English ai ina hereva “amen” anina na “unu baine vara toma” eiava “momokani.” Una na Heberu herevana amo e abia, bona anina na “gwauhamata ta ba badinaia” o “ba hamomokania.” Nega haida una hereva na kota lalodiai e ḡaukaralaiamu. Ta na gwauhamata ta e gwauraiamu murinai, e gwaumu “amen,” unu amo baine hamomokania e gwauraia herevana na momokani bona enai bae vara ḡaudia na e abi daemu. (Num. 5:22) Taunimanima vairadiai una hereva e gwauraiamu neganai, namona na ena gwauhamata na baine badinaia.​—Neh. 5:13.

Deuteronomi karoa 27 ai “amen” e ḡaukaralaiava haheitalaina ta e herevalaia. Israel taudia na Gwauhamata Tanona ai e vareai murinai, Ebal Ororona bona Gerisim Ororona bogaraḡidiai e hegogo, Taravatu bae kamonaia totona. Unuseniai dia bae kamonai mo to Taravatu bae abia dae danu. Gwau-edeede ena dika e duahi hedinarai neganai, iboudiai e haere, eto, “Amen”! (Deu. 27:15-26) Mani a laloa taunimanima hutuma, tatau, hahine, bona natu iboudiai ese una hereva e boilaia. (Ios. 8:30-35) Momokani, una dina ai e gwaurai herevadia na asie lalodia boio. Bona unu Israel taudia ese edia hereva na e badinaia, badina Baibul na eto: “Israel taudia ese Iehova isiaina e lao heniva, Iosua ena mauri dinadia iboudiai lalodiai, bona tau-badadia, Iosua ena mase murinai dounu e mauriva bona Iehova ena kara Israel taudia ediai na matadia amo e itava taudia, edia mauri dinadia iboudiai lalodiai danu.”​—Ios. 24:31.

Iesu danu “amen” na e gwauraiava ena hereva ihamomokanidia totona, to dala ma ta ai e ḡaukaralaia. Ia ese “amen” (English ai e hahanaia na “truly” o momokani) e gwauraia baine harorolaia hereva momokanina baine hahedinaraia totona, dia ta ena hereva baine haerelaia totona.  Nega haida, “amen” na nega rua e gwauraiava. (Mat. 5:18; Ioa. 1:51) Una dala amo ena kamonai taudia e hadibadiava iena hereva na momokani. Iesu unu baine hereva toma na maoro, badina ia na Dirava ese vada e abia hidi ena gwauhamata iboudiai baine haḡuḡurudia.​—2 Ko. 1:20; Apok. 3:14.

Israel taudia danu Iehova e imodaiava bona e ḡuriḡuriva neganai “amen” e gwauva. (Neh. 8:6; Sal. 41:13) Kamonai taudia na ḡuriḡuri dokonai e gwauva “amen,” unu amo e hahedinaraiava ḡuriḡuri herevadia na e abi daeva. Iboudiai na una dala amo Iehova e tomadiho heniava. Una na King David ese Iehova ena Taravatu Mauana Ierusalem e laohaia neganai e vara. Una murinai e karaia ariana lalonai, ia ese ḡuriḡuri namona ta na ane ai e herevalaia, bona 1 Sisiga 16:8-36 ai una ane e torea. Taunimanima iboudiai na iena hereva ese kudoudia e hamarere dainai, eto “‘Amen,’ bona Iehova e imodaia.” Oibe, una dina ai idia na mai moaledia ida Iehova e toma henia diho hebou.

Kristen ginigunadia danu Iehova e imodaiava neganai “amen” e gwauva. Baibul e torea taudia edia revareva ai una hereva na nega momo e toreava. (Rom. 1:25; 16:27; 1 Pe. 4:11) Apokalupo bukana ai guba anerudia na Iehova e imodaia, eto: “Amen! Iah baita hanamoa!” (Apok. 19:1, 4; NW) Kristen ginigunadia na edia hebou ai ḡuriḡuri e gwauraiva muridiai, “amen” e gwauva. (1 Ko. 14:16) To, una hereva na se gwauraia kavava.

Iehova ena hesiai taudia ese “amen” e ḡaukaralaiava dalana amo tame diba, ḡuriḡuri dokonai “amen” baita gwa na mai anina bada. Siboda eda ḡuriḡuri dokonai una hereva ta gwauraiamu neganai, ta hahedinaraiamu ita na mai momokanida ida ta ḡuriḡurimu. Bona ta ena ḡuriḡuri dokonai “amen” na lalodai ta gwauraiamu neganai, ta hahedinaraiamu ḡuriḡuri herevadia na ta abi daemu.  “Amen” baita gwa badidia ma haida aita lalo.

Eda tomadiho kahana ta dainai, baita hakala namonamo. Ḡuriḡuri negadiai ita na Iehova ta tomadiho heniamu dainai, namona na eda hereva bona kara amo baita hahedinaraia ḡuriḡuri negana na ta laloa badamu. Ta uramu “amen” na mai laloda idoinai ida baita gwauraia, una dainai, e gwauraiamu ḡuriḡurina na baita hakala henia namonamo.

Ita e hatamonadamu. Taunimanima vairadiai e hegwauraimu ḡuriḡuridia ai, kongrigeisin taudia iboudiai na mai lalodia tamona ida una hereva e kamonaimu. (Apos. 1:14; 12:5) Tadikaka bona taihu ida “amen” ta gwauraia heboumu neganai, una ese eda lalotamona karana e hagoadaiamu. Herevana iboudai ese “amen” na laloda ai ta gwauraiamu eiava ta gwauraia badabadamu, to ta noiamu ḡauna na Iehova ese baine haerelaia diba.

Iehova ta imodaiamu. Iehova ese ia itomadiho henina totona ta karamu ḡaudia iboudiai na e itamu. (Luk. 21:2, 3) Eda ura korikori bona laloda ai e miamu ḡaudia na mai dibana. Hebou ta na telefon amo ta kamonaimu, bona “amen” ta gwaumu neganai Iehova ese una na e laloa badamu. “Amen” ta gwaumu neganai, ita na hebou taudia ida Iehova ta imodaiamu.

Reana baita laloamu iseda “amen” na dia ḡau badana, to ia na mai anina bada herevana. Bible encyclopedia ta na e gwaumu, Dirava ena hesiai taudia na “ina hereva tamona amo” e hahedinaraiamu, e ḡuriḡurilaiamu ḡauna na momokani, e abia daemu Dirava ese edia ḡuriḡuri be haerelaiamu, bona e diba momokanimu Ia na unu baine kara toma. Namona na ta gwauraiamu “amen” herevana na Iehova ese baine abia dae ḡauna.​—Sal. 19:14.