1. Adam bona Heva e haboio ḡaudia be dahaka, bona dahaka e vara?

O LALOAMU daika ese namo bona dika baine gwauraidia hidi be maoro? Adam bona Heva ese namo bona dika idibalaidia auna huahuana e ania neganai, e hahedinaraia Iehova se abidadama henia bona ena taravatu se badina. Idia sibodia ese namo bona dika e abi hidi. (Gen. 3:22) To e haboio ḡaudia mani a lalo. Edia hetura karana Iehova ida na e dika. Danu bae mauri hanaihanai hahenamona e haboioa, bona kara dika bona mase na natudia e henidia hanai. (Rom. 5:12) Edia abi hidi ese dika bada e havaraia.

2-3. (a) Filipo ese e haroro henia Etiopia Eunuko tauna be dahaka e kara? (b) Bema baita bapatisomu dahaka hahenamo baita abimu, bona ededia henanadai baita herevalaimu?

² Adam bona Heva edia kara bona Filipo ese e haroro henia Etiopia eunuko tauna ena kara mani aita haheḡereḡerea. Eunuko tauna na Iehova bona Iesu ese ia dainai e kara ḡaudia e moalelai dainai, maoromaoro e bapatiso. (Apos. 8:34-38) Una eunuko tauna heḡereḡerena, eda mauri Dirava enai ta gwauhamatalaiamu bona ta bapatisomu neganai, ta hahedinaraiamu Iehova bona Iesu ese ita daidai e kara ḡaudia na ta lalodia badamu. Danu, ta hahedinaraiamu Iehova na ta abidadama heniamu, bona ta dibamu Ia sibona ese dahaka be namo bona dahaka be dika baine gwauraidia hidi na maoro.

³ Iehova ihesiai henina ai ta abimu hahenamodia mani a lalo. Una hahenamo ta na, Iehova ese Adam bona Heva e haboio ḡaudia iboudiai, mauri hanaihanai danu, be henidamu. Iesu Keriso ta abidadama heniamu dainai, Iehova ese eda dika e gwautaomu bona lalo ḡoevana e henidamu. (Mat. 20:28; Apos. 10:43) Danu ita na Iehova ena hesiai taudia ai tala bona vaira negai hahenamo namodia momo baita moalelaimu. (Ioa. 10:14-16; Rom. 8:20, 21) Iehova e  dibaia taudia haida, ena be dibadia unu hahenamo na bae vara, to asie uramu Etiopia Eunuko tauna ena haheitalai bae tohotohoa. Dahaka ese e koudiamu basie bapatiso? Bona dahaka bae kara diba unu bae hanaidia totona?

4-5. Avery bona Hannah e koudiava ḡaudia be dahaka?

⁴ E daradaramu. Mero ta ladana Avery, tamana bona sinana na Iehova ena Witnes taudia. Ia tamana ena kara na namo bona ia na elda namona ta. To, Avery na bapatiso iabina totona e daradarava. Dahaka dainai? Ia na ini e gwau toma: “Tamagu heḡereḡerena na basina kara dibamu.” Danu Avery na e laloava ia na dia heḡereḡere gabeai bae henia madunadia baine hua. Eto: “Na gariva badina hari be bae noigu taunimanima vairadiai baina ḡuriḡuri, tok baine heni, eiava haroro grup baina naria.”

⁵ Hannah, laḡanina 18, danu abi hidi ikarana totona e daradarava. Ia tamana bona sinana na Iehova e hesiai heniamu taudia. To ia na e daradarava, Iehova ena taravatu baine badinadia diba eiava lasi. Dahaka dainai? Badina Hannah na e laloava ena mauri na asi anina. Una lalohadai ese lalona e hametauava dainai, nega haida sibona tauanina e haberoava. Ia na eto: “Na karava ḡaudia na ta asi na hamaoroava, tamagu bona sinagu danu asi dibadia. Bona na laloava na karava ḡaudia daidiai Iehova ese basine ura henigumu.”

6. Vanessa e kouava ḡauna be dahaka?

⁶ Bamodia e lalodiamu. Vanessa, laḡanina 22, na eto: “Lau na mai turagu namona ta, bona laḡani momo lalodiai na dibaia namonamo.” To, Vanessa turana na murimuri kekenina dainai, Vanessa na se hagoadaiava baine bapatiso. Una ese Vanessa lalona e hahisia, bona ini e gwau tomamu: “Egu ai haida baina bamodia na auka, bona na lalova bema emai hebamo namona be dokomu, reana bamogu namona ma ta basina davariamu.”

7. Makayla be dahaka dainai e gariva?

⁷ Bae kerere garidia. Makayla laḡanina 5 neganai, kakana merona na orea murimurinai e atoa. E bada neganai, kakana ena kara ese tamana bona sinana e hahisidiava na e itaia. Una dainai, Makayla na ini e gwau toma: “Na gariva baina bapatiso, badina hari be kerere ta ba karaiamu bena orea murimurinai be atogumu, una ese tamagu bona sinagu be hahisidiamu.”

