1-2. Ta e bapatisomu neganai dahaka e varamu, bona dahaka baita herevalaimu?

 OI ESE haida e bapatiso be do itadia, a? Edia bapatiso dinana ai tadikaka ese henanadai rua e henidia neganai, o kamonai idia na mai edia ura ida e haere, oibe. Ranu amo e dae neganai, edia ruma bese bona turadia o itadia mai moaledia ida imadia e poupou. Oibe, wiki ta ta ai, taunimanima tausen momo ese edia mauri na Iehova Dirava enai e gwauhamatalaimu bona e bapatisomu.

² Oi be bapatiso lalohadaina o abiamu, a? Bema oibe, Iehova ese oi na e lalomu badamu, badina ina tanobada dikana lalonai ia o “tahuamu.” (Sal. 14:1, 2) Ena be oi na matamata eiava buruka to ina atikol ese be durumumu. To ita ta bapatiso tauda danu ta uramu Iehova baita hesiai henia hanaihanai. Una dainai, mani Iehova baita hesiai henia badidia toi aita herevalaidia.

3. Dahaka dainai Iehova ena hesiai taudia ese hereva momokani bona kara maoromaoro e ura henimu? (Salamo 119:128, 163)

³ Iehova ese ena taunimanima e haḡanidia ‘hereva momokani bae ura henia.’ (Sek. 8:19) Iesu ese ia murinai e raka taudia e hamaorodia kara maoromaoro bae badinaia. (Mat. 5:6) Una anina na, ta na mai ena ura ida Dirava vairanai kara maorodia o kara namodia baine kara na namo. Oi ese hereva momokani bona kara maoromaoro o ura henimu, a? A dibamu o ura henidiamu. Oi ese koikoi bona kara dikadia iboudiai na o inai henidiamu. (Salamo 119:128, 163 ba duahidia.) Koikoi na ina tanobada lohiana, Satana ena kara. (Ioa. 8:44; 12:31) Satana ena ura ta na, Iehova Dirava ladana helaḡana baine hadikaia.  Eden ai gwau-edeede karana e vara negana amo Satana ese eda Dirava e sivarailaia koikoimu herevadia e halasimu. Ia na e uramu taunimanima na bae lalo, Iehova na sibona ena namo e lalomu, ia na lohia tauna koikoina, bona taunimanima na ḡau namodia se henidiamu. (Gen. 3:1, 4, 5) Satana ena koikoi dainai, taunimanima ese Iehova na e laloa kereremu. Taunimanima ese hereva momokani asie ‘ura heniamu’ neganai, Satana ese e hakaudia kereremu, unu amo kara dikadia idauidau e karamu.​—Roma 1:25-31.

4. Edena dala ai Iehova ese e hahedinaraia ia na “kara momokani Diravana”? (Laulau danu ba itaia.)

⁴ Iehova na “kara momokani Diravana,” bona ia e lalokau heniamu taudia na hereva momokani e hadibalaidiamu. (Sal. 31:5, NWT) Unu amo e durudiamu Satana ena koikoi herevadia e dadaraimu. Danu, Iehova ese ena hesiai taudia na e hadibadiamu, bae kara momokani bona bae kara maoromaoro. Unu amo bae matauraidia bona lalodia na bae maino. (Her. 13:5, 6) Baibul o stadilaia neganai, Iehova ese oi danu e hadibamu unu ba kara toma, a? O laloparara oiemu ai bona taunimanima iboudiai ediai Iehova ena dala na hereadae. (Sal. 77:13) Una dainai o ura Dirava ena kara maoromaoro ba badinaia. (Mat. 6:33) O uramu hereva momokani ba gwauraia hedinarai, bona ba hahedinaraia Satana ese eda Dirava Iehova e sivarailaiamu herevadia na koikoi. Edena dala ai unu ba kara toma?

5. Edena dala ai hereva momokani bona kara maoromaoro ba badinadia?

⁵ Namona na emu mauri dalana amo ba hahedinaraia, oi na o gwaumu: “Lau ese Satana ena koikoi herevadia na dadaraimu, bona hereva momokani na badinaiamu. Na uramu Iehova na egu Lohia Badana, bona e gwauraimu karadia maorodia baina kara.” Edena dala ai una ba karaia? Iehova ba ḡuriḡuri henia, emu mauri na ia enai ba gwauhamatalaia bona una gwauhamata ihamomokanina totona ba bapatiso. Oibe, hereva momokani bona kara maoromaoro o ura henimu dainai, ba bapatiso na maoro.

