1. Kristen tama sina na e uramu bae diba natudia do se bapatiso ai dahaka bae kara na namo?

“HUA momo lalodiai Tamagu bona Sinagu na hamaorodiava lau na na urava baina bapatiso, bona nega momo idia ida una a herevalaiava. Idia na e urava baina diba na karaia abi hidina na mai anina bada. Lau na December 31, 1934 ai, na bapatiso.” Una na Blossom Brandt e urava baine bapatiso neganai e vara ḡauna. Hari ina negai, Kristen tama sina danu e uramu natudia bae durudia abi hidi maorodia bae kara. Bema bapatiso iabina karana ai do bae nari eiava bae halahe, edia hetura karana Dirava ida bae hadikaia diba. (Iak. 4:17) To, tama sina na natudia do se bapatiso ai, e uramu bae diba natudia na heḡereḡere Kristen tauna ena maduna bae huaia totona.

2. (a) Seket taudia haida be dahaka e gwaumu? (b) Ina atikol ai dahaka baita herevalaimu?

² Seket taudia haida na e gwaumu, laḡanidia 13 ela 19 memerodia bona kekenidia momo na Kristen ruma besedia ai e tubu, to do asie bapatiso. Nega momo, ini memero kekeni na  kongrigeisen heboudia e laomu bona haroro ḡaukara e karamu. Bona e gwaumu idia na Iehova ena Witnes taudia. To, badi haida dainai asie uramu edia mauri Iehova enai bae gwauhamatalaia bona bae bapatiso. Dahaka dainai? Nega haida, tama sina ese e hagoadadiamu do basie bapatiso. Ina atikol ai, badi foa baita herevalaimu, unu badi daidiai Kristen tama sina haida ese natudia na asie hagoadadiamu bae bapatiso.

3. Blossom tamana sinana be dahaka e lalohekwarahilaiava?

³ Blossom tamana sinana, paragraf matamanai e herevalaia taudia, na e lalohekwarahiva, badina e urava bae diba natudia ese bapatiso anina e lalopararalaia eiava lasi. Edena dala ai tama sina na bae diba natudia na heḡereḡere ena mauri baine gwauhamatalaia totona?

4. Tama sina ese natudia e hadibadiamu neganai, edena dala ai Iesu ena haheḡani Mataio 28:19, 20 ai ese baine durudia?

⁴ Mataio 28:19, 20 ba duahi. Vanega stadi ai ta herevalaia heḡereḡerena, Baibul ese ta laḡanina hida ai baine bapatiso na se gwauraia. To, tama sina ese ta na hahediba tauna ai bae halaoa anina bae laloa neganai, una ese baine durudia diba. Mataio 28:19 ai, ina hereva “hahediba ai ba halaodia” na Grik gado ai e hahanaia neganai, anina na o uramu ta ba durua hahediba tauna ai bainela. Hahediba tauna na Iesu ena hahediba herevadia e dibamu bona e lalopararalaimu, bona e uramu baine badina. Una dainai Kristen tama sina ese natudia na beibidia ai bae hadibadia, unu amo bae bada neganai edia mauri bae gwauhamatalaia bona Keriso ena hahediba ai baela. Momokani, beibi na dia heḡereḡere bapatiso bae abi. To, Baibul ese e hahedinaraiamu natu maraḡidia ese Baibul ena hereva momokani na bae lalopararalaia diba bona bae ura henia.

5, 6. (a) Baibul ese Timoteo e herevalaia neganai, ena bapatiso karana amo dahaka ta dibamu? (b) Edena dala ai aonega tama sina ese natudia bae durudia diba?

⁵ Timoteo na maraḡina ai hereva momokani e abia dae bona hahediba tauna ta ai ela. Aposetolo Paulo na eto Timoteo na maraḡina negana amo Baibul ena hereva momokanidia e diba. Ena be Timoteo tamana na dia Iehova ena hesiai tauna ta, to sinana bona tubuna hahine, Iuda hahinedia, ese e duruava Baibul ena hereva baine ura henia totona. Una dainai iena abidadama na e goada. (2 Tim. 1:5; 3:14, 15) Timoteo na laḡanina 20 heḡereḡerena ai Keriso ena hahediba ta ai ela, bona kongrigeisen ai maduna badadia e hua.​—Kara 16:1-3.

⁶ Vaia, natu na idauidau; lauma dalana ai edia goada na idauidau. Haida na maraḡidia ai hereva momokani e lalopararalaiamu, abi hidi maorodia e karamu, bona e uramu bapatiso bae abi. Ma haida na dia heḡereḡere bapatiso bae abi dainai e narimu ela bona laḡanidia e badamu. Una dainai, aonega tama sina ese natudia na asie doridiamu bapatiso bae abi. To, natu ta ta edia laloparara heḡereḡerena ai e durudiamu lauma dalana ai bae goada totona. Natu ta ese Hereva Lada-isidia 27:11 ena hereva e badinaiamu neganai, tama sina na e moalemu. (Ba duahia.) To, namona na bae helalotao, natudia e durudiamu badina na e uramu Kristen hahediba taudia ai baela. Una bae laloa neganai, sibodia bae henanadai, ‘Natugu ena diba be heḡereḡere Dirava enai ena mauri baine gwauhamatalaia bona bapatiso baine abi, a?’

