Jack bona Marie-Line na laḡani 1988 ai ful-taim hesiai ḡaukara e hamatamaia. Guadeloupe bona French Guiana ai, asainmen idauidau e karadia badina idia na mauri dala idauidau e manadalai. Unu gabu ruaosi na France brens ofesi ena heitatao henunai. Mani henanadai haida aita henidia.

Dahaka dainai ful-taim hesiai ḡaukarana o hamatamaia?

Marie-Line: Guadeloupe ai, lau do maraḡigu ai nega momo sinagu ida daba ela adorahi a harorova. Lau sinagu na doini Witnes goadana ta. Taunimanima na ura henidiava dainai, laḡani 1985 ai sikuli na haorea murinai painia ḡaukarana na hamatamaia.

Jack: Lau maraḡigu ai, haroro ḡaukara e karaia goadagoadava taudia na bamodiava. Sikuli holidei negadiai, na heduru painiava. Wiken ai, nega haida basi ai a guiva painia taudia ida edia teritori ai a haroro hebouva. Daba ela adorahi a harorova, bena murinai kone a laova. Unu na nega namodia.

Laḡani 1988 ai Marie-Line na adavaia murinai, sibogu na gwa: ‘Ai na asi emai maduna dainai emai haroro ḡaukara na baia habadaia.’ Marie-Line ida painia ḡaukarana a karaia matama. Painia sikuli ala bena laḡani ta murinai, e abimai hidi spesel painia ḡaukarana baia karaia. French Guiana do asi ala neganai, Guadeloupe ai asainmen namodia momo a moalelai.

Laḡani momo lalodiai asainmen matamatadia momo o abi. Dahaka ese e durumu unu asainmen ba moalelaidia totona?

Marie-Line: French Guiana Betele ai, tadikaka momo na mai dibadia ai ese a ura henia momomu sirina na Isaia 6:8. Ai e rini henimaiva negadiai, nega momo idia na hevaseha dalanai e nanadaimaiva: “Umui ese o ura heniamu sirina o laloataomu, a?” Unu amo a dibava ai na asainmen matamatana ta baia abiamu. Bona aina a gwauva: “Ai o ina, A siai mai.”

Ai ese emai asainmen matamatadia na asainmen gunadia ida asia haheḡereḡereva, badina unu baia kara tomamu neganai emai asainmen matamatana na basia moalelaiamu. Bona a hekwarahiva  emai asainmen matamatadia ai tadikaka taihu baia dibadia.

Jack: Tadikaka taihu haida na se urava ai na gabu ma haida baiala, una dainai e hamaoromaiva baia noho. To, Guadeloupe a rakatania neganai, tadikaka ta ese Iesu ena hereva Mataio 13:38 ai e hamaorolaimai: “Uma na tanobada.” Herevana gabu ma ta a laova, to a helalotaova ai na una tanobadai dounu hesiai ḡaukarana a karaiava. Una dainai, mai anidia bada ḡaudia na taunimanima bona teritori.

Teritori matamatana ta ai a kauva neganai, a itaiava taunimanima haida edia mauri na namo dainai e moaleva. To, ai na a hekwarahiva una gabu taudia edia noho dalana heḡereḡerena baia noho. Ena be ai ese aniva anianidia na i’idau to idia e aniva ḡaudia aniva bona idia e inuva ḡaudia a inuva, to heduru daladia maorodia danu a badinava basia gorere totona. Aina a hekwarahiva, emai asainmen iboudiai daidiai ḡau namodia mo baia herevalai.

Marie-Line: Tadikaka bona taihu edia amo ḡau momo a diba. French Guiana ai a kau murinai, e vara ḡauna ta na doini na laloataomu. Medu bada herea e diho, una dainai a lalova baia nari ela bona medu baine doko bena baia haroro. To taihu ta ese e nanadaigu, “Oi do heḡaeḡae?” Bena na haere na gwa: “Ede baita lao tomamu?” Ia na e gwa: “Emu damaru bavabia, ita na baskele amo baitalaomu.” Una neganai baskele baina tari bona nega tamona damaru baina dogotao dalana na dibaia. Bema una basinama dibaia, medu lalonai basinama haroro diba.

Umui na gabu 15 ola. Una dainai pablisa dia momo gabudiai e uramu hesiai ḡaukarana bae karaia taudia be ede bo hagoadadia tomamu?

