1. Kohelete 3:1, 7 ese dahaka e hadibadamu?

ITA haida na ta uramu baita herevahereva. Haida be e uramu asi reḡereḡedia bae noho. Ina atikol ena siri badana ese e hahedinaraiamu, herevahereva bona asi reḡereḡeda baita noho na mai negadia. (Kohelete 3:1, 7 ba duahi.) To, nega haida ita na ta uramu tadikaka taihu haida na ḡau momo bae herevalai. Bona ta uramu haida na basie hereva momo.

2. Edena negai baita hereva bona baita hereva dalana taravatudia be daika ese baine ato na maoro?

² Herevahereva karana na Iehova ena harihari ḡauna ta. (Eso. 4:10, 11; Apok. 4:11) Iena Hereva amo ita e durudamu una harihari ḡauna iḡaukaralaina dalana baita lalopararalaia. Ina atikol ai, Baibul ese e herevalaidia taudia edia haheitalai baita herevalaimu, unu ese be durudamu baita dibamu edena nega be baita hereva negana bona edena nega be asi reḡereḡeda baita noho. Bona baita itaiamu, Iehova ese haida ediai ta gwauraimu herevadia be ede e lalodia tomamu. Baita herevalaiamu ḡauna ginigunana na edena negai baita hereva na namo.

3. Roma 10:14 heḡereḡerena, edena negai baita hereva?

³ Namona na hanaihanai baita heḡaeḡae Iehova bona Basileia baita herevalaidia totona. (Mat. 24:14; Roma 10:14 ba duahia.) Unu baita kara tomamu neganai, ita na Iesu ta tohotohoamu. Iesu tanobada ema badina badana ta na ma haida ediai Tamana sivaraina momokanina baine hahedibalaia. (Ioa. 18:37) To, baita helalotao, eda hereva dalana na mai anina bada. Una dainai, haida ediai Iehova ta herevalaiamu neganai, namona na ‘mai manauda bona mai hematauraida ida’ baita hereva, bona  ta ena hemami bona ia ese e abi daemu ḡaudia na baita lalodia bada. (1 Pet. 3:15) Unu amo e kamonaimu tauna na ḡau ta baita hadibaiamu bona reana kudouna baita hamarereamu.

4. Hereva Lada-isidia 9:9 heḡereḡerena, elda edia hereva amo haida be ede bae durudia toma?

⁴ Bema elda taudia na e itaiamu tadikaka ta eiava taihu ta na sisiba baine abi, namona na bae hereva henia. Bona basie hahemaraia totona, idia ese nega maorona bae abia hidi. Namona na bae boiria tabe to dia tadikaka taihu vairadiai bae hereva henia. Hanaihanai elda taudia na edia hereva dalana amo bae hahedinaraia e sisiba heniamu tauna na e matauraiamu. To, namona na Baibul ena hahekau herevadia amo ma haida bae durudia aonega dalanai bae raka totona. (Hereva Lada-isidia 9:9 ba duahia.) Bema haida baita hereva henidia na maoro, dahaka dainai basita gari na namo? Mani haheitalai idaudia rua aita herevalaia. Ta be, tau ta ese natuna edia kerere daidiai bema sisiba henidia na namo, to ma ta be, hahine ta na e horoa pavapavana baine hereva henia na namo.

5. Edena negai Hahelaḡa Tauna Badana Eli bema hereva na maoro?

⁵ Hahelaḡa Tauna Badana Eli ese natuna memerodia raruosi na e lalokau henidia badava. To, unu memero raruosi ese Iehova na asie matauraiava. Idia na hebou kalagana ai hahelaḡa ḡaukarana e karaiava. To idia ese edia maduna na dala kererenai e ḡaukaralaiava, Iehova e heniava boubou ḡaudia na asie matauraiva, bona matabodaḡa karadia e karava. (1 Sam. 2:12-17, 22) Mose ena taravatu heḡereḡerena, Eli natuna na edia kara dainai bae hamasedia na maoro, to Eli ese idia na se sisiba henidia bona dounu hebou kalagana ai edia hesiai ḡaukara e karava. (Deu. 21:18-21) Iehova ese Eli ena kara be ede e laloa toma? Ia na Eli e hamaoroa, eto: “Dahaka dainai natumu o matauraidia badamu, lau o matauraigu maraḡimu?” Bena Iehova na lalona e hadaia Eli natuna raruosi baine hamasedia.​—1 Sam. 2:29, 34.