8. Miles be dahaka dainai e gariva?

 ⁸ Bae inai henidia garidia. Miles tamana bona sinana na e divos. Tamana na Witnes tauna ta, to sinana na dia Witnes hahinena. Miles na ini e gwau toma: “Lau na sinagu ida laḡani 18 na noho, to na gariva baina hamaoroa lau na na urava baina bapatiso. Tamagu na Witnes ta ai ela neganai, sinagu na se moale. Una dainai, na laloava lau danu unu be karagu tomamu.”

9. Iehova ena haheauka bona lalokau karadia bo dibamu neganai, dahaka bo karamu?

⁹ Adam bona Heva edia lalokau Iehova enai na asie hagoadaia dainai, Ia na asie badinaia. Iehova ese maoromaoro se hamasedia dainai, e mauri daudau bona natudia e havara bona sibodia ese natudia bae naridia daladia e abi hidi. Adam bona Heva edia abi hidi amo e vara ḡaudia ese e hahedinaraia, Iehova e dadaraia na kavakava karana. Natudia roboana ese tadina e alaia mase, una nega amo taunimanima na e daḡedaḡeva bona sibodia edia namo e lalova. (Gen. 4:8; 6:11-13) To Iehova na dala ma ta ai, Adam bona Heva natudia​—⁠e urava Ia bae hesiai henia taudia​—⁠e hamauridia. (Ioa. 6:38-40, 57, 58) Iehova ena haheauka bona lalokau bo dibamu neganai, emu lalokau ia enai na be goadamu. Bona basio uramu Adam bona Heva edia kara ba tohotoho, to Iehova enai emu mauri bo gwauhamatalaiamu.

10. Dahaka dainai Salamo 19:7 ilalo dobuna karana ese baine durumu Iehova ba hesiai henia?

¹⁰ Iehova na dounu ba dibaia. Iehova bo dibaia namonamomu neganai, basio garimu bona ia ihesiai henina karana bo moalelaiamu. Avery, matamanai tame herevalaia merona, na ini e gwau tomamu: “Salamo 19:7 ai e hetore gwauhamatana na duahia bona na laloa dobu neganai, lalogu na e hagoadaia.” (Ba duahia.) Avery na Iehova ese una gwauhamata e haḡuḡurua dalana e itaia neganai, ena lalokau Iehova enai na e hagoadaia. Lalokau ese e hagoadadamu Iehova baita hesiai henia bona ihabaduna  karadia baita dadarai. Hannah, matamanai tame herevalaia kekenina, na ini e gwau tomamu: “Egu Baibul duahiduahi bona stadi karana amo na laloparara, sibogu tauanigu na haberoamu neganai, Iehova danu na hahisiamu.” (1 Pe. 5:7) Hannah na Dirava ena “hereva ibadinana” kekenina ai ela. (Iak. 1:22) Bena dahaka e vara? Ia na eto: “Iehova ibadinana ena namo na itaia neganai, egu lalokau ia enai na e goada. Hari, na abia dae momokanimu heduru na uramu negadiai Iehova ese baine durugu diba.” Hannah na sibona ma se hahehisi lou. Iehova enai ena mauri e gwauhamatalaia bona e bapatiso.

11. Vanessa be dahaka e kara tura namodia baine bamodia totona, bona una ese dahaka e hadibadamu?

¹¹ Bamomu bavabidia hidi namonamo. Vanessa, matamanai ta herevalaia kekenina, na gabeai e laloparara ia na bamona ese e kouava Iehova basine hesiai henia. Una dainai ena hebamo karana ia ida na e hadokoa. To Vanessa na ḡau haida danu e kara. E hekwarahiva kongrigeisin lalonai tura matamatadia baine bamodia. Ia na e gwa Noa bona ena ruma bese edia haheitalai ese e durua. Ini e gwau toma: “Idia na Iehova se lalokau heniava taudia bogaraḡidiai e nohova. To idia na e hebamo heheni namonamova.” Vanessa na e bapatiso murinai, painia ḡaukarana e karaia. Hari ia na e gwaumu: “Una ese e durugumu egu kongrigeisin bona kongrigeisin ma haida ai tura namodia baina bamodia.” Oi danu Iehova ese e henida ḡaukarana bo goadalaiamu neganai, tura namodia bo davaridia dibamu.​—⁠Mat. 24:14.

12. Adam bona Heva be edena kara se hahedinaraia, bona dahaka e vara?

¹² Gari mamina ba hanaia. Bema ita na Iehova ta gari heniamu eiava ta matauraiamu, basita uramu ia ihabaduna karana ta baita karaia. (Sal. 111:10) Bema Adam bona Heva ese una hemataurai karana bema hahedinaraia, Iehova na basiema gwau-edeede henia. To, e gwau-edeede murinai, e laloparara idia na vada e kerere. Idia ese kara dika bona mase na natudia e henidia hanai. Dirava ena  taravatu e utua neganai, raruosi e laloparara idia na ḡaḡaedia mo, una dainai e hemarai bena e hehuni.​—⁠Gen. 3:7, 21.

13-14. (a) Petro Ginigunana 3:21 ai, dahaka dainai mase garina basita gari na namo? (b) Iehova ta lalokau heniamu badidia haida be dahaka?