Marie-Line: Gabu idauna ta baola na mai hekwarahina. To haroro ḡaukara muridiai bo loumu neganai, ḡau badana na oi na mai emu noho gabuna.

Jack: Nega momo, lau na emai ruma matamatana lalona na peniava. Brens ai e ḡaukarava tadikakadia na mai dibadia ai na basia noho daudau dainai e hauraguva e gwauva: “Jack, ruma ipenina lalohadaina na basio abia.”

Marie-Line na mai dibana emai kohu be ede baine pekidia toma. Boksi ai e udadiava bona ladadia e toreva, heḡereḡere “bathroom,” “bedroom,” “kitchen,” ḡaudia sibodia. Una dainai emai ruma matamatanai a kauva neganai, ai na asi hekwarahiva to unu boksi ta ta na edia gabu maorodia ai  atodiava. Unu boksi ta ta na mai listidia dainai a davari haraḡava.

Marie-Line: Heḡaeḡae namonamo karana na a dibaia dainai, una ese e durumaiva haroro ḡaukarana a hamatamaia haraḡava.

Emu hesiai ḡaukara ba haḡuḡurua totona, emui nega be ede o haria namonamo toma?​—⁠2 Tim. 4:5.

Marie-Line: Monday iboudiai ai na a laḡa-aniva bona hebou totona a heḡaeḡaeva. To, Tuesday ela Sunday na a harorova.

Jack: Ena be mai dibamai hua ta ta ai haroro ḡaukarana ai hora hida baia abia, to una na asia laloa badava. Aiemai ai, haroro ḡaukarana na ḡau badana. Ruma a rakataniava negana amo ela bona a louva negana, ai na a davaridiava taudia iboudiai a hereva henidiava.

Marie-Line: A pikinekiva negadiai, lau na hanaihanai pepapepa na abi kauva. Ena be taunimanima na se dibava ai na Iehova ena Witnes taudia to emaiva dekemai bona pablikeisin e noiva. Una dainai, emai heḡoeva daladia bona kara nahuadia na a tohova. Taunimanima ese unu na e lalo badava.

Jack: Badimai ai e nohova taudia na a kara namo henidiava. Pepa dikadia na abi isiva, rabesi na negeva, bona momoru na darova. Badimai ai e nohova taudia na unu kara e itava bona nega haida e nanadaimaiva, “Lau Baibul ta bo henigumu namo?”

Nega momo umui na gabu daudaudia ai o haroro. Ekspiriens ta o laloataomu, a?

Jack: Guiana ai, teritori haida ilao henidia na auka. Dala na didika dainai nega momo wiki ta lalonai ai na kilomita 600 bamona a heauva. St. Élie, Amazon udana ala negana na doini a laloataomu. Hora momo lalonai motuka bona bouti amo a laova. Unu gabu ai e nohova taudia momo na golo e abiva taudia. Emai pablikeisin e moalelaiva dainai, haida edia kontribiusin na gold nuggets maraḡidia e henimaiva. Adorahi ai, orea ena vidio ta a haheitalaidia. Una gabu ai e nohova taudia momo na ema una vidio bae itaia totona.

Marie-Line: Vanegai, Jack na e noia Camopi hanuana ai Memorial tok baine heni. Una gabu baiala totona, Oyapock Sinavaina ai hora foa bouti amo a heau. Una nega na a moalelaia bada.

Jack: Sinavai ranuna e aru haraḡaharaḡava neganai, nadi danu e koudiava bona una na mai garina. A gui boutina ese una aru e hanaiava dalana na na hoalaiava. Bouti e tariava tauna ese una aru ihanaina dalana baine dibaia namonamo. Una na aiemai ai e vara ḡauna ta. Ena be una negai Witnes taudia na 6, to Memorial ela taudia na 50 bona idia haida na Amerindia taudia.

Marie-Line: Iehova e uramu bae hesiai henia matamata taudia na ekspiriens unu bamona bae moalelaia diba. Nega unu bamodiai Iehova bavabidadama henia bona emu abidadama na be goadamu. Nega momo a itaiamu Iehova ese ai na e durumaimu.

Umui na gado momo o diba. Umui emui ai unu gado idibadia be haraḡa, a?

