1. Petro Ginigunana 3:8 ai, dahaka dainai eda hemami bona namo e lalomu taudia ida ta nohomu neganai ta moalemu?

E LALOKAU henidamu bona eda namo e lalomu taudia ida ta nohomu neganai, ta moalemu. Idia ese eda lalohadai bona hemami na e lalopararalai tohomu bona e uramu bae duruda. Nega haida ena be do asita noidia, to eda dabu ḡaudia na mai dibadia dainai e durudamu. Ita na e ‘hekaha hehenimu’ * taudia daidiai ta moalemu.​—1 Petro 3:8 ba duahia.

2. Dahaka dainai hebogahisi baita hahedinaraia na mai hekwarahina?

² Ita na Kristen tauda dainai, ta uramu haida baita bogadia hisi, o baita lalodia bada. To, nega haida una na mai hekwarahina. Dahaka dainai? Badina ita na dia ḡoevadae tauda. (Rom. 3:23) Nega momo ita na siboda ta helalomu. Una dainai, namona na baita hekwarahi ma haida baita lalodia. Danu reana eda ruma bese maurina eiava guna edai e vara ḡauna ta dainai, nega haida na auka hebogahisi karana baita hahedinaraia. Eiava reana ina tanobada taudia edia kara ta tohotohomu. Ini dina gabedia ai, momo ese haida edia hemami na asie lalomu. To, ‘sibodia e heura henimu.’ (2 Ti. 3:1, 2) Dahaka ese baine duruda unu hekwakwanai baita hanaidia bona haida edia hemami baita lalo?

3. (a) Edena dala ai hebogahisi karana baita hahedinaraia? (b) Ina atikol ai dahaka baita herevalaimu?

³ Bema Iehova Dirava bona Natuna, Iesu Keriso, baita tohotohodiamu, hebogahisi karana na baita hahedinaraia dibamu. Iehova na lalokau Diravana, bona haida edia namo ilalodia karana ai haheitalai hereadaena e hahedinaraia.  (1 Ioa. 4:8) Iesu na Tamana ena kara e tohotohoa ḡoevaḡoeva. (Ioa. 14:9) Tanobada ai e nohova neganai, ia ese taunimanima baita bogadia hisi dalana na e hahedinaraia. Ina atikol ai, Iehova bona Iesu edia hebogahisi karana, bona edia haheitalai baita tohotoho daladia baita herevalaimu.

4. Edena dala ai Isaia 63:7-9 ese e hahedinaraiamu Iehova ese ena hesiai taudia na e lalodiamu?

⁴ Baibul ese e hadibadamu Iehova ese ena hesiai taudia na e lalodiamu. Heḡereḡere, Israel taudia na hisihisi idauidau e davariva neganai Iehova ena hemami mani a laloa. Baibul na e gwaumu: “Edia hisihisi iboudiai ia ese e hisihisilai.” (Isaia 63:7-9 ba duahi.) Gabeai, Iehova na peroveta tauna Sekaria amo e hahedinaraia, haida ese ena taunimanima e hahisidiamu neganai, ia ese edia hisihisi na e mamimu. Iehova ese ena hesiai taudia e hamaorodia, eto: “Umui e daumui tohomu tauna ese [lau matagu] nadinadina e daua tohomu.” (Sek. 2:8) Una hereva amo Iehova ese e hahedinaraia ena taunimanima na e lalodia badamu!

