1-2. Bema oi na dia heḡereḡere ba bapatiso, dahaka dainai basio lalomanoka? (Rau 1 laulauna ba itaia.)

 BEMA oi na o uramu ba bapatiso, una na tahua ḡauna namona. Oi be heḡereḡere ba bapatiso, a? Bema oibe, bona elda taudia danu unu e lalo tomamu, bapatiso bavabia na namo. Unu amo Iehova ena hesiai ḡaukara lalonai hahenamo momo bo abimu.

² To, ta ese oi e hamaoromu ḡau haida do ba hanamo guna, a? Eiava sibomu ese una o lalopararalaiamu, a? Bema oibe, basio lalomanoka. Ena be oi na matamata eiava buruka, to una mai anina bada tahua ḡauna na bo haḡuḡurua dibamu.

3. Etiopia tauna ese Filipo be edena henanadai e henia, bona edena henanadai danu baita laloa? (Apos. 8:36, 38)

³ Aposetolo Edia Kara 8:36, 38 ba duahidia. Dagi bada Etiopia tauna ta ese evanelia tauna Filipo e nanadaia: “Dahaka ese ibapatisogu e laoa ahumu?” Una Etiopia tauna na e ura baine bapatiso, to ia be momokani heḡereḡere una mai anina bada ḡauna baine karaia, a?

4. Edena dalai Etiopia tauna ese e hahedinaraia ia na e ura diba ma haida dounu baine abi?

⁴ Etiopia tauna na “Ierusalem ela tomadiho totona.” (Apos. 8:27) Toana na ia ese Iuda tomadiho e abia dae. Una dainai ia na Heberu Toretore helaḡadia amo Iehova e dibaia. To, dounu e urava diba ma haida baine abi. Filipo ese dala ai e davaria neganai, una tau be dahaka e karava? Ia na peroveta tauna Isaia ena toretore e duahiva. (Apos. 8:28) Unu na Baibul ena hereva  momokani dobudia. Una Etiopia tauna ese Baibul ena hahediba hereva badadia haida e dibadia mo na dia heḡereḡere, ia na e ura diba ma haida dounu baine abi.

5. Etiopia tauna na e diba ḡaudia daidiai dahaka e kara?

⁵ Una tau na Etiopia edia kwini henunai e ḡaukarava; “ena kohu ireḡuna tauna.” (Apos. 8:27) Una dainai ena maduna na momo bona e bisiva, to nega e ato Iehova baine tomadiho henia. Ia na dia hereva momokani mo e dibaia, to e diba ḡaudia e badina danu. Una dainai Etiopia amo e laolao, Ierusalem dubuna ai Iehova baine tomadiho henia totona. Una laolao ai nega bona moni bada e ḡaukaralai, to unu na se lalo, ia ese e laloa bada ḡauna na, Iehova baine tomadiho henia.

6-7. Etiopia tauna ena lalokau Iehova enai be ede e hagoadaia toma?

⁶ Etiopia tauna na Filipo amo mai anidia bada hereva momokanidia haida e diba, una hereva ta be ina, Iesu na Mesia. (Apos. 8:34, 35) Una dagi bada tauna na Iesu ese ia dainai e karaia ḡauna e diba neganai e moale. Bona dahaka e kara? Ia ese Iuda tomadiho na dounu bema badinaia diba. To, ena lalokau Iehova bona Natuna Iesu ediai e hagoadaia dainai, abi hidi e kara baine bapatiso bena Iesu Keriso ena hahediba ai bainela. Filipo ese e itaia una tau na da heḡereḡere dainai e ha bapatisoa.

⁷ Bema Etiopia tauna ena haheitalai bo tohotohoamu, oi danu bapatiso iabina totona bo heḡereḡere dibamu. Bona mai lalo goadamu ida bo gwaumu, “Dahaka ese ibapatisogu e laoa ahumu?” Mani aita itaia oi be edena dala ai Etiopia tauna ba tohotohoa diba: (1) Ia na dounu diba e abi, (2) e diba ḡaudia e badinadia, bona (3) ena lalokau Dirava enai na dounu e hagoadaia.

