1-2. (a) Edena dala ai Iehova ese taunimanima e hereva henidiamu? (b) Ina atikol ai dahaka baita herevalaimu?

IEHOVA na e ura dikadikamu ita baine hereva henida. Guna, ia ese peroveta taudia, aneru, bona Natuna, Keriso Iesu, edia amo ena lalohadai e herevalaiva. (Amo. 3:7; Gal. 3:19; Apok. 1:1) Hari, ia ese ena Hereva, Baibul, amo ita e hereva henidamu. Baibul amo Iena lalohadai baita dibamu bona ena kara baita lalopararalaimu.

² Iesu tanobada ai e nohova neganai, Iehova na nega idaudia toi ai guba amo ia e hereva henia. Mani Iehova ese e gwaurai herevadia, unu hereva anidia, bona be durudamu daladia aita herevalai.

3. Mareko 1:9-11 ai, Iesu e bapatiso neganai Iehova be dahaka e gwa, bona dahaka mai anidia bada ḡaudia toi e hamomokanidia?

³ Mareko 1:9-11 ai, Iehova guba amo e hereva negana ginigunana e herevalaia. (Ba duahi.) Eto: “Oi na lau Natugu, egu lalokau; lau ese oi na lalo namo henimumu.” Iesu na Tamana ena lalokau bona lalonamo herevadia e kamonai neganai, e moale dikadika! Iehova ena hereva Iesu enai ese mai anidia bada ḡaudia toi e hamomokanidia. Ginigunana na, Iesu na ia Natuna. Iharuana be, Iehova ese Natuna na e lalokau heniamu. Bona ihatoina na, Iehova ese Natuna na e lalonamo heniamu. Mani unu point ta ta aita herevalai.

4. Iesu e bapatiso neganai, Dirava ese dahaka ḡaukara matamatana e henia?

⁴ “Oi na lau Natugu.” Una hereva amo Iehova ese e hahedinaraia, ia Natuna lalokauna, Iesu, na ḡaukara matamatana ta baine karaia. Iesu gubai e nohova neganai, ia na vada Dirava Natuna. To, e bapatiso neganai, Dirava ese lauma helaḡa amo e horoa. Una negai, Dirava  ese e hahedinaraia ia Natuna Iesu na e horoa, anina na Iesu na ma baine lou guba, bena Dirava ese King bona Hahelaḡa Tauna Badana ai baine halaoa. (Luk. 1:31-33; Heb. 1:8, 9; 2:17) Una dainai, Iesu e bapatiso neganai, Tamana na eto: “Oi na lau Natugu.”​—Luk. 3:22.

5. Edena dalai Iehova heḡereḡerena haida baita hagoadadia?

⁵ “Oi na . . . egu lalokau.” Iehova ena lalokau bona lalonamo herevadia ese e hadibadamu, dala baita tahu haida baita hagoadadia totona. (Ioa. 5:20) Ta laloa badamu tauna ta ese e lalokau henidamu bona eda kara namodia daidiai e hanamodamu neganai, ta moalemu. Una heḡereḡerena, eda kongrigeisin ai tadikaka taihu bona ruma bese taudia baita lalokau henidia bona baita hagoadadia na namo. Haida baita hanamodiamu neganai, edia abidadama baita hagoadaiamu bona baita durudiamu Iehova bae badinaia. Tama sina ese natudia bae hagoadadia na namo. Mai momokanidia ida natudia bae hanamodia bona bae lalokau henidia neganai, natudia na be goadamu bona be moalemu.

6. Dahaka dainai Iesu Keriso baita trastia?

⁶ “Lau ese oi na lalo namo henimumu.” Iehova na unu e hereva toma badina e diba momokani Iesu na mai lalona idoinai ida Tamana ena ura baine karaia. Iehova ese Natuna na e trastiamu dainai, ita danu baita abia dae Iesu ese Iehova ena gwauhamata iboudiai na baine haḡuḡurudia. (2 Ko. 1:20) Iesu ena haheitalai baita laloamu neganai, baita ura dikadikamu ia amo diba baita abi bona ena haheitalai baita tohotohoa. Iehova na dibana Natuna na ena  ura baine karaia, una heḡereḡerena, e dibamu iena hesiai taudia na Natuna ena amo dounu diba be abimu.​—1 Pe. 2:21.

7. Mataio 17:1-5 ai, Iehova be edena negai guba amo e hereva, bona dahaka e gwaurai?

⁷ Mataio 17:1-5 ba duahi. Iehova guba amo e hereva negana iharuana na, Iesu “vairana e idau” neganai. Iesu ese Petro, Iakobo bona Ioane e boiridia ia bae bamoa ororo badana ta ai bae dara dae. Unuseni ai, matahanai idau hereana ta e itaia. Iesu vairana na e hururu-hururu dina na heto, bona dabuana danu e kuroka-kuroka diari na heto. Tatau rarua, Mose bona Elia, na Iesu ida ena mase bona toreisi lou e herevalaiava. Ena be unu aposetolo tatoi na “mamahuta” mamase, to e noga neganai Iesu bona unu tatau rarua e itadia. (Luk. 9:29-32) Bena, ori ta ese e ḡovadia ahu, bona una ori lalona amo ere ta e kamonai​—una na Dirava erena! Iesu e bapatiso neganai, Iehova ese ena lalonamo bona lalokau Natuna enai na ma e gwauraia lou, eto: “Natugu binai, egu lalokau; lau ia na lalo namo heniamu.” To una hereva dokonai Iehova na eto: “Ia erena ba kamonai.”