5. Iehova ese ena hesiai taudia e durudia sivaraina ta mani a herevalaia.

⁵ Iehova na ena taunimanima e hisihisimu neganai, dia e bogadia hisimu mo, to idurudia totona kara ta e karaiamu. Heḡereḡere, Israel taudia na Aigupto ena iḡui ai e hisihisiva neganai, Iehova ese edia hisihisi na e mami bona e bogadia hisi dainai e durudia. Ia ese Mose e hamaoroa, eto: “Egu bese edia hisihisi . . .  vada na itaia, bona edia taitai . . . vada na kamonai; badina be edia hisihisi vada name diba. Lau vada name diho, Aigupto taudia imadia amo baina hamauridia.” (Eso. 3:7, 8) Iehova ese ena taunimanima e bogadia hisi dainai, iḡui amo e ruhadia. Laḡani haida muridiai, Gwauhamata Tanona ai, Israel taudia na inaidia ese e tuari henidiava. Iehova be dahaka e kara? “E daḡedaḡe henidia bona e hahisidia taudia daidiai e ḡanaḡanava negadia ai . . . e bogadia hisiva.” Oibe, Iehova ese iena taunimanima na e bogadia hisi dainai e durudia. Ia ese hahemaoro taudia e siaidia  Israel taudia na inaidia amo e hamauridia.​—Hah. 2:16, 18.

6. Iehova ese lalohadai kerere e abimu tauna e laloa badamu dalana mani a herevalaia.

⁶ Iehova ese iena taunimanima edia hemami na e lalomu​—ena be nega haida edia lalohadai na kekerere. Mani Iona sivaraina aita laloa. Dirava ese ina peroveta tauna e siaia Nineve taudia ediai hahemaoro herevana baine harorolaia. Idia e helalo-kerehai neganai, Dirava na lalona e haidaua bona se hamasedia. To, Iona ese una na se moalelaia. E “badu” badina e harorolaia hahemaoro herevana anina na se vara. To Iehova na mai haheaukana ida Iona e durua ena lalohadai baine hamaoromaoroa. (Ion. 3:10–4:11) Gabeai, Iona na Iehova ese e hadibaia ḡauna e laloparara; bona Iehova ese e ḡaukaralaia ina sivarai na ita daidiai e torea.​—Rom. 15:4. *

7. Iehova ese ena hesiai taudia e kara henidiamu dalana amo dahaka ta dibamu?

⁷ Iehova ese ena taunimanima e kara henidia dalana ese e hadibadamu iena hesiai taudia na e lalodia badamu. Ia ese ita ta ta eda hisihisi na e itamu. Iehova ‘sibona ese taunimanima iboudiai lalodia e dibadiamu.’ (2 Si. 6:30) Eda lalohadai, hemami, bona goada hetoadia na e lalopararalaimu. Bona ‘baine narida, eda goada e hereaiamu hedibaḡanina ta ese baine butuda tao na garina.” (1 Ko. 10:13) Una gwauhamata ese e hagoadadamu!

8-10. Dahaka ese Iesu e durua taunimanima baine lalodia bada?

⁸ Iesu tanobada ai e nohova neganai, haida na e lalodia badava. Mai anina bada ḡaudia toi ese ia na e durua. Ginigunana be, matamanai tame herevalaia heḡereḡerena, Iesu ese Tamana ena kara na e tohotohoa ḡoevaḡoeva. Tamana heḡereḡerena, Iesu ese taunimanima na e lalokau henidiava. Ena be Iehova ida e kara ḡaudia iboudiai na e moalelai, to unu iboudiai padadiai ia ese “taunimanima natudia iboudiai” e lalokau henidiava. (Her. 8:31) Lalokau dainai Iesu na taunimanima edia hemami e lalo bada.

⁹ Iharuana na, Iehova heḡereḡerena, Iesu na taunimanima kudoudia eiava edia lalohadai bona hemami na mai dibana. (Mat. 9:4; Ioa. 13:10, 11) Una dainai edia hisihisi e ita neganai, e bogadia hisi bona taudia e halo.​—Isa. 61:1, 2; Luk. 4:17-21.