8. Ioane 17:3 be ede ba badinaia toma?

⁸ Ioane 17:3 ba duahia. Iesu ena hereva ese oi e durumu Baibul o stadilaia, a? Ita momo na e duruda dainai Baibul ta stadilaia. To ina siri ese danu e durudamu Dirava na dounu baita dibaia, a? Oibe. “Dirava Korikori tamona” idibana karana na basita hadokoamu. (Koh. 3:11) Una na baita karaia hanaihanai ḡauna. Iehova idibana karana baita habadaiamu neganai, eda hetura karana ia ida na be goadamu.​—Sal. 73:28.

9. Baibul ena hereva badadia ta dibamu murinai, dahaka baita kara be namo?

⁹ Iehova ta dibaia matamamu neganai, Baibul ena hereva badadia mo ta dibamu. Aposetolo Paulo ese Heberu kongrigeisin e tore henidia neganai, unu hereva badadia na e gwauraidia “Dirava ena hereva badidia.” Ia ese unu hereva na se lalodia maraḡi, to  beibi ese e inumu milikadia o rata ida e haheḡereḡerea. (Heb. 5:12; 6:1) Danu, Kristen taudia iboudia e hagoadadia, dia hahediba hereva badadia mo bae diba, to Dirava ena hereva momokani dobudia danu bae dibadia. Oi o uramu Baibul ena hahediba hereva dobudia ba dibadia, a? O ura dikadikamu Iehova bona ena ura dounu ba dibadia, a?

10. Dahaka dainai haida ediai stadi karana na auka?

¹⁰ Momo ediai stadi karana na auka. To oi ese stadi karana be ede o laloa tomamu? Skuli ai, duahiduahi bona stadi namonamo karadia o diba, a? Stadi karana be o moalelaia bona ḡau momo o dibadia, a? Eiava o laloamu buka amo diba iabina karana na auka? Bema oibe, basio lalomanoka, haida danu unu e hemami tomamu. To, Iehova ese baine durumu diba. Ia na ḡoevadae bona Hahediba Tauna hereadaena.

11. Edena dala ai Iehova ese e hahedinaraia ia na “Hahediba Tauna Badana”?

¹¹ Iehova na sibona e hegwaurai “emui Hahediba Tauna Badana.” (Isa. 30:20, 21; NWT) Ia na haheauka, hebogahisi, bona laloparara Tauna. Bona e hadibadiamu taudia edia kara namodia mo e itamu. (Sal. 130:3) Bona se doridamu basita kara diba ḡaudia baita kara. Ba helalotao, ia ese haramu e karaia; una na harihari ḡauna namo hereana ta. (Sal. 139:14) Danu diba baita abia urana na lalodai e atoa. Bona e uramu ia idibana karana na baita hahesiriua bona baita moalelaia. Una dainai, Baibul ena hereva momokanidia baita ‘ura henidia’ na aonega karana. (1 Pet. 2:2) Namona na ba haḡuḡuru diba tahua ḡaudia bavato, bona dina ta ta Baibul ba duahia bona ba stadilaia. (Ios. 1:8) Iehova ena heduru amo, Baibul iduahina bona iena kara namodia idibadia karadia na bo moalelaimu.   

12. Dahaka dainai Iesu ena mauri baita stadilaia na namo?

¹² Hanaihanai nega bavato Iesu ena mauri bona hesiai ḡaukara ba lalodia dobu. Ini nega aukadia lalodiai Iehova baita hesiai henia totona, Iesu ena haheitalai baita tohotohoa namonamo. (1 Pet. 2:21) Iesu ese ena hahediba e hamaorodia idia na hekwakwanai do bae davari. (Luka 14:27, 28) To, mai dibana ena hahediba korikoridia na Dirava bae badinaia diba, ia e kara heḡereḡerena. (Ioa. 16:33) Namona na Iesu ena mauri ba stadilaia, bona dina ta ta ai ia ba tohotohoa.

13. Iehova enai be dahaka ba ḡuriḡurilai, bona dahaka dainai?

¹³ Diba mo bavabia na dia heḡereḡere. Diba bavabi badina na o uramu Iehova ba dibaia namonamo, ba lalokau henia bona bavabidadama henia. (1 Kor. 8:1-3) Iehova o dibaiamu lalonai, ba noia baine durumu emu abidadama ba hagoadaia totona. (Luka 17:5) Ia ese ḡuriḡuri unu bamodia na e haerelaimu. Eda Dirava enai diba maoromaorona bo abiamu neganai, emu abidadama be goadamu bona be durumumu kara ma haida ba kara.​—Iak. 2:26.

