1. Tama sina be e uramu natudia be dahaka bae kara?

 TAMA sina e, a dibamu oi na o uramu natumui ba durudia Iehova bae dibaia bona bae lalokau henia. To Dirava na asita itaiamu dainai, edena dala ai natumui ba durudia diba bae abia dae ia na e nohomu bona ia turana ai baela?​—Iak. 4:8.

2. Edena dala ai tama sina ese natudia na Iehova ena kara namodia bae hadibalaidia?

² Natumu ba durudia Iehova turana ai baela dalana badana ta na, idia ida Baibul ba stadilaia. (2 Tim. 3:14-17) To, Baibul ai natu ese Iehova bae dibaia dalana ma ta e hahedinaraiamu. Hereva Lada-isidia bukana ai, tama ta ese natuna e hadibaia Iehova ese e havara ḡaudia amo ena kara namodia be dibamu. (Her. 3:19-21) Ina stadi ai baita itaiamu, edena dala ai tama sina ese Iehova e havara ḡaudia amo natudia bae durudia Iena kara namodia bae diba.

3. Tama sina ese natudia be ede bae durudia toma?

³ Baibul na e tomu “tanobada matamana amo e hehuni ḡaudia, [Dirava] ena siahu bona ena kara, vada eme hedinarai, e kara ḡaudia ese vada e hahedinaraimu.” (Roma 1:20) A dibamu  umui tama sina ese natumui o bamodiamu negadia na o moalelaimu. Unu nega ba ḡaukaralai, natumui ba durudia Iehova “e kara ḡaudia” ese ena kara namodia e hahedinaraimu daladia bae diba. Mani aita itaia, tama sina ese Iesu ena hahediba dalana be ede bae tohotohoa toma.

4. Edena dala ai Iesu ese Dirava e kara ḡaudia amo ena hahediba e hadibadia? (Luka 12:24, 27-30)

⁴ Mani Iesu ese Dirava e kara ḡaudia amo taunimanima e hadibadia dalana aita laloa. Nega ta, ena hahediba e hamaorodia galo bona herahera o flaoa bae haerodia. (Luka 12:24, 27-30 ba duahidia.) Iesu ese animal bona flaoa idaudia bema herevalaidia diba, to idia mai dibadia manuna bona flaoana e herevalai. Reana hahediba taudia na galo e itadia e roho hanaiva bona flaoa hairaidia e itadia. Mani a laloa Iesu na ena hereva lalonai unu ḡau e duduiva. Bona unu ḡau e herevalaidia murinai dahaka e kara? Ia ese ena hahediba taudia e hadibadia Tamana na hariharibada bona hebogahisi Diravana. Iehova ese galo bona flaoa e naridiamu heḡereḡerena, ena hesiai taudia na baine naridia diba.

5. Tama sina be ededia haheitalai amo natudia bae durudia Iehova bae dibaia?

⁵ Tama sina, Iesu ena hahediba dalana be ede ba tohotohoa toma? Reana natumu enai o ura heniamu animal o flaoana ta ba herevalaia. Bena unu ḡau ese Iehova ena kara e hahedinaraimu daladia ba hadibalaia. Bona reana natumu ba nanadaia ia be edena animal o flaoa e ura heniamu. Bema ia ese e ura heniamu ḡauna ta bo herevalaiamu, Iehova ena kara namodia bo herevalaimu neganai, be hakala namonamomu.

6. Christopher sinana ena haheitalai amo dahaka ta dibamu?

⁶ Tama sina be nega bada lalonai animal o tubutubu ḡauna ta bae stadilaia murinai, natudia ediai Iehova ena kara bae herevalaia, a? Lasi. Iesu ese galo e anianimu eiava flaoa e tubumu daladia iboudiai na se herevalai. Ena be natumu na be uramu Iehova e kara ḡaudia na ba herevalaidia ḡoevaḡoeva, to nega haida hereva kwadoḡina ta o henanadai ta amo Iehova ba herevalaia diba. Tadikaka ladana Christopher na maraḡina negana e laloa lou neganai, e gwa: “Sinagu na hereva kwadoḡidia amo Dirava e kara ḡaudia e herevalaiva, una ese e durumai baia lalodia bada. Heḡereḡere, ororo badidia a laova neganai, e gwauva: ‘Mani ini ororo badadia bona hairaidia a itadia! Iehova na mai hoana, ani?’ Eiava kone a laova neganai, e gwauva: ‘Mani unu hurehure badadia a itadia! Dirava ena siahu na bada herea, ani?’” Christopher na ma e gwa: “Hereva unu bamodia ese e durumai bada.”

7. Edena dala ai natumu ba hadibadia Dirava e kara ḡaudia bae haerodia?

⁷ Natumui e tubu daemu lalonai, ba hadibadia Iehova e kara ḡaudia bae haerodia bona ena kara namodia bae dibadia. Dirava ena ima karakara ḡauna ta ba herevalaia diba bona natumu ba nanadaidia, “Ina ese Iehova enai oi be dahaka e hadibamumu?” Reana edia lalohadai be gwauraimu neganai bo hoamu bona bo moalemu.​—Mat. 21:16.