¹⁰ Ihatoina be, Iesu na taunimanima ese e davari hekwakwanaidia haida e davari danu. Heḡereḡere, Iesu na ogoḡami besena lalonai e bada. Ia e ubua tauna, Iosef, ida e ḡaukara hebouva neganai, ḡaukara goada dalana e dibaia. (Mat. 13:55; Mar. 6:3) Danu Iosef na reana Iesu ena hesiai ḡaukara do se hamatamaia lalonai e mase. Una dainai Iesu na lalokau tauna ta e masemu hisihisina na mai dibana. Bona ena ruma bese lalonai haida edia lalohadai tomadiho ai na idauidau. (Ioa. 7:5) Unu iboudiai ese Iesu e durua dainai, taunimanima ese e davari hekwakwanaidia bona edia hemami na e lalopararalai.

11. Edena dala ai Iesu ese e hahedinaraia taunimanima na e lalodia bada? Ba herevalaia. (Rau 1 laulauna ba itaia.)

¹¹ Iesu na ena hoa karadia amo e hahedinaraia taunimanima na e lalodia bada. Hoa karadia na dia maduna ta dainai e kara, to e hisihisiva taudia e ‘bogadia hisiva’ dainai e durudia. (Mat. 20:29-34; Mar. 1:40-42) Heḡereḡere, Iesu ese taia  kudima tauna ena hemami e laloa dainai, hutuma amo e hakaua siri bona e hanamoa, bona vabu ta e bogaia hisi dainai, natuna merona tamona e hatorea isi lou. (Mar. 7:32-35; Luk. 7:12-15) Iesu ese unu taunimanima na e bogadia hisi dainai e ura baine durudia.

12. Ioane 11:32-35 ese edena dala ai e hahedinaraiamu Iesu ese Mareta bona Maria na e bogadia hisi?

¹² Iesu ese Mareta bona Maria e bogadia hisi. E itadia idia na taihudia Lasaro e mase dainai e taiva neganai, ia danu “e tai.” (Ioane 11:32-35 ba duahi.) Ia e tai badina na dia turana namona e mase dainai. Lasi, badina mai dibana Lasaro na be hatorea isi loumu. To, e tai badina e taitaiva taudia edia lalohisihisi e mamia bona e lalopararalaia.

13. Ta dibamu Iesu ese taunimanima na e lalodiamu dainai, una ese ita be ede e hagoadada tomamu?

¹³ Iesu ese taunimanima e lalodia bada karana ta dibamu dainai, una ese ita na e hagoadadamu. Momokani, ita na dia ḡoevadae tauda. To, ta lalokau heniamu badina ia ese taunimanima na mai hebogahisina ida e durudia. (1 Pe. 1:8) Ta moalemu badina hari ia na Dirava ena Basileia Pavapavana. Bona kahirakahira hisihisi iboudiai be haorediamu. Iesu na guna tanobada ai e noho dainai, ia na heḡereḡere taunimanima baine durudia, Satana ena lohia henunai e varamu hisihisidia iboudiai baine kokidia. Momokani, ta moalemu badina eda King namona ese eda “manoka-manoka” ḡaudia na e lalopararalaimu.​—Heb. 2:17, 18; 4:15, 16.

14. Efeso 5:1, 2 baita laloa neganai, dahaka baita kara be namo?

¹⁴ Iehova bona Iesu edia haheitalai baita lalomu neganai, una ese be hagoadadamu haida baita lalodia bada totona. (Efeso 5:1, 2 ba duahi.) Momokani, ita ese taunimanima kudoudia na asita itamu. To baita hekwarahi edia hemami bona dabu ḡaudia baita lalopararalai. (2 Ko. 11:29) Ena be ina tanobada taudia na sibodia e helalomu, to ita na baita hekwarahi ‘ta ta ena namo ena namo basita tahu, a bamoda edia namo baita tahu.’​—Flp. 2:4.