Jack: Lasi. To, lau ese unu gado idauidau na dibadia unu amo baina haroro bona kongrigeisin baina durua. Lau na Sranantongo * gado ai Baibul duahiduahi ta do asina karaia to Gima Kohorona Stadi hari na hakaua. Tadikaka ta na nanadaia bema ia ese egu hereva na e lalopararalai. Ia na e haere eto: “Nega haida o herevalaimu ḡaudia na asia lalopararalaimu, to una na namo.” Maraḡidia ese lau na e durugu bada. Na kerereva negadiai e hamaoromaoroguva, to badadia na unu na asie kara tomava. Maraḡidia amo ḡau momo na diba.

Marie-Line: Teritori ta ai, lau na mai egu Baibul stadi haida French, Portuguese, bona Sranantongo gado ai. Taihu ta ena heduru herevana na ina, bema dina ta lalonai gado idauidau ai stadi baina kara, namona na asi dibagu namonamo gadona ai stadi baina kara matama to dokonai mai dibagu namonamo gadona ai stadi baina kara. Gabeai, iena heduru herevana anina na lalopararalaia.

Dina ta, baina kara stadidia na rua, ta be Sranantongo gado ai, ma ta be Portuguese gado  ai. Stadi iharuana na karaiava neganai taihu ta na lau e hamaorogu, eto: “Marie-Line, na laloamu ḡau ta na kerere.” Bena na diba Brazil hahinena na Sranantongo gado ai na hereva heniava to dia Portuguese gado ai.

Emui hesiai ḡaukara o kara gabudiai e nohomu taudia ese umui na e lalokau henimuiva. Edena dalai umui na tura namodia ai ola?

Jack: Hereva Lada-isidia 11:25 na e gwaumu: “Harihari-bada tauna na ena taḡa ma e badamu.” Nega atova haida a bamodiava bona haida daidiai ḡau a karava. Kingdom Hall ihanamona ḡaukarana ai tadikaka haida na lau e hamaorogu eto: “Ene na pablisa ese bae kara.” To, lau na na gwa: “Lau danu pablisa ta. Una dainai bema ḡaukara haida mimia, lau na na uramu baina heduru.” Ena be ita iboudai na ta uramu siboda eda ura ḡaudia haida baita kara, to nega momo ai na a lalova una ese ma haida idurudia karana basine koua na namo.

Marie-Line: Ai na a hekwarahiva tadikaka taihu baia hetura henidia totona. Unu amo a dibava ededia negai idia na e urava ta ese natudia baine naridia eiava sikuli amo baine abidia. Bena una ese e durumaiva emai palani ma a haidaudiava idia baia durudia totona. Unu amo ai na tura namodiai a laova bona a heḡaeḡaeva idia baia durudia totona.

Hesiai ḡaukara na pablisa dia momo gabudiai o kara dainai, dahaka hahenamo o abi?

Jack: Ful-taim hesiai ḡaukara amo hahenamo momo a abi. Nega momo Iehova ese e havara ḡaudia na a moalelaiva. Ena be hekwakwanai danu a davariva, to a lalomainova badina a dibava a laova gabudia ai Dirava ena taunimanima ese aina e durumaiva.

Eregabegu ai, egu Kristen gini siri karana dainai French Guiana ena dibura ruma ai e atogu. Asi na laloa lau na nega ta misinari ḡaukarana baina karaia bona diburai e nohova taudia baina haroro henidia. Momokani, Iehova na hariharibada Diravana bona lau na e hanamogu.

Marie-Line: Na moalelaia bada ḡauna na haida idurudia karana. A moalemu badina ai na Iehova ena hesiai ḡaukara a karaiamu. Una ese emai headava danu e hagoadaia. Nega haida, Jack ese e noiguva bema heḡereḡere hahegoada bae abi headava taudia baia boiridia baia aniani hebou totona. Nega momo lau na gwauva: “Lau danu unu na lalo tomamu.” Nega momo aiemai lalohadai na tamona.

Jack: Vanegai, dokta ese e hamaorogu lau na prostate cancer na abia. Ena be Marie-Line na se uramu una baia herevalaia, to na hamaoroa nato: “Lalokau, lau na do asina buruka to bema baina mase haraḡa, lau na mai dibagu egu mauri na na ḡaukaralaia Iehova na hesiai henia dainai una ese na e hamoalegumu.”​—⁠Gen. 25:8.

Marie-Line: Iehova ese ai na asainmen momo e henimai, bona dala e kehoa guna a lalova basia kara diba ḡaudia na a karadia. Emai mauri ai hahenamo momo a davari. Iehova ena orea ese baine siaimai lao gabudia na baiala, badina a abia daemu Iehova ese ai na nega iboudiai be durumaimu.