1. Baibul ese matahakani be ede e herevalaia toma?

INA hereva “matahakani” o kamonaimu neganai, dahaka o lalomu? Reana bo lalomu ia na ta ihahisina karana, to ia anina na dia una mo. Baibul na e gwaumu, matahakani ese ita na baine duruda, bona nega haida ia na diba, aonega, lalokau, bona mauri ida e gwauraidia hebou. (Her. 1:2-7; 4:11-13) Dirava ese ita na e lalokau henidamu dainai matahakani e henidamu bona e uramu mauri hanaihanai baita abia. (Heb. 12:6) Iena matahakani na dia badu ai eiava daḡedaḡe dalanai e henimu. Momokani, “matahakani” anina korikorina na ta ba hadibaia namonamo, tama eiava sina ta ese natuna lalokauna e hadibaiamu heḡereḡerena.

2, 3. Matahakani anina be dahaka ba kara danu? (Rau 23 ai laulau ba itaia.)

² Mani ina haheitalai aita laloa: Mero maraḡina ta ladana Johnny na ruma lalonai bolo ta e gadaralaiamu. Sinana na eto: “Johnny, oi na mai dibamu ruma lalonai bolo na basio gadaralaia! Ḡau ta bo hamakohiamu garina.” To ia ese sinana ena hereva na se kamonai, bona dounu bolo e gadaralaiava lalonai teibolo ai uro ta e hamakohia. Edena dala ai sinana ese baine matahakani henia? Ena matahakani lalonai natuna baine  hadibaia bona kara ma haida danu baine kara. Ia ese Johnny baine hadibaia dahaka dainai kerere e karaia. Ia na e uramu Johnny na baine diba tamana sinana baine kamonai henidia na aonega karana, bona taravatu e atomu na mai badidia bona mai edia namo. Bena Johnny iduruna totona, kara ma haida danu baine kara. Heḡereḡere, Johnny ena amo bolo baine abia. Unu amo Johnny na baine diba gwau-edeede karana na mai ena dika.

³ Ita na Kristen tauda dainai, ita na Dirava ena orea lalonai ta nohomu. (1 Tim. 3:15) Una dainai, Iehova na mai ena maoro taravatu baine ato bona basita badina neganai mai lalokauna ida matahakani baine heni. Danu, bema eda kara dainai kerere baita karamu, Dirava ena matahakani ese be hadibadamu Ia baita kamonai henia na mai anina bada. (Gal. 6:7) Dirava ese ita na e laloda badamu bona se uramu baita hisihisi.​—1 Pet. 5:6, 7.

4. (a) Iehova ese edena hahediba dalana e laloa badamu? (b) Ina atikol ai dahaka baita herevalaimu?

⁴ Baibul ena matahakani baita henimu neganai, ita ese natuda eiava Baibul stiuden ta baita duruamu Keriso ena hahediba ai bainela totona. Dirava ena Hereva, eda hahediba tulu badana, ese baine duruda “kara maoromaoro ai” matahakani baita heni. Una ese natuda eiava eda Baibul stiuden baine durua Iesu ena ‘haheḡani iboudiai’ baine lalopararalai bona baine badina. (2 Tim. 3:16; Mat. 28:19, 20) Iehova na e uramu hahediba unu hetomana amo stiuden bae hadibadia, bena idia ese ma haida na Keriso ena hahediba ai bae halaodia. (Tito 2:11-14 ba duahi.) Hari, mai anina bada henanadaidia toi edia haere baita herevalaimu: (1) Edena dala ai Dirava ena matahakani ese ena lalokau e hahedinaraiamu? (2) Idaunega ai Dirava ese e matahakani henidia taudia edia amo dahaka ta dibamu? (3) Matahakani ta henimu neganai, edena dala ai Iehova bona natuna baita tohotohodia diba?

5. Ededia dala haida ai Iehova ena matahakani ese ena lalokau ita edai e hahedinaraiamu?

⁵ Iehova na mai ena lalokau dainai, eda kerere e hamaoromaoromu, e sisiba henidamu, bona e hadibadamu, unu amo iena lalokau ai baita noho bona mauri dalana ai baita raka. (1 Ioa. 4:16) Ia ese ita na se gwauraida dikamu, badina se uramu baita mamia ita na asi anida. (Her. 12:18) To, Iehova ese eda kara namodia na e lalo badamu, bona eda ura kwalimu na e matauraiamu. Dirava ese ena Hereva, pablikeisen idauidau, Kristen tama sina, eiava kongrigeisen elda amo e henimu matahakanina be unu o laloa tomamu, a? Momokani, “kerere” ta karamu bona elda taudia ese mai edia manau bona lalokau ida e sisiba henidamu neganai, una ese Iehova ena lalokau ita edai e hahedinaraiamu.​—Gal. 6:1.