6. Eli ena haheitalai amo dahaka ta dibamu?

⁶ Eli ena haheitalai amo ita na mai anina bada ḡauna ta tame dibaia. Bema ta dibamu turada ta eiava varavarada ta ese Iehova ena taravatu e utua, namona na baita hereva henia, bona baita durua Iehova ena taravatu na baine lalodia bada. Bena baita hagoadaia Iehova ese e abidia hidi taudia amo heduru baine abi. (Iak. 5:14) Ita na asita uramu Eli e kara heḡereḡerena baita kara, turada ta eiava varavarada ta baita matauraia bada to Iehova na baita laloa  maraḡi. To bema baita hekwarahimu ta ena kerere baita hamaoromaoroamu, una ese ia na be duruamu. Eli ena kara bona Israel hahine ladana Abigail ena kara edia idau aita lalodia.

7. Dahaka dainai Abigail na David e hereva henia?

⁷ Abigail na taḡa tauna Nabala adavana. David bona ena tatau na King Saulo ena amo e heau neganai, idia na Nabala ena mamoe e naridiava taudia ida e nohova bona Nabala ena mamoe na henaohenao taudia amo e gimadiava. To Nabala ese edia kara namona e laloa, a? Lasi. David ese e noia aniani bona ranu taidia iena tatau baine henidia neganai, Nabala na e badu bona e gwau henidia. (1 Sam. 25:5-8, 10-12, 14) Una dainai, David na e badu dikadika bona e ura Nabala ena rumai e nohova tataudia iboudiai baine aladia mase. (1 Sam. 25:13, 22) Una dika be ede bae hanaia toma? Abigail na e diba ia ese ḡau ta baine gwauraia na namo, una dainai lalona e hagoadaia bena ela unu tatau 400 e hedavari henidia bona David e hereva henia.

8. Abigail ena haheitalai amo dahaka ta dibamu?

⁸ Abigail na David ida e hedavari neganai, ia na mai lalogoadana bona hematauraina ida e hereva bona e ura ia ese baine gwauraia ḡauna na David ese baine karaia. Ena be e vara ḡauna na dia Abigail ena kerere, to ia ese David e sori henia. Ia ese David ena kara namodia e gwaurai bona heduru totona Iehova enai e tabekau. (1 Sam. 25:24, 26, 28, 33, 34) Abigail heḡereḡerena, bema ta itaiamu ta na dala kererena e badinaiamu neganai, namona na baita hereva henia. (Sal. 141:5) Namona na mai hematauraida ida baita hereva henia, to baita lalogoada danu na namo. Bema mai lalokauda ida ta baita sisiba heniamu, ta hahedinaraiamu ita na tura korikorina ta.​—Her. 27:17.

9-10. Elda taudia na haida e sisiba henidiamu neganai, dahaka bae laloatao na namo?

⁹ Bema kongrigeisin ai ta na dala kererena e  badinaiamu, namona na elda taudia na bae lalogoada bena e kerere tauna bae hereva henia. (Gal. 6:1) Elda taudia na e lalopararamu idia danu dia ḡoḡoevadadae bona nega haida sisiba na be abimu. To, una ese idia na se koudiamu sisiba bae abi taudia bae matahakani henidia totona. (2 Tim. 4:2; Tito 1:9) Idia na ta e sisiba heniamu neganai, mai edia aonega bona haheauka ida e herevamu. Idia ese tadikakadia na e lalokau heniamu, bona lalokau dainai e duruamu. (Her. 13:24) To idia ediai Iehova imatauraina na ḡau badana, una dainai Iena taravatu e badinamu bona kongrigeisin na dika amo e gimaiamu.​—Apos. 20:28.

¹⁰ Tame herevalai ḡaudia amo tame diba ita be ededia negai baita hereva. Bona ededia negai basita hereva na namo. To nega unu bamodiai dahaka ese dala maorona ibadinana karana be ha-aukaiamu?