15. Daidia ese ma haida edia hemami bae laloa na namo?

¹⁵ Kongrigeisin elda taudia ese haida edia hemami bae laloa na namo. Dibadia idia ese mamoe e nariamu dalana na Iehova vairanai bae gwaurai hedinarai. (Heb. 13:17) Tadikaka bona taihu bae durudia totona, namona na hebogahisi karana bae hahedinaraia. Elda taudia be edena dala ai unu bae kara toma?

16. E hebogahisimu elda tauna be dahaka baine kara, bona dahaka dainai una na mai anina bada?

¹⁶ E hebogahisimu elda tauna na nega e atomu tadikaka bona taihu baine durudia. Henanadai e henimu bona e hakala henidia namonamomu. Una na mai anina bada badina nega haida tadikaka o taihu ta enai na auka ena lalohadai o hemami baine gwauraia hedinarai. (Her. 20:5) Bema elda ta na mai ena ura ida ena nega be henimu, tadikaka taihu na basie garimu ia ihereva henina, be hetura henia namonamomu, bona be lalokau heniamu.​—Apos. 20:37.

17. Tadikaka bona taihu momo ese e moalelaiamu ḡauna be dahaka? Haheitalai ta a herevalaia.

¹⁷ Tadikaka bona taihu momo na e gwaumu idia e moalelaiamu ḡauna na, kongrigeisin elda taudia ese e lalodia badamu. Dahaka dainai? Adelaide na e gwaumu: “Idia ihereva henidia na basio garimu badina mai dibamu emu hemami  na be lalopararalaiamu.” Ma eto: “Idia ida bo herevaherevamu neganai, edia hereva dalana amo bo dibamu, emu hemami na e laloamu.” Tadikaka ta na elda ta ese e durua dalana e moalelaia, eto: “Egu hekwakwanai na herevalai neganai, elda ta na e tai. Egu mauri lalonai una kara na basina laloaboio.”​—Rom. 12:15.

18. Edena dala ai baita hahedinaraia haida edia hemami ta lalo badamu?

¹⁸ Momokani, dia elda taudia mo, to ita iboudai ese haida edia hemami baita lalo bada. Edena dala ai? Namona na eda ruma bese taudia bona tadikaka taihu edia hekwakwanai baita lalopararalai toho. Kongrigeisin ai matamata taudia, gorere taudia, burukadia bona edia lalokau taudia e mase dainai e lalohisihisimu taudia baita lalodia bada. Baita sekedia idia nanamo eiava. Edia hemami e herevalaimu neganai baita hakala namonamo. Bona dala idauidau ai baita durudia bae laloparara edia hisihisi na ta mamimu. Unu baita kara tomamu neganai, ita na lalokau korikorina ta hahedinaraiamu.​—1 Ioa. 3:18.

19. Dahaka dainai haida edia hemami baita lalo bona dala idauidau ai baita durudia?

¹⁹ Haida ta durudiamu neganai, namona na edia hemami baita lalo danu. Dahaka dainai? Badina taunimanima ese edia hekwakwanai e haheaukalaimu daladia na idauidau. Haida be e uramu edia hekwakwanai bae herevalai, a haida na asie uramu bae herevalai. Una dainai ta uramu baita durudia, to idia ihahemaraidia henanadaidia na basita gwaurai. (1 Te. 4:11) Haida ese edia hemami e herevalaimu neganai, reana e gwauraimu ḡaudia haida na basita abi daemu. To, namona na baita laloparara una na edia hemami e gwauraia hedinaraimu. Ta uramu hereva ikamonaina ai baita haraḡa to hereva igwauraina ai basita haraḡa.​—Mat. 7:1; Iak. 1:19.

20. Stadi gabena ai dahaka baita herevalaiamu?

²⁰ Hebogahisi karana na dia kongrigeisin ai mo baita hahedinaraia, ta uramu eda hesiai ḡaukara lalonai danu baita hahedinaraia. Hahediba ḡaukarana ta karaiamu neganai hebogahisi karana be ede baita hahedinaraia toma? Stadi gabena ai una baita herevalaiamu.