7. E uramu baine bapatiso tauna be Baibul ibounai baine dibaia guna, a? Ba herevalaia.

⁷ Tama sina ese natudia e hadibadiamu neganai, e uramu bae durudia hereva momokani bae lalopararalaia namonamo, unu amo edia mauri bae gwauhamatalaia. To, basitato natu ese Baibul ibounai baine dibaia namonamo, gabeai ena mauri Dirava enai baine gwauhamatalaia bona baine bapatiso. Bapatiso murinai, hahediba taudia iboudiai ese diba maoromaorona dounu bae abia na namo. (Kolose 1:9, 10 ba duahi.) Una dainai edia diba ena bada be ede bamona?

8, 9. Paulo bona dibura rumana igimana tauna edia sivarai amo dahaka ta dibamu?

⁸ Kristen ginigunadia edia nega ai ruma bese ta enai e vara ḡauna ese tama sina baine durudia. (Kara 16:25-33) Laḡani 50 C.E. lalonai, Paulo na ena misinari laolaona iharuana ai Filipi hanuana e vadivadia. Unuseni ai, ia bona bamona Sila na e habadelaidia koikoi bona dibura ruma ai e atodia. Hanuaboi ai, tano laga ese dibura rumana e hamarerea bona iduara iboudiai e hekeho. Dibura rumana igimana tauna na e laloava dibura taudia na vada e heau, una dainai sibona baine hemata eto neganai, Paulo ese e durua. Paulo bona Sila ese dibura rumana igimana tauna bona ena ruma bese e haroro henidia. Idia ese Iesu sivaraina e diba neganai dahaka e kara? Bapatiso e abi. Una sivarai amo dahaka ta dibamu?

⁹ Reana dibura rumana igimana tauna na ami ḡaukara amo e ritaea. Ia na Dirava ena Hereva na asi dibana namonamo. Una dainai Kristen tauna ai bainela totona, Baibul ena hereva momokani badadia baine diba na namo, Dirava ena hesiai tauna ai bainela anina baine lalopararalaia, bona lalona baine hadaia Iesu ena hahediba herevadia baine badina. Una nega kwadoḡina ai, Baibul ena hereva momokanidia e diba bona e moalelai dainai e bapatiso. Momokani, e bapatiso murinai dounu ena diba na e habadaiava. Bema natumu ese baine hamaoromu ia na Baibul ena hahediba hereva badadia, gwauhamata bona bapatiso anidia danu, e lalopararalaimu bona e uramu baine bapatiso, dahaka ba kara diba? Umui Kristen tama sina ese natumui ba hadibaia, kongrigeisen elda baine hereva henidia, bena idia ese bae haeroa ia be heḡereḡere baine bapatiso eiava lasi. * Bapatiso hahediba taudia ma haida heḡereḡeredia, ia na ena mauri lalonai Iehova idibana karana baine habadaia hanaihanai.​—Roma 11:33, 34.

10, 11. (a) Tama sina haida edia lalohadai be dahaka? (b) Tama sina ese bae laloa guna ḡauna be dahaka?

¹⁰ Tama sina haida na e laloamu natudia do asie bapatiso neganai, edukeisen namona eiava moni ḡaukara ta bae abia guna na namo. Reana be lalomu unu na lalohadai namodia, to una ese natu be durudiamu moale korikorina bae abia totona, a? Una be Baibul ena lalohadai heḡereḡerena, a? Iehova ena Hereva ese e hagoadadamu dahaka baita kara na namo?​—Kohelete 12:1 ba duahia.

¹¹ Mai anina bada ḡauna na baita helalotao, ina tanobada bona lalona ḡaudia ese Iehova ena ura bona lalohadai na  asie hahedinaraimu. (Iak. 4:7, 8; 1 Ioa. 2:15-17; 5:19) Natu ta ese ena hetura karana Iehova ida baine hagoadaia karana ese baine gimaia, Satana, ena tanobada, bona ena lalohadai dikadia ese basie hakaua kerere totona. Bema tama sina ese edukeisen bona moni ḡaukara be lalo badamu, natudia na be laloamu unu ḡau na mai anidia bada bona lauma ḡaudia na basie lalo badamu. Kristen tama sina lalokaudia be e uramu natudia ese ina tanobada ena lalohadai bae badinaia, a? Moale korikori baita abia dalana tamona na eda mauri lalonai Iehova ena ura baita atoa guna.​—Salamo 1:2, 3 ba duahi.

12. Dahaka dainai tama sina haida na e uramu natudia na do basie bapatiso?

¹² Kristen sina ta na se urava natuna baine bapatiso badina na ini e herevalaia toma, “Orea amo ta e atoa sirimu karana na mai hemaraina.” Una taihu heḡereḡerena, tama sina haida na e laloamu natudia na do basie bapatiso ela bona kavakava karadia bae dadaraidia guna. (Gen. 8:21; Her. 22:15) Reana be lalomu, ‘Natugu na do se bapatiso dainai, orea amo na basie atoa siri dibamu.’ Dahaka dainai una na lalohadai kererena?​—Iak. 1:22.