14. Edena dala ai aposetolo Petro ese e hahedinaraia ta dibamu ḡaudia baita badina na mai anina bada? (Laulau danu ba itaia.)

¹⁴ Aposetolo Petro ese e hahedinaraia, Keriso ena hahediba taudia ese e dibamu ḡaudia bae badinadia na mai anina bada. Ia ese Noa sivaraina e herevalaia. Iehova ese Noa e hamaoroa, abata amo kara dika taudia baine haoredia. Noa bona ena ruma bese bae roho mauri totona abata bainema sivaraina bae diba mo na dia heḡereḡere. Ba laloatao Petro na abata do se vara negana e herevalaia, una na Noa ese ‘lagatoi e karaiava negana.’  (1 Pet. 3:20) Oibe, Noa bona ena ruma bese na lagatoi o bouti badana ta e karaia, unu amo e hahedinaraia Dirava amo e diba ḡaudia e badina. (Heb. 11:7) Petro ese Noa e karaia ḡauna na bapatiso ida e haheḡereḡerea, e gwa: “Una heḡereḡerena be bapatiso, harihari umui eme hamaurimui.” (1 Pet. 3:21) Una dainai, bapatiso bavabi totona ba kara ḡaudia na Noa bona ena ruma bese ese laḡani momo lalodiai bouti badana bae karaia totona e kara ḡaudia ida baita haheḡereḡeredia diba. Dahaka ba kara unu amo ba heḡereḡere ba bapatiso?

15. Edena dala ai baita hahedinaraia ita na ta helalo-kerehai momokani?

¹⁵ Baita karaia ḡauna ta na, eda kara dika amo baita helalo-kerehai momokani. (Apos. 2:37, 38) Baita helalo-kerehai momokanimu neganai, eda kara na baita haidaumu. Iehova ese se moalelaimu karadia, heḡereḡere matabodaḡa, siga ani karana, bona hereva dikadia igwauraidia karadia be o dadaraidia, a? (1 Kor. 6:9, 10; 2 Kor. 7:1; Efe. 4:29) Bema lasi, namona na ba hekwarahi ba dadaraidia. E stadi henimumu tauna eiava kongrigeisin elda ba noidia bae durumu. Bema oi na matamata bona tamamu sinamu ida doini o nohomu, ba noidia bae durumu bapatiso bavabia dalana e kouamu kara mirodia ba dadarai totona.

16. Iehova itomadiho henina karadia baita goadalai totona dahaka baita kara be namo?

¹⁶ Hanaihanai Iehova itomadiho henina karadia baita goadalai na ḡau badana. Anina na Kristen heboudia baitala bona tok bona haere baita heni. (Heb. 10:24, 25) Bona bema oi na heḡereḡere haroro ḡaukara ba karaia, namona na una ḡaukara ba goadalaia. Una hahemauri ḡaukarana bo karaia hanaihanaimu neganai, bo moalemu. (2 Tim. 4:5) Bema oi na matamata bona tamamu sinamu ida o nohomu, sibomu ba henanadai: ‘Lau be nega iboudiai tamagu bona sinagu ese e hamaorogumu baina hebou bona baina haroro, a? Eiava sibogu ese unu na karamu?’ Bema sibomu ese unu bo karamu, bo hahedinaraiamu Iehova Dirava na o abidadama heniamu, o lalokau heniamu bona o tenkiu heniamu. Unu na ‘Dirava ibadinana’ karadia, bona emu harihari ḡaudia Iehova enai. (2 Pet. 3:11; Heb. 13:15) Mai eda ura ida eda  Dirava ta heniamu harihari ḡaudia na ia ese e moalelaimu. (2 Korinto 9:7 ba haheḡereḡerea.) Ḡau namodia Iehova ta heniamu neganai ta moalemu.