6. Ta na matahakani dainai ena hahenamo e haboiomu neganai, edena dala ai una na Dirava ena lalokau karana?

⁶ To, nega haida matahakani na dia sisiba mo baita heni. Bema ta na kara dika badadia haida baine kara, kongrigeisen ai ena hahenamo baine haboio diba. Una baine vara neganai, una matahakani ese Dirava ena lalokau e hahedinaraiamu. Heḡereḡere, ena hahenamo baine haboio karana ese baine durua, baine laloparara Baibul istadilaina karana, lalo dobu, bona ḡuriḡuri karana baine lalodia bada na mai anidia bada. Unu amo lauma dalanai baine goada diba. (Sal. 19:7) Gabeai, ena hahenamo baine abi lou diba. Orea amo ta e atoa sirimu karana ese danu Iehova ena lalokau e hahedinaraiamu,  badina una ese kongrigeisen na dika amo e gimaiamu. (1 Kor. 5:6, 7, 11) Bona Dirava ena matahakani na maoromaoro dainai, murimuri ai e atoamu tauna na ena kerere baine lalopararalaia bona baine helalo-kerehai diba.​—Kara 3:19.

7. Sebna be daika, bona dahaka kara kererena e karaia?

⁷ Matahakani ena namo baita lalopararalaia totona, Iehova ese e matahakani henidia taudia rua baita herevalaidia: Ta na Sebna, King Hesekia ena negai e nohova tauna, bona ma ta na Graham, iseda negai e nohomu tadikakana ta. Sebna na Hesekia ena “ruma ireḡuna tauna” dainai, ena dagi na bada. (Isa. 22:15) To, ia na e hekokoroku, bona e ura taunimanima ese bae imodaia. Danu ia ese dava bada gara gabuna ta e karaia iena, bona “kariota ḡoeva-daedia” ai e guiva!​—Isa. 22:16-18.

8. Edena dala ai Iehova ese Sebna e matahakani henia, bona dahaka e vara?

⁸ Sebna na sibona e heimodai dainai, Dirava ese ena dagi amo e kokia bona Eliakim ese gabuna e abia. (Isa. 22:19-21) Una na Asuria edia King Senakerib e ura Ierusalem baine tuari henia neganai e vara. Gabeai, una king ese dagi bada taudia haida bona tuari orea badana ta e siaidia Ierusalem, Iuda taudia bona Hesekia bae hagaridia. (2 Han. 18:17-25) Hesekia ese Eliakim e siaia unu dagi bada taudia baine hereva henidia, to ia na sibona sela. Tatau rarua ese e bamoa, idia ta na Sebna, ia na seketere ḡaukara e karava. Una ese e hahedinaraiamu Sebna na se badu eiava se lalohisihisi to mai manauna ida maduna maraḡidia e abi dae. Una sivarai amo dahaka ta dibamu? Mani ḡau toi aita lalodia.

9-11. (a) Sebna ena sivarai amo dahaka mai anidia bada ḡaudia ta dibamu? (b) Iehova ese Sebna e kara henia dalana ese oi be edena dala ai e hagoadamumu?

⁹ Ḡau ginigunana na, Sebna ese ena dagi e haboioa. Ena sivarai ese e hadibadamu “heaḡi ese hahebuatari dalana e lailaiamu; hekokoroku ese moru dalana e lailaiamu.” (Her. 16:18) Bema kongrigeisen ai maduna haida o huamu, reana maduna badadia haida, manau karana bo hahedinaraiamu, a? Hahenamo o abimu eiava ḡaukara haida o haḡuḡurumu neganai Iehova o hanamoamu, a? (1 Kor. 4:7) Aposetolo Paulo na eto: “Umui ta ta na haduamuimu, basio hekokoroku, a lalomui bae manau, Dirava ese heabidadama ahuna ta ta e henimui hagau-hagau heḡereḡerena.”​—Roma 12:3.