8. Israel tama sina na natudia ida “dala ai” e laolaova negadiai dahaka e karava?

⁸ Iehova ese Israel tama sina e hamaorodia, natudia ida “dala ai” bae raka negadiai Iena haheḡani bae hadibalaidia. (Deu. 11:19) Israel hanuadia ai dala na momo bona animal, manu, bona flaoa idauidau bae itadia diba. Una dainai ruma bese na dala ai e laolaova negadiai, tama sina ese Iehova e kara ḡaudia na natudia ediai e herevalaiva. Umui tama sina  danu, nega unu bamodia ai Dirava e kara ḡaudia amo natumui ba hadibadia diba. Mani tama sina haida ese unu e kara toma daladia aita herevalai.

9. Punitha bona Katya edia amo dahaka ta dibamu?

⁹ India ena siti badana ta ai e nohomu sina ta ladana Punitha na e gwaumu: “Hanua ai varavaramai a vadivadidiava neganai, una na nega namona Iehova e kara ḡaudia na natumai ediai a herevalaiva. Na itaiava unuseniai natumai ese Iehova e kara ḡaudia na e lalopararalai namonamova, to siti ai be auka.” Tama sina, gabu hairaidia ai natumui bo bamodiamu negadia na idia ese basie laloboiomu. Moldova ai, taihu ta ladana Katya na e gwaumu: “Maraḡigu ai tamagu bona sinagu ida hanua ai a loaloava negadia na doini na lalotaomu. Na moalemu badina idia ese maraḡigu negana amo e hadibagu, nega baina ato Iehova ese e kara ḡaudia baina itadia bona ia baina dibaia.”

10. Tama sina be dahaka bae kara bema siti amo hanua baela na auka? (Maua ladana “ Tama Sina Idurudia Ḡaudia” ba itaia.)

¹⁰ Dahaka ba kara diba bema hanua baola na auka? India ai e nohomu tauna ta ladana Amol na e gwaumu: “Na nohomu gabuna ai, tama sina na hora momo moni ḡaukara e karamu, bona hanua baiala davana na bada. To, laḡa-ani gabuna ta (park) o dehe ai Iehova ena ima karakara ḡaudia na bo itamu bona Iena kara namodia bo herevalai dibamu.” Ruma badina bo haeroa namonamomu neganai, Iehova e kara ḡaudia na bo davarimu unu amo natumu ba hadibadia diba. (Sal. 104:24) Heḡereḡere manu, dimairi, tubutubu ḡaudia, bona ma ḡau momo bo itadiamu. Germany ai hahine ta ladana Karina na e gwaumu: “Sinagu na flaoa e ura heni dikadikamu, una dainai maraḡigu ai ia ida a loava negadiai ia ese flaoa e herevalaiva.” Tama sina, iseda orea ese Dirava e kara ḡaudia e herevalaimu  vidiodia bona pablikeisin idauidau amo natumui ba hadibadia. Ena be emui noho daladia na idauidau to natumui ba durudia diba Dirava e kara ḡaudia bae haerodia. Mani natumui ediai Iehova ena kara namodia haida ba herevalai daladia aita lalo.

11. Edena dala ai tama sina ese natudia bae durudia Iehova ena lalokau bae dibaia?

¹¹ Natumu ese Iehova ena lalokau bae dibaia totona, animal momo ese natudia e naridia namonamomu dalana ba herevalaia diba. (Mat. 23:37) Danu, Iehova ese e kara ḡaudia idauidau ba herevalai diba. Matamanai tame herevalaia taihuna, Karina, na e gwaumu: “A raka-rakava negadiai, sinagu ese e hamaoroguva do baia laḡa-ani, bena flaoa idauidau baia itadia bona hairaidia ese Iehova ena lalokau e hahedinaraiamu dalana baia haeroa. Laḡani momo muridiai, lau na dounu flaoa na itadiamu bona edia idau, disain bona kala na haerodiamu. Unu ese e hadibagumu Iehova ese ita na e lalokau henida badamu.”

12. Edena dala ai tama sina ese natudia bae durudia Dirava ena aonega bae lalopararalaia? (Salamo 139:14) (Laulau danu ba itaia.)

¹² Natumu ba durudia Dirava ena aonega bae lalopararalaia. Iehova ena aonega ese eda aonega na e hereaia. (Roma 11:33) Heḡereḡere, ranu e daemu bena ori ai e laomu, bona unu ori na gabu ta ta e laomu dalana ba herevalaia. (Iobu 38:36, 37) Danu, taunimanima tauanidia e karaia dalana ba herevalaia diba. (Salamo 139:14 ba duahia.) Tama ta ladana Vladimir na unu e kara toma. E gwaumu: “Dina ta, natumai merona na ena baskele amo e moru bona e bero. Dina haida muridiai, berona na e namo. Lau bona adavagu ese a hadibaia Iehova ese tauanida e karaia dalana na sibona baine namo lou diba. Bona a hamaoroa taunimanima ese e karamu ḡaudia ai ḡau unu bamona ta basita itaia dibamu. Heḡereḡere, accident murinai motuka ta na sibona basine ha henamo lou dibamu. Una ese natumai e durua Iehova ena aonega e lalopararalaia.”