17-18. Edena kara ese baine durumu ba bapatiso, bona dahaka dainai? (Hereva Lada-isidia 3:3-6)

¹⁷ Bapatiso iabina totona o goadamu lalonai, hahetoho na bo davarimu. Emu abidadama dainai reana taunimanima haida ese be kirikirilaimumu, be gwau dika henimumu bona be daḡedaḡe henimumu. (2 Tim. 3:12) Reana o hekwarahimu kara kererena ta ba dadaraia, to nega haida una kara na ma o karaia loumu. Eiava reana emu tahua ḡauna na so haḡuḡurua dainai bo lalohishisimu o bo lalomanokamu. Dahaka ese baine durumu ba haheauka? Iehova ilalokau henina karana.

¹⁸ Iehova ilalokau henina karana na kara hereadaena. (Hereva Lada-isidia 3:3-6 ba duahidia, NWT) Una lalokau ese be durumumu hekwakwanai idauidau bo haheaukalaimu. Baibul ese Iehova ena mia hanaihanai lalokauna iena hesiai taudia ediai, na e hahedinaraia. Una mia hanaihanai lalokauna dainai, ena hesiai taudia na se rakatanidiamu. (Sal. 100:5, NWT) Dirava ese oi na ia heida-idana e karamu. (Gen. 1:26) Una dainai iena lalokau be ede ba hahedinaraia toma?   

19. Iehova ese oi daimu ai e kara ḡaudia daidiai edena dala ai emu tenkiu karana ba hahedinaraia? (Galatia 2:20)

¹⁹ Namona na Dirava ba hanamoa o ba tenkiu henia. (1 Tes. 5:18) Dina ta ta ai, sibomu ba henanadai, ‘Iehova be edena dala ai e hahedinaraiamu lau na e lalokau henigumu?’ Bena emu ḡuriḡuri ai, oi daimu ai e kara ḡaudia daidiai ba tenkiu henia. Ba laloparara Iehova na oi e lalokau henimumu dainai, ḡau namodia momo e kara, aposetolo Paulo e laloparara heḡereḡerena. (Galatia 2:20 ba duahia.) Sibomu ba henanadai, ‘Lau be na uramu Iehova enai egu lalokau baine hahedinaraia, a?’ Iehova ilalokau henina karana ese be durumumu hedibaḡani bona hekwakwanai idauidau bo hanaidia. Danu be hagoadamumu Iehova itomadiho henina ḡaukaradia bo goadalaimu, unu amo dina ta ta ai emu lalokau ia enai bo hahedinaraiamu.

20. Dahaka ba kara emu mauri Iehova enai ba gwauhamatalaia totona, bona dahaka dainai una na abi hidi badana?

²⁰ Iehova ilalokau henina karana ese be hagoadamumu  ḡuriḡuri amo emu mauri na ia enai bo gwauhamatalaiamu. Ba helalotao, Iehova enai emu mauri o gwauhamatalaiamu neganai, oi na da iena ela bona hanaihanai. Anina na nega namodia ai bona nega dikadia ai dounu ia bo hesiai heniamu. Una gwauhamata na ma basio karaia loumu. Vaia gwauhamata ta, ta karaiamu neganai, una na abi hidi badana. Mani ina a laloa: Emu mauri lalonai abi hidi momo bo karamu, idia haida na abi hidi namodia, to Iehova enai emu mauri o gwauhamatalaiamu abi hidina ese unu iboudiai na e hereadia. (Sal. 50:14) Satana na be hekwarahimu emu lalokau Iehova enai baine hamanokaia, iena ura na Iehova ba rakatania. To Satana ena dala na basio kehoa! (Iobu 27:5) Emu lalokau Iehova enai be goadamu neganai, emu gwauhamata na bo haḡuḡuruamu bona emu hetura karana Dirava ida na be goadamu.

21. Dahaka dainai baita gwaumu bapatiso na dia eda hesiai ḡaukara dokona to matamana?

²¹ Iehova o gwauhamata heniamu murinai, emu kongrigeisin elda ba hadibadia oi na o uramu ba bapatiso. To ba helalotao, bapatiso na dia emu hesiai ḡaukara dokona to matamana. Una na Iehova ena hesiai ḡaukara ba karaia hanaihanai negana e matamaiamu. Una dainai hari na nega namona emu lalokau Iehova enai ba hagoadaia. Tahua ḡaudia bavato unu amo dina ta ta ai emu lalokau baine goada. Una ese be durumumu ba bapatiso totona. Una na moale negana. To ina na matamana mo. Namona na emu lalokau Iehova bona Natuna ediai ba hagoadaia hanaihanai!