¹⁰ Ḡau iharuana na, Iehova ese Sebna e  matahakani henia neganai, e diba Sebna ese ena kara na baine haidaua diba. (Her. 3:11, 12) Una ese hari ina negai Dirava ena kongrigeisen ai edia maduna e haboiomu taudia e durudiamu! Namona na basie badu eiava basie lalohisihisi, to bae ḡaukara goada Dirava bae hesiai henia, bona bae helalotao una matahakani na Iehova ena lalokau karana. Ba helalotao, Tamada ese be duruda dibamu bema baita manaumu. (1 Petro 5:6, 7 ba duahi.) Dirava ese mai lalokauna ida e henimu matahakanina ese eda kara baine haidaua diba, una dainai ena heduru baita abi dae na namo.

¹¹ Ḡau ihatoina na, Iehova ese Sebna e kara henia dalana amo tama sina bona elda taudia na mai anina bada ḡauna ta e dibaiamu. Una be dahaka? Ena be Iehova ena matahakani ese e hahedinaraiamu kara dika na e inai heniamu, to danu e hahedinaraiamu kara dika e karaia tauna na e laloa badamu. Bema oi na tama o sina ta eiava elda ta dainai matahakani ba heni na namo, Iehova heḡereḡerena, natumu eiava tadikaka o taihu ena kara dika ba inai henia to ena namo ba lalo, a?​—Iuda 22, 23.

12-14. (a) Haida ese Dirava ena matahakani be ede e laloa tomamu? (b) Edena dala ai Dirava ena Hereva ese tadikaka ta e durua ena kara e haidaua, bona dahaka e vara?

¹² To, haida na matahakani e abimu neganai, e lalohisihisimu dainai Dirava bona ena taunimanima edia amo e daudaumu. (Heb. 3:12, 13) To una anina be ta ese basine durudia diba, a? Mani Graham aita laloa, ia na orea amo e atoa siri, to gabeai e abia vareai lou, bona lauma dalanai e manoka. Laḡani haida muridiai, ia ese elda ta e noia baine stadi henia.

¹³ Elda na eto: “Graham ena manoka ḡauna na hekokoroku karana. Ia ese elda taudia haida e badu henidiava badina orea amo e atoa siri. Una dainai ena stadi gabedia ai, ai ese hekokoroku karana bona ena dika e herevalai siridia haida a herevalaiva. Graham ese Dirava ena Hereva amo ena kara e lalopararalai neganai, se moale! Ia ese ḡau haida e haidau! Ia na e laloparara hekokoroku karana na ‘au tahana’ ta na heto ia e kouava bona badu karana na ena manoka ḡauna neganai, haraḡa herea ena kara e haidaua. Kristen heboudia e lao hanaihanaiva, Dirava ena Hereva e stadilaia goadagoadava, bona dina ta ta ai ḡuriḡuri karana na e manadalaia. Danu, ia ese lauma dalanai ena ruma bese baine naria madunana e abia dae, una dainai adavana bona natuna na e moale bada.”​—Luka 6:41, 42; Iak. 1:23-25.

¹⁴ Una elda na ma eto: “Dina ta, Graham ese e hamaorogu herevana ese kudougu e hamarerea. Ia na eto, ‘Lau na laḡani momo hereva momokani ai na noho, bona na painiava danu. To hari baina gwau diba Iehova na na lalokau heniamu.’ Se daudau, ia na Kingdom Hall ai maikrofon iloalaina maduna na e abia​—una maduna na e laloa badava. Iena haheitalai amo na diba, ta na baine manau bona Dirava ena matahakani baine abi dae neganai, hahenamo momo baine abi diba!”

15. Bema ta uramu eda matahakani ese ma haida baine durudia, dahaka baita kara na namo?

¹⁵ Hahediba taudia namodia ai baitala totona, namona na stiuden namodia ai baitala guna. (1 Tim. 4:15, 16) Una heḡereḡerena, bema oi na Dirava ese maduna e henimu ma haida ba matahakani henidia, mai emu ura ida Iehova ena hahekau dalana ba badinaia na namo. Una dala amo ma haida bo hadibadiamu bona bo sisiba henidiamu neganai, be matauraimumu bona emu sisiba be abi daemu. Mani Iesu ena haheitalai aita laloa.