6. Salamo 45:4 ai Iesu Keriso ba lalokau henia badidia be ede e herevalai toma?

⁶ Iesu Keriso baita lalokau henia badidia haida na, Salamo bukana ai baita duahimu. (Salamo 45:4 ba duahia; NWT) Oibe, Iesu na hereva momokani, manau, bona  kara maoromaoro tauna. Bema oi na hereva momokani bona kara maoromaoro o ura henidiamu, anina na Iesu Keriso danu o lalokau heniamu. Iesu na mai ena lalogoada ida hereva momokani e gwauraia hedinarai bona kara maoromaoro e badinaia. (Ioa. 18:37) To, manau karana be ede e hahedinaraia toma?

7. Iesu ena manau karana ese oi be ede e durumu tomamu?

⁷ Iesu na ena kara amo manau karana e hahedinaraia. Heḡereḡere, dia ia sibona ladana e abia isi to nega iboudiai Tamana e hanamoa. (Mar. 10:17, 18; Ioa. 5:19) Una manau karana ese oi be ede e durumu tomamu? Una ese e durumumu dainai Dirava Natuna o lalokau heniamu bona o badinaiamu, ani? Dahaka dainai Iesu na e manau? Badina ia Tamana na manau tauna, bona e lalokau heniamu bona e tohotohoamu. (Sal. 18:35; Heb. 1:3) Iesu na Tamana ena kara e hahedinaraia ḡoevaḡoeva dainai, o uramu ia ba badinaia, a?

8. Dahaka dainai eda King Iesu ta lalokau heniamu?

⁸ Ita ese eda King Iesu ta lalokau heniamu, badina ia na Lohia Tauna hereadaena. Iehova sibona ese Natuna e hadibaia bona e abia hidi baine lohia. (Isa. 50:4, 5) Danu, Iesu na sibona ena ura idadaraina lalokauna e hahedinaraia. (Ioa. 13:1) Iesu na emu King dainai, ia o lalokau heniamu na maoro. Iesu ese ia e lalokau henia momokanimu taudia na e gwauraidiamu turana, bona ena haheḡani e badinamu amo edia lalokau e hahedinaraiamu. (Ioa. 14:15; 15:14, 15) Momokani, Iehova Natuna turana ai baitala na hahenamo badana!

9. Edena dala ai Kristen taudia edia bapatiso na Keriso ena heḡereḡerena?

⁹ Iesu ena haheḡani ta na, ia murinai e rakamu taudia ese bapatiso bae abi. (Mat. 28:19, 20) Ia na unu e kara toma. Dala haida ai iena bapatiso na idau ia murinai e rakamu taudia edia amo. (Maua ladana, “ Iesu Ena Bapatiso Bona Ena Hahediba Edia Bapatiso be Ede E Idau Toma?” ba itaia.) To dala ma haida ai be heḡereḡere. Iesu e bapatiso neganai, ia na sibona e heni Tamana ena ura baine karaia. (Heb. 10:7) Una heḡereḡerena, Iesu murinai e rakamu taudia e bapatisomu neganai, e hahedinaraiamu edia mauri na Iehova Dirava enai vada e gwauhamatalaia. Hari, edia mauri lalonai mai anina bada ḡauna na Dirava ena ura bae karaia, dia idia sibodia edia ura. Unu amo Biagudia ena haheitalai e tohotohoamu.