8. Iesu toana e idau matahanaina ese Iesu bona hahediba be ede e durudia toma?

⁸ Una matahanai na vaira negai Iesu ese Dirava ena Basileia lalonai baine abia hairaina bona King siahuna e laulaulaia. Una ese Keriso na e hagoadaia baine haheauka ena be bae hahisia ela bona bae hamasea. Danu, una matahanai ese hahediba edia abidadama e hagoadaia, bona e haheḡaeḡaedia bae davari hahetohodia bae haheaukalai. Laḡani 30 muridiai, aposetolo Petro ese una matahanai na dounu e herevalaiava, una ese e hahedinaraia una matahanai na se laloaboio.​—2 Pe. 1:16-18.

9. Iesu ese ena hahediba taudia be dahaka sisiba e henidia?

⁹ “Ia erena ba kamonai.” Iehova ese e hahedinaraia, ia na e uramu Natuna ena hereva baita kamonai bona baita badina. Iesu tanobada ai e nohova neganai dahaka hereva e gwaurai? Ia ese mai anidia bada ḡaudia momo e gwaurai! Heḡereḡere, ia murinai e raka taudia e hadibadia sivarai namona be ede bae harorolaia toma, bona bae gima herevana na e gwauraia loulou. (Mat. 24:42; 28:19, 20) Danu e haḡanidia bae ḡaukara goada bona basie hesiku. (Luk. 13:24) Iesu ese e hagoadadia bae helalokau heheni, lalotamona ai bae noho, bona iena haheḡani bae badina. (Ioa. 15:10, 12, 13) E henidia sisibadia na idia idurudia! Hari ina negai unu sisiba na dounu mai anidia bada.

10-11. Edena dala ai baita hahedinaraia ita na Iesu erena ta kamonaimu?

¹⁰ Iesu eto: “Hereva momokani ibadinana taudia iboudiai ese lau eregu e kamonaimu.” (Ioa. 18:37) Iesu erena baita kamonai dalana ta na baita “haheauka heheni’ bona ‘dika baita hegwau tao heheni.’ (Kol. 3:13; Luk. 17:3, 4) Erena ta kamonaimu dalana ma ta na, “nega namodia ai bona nega dikadia ai” sivarai namona na mai eda ura ida baita harorolaia.​—2 Ti. 4:2.

¹¹ Iesu eto: “Egu mamoe ese lau gadogu e kamonaimu.” (Ioa. 10:27) Keriso ena hahediba taudia na dia ena hereva mo e kamonaimu to karana danu e karaiamu. Idia ese “tanobada ena lalo-haguhi ḡaudia” na asie lalodiamu. (Luk. 21:34) To, edia mauri lalonai Iesu ena haheḡani ibadinadia karana na e laloa badamu, herevana  hekwakwanai idauidau e davarimu. Heḡereḡere inaida ese e daḡedaḡe henidiamu, e ogoḡamimu, bona disasta idauidau ediai e varamu. To, idia na dounu Iehova e badinaiamu. Iesu ese ina hahegoada herevana e henidia, e gwaumu: “Egu haheḡani e abi daemu bona e badinamu tauna, ia bunai e lalokau henigumu. E lalokau henigumu tauna na Tamagu ese baine lalokau henia.”​—Ioa. 14:21.

12. Iesu erena baita kamonai dalana ma ta be dahaka?

¹² Iesu erena baita kamonai dalana ma ta na, ia ese e abidia hidi hegunalai taudia ida baita ḡaukara hebou. (Heb. 13:7, 17) Vanega laḡanidia ai, Dirava ena orea ese senisi momo e kara, heḡereḡere eda tulu matamatadia baita ḡaukaralai daladia, haroro daladia matamatadia, eda pura ta ta heboudia baita kara daladia, bona Kingdom Hall baita hagini, baita hanamo bona baita naridia namonamo daladia e hadibadamu. Eda ḡaukara baita karaia namonamo daladia e hadibada namonamomu dainai, ta moalemu! Orea ese e hadibadamu ḡaudia baita badinamu neganai Iehova ese eda hekwarahi na be hanamoamu.