16. Iesu ena haheitalai amo matahakani bona hahediba dalana maorona ai dahaka ta dibamu?

 ¹⁶ Iesu na nega iboudiai Tamana e kamonai heniava, ena be nega haida una na auka. (Mat. 26:39) Bona ena hahediba herevadia bona aonega dainai Tamana e hanamoava. (Ioa. 5:19, 30) Iesu na ena manau bona kamonai karana ese e durua hebogahisi bona hahediba tauna namona ai ela, bona kudou namo taudia ese e ura heniava. (Luka 4:22 ba duahia.) Ena hereva namodia ese lalomanoka taudia na e hagoadadia. (Mat. 12:20) Ena haheauka karana e tohoava negadia ai danu, Iesu na kara namo bona lalokau e hahedinaraiva. Ena aposetolo taudia edia hepapahuahu heheni karana e hamaoromaoroa neganai, unu kara e hahedinarai.​—Mar. 9:33-37; Luka 22:24-27.

17. Ededia kara namodia ese elda taudia bae durudia Dirava ena mamoe bae reḡudia namonamo?

¹⁷ Baibul amo matahakani bae heni elda taudia ese Keriso ena haheitalai bae tohotohoa na aonega karana. Momokani, unu be kara tomamu neganai, be hahedinaraiamu idia na e uramu Dirava bona Natuna ese bae hakaudia. Aposetolo Paulo na eto: “Dirava ena mamoe serina ba reḡudia. Ba itadia tao, Dirava ena ura heḡereḡerena; dia gwaugwau amo, a lalodia iha-uradia amo; dia kohu idavarina totona, a lalomui e uramu dainai; dia lohia taumui ai baola totona, a mamoe serina bae haḡoimui totona.” (1 Pet. 5:2-4) Mai moaledia ida Dirava bona Keriso, kongrigeisen kwarana, e badinadiamu elda taudia na sibodia bona e naridiamu taudia danu namo bae davari.​—Isa. 32:1, 2, 17, 18.

18. (a) Iehova na e uramu tama sina be dahaka bae kara? (b) Edena dala ai Dirava ese tama sina e durudiamu edia maduna bae haḡuḡuru?

¹⁸ Ruma bese lalonai danu matahakani ihenina karana ena hahekau herevadia bae badina. Baibul ese ruma bese kwaradia e hamaorodia: “Natumui basio habadudia, a Lohiabada ena hahediba herevadia bona ena sisiba herevadia ba ubulaidia.” (Efe. 6:4) Dahaka dainai una na mai anina bada? Hereva Lada-isidia 19:18 na etomu: “Natumu matana ba hakania, helaro na doini e miamu negana ai; lalomu basio hadaia ia baine dika.” Oibe, bema Kristen tama sina ese natudia basie matahakani henidia, idia na Iehova vairanai edia kara bae gwaurai hedinarai. (1 Sam. 3:12-14) To, Iehova ese tama sina na aonega bona goada baine henidia diba, bema bae ḡuriḡuri henia, bona iena Hereva bona lauma helaḡa ena hahekau dalana bae badinaia.​—Iakobo 1:5 ba duahia.

19, 20. (a) Dirava ena matahakani iabi daena karana ese dahaka hahenamo e havaramu? (b) Stadi gabena ai dahaka baita herevalaimu?

¹⁹ Bema Dirava ena matahakani baita abi daemu bona ma haida ta matahakani henidiamu neganai Iehova bona Iesu baita tohotohodiamu, hahenamo momo baita abimu. Danu, ruma bese bona kongrigeisen na maino ai be nohomu. Bona ta ta na be mamiamu idia na ta lalokau henidiamu, ta lalodia badamu, bona be noho namonamomu​—unu na vaira negai bae vara hahenamodia haida. (Sal. 72:7) Momokani, Iehova ena matahakani ese e hadibadamu iena henari henunai maino bona lalotamona ai baita noho hanaihanaimu. (Isaia 11:9 ba duahia.) Una baita laloa neganai, baita abia daemu matahakani na Dirava ena lalokau karana.

²⁰ Stadi gabena ai, ita ese ruma bese lalonai bona kongrigeisen ai matahakani daladia ma haida baita dibamu. Danu siboda eda kara baita biagu dalana bona matahakani ena hisihisi e hereaiamu ḡauna baita herevalaimu.