10. Dahaka dainai Iesu ilalokau henina karana ese baine hagoadamu ba bapatiso?

¹⁰ Oi ese o abia dae Iesu na Iehova Natuna tamona bona Dirava ese e abia hidi ita baine lohiada Pavapavana. O diba Iesu na manau bona Tamana ena kara e hahedinarai ḡoevaḡoeva. Ia ese hitolo taudia e ubudia, lalomanoka taudia e hagoadadia, bona gorere taudia e hanamodia. (Mat. 14:14-21) Danu, hari ina negai kongrigeisin e hakauamu dalana na o itaiamu. (Mat. 23:10) Bona mai dibamu ia na Dirava ena Basileia Pavapavana dainai, vaira negai ḡau namodia momo be karamu. Edena dala ai ba hahedinaraia ia na o lalokau heniamu? Iena haheitalai ba tohotohoa. (Ioa. 14:21) Una ba karaia dalana ta na, Iehova enai emu mauri ba gwauhamatalaia bona ba bapatiso.

11. Ba bapatiso badina badana be dahaka?

¹¹ Ba bapatiso badina badana be dahaka? Iesu ese Dirava ena haheḡani hereadaena e hahedinaraia, eto: “Lohiabada emu Dirava ba lalokau henia mai lalomu idoinai, mai laumamu [“emu mauri,” Nega Matamata Trensleisin] idoinai, mai daramu idoinai, mai goadamu idoinai.” (Mar. 12:30) Emu lalokau Dirava enai be unu bamona, a?

12. Dahaka dainai Iehova o lalokau heniamu? (Laulau danu ba itaia.)

 ¹² Badi momo daidiai Iehova o lalokau heniamu. Heḡereḡere, o lalopararamu ia na mauri badina bona “harihari ḡaudia namodia iboudiai bona herahia ḡaudia ḡoeva-daedia iboudiai” e henimu Diravana. (Sal. 36:9; Iak. 1:17) O moalelaimu ḡaudia namodia iboudiai na eda lalokau Diravana ena amo e maimu.   

13. Dahaka dainai mauri idavalaina boubouna na harihari ḡauna hereadaena?

¹³ Mauri idavalaina boubouna na Iehova ese e henida harihari ḡauna hereadaena ta. Dahaka dainai unu ta gwau tomamu? Mani Iehova bona Natuna edia hetura karana aita laloa. Iesu na e gwa: “Tamagu ese e lalokau henigumu” bona “Tamagu na lalokau heniamu.” (Ioa. 10:17; 14:31) Idia raruosi na laḡani bilion bilion e noho hebou dainai edia hetura karana na goada. (Her. 8:22, 23, 30) Una dainai, Dirava ese Natuna e itaia e hisihisi bona e mase neganai, e lalohisihisi bada herea. Iehova ese oi bona taunimanima iboudiai na e lalokau henimui badamu, una dainai mai ena ura ida Natuna lalokauna na boubou ḡauna bamona e heni, unu amo dala e kehoa oi bona ma haida ese mauri hanaihanai bavabia diba. (Ioa. 3:16; Gal. 2:20) Oibe, Dirava ta lalokau heniamu badina badana be una.

14. Emu mauri lalonai ba karaia ḡauna hereadaena be dahaka?

 ¹⁴ Iehova o dibaia namonamo dainai emu lalokau ia enai na e badamu. Momokani, o uramu ia ba hetura henia hanaihanai. Bona una na bo karaia dibamu. Ia ese e hagoadamumu, ia kudouna ba hamoalea. (Her. 23:15, 16) Una na emu hereva bona kara amo ba hahedinaraia. Unu bo kara tomamu neganai, bo hahedinaraiamu oi na Iehova o lalokau henia momokanimu. (1 Ioa. 5:3) Una na emu mauri lalonai ba karaia ḡauna hereadaena.   

15. Emu lalokau Iehova enai be ede ba hahedinaraia toma?

¹⁵ Emu lalokau Iehova enai be ede ba hahedinaraia toma? Ginigunana na, ḡuriḡuri amo emu mauri na Dirava momokanina tamona enai ba gwauhamatalaia. (Sal. 40:8) Bena, una gwauhamata ihamomokanina totona ba bapatiso. Ina atikol ai tame herevalaia bamona, emu bapatiso na mai anina bada bona mai moalena. Oiemu mauri na dia oi sibomu, to Iehova totona ba ḡaukaralaia. (Roma 14:8; 1 Pet. 4:1, 2) Una na abi hidi badana. To una ese dala e kehoamu mauri namona ba moalelaia. Edena dala ai?

