai, momo ese matahakani bona sibo hebiagu karana na e dadaraimu. To unu e kara tomamu taudia na gabeai dika bae davari. (Her. 1:24-31) Una dainai “hahediba herevadia [baita] hakala henidia, bena [baita] aonega.” Hereva Lada-isidia 4:13 na e gwaumu: “Hahediba ba dogoa tao, basio kahua nege; ba gimaia, badina be ia na emu mauri.”