13. Edena dala ai tama sina ese natudia bae durudia Iehova ena siahu bae lalopararalaia? (Isaia 40:26)

¹³ Iehova ese e hamaorodamu guba baita itaia bona iena siahu hereadaena amo hisiu ta  se boiomu dalana baita haeroa. (Isaia 40:26 ba duahia.) Natumui ba hagoadadia diba, guba bae itaia bona e itamu ḡaudia bae haerodia. Taiwan ai, taihu ta ladana Tingting na maraḡina negana e laloa lou, e gwa: “Nega ta, sinagu ese e laohaigu a kampa, bona gabu na dibura dainai hisiu momo herea a itadia. Una negai na, na lalohekwarahiva badina skuli turadia edia lalo veri karadia daidiai bona na lalova lau be dounu Iehova ba hesiai heniamu eiava. Sinagu ese e hamaorogu, Iehova ese ena siahu amo unu hisiu e karadia dalana baina haeroa, bona baina helalotao Ia ese una siahu baine ḡaukaralaia diba lau baine durugu hahetoho baina hanaidia. Iehova ese e kara ḡaudia na haerodia murinai, na ura Iehova baina dibaia namonamo, bona lalogu na hadaia ia baina hesiai henia.”

14. Edena dala ai tama sina ese Iehova e kara ḡaudia amo natudia bae durudia bae diba Iehova na moale Diravana?

¹⁴ Iehova ese e kara ḡaudia amo e hahedinaraiamu ia na moale Diravana bona e uramu ita danu baita moale. Saiens taudia ese e davaria animal momo, heḡereḡere manu bona gwarume na e gadaramu danu. (Iobu 40:20) Natumu ese animal e itadiamu e gadaramu neganai e kirimu, a? Reana e itaiamu pusi ta e roho isi roho isimu varo baine abia eiava sisia maraḡidia rua e gadara heboumu. Bema natumu o itadiamu animal edia kara daidiai e kirimu, ba hadibadia ita na moale Diravana ta hesiai heniamu.​—1 Tim. 1:11, NWT.

15. Dahaka ese tama sina be durudiamu natudia edia lalohadai bae diba? (Hereva Lada-isidia 20:5) (Laulau danu ba itaia.)

¹⁵ Nega haida ai, tama sina ese natudia edia hekwakwanai bae dibadia na auka. Bema emu ai unu e vara tomamu, namona na dala ba tahu natumu ese edia lalohadai bae gwaurai totona. (Hereva Lada-isidia 20:5 ba duahia.) Tama sina haida na natudia ida Iehova e kara ḡaudia e moalelaimu neganai, ediai na dia auka natudia ida bae herevahereva totona. Dahaka dainai? Badi ta na, nega unu bamodia ai edia herevahereva ihadikana  ḡaudia na dia momo. Taiwan ai, tama ta ladana Masahiko ese badi ma ta e gwauraia, e gwa: “Natumai ida ororo eiava kone ai a loaloamu neganai idia na e moalemu. Bona edia lalohadai baia dibadia na dia auka.” Matamanai tame herevalaia taihuna, Katya na e gwaumu: “Skuli murinai, sinagu ese gabu hairaina ta e laohaiguva. Unuseniai lauegu ai na dia auka skuli ai e varava ḡaudia eiava lalogu e hahekwarahiva ḡaudia na hamaorolaiava.”

16. Edena dala ai ruma bese ese Iehova e kara ḡaudia bae moalelai hebou?

¹⁶ Ruma bese ese Iehova e kara ḡaudia e moalelai heboumu neganai, ta ta padadiai lalokau karana na e goadamu. Baibul na e gwaumu “kiri mai negana” bona “mavaru mai negana.” (Koh. 3:1, 4) Iehova ese gabu mai hairaidia e karadia, unu amo ta ura henimu ḡaudia baita kara diba. Ruma bese momo na e uramu hanua, ororo, eiava kone ai bae loa hebou. Natu haida na e uramu gabu mai hairaidia ai bae heau, bae gadara, animal bae itadia, eiava sinavai o davara ai bae digu. Iehova ese e kara ḡaudia na dala idauidau ai baita moalelaidia diba!

17. Dahaka dainai tama sina ese natudia bae durudia Dirava e kara ḡaudia bae moalelai?

¹⁷ Dirava ena tanobada matamatana ai, tama sina bona natu ese Iehova e kara ḡaudia be moalelai ḡuḡurumu. Una nega ai, ita ese animal garidia basita garimu bona idia danu ita garida na basie garimu. (Isa. 11:6-9) Iehova e kara ḡaudia na baita moalelaidia hanaihanaimu. (Sal. 22:26) To tama sina, basio nari ela bona una nega, to hari amo natumui ba durudia Dirava e kara ḡaudia bae moalelai. Iehova e kara ḡaudia amo natumu bo durudiamu ia be dibaiamu neganai, idia na King David bamona be gwaumu: ‘Iehova e, ta ena ḡaukara na dia oiemu heḡereḡerena.’​—Sal. 86:8.