16. Salamo 41:12 heḡereḡerena, edena dala ai Iehova ese ia e hesiai heniamu taudia na e hanamodiamu?

¹⁶ Iehova na hariharibada Tauna hereadaena. Herevana dahaka ia o heniamu, to ia ese hanaihanai ḡau momo be henimu. (Mar. 10:29, 30) Ina tanobada dikana ai danu, mauri namona be henimumu, unu amo ba moale. Emu bapatiso negana ai una mauri namona na matamana mo. Tamamu lalokauna na bo hesiai henia hanaihanaimu. Bona raruosi bogaraḡimui ai e miamu lalokauna na be goadamu. Bona ia e mauri hanaihanaimu dainai, oi danu bo mauri hanaihanaimu.​—Salamo 41:12 ba duahia.

17. Iehova be dahaka ba henia diba?

¹⁷ Dirava enai emu mauri o gwauhamatalaia bona o bapatiso neganai, una na ḡau namo hereana ta ia o henia. Ia ese ba moalelai ḡau namodia iboudiai na e henimumu. Una dainai, oi ese mai anina bada ḡauna ta na guba  bona tanobada Biagudia ba henia diba, una na mai emu ura ida ia ba badinaia hanaihanai. (Iobu 1:8; 41:11; Her. 27:11) Una na mauri dalana hereadaena. Momokani, Iehova o lalokau heniamu dainai bapatiso bavabia.

18. Ededia henanadai ba heni?

¹⁸ Ina henanadai be ede bo haerelaia tomamu, Oi be o uramu ba bapatiso, a? Sibomu ese ba haerelaia diba. To reana bo henanadaimu, ‘Dahaka ese e kougumu?’ (Apos. 8:36) Tame herevalai badi toi ba lalodia tao. Ginigunana na, hereva momokani bona kara maoromaoro o ura henidiamu. Sibomu ba henanadai, ‘Lau na uramu taunimanima iboudiai ese hereva momokani bae gwaurai bona kara maorodia bae kara negana lalonai baina noho, a?’ Iharuana na, Iesu Keriso o lalokau heniamu. Sibomu ba henanadai, ‘Lau na uramu Dirava Natuna na egu King ai baina halaoa, bona ena haheitalai baina tohotohoa, a?’ Ihatoina na mai anina bada, Iehova o lalokau heniamu. Sibomu ba henanadai, ‘Lau na uramu Iehova kudouna baina hamoalea dainai ia na hesiai heniamu, a?’ Bema emu haere na, oibe, ba bapatiso na namo.​—Apos. 16:33.

19. Dahaka dainai bapatiso iabina totona basio gari o basio daradara? Haheitalai a gwauraia. (Ioane 4:34)

¹⁹ Bema bapatiso iabina na o garimu eiava o daradaramu, Iesu ena hereva ta mani a laloa. (Ioane 4:34 ba duahia.) Ia ese Tamana ena ura ikarana na aniani ida e haheḡereḡerea. Dahaka dainai? Badina aniani ese tauanida e duruamu. Iesu na mai dibana Iehova e uramu baita kara ḡaudia na iseda namo totona. Iehova na se uramu baita karaia ḡauna ta ese baine hahisida. Iehova be e uramu ba bapatiso, a? Oibe. (Apos. 2:38) Una dainai bavabia dae bapatiso iabina haheḡanina bo badinaiamu neganai, namo bo davarimu. Aniani namona ta e atoa lasimu neganai, oi na ḡau ta ese se koumumu una aniani bavania, una heḡereḡerena namona na ḡau ta ese basine koumu ba bapatiso totona.

20. Atikol gabena ai dahaka baita herevalaiamu?

²⁰ Oi be heḡereḡere ba bapatiso, a? Momo na reana be gwaumu, “Lau na do dia heḡereḡere.” Vaia Iehova enai emu mauri ba gwauhamatalaia bona ba bapatiso na abi hidi badana. Una dainai nega bavato ba lalohadailaia namonamo, bona ba hekwarahi unu amo ba heḡereḡere ba bapatiso totona. To bema o uramu ba bapatiso, harihari dahaka ba kara be namo unu amo ba heḡaeḡae? Atikol gabena ai una henanadai haerena baita herevalaiamu.