13. Iesu baita kamonai henia ena namo haida be dahaka?

¹³ Iesu ese e hadibadamu ḡaudia iboudiai baita badinamu neganai namo baita davarimu. Iesu ese ena hahediba e hamaorodia iena hahediba herevadia ese laḡa-ani do baine henidia. Eto: “Laumamui do bae laḡa ani. Badina be egu maduna na haraḡa, ihuana danu asi hekwarahina.” (Mat. 11:28-30) Baibul ai, Evanelia bukadia hani ese Iesu ena mauri bona hesiai ḡaukara e herevalai, una ese e hagoadadamu bona aonega e henidamu. (Sal. 19:7; 23:3) Iesu eto: “Dirava ena hereva e kamonaimu bona e badinamu taudia hari nanamo heherea.”​—Luk. 11:28.

14-15. (a) Ioane 12:27, 28 ai, edena negai ihatoina ai Iehova na guba amo e hereva? (b) Dahaka dainai Iehova ena hereva ese Iesu na e hagoadaia?

¹⁴ Ioane 12:27, 28 ba duahi. Evanelia bukana Ioane ese Iehova guba amo e hereva negana ihatoina e herevalaia. Iesu do se mase neganai, ia na Ierusalem ela Pasova ginigabena baine karaia totona. Ia na eto: “Kudougu eme hetaha.”  Bena e ḡuriḡuri, eto: “Tamagu e, ladamu a heatolaia.” Bena Tamana ese guba amo e hereva henia, eto: “Vada name heatolaia; ma baina heatolaia.”

¹⁵ Iesu na e lalohekwarahi badina iena maduna badana na Iehova baine badinaia hanaihanai. Iesu na dibana ia na do bae dadabaia bona bae hamasea. (Mat. 26:38) Ena be una baine vara, to ia e laloa bada ḡauna na, Tamana ladana baine heatolaia. Haida na e gwauva Iesu na Dirava ladana e hadikaia tauna, bona se ura ena mase ese Dirava ladana baine hadikaia. Iehova ena hereva ese Iesu lalona e hagoadaia. Iesu na e diba Iehova ladana na do baine heatolaia. Tamana ena hereva ese goada e henia, baine davari hisihisidia baine haheaukalai. Ena be una negai reana Iesu sibona ese Tamana ena hereva e kamonai, to Iehova ese Iena hereva na ita daidiai Baibul ai e tore.​—Ioa. 12:29, 30.

16. Dahaka dainai asita uramu haida ese Dirava ladana bae hadikaia?

¹⁶ Iesu heḡereḡerena, ita danu asita uramu haida ese Iehova ladana bae hadikaia. Reana Iesu enai e vara heḡereḡerena, ita na haida ese se kara namo henidamu. Eiava inaidia ese sivarai koikoidia e halasimu dainai ta lalohisihisimu. Unu sivarai koikoidia ese Iehova ladana bona ena orea e hadikaiamu. Nega unu bamodia ai, Iehova ena hereva ese  laloda e hagoadamu. Una dainai basita lalohekwarahi momo. Dibada ‘Dirava ena maino, eda diba idoinai e hereaiamu mainona, ese laloda bona darada baine gima, Keriso Iesu lalonai.’ (Flp. 4:6, 7) Iehova ese ladana na baine heatolaia ela bona hanaihanai. Ia ese ena Basileia amo Satana bona ina tanobada ese Iena hesiai taudia e hahisidiamu karadia iboudiai baine haoredia.​—Sal. 94:22, 23; Isa. 65:17.

17. Isaia 30:21 ai, hari Iehova be edena dala ai ita e hereva henidamu?

¹⁷ Hari, Iehova na doini ita e hereva henidamu. (Isaia 30:21 ba duahia.) Momokani, ita ese guba amo Dirava gadona na asita kamonaiamu. To, Ia ese ena Hereva, Baibul, e henida, unu amo ita baine hadibada. Danu, Iehova ena lauma helaḡa amo “kohu ireḡuna tauna mai ena kamonai” e hakauamu Iena hesiai taudia adia baine heni helaoreana. (Luk. 12:42) Lauma aniani namodia na momo, heḡereḡere e printidia pablikeisen na idauidau, bona Intanet amo vidio bona audio pablikeisen momo ta abimu.

18. Edena dala ai Iehova ena hereva ese emu abidadama e hagoadaiamu bona lalogoada e henimumu?

¹⁸ Iehova ese Iesu tanobada ai e nohova neganai e hamaoroa herevadia baita lalodiatao na namo. Baibul ai, Dirava sibona ena hereva ese e hadibadamu Iehova na nega korikori ai ḡau iboudiai baine hamaoromaorodia, bena Satana bona ena tanobada dikana ese e hahisidamu ḡaudia iboudiai baine kokidia. Una dainai Iehova erena baita kamonai namonamo. Unu baita kara tomamu neganai, hari bona gabeai baita davari hekwakwanaidia baita haheaukalai diba. Baibul na e gwaumu: “Emui haheauka badina binai: Dirava ena ura ba karaia ḡuḡuru, bena gwauhamata anina do bavabia.”​—Heb. 10:36.