11. Iamesi be edena haheitalai e ḡaukaralaia, bona edena dalai eda hereva dalana e haheitalaiamu?

¹¹ Nega haida eda hereva ibiaguna na auka. Baibul e torea tauna Iamesi (Iakobo) ese haheitalai ta amo una e herevalaia. Ia na e gwa: “Tau ta ena hereva ai se hekwakwanaimu, ia na ḡoevadae tauna, tau-anina ireḡuna na mai dibana.” (Iak. 3:2, 3) Leather varona ta na hosi kwarana bona uduna ai e atoamu. Hosi ai e gui tauna na una leather varona be veriamu neganai, hosi na iena hahekau dalana be badinaiamu eiava be stopumu. Bema hosi ai e gui tauna na varo basine dogoatao namonamomu, hosi na sibona ena heau dalana be badinaiamu bena hosi bona e gui tauna na dika be davarimu. Una heḡereḡerena, bema eda hereva dalana basita biaguamu, una ese dika bada be havaraiamu. Mani aita itaia, ededia negai eda hereva nahuadia baita toho bona basita hereva na maoro.

12. Ededia negai basita hereva na namo?

¹² Bema o itaiamu tadikaka ta eiava taihu ta  na ḡau haida e diba to unu na haida basie diba ḡaudia, oi be dahaka bo karamu? Heḡereḡere, bema gavamani ese eda ḡaukara e taravatumu tanodia ai e nohomu tadikakana ta bo hedavari heniamu, oi be unuseniai eda ḡaukara e haheauamu dalana bo henanadailaiamu, a? Momokani, oi na badi namodia daidiai o henanadaimu. Heḡereḡere, tadikaka taihu na ta lalokau henidiamu dainai ta uramu ediai e varamu ḡaudia baita diba. Bona ta uramu idia ta ta daidiai baita ḡuriḡuri. To, una na dia nega maorona baita hereva. Bema ta baita doria basine herevalai ḡaudia baine herevalai, ta hahedinaraiamu ia bona unukahai e nohomu tadikaka taihu na asita lalokau henidiamu, badina idia na mai dibadia una tadikaka na hereva ta basine gwauraiamu. Momokani, ita na asita uramu gavamani ese e taravatu tanodia ai e nohomu tadikaka taihu edia hekwakwanai baita habada. Una heḡereḡerena, gabu unu bamodia ai hesiai ḡaukara e karamu tadikaka taihu na asie uramu Witnes taudia ese edia haroro ḡaukara eiava Kristen hesiai ḡaukara e haheauamu daladia bae herevalai.

13. Hereva Lada-isidia 11:13 heḡereḡerena, elda taudia be dahaka bae kara, bona dahaka dainai?

¹³ Elda taudia ese Baibul ena hahekau herevana Hereva Lada-isidia 11:13 ai bae badinaia na namo, ma haida basie diba ḡaudia na basie herevalai. (Ba duahia.) To, bema elda tauna ta na mai adavana, nega haida una sisiba ibadinana na be aukamu. Headava taudia na edia hetura karana baine goada totona, idia na lalodiai e miamu herevadia, edia hemami, bona edia lalohekwarahi e herevalai heboumu. To, elda tauna na mai dibana kongrigeisin ai haida edia “hehuni herevadia” na adavana basine hamaorolaia. Bema unu be kara tomamu, tadikaka taihu ese edia manoka ḡaudia na basie hamaorolaiamu eiava sibona ladana na be hadikaia dibamu. Kongrigeisin ai maduna e huamu taudia na “basie udu mauri” o basie koikoi. (1 Tim. 3:8.) Anina na idia ese haida na basie koidia eiava basie maumau. Bema elda tauna na adavana e lalokau heniamu, adavana basine diba herevadia na basine herevalai.

14. Bema taihu adavana na elda ta, edena dalai baine durua diba?

¹⁴ Hahine ese adavana baine durua totona, adavana na basine doria ia basine diba ḡaudia baine hamaorolaia totona. Bema hahine na unu be kara tomamu, ia na dia adavana mo be duruamu to adavana e hereva henia taudia danu be matauraidiamu. Ḡau badana be ia ese Iehova be hamoaleamu, badina una ese kongrigeisin lalonai maino bona lalotamona be havaraiamu.​—Roma 14:19.