13. Bema ta na basine bapatiso, Iehova vairanai ena kara basine gwaurai hedinaraimu, a? Ba herevalaia.

¹³ Momokani, Kristen tama sina na e uramu natudia na lauma dalana ai bae goada guna, bena edia mauri Dirava enai bae gwauhamatalaia bona bae bapatiso. To, basie laloa bema natu ta na basine bapatiso, ia na Iehova vairanai ena kara basine gwauraia hedinarai diba. Dahaka dainai? Ta na dia bapatiso karana amo Iehova vairanai ena kara baine gwaurai hedinarai. To, natu na Iehova vairanai kara maorodia bona kara kereredia baine diba neganai, Dirava vairanai ena kara baine gwaurai hedinarai. (Iakobo 4:17 ba duahia.) Una dainai, tama sina namodia na e ḡaukara goadamu haheitalai namona bae hahedinaraia, idia ese natudia na e hagoadaiamu bapatiso baine abi totona. Idia na e uramu natudia na maraḡina ai bae durua Iehova ena kara maoromaoro taravatudia baine ura henidia. (Luka 6:40) Una ura ese ia na be gimaiamu, badina natumui na mai ena ura ida Iehova ena kara maoromaoro dalana be badinaiamu.​—Isa. 35:8.

14. Edena dala ai elda taudia ese natu bae durudia diba?

¹⁴ Kongrigeisen elda na mamoe ireḡudia taudia dainai, natu ediai lauma ḡaudia iatodia guna karadia bae herevalai diba. Laḡani 70 mai kahana painia ḡaukara e karaia taihuna ta na, laḡanina 6 neganai Tadikaka Charles T. Russell ese e hereva henia negana e laloa. Eto: “Ia na miniti 15 lalonai lau ida lauma ḡaudia baina ato guna karana a herevalaiava.” Oibe, hereva maorodia bona hahegoada herevadia ese ta na baine durua diba. (Her. 25:11) Danu, elda taudia ese tama sina bona natudia bae boiridia diba, Kingdom Hall ḡaukaradia bae kara, bona natu na laḡanidia bona edia diba heḡereḡerena bae kara diba ḡaukaradia bae henidia.

15. Ededia dala haida ai kongrigeisen taudia ese matamata taudia bae hagoadadia diba?

¹⁵ Kongrigeisen taudia ese matamata taudia bae durudia dalana ta na, edia namo bae lalo. Una anina na edia goada lauma dalana ai ba itaia. Pura ta  ta hebouna ai natu be haere namona ta e henimu, eiava hebou ai kaha ta e karaiamu, a? Sikuli ai ia be hahetoho ta e haheaukalaia eiava ta e haroro henia, a? Namona na mai momokanimu ida ba hanamoa. Nega bavato​—hebou vairanai eiava murinai​—natu ta ida ba herevahereva totona. Unu amo, natu na be lalopararamu kongrigeisen ai idia na ta lalodia badamu.​—Sal. 35:18.

16, 17. (a) Dahaka dainai ta baine bapatiso na mai anina bada? (b) Dahaka dainai Kristen tama sina na e moalemu? (Rau 12 ai laulau ba itaia.)

¹⁶ Kristen tama sina ese natudia na Iehova “ena hahediba herevadia bona ena sisiba herevadia” amo e hadibadiamu karana na hahenamo badana ta. (Efe. 6:4; Sal. 127:3) Kristen tama sina natudia na Iehova ena gwauhamata besena ai asie vara, dia idaunegai Israel taudia natudia heḡereḡeredia. Danu, Dirava ilalokau henina karana na se varalaia. Namona na tama sina ese natudia na e vara negana amo bae durua hahediba tauna ta ai bainela, ena mauri baine gwauhamatalaia, bena baine bapatiso unu amo Iehova ena hesiai tauna ai bainela. Dahaka be mai anina bada? Ta na ena mauri e gwauhamatalaiamu, e bapatisomu, bona mai ena abidadama ida Dirava baine hesiai henia neganai, hisihisi badana lalonai baine roho mauri diba.​—Mat. 24:13.

¹⁷ Blossom Brandt na e ura baine bapatiso neganai, tamana sinana na e urava bae diba ia na heḡereḡere ena mauri lalonai una mai anina bada abi hidina baine karaia. E diba ia na heḡereḡere neganai, idia ese iena abi hidi karana na e durua. Blossom do se bapatiso hanuaboina ai, tamana ese kara namona ta e karaia. Blossom na eto: “Iboumai e hamaoromai baia tui diho, bena ia na e ḡuriḡuri. Iehova e hamaoroa ia na e moale dikadikamu badina natuna ese ena mauri Ienai e gwauhamatalaia.” Laḡani 60 mai kahana murinai, Blossom na eto: “Una hanuaboi na basina laloaboio diba!” Umui tama sina na ba moale badina natumui na edia mauri e gwauhamatalaiamu, bona Iehova ena hesiai taudia ai e laomu.