¹³ Mase garina na basita gari. Iehova ese dala ta e kehoa mauri hanaihanai baita abia totona. Bema ta kereremu to mai kudouda idoinai ida baita helalo-kerehaimu neganai, Iehova ese eda dika na be gwautaomu. Natuna ese e heni mauri davana ta abidadama heniamu dainai eda dika na e gwautaomu. Abidadama baita hahedinaraia dalana badana na, eda mauri Dirava enai baita gwauhamatalaia bona baita bapatiso.​—⁠1 Petro 3:21 ba duahia.

¹⁴ Iehova ta lalokau heniamu badidia na momo. Ia ese dina ta ta baita moalelai ḡau namodia e henidamu, bona hereva momokani bona ena ura e hadibadamu. (Ioa. 8:31, 32) Danu Kristen kongrigeisin amo e hakaudamu bona e hagoadadamu. Hekwakwanai ta davarimu negadiai e durudamu baita haheauka, bona e henida helaro namona ta na, vaira neganai mauri hanaihanai baita abiamu. (Sal. 68:19; Apok. 21:3, 4) Iehova ese ita daidai e kara ḡaudia baita lalo dobumu neganai, eda lalokau ia enai na be hagoadaiamu. Bona Iehova baita lalokau heniamu neganai, baita matauraiamu bona basita uramu lalona ihahisina karana ta baita karaia.

15. Makayla be edena dala ai gari mamina e hanaia?

¹⁵ Makayla, matamanai ta herevalaia kekenina, na e laloparara Iehova na dika e gwautaomu Diravana. Ini e gwau toma: “Na diba ita iboudai na dia ḡoevadae bona baita kereremu danu. To danu na laloparara Iehova na ita e lalokau henidamu bona mauri davana dainai eda dika na baine gwautao diba.” Ia ese Iehova e lalokau henia dainai ena mauri e gwauhamatalaia bona e bapatiso.

16. Miles na sinana ese baine inai henia garina be ede e hanaia toma?

¹⁶ Miles na e gariva badina e laloava sinana ese be kouamu basine bapatiso totona, to seket tauna enai heduru e tahu. Miles na eto: “Seket tauna danu tamana mo Witnes tauna. Ia ese e durugu baina bapatiso badina na sinagu enai baina herevalaia namonamo, bona sinagu baina hadibaia una na dia tamagu ese e dorigumu dainai to lau sibogu egu abi hidi.” Miles sinana na se moale. Gabeai, Miles na sinana ena ruma e rakatania bona e karaia abi hidina e badinaia. Miles na e gwaumu: “Iehova ese lau daigu ai e kara ḡaudia namodia na diba neganai kudougu na e hamarerea. Iesu ena mauri davana ihenina karana na haeroa neganai, na laloparara Iehova ese lau na e lalokau henigumu. Una ese e hagoadagu egu mauri Iehova enai na gwauhamatalaia bona na bapatiso.”

17. Dahaka baita kara be namo?

¹⁷ Eden ai, Heva ese au huahua e ania neganai, ia ese Tamana e dadaraia. Adam danu adavana e badinaia neganai, e hahedinaraia Iehova ese ia dainai e kara ḡau namodia na se lalodia bada. Ita ese baita hahedinaraia ita na dia Adam bona Heva heḡereḡeredia. Iehova ese ita daidai e kara ḡaudia iboudiai na ta moalelaidiamu. Baita bapatisomu neganai, Iehova enai baita hahedinaraiamu ita na ta abia daemu Ia sibona na mai ena maoro dahaka be namo bona dahaka be dika baine gwauraidia hidi. Ta hahedinaraiamu Tamada na ta lalokau heniamu bona ta abidadama heniamu.

18. Iehova ena hesiai ḡaukara be ede ba moalelaia toma?

¹⁸ Ta bapatisomu murinai, dina ta ta Iehova ena taravatu baita badina na ḡau badana, dia ita siboda eda. Iehova e badinaiamu taudia milioni momo na unu e kara tomamu. Oi danu unu ba kara toma diba bema Dirava ena Hereva, Baibul, ai emu laloparara ba habadaia; tadikaka bona taihu ba bamodia hanaihanai; bona Tamamu lalokauna enai o diba ḡaudia na haida ediai ba herevalai. (Heb. 10:24, 25) Abi hidi o karamu neganai, namona na Iehova ese iena Hereva bona orea amo e henimu sisibadia ba badina. (Isa. 30:21) Bena bo karamu ḡaudia iboudiai na bo moalelaimu.​—⁠Her. 16:3, 20.

19. Dahaka baita laloatao hanaihanai, bona dahaka dainai?

¹⁹ Iehova ena hahekau ena namo na emu mauri lalonai bo itamu neganai, emu lalokau ia enai be badamu bona ena taravatu bo badinamu. Bena Satana ese e uramu baine henimu ḡaudia ese lalomu basie veriamu Iehova ba rakatania. Mani a laloa, laḡani daha ta murinai bo lalo loumu neganai bo moalemu badina bapatiso totona o karaia abi hidina na abi hidi maorona!