15. Iehova ese Iobu turana tatoiosi be ede e lalodia toma, bona dahaka dainai?

¹⁵ Iobu bukana ese be durudamu baita dibamu ededia dalai bona ededia negai baita hereva. Iobu ese hisihisi idauidau e haheaukalai murinai, tatau foa na ia dekena ela tauhalo bae henia bona bae sisiba henia totona. To, hora momo lalodiai idia na hereva ta asie gwauraia. Gabeai ini tatau tatoi​—Elifas, Bildad, bona Sofara​—ese e gwaurai herevadia amo e hahedinaraia, idia ese Iobu iduruna herevadia na asie lalohadailai. To idia na e lalohadaiva ede bae hahedinaraia toma Iobu na kerere ta e karaia. Idia ese e gwaurai herevadia haida na mamaoro, to Iobu bona Iehova dainai e gwaurai herevadia momo na dia nanamo bona unu na hereva koikoidia. Idia ese Iobu na kererena e gwaurai. (Iobu 32:1-3) Iehova be dahaka e kara? Ia ese unu tatau na e badu henidia dikadika. Idia na e gwauraidia kavakava bona e hamaorodia Iobu bae noia idia daidiai baine ḡuriḡuri.​—Iobu 42:7-9.

16. Elifas, Bildad, bona Sofara edia haheitalai dikana amo dahaka ta dibamu?

 ¹⁶ Elifas, Bildad, bona Sofara edia haheitalai dikana amo ita na ḡau haida ta dibamu. Ginigunana na, tadikakada na basita hahemaoro henidia. (Mat. 7:1-5) To, hereva ta do asita gwauraia neganai, baita hakala namonamo guna. Unu amo idia ediai e vara ḡauna baita lalopararalaiamu. (1 Pet. 3:8) Iharuana na, ta herevamu neganai, namona na mai eda gado namo ida baita hereva bona hereva maorodia baita gwaurai. (Efe. 4:25) Bona ihatoina na, Iehova na haida ida ta herevalaimu herevadia na e lalodia badamu.

17. Elihu ena haheitalai amo dahaka ta dibamu?

¹⁷ Iobu e vadivadia tauna ihahanina na Elihu, ia na Abraham varavarana ta. Iobu bona unu tatau tatoi e herevava neganai, ia na e hakalava. Ia na e hakala namonamo dainai, Iobu na hereva namodia amo e hagoadaia bona sisiba maorodia e gwaurai Iobu ena lalohadai baine hamaoromaoroa totona. (Iobu 33:1, 6, 17) Elihu enai Iehova baine imodaia na ḡau badana to dia ia sibona eiava ma tau ta. (Iobu 32:21, 22; 37:23, 24) Elihu ena haheitalai amo ta dibamu, baita hereva mai negana bona basita hereva danu mai negana. (Iak. 1:19) Bona tame dibaia ḡauna ma ta na sisiba ta henimu neganai, iseda ura badana na Iehova baita imodaia.

18. Edena dalai baita hahedinaraia ita ese Iehova ena harihari ḡauna, herevahereva karana na ta laloa badamu?

¹⁸ Baibul ena hereva heḡereḡerena nega bona dala maorodiai baita herevamu neganai, ta hahedinaraiamu Iehova ena harihari ḡauna na ta laloa badamu. Iehova ena lauma amo e hasiahua tauna King Solomon na ini e gwau toma: “Hereva maorona igwauraina na gold apolodia silver boseadia lalodiai na heheto.” (Her. 25:11) Haida ese e gwauraimu herevadia baita hakala namonamomu bona baita gwaurai herevadia baita lalodia namonamomu neganai, eda hereva na vaitani gold apolodia na heto, anina na eda hereva na dava bada ḡaudia bona mai hairaidia. Ena be ita na dia hereva momo tauda eiava hereva momo tauda, to eda hereva amo haida baita hagoadadia bona Iehova baita hamoalea diba. (Her. 23:15; Efe. 4:29) Una harihari ḡauna namona dainai Dirava baita tenkiu henia.