Dahaka dainai Elimelek varavarana na e gwa bema Ruta baine adavaia neganai, ahuna na baine haboioa diba? (Ruta 4:1, 6)

Baibul negadiai, bema headava tauna ta na asi natuna bena baine mase, iena tano be daika ese baine abia? Ena bese ladana be baine boio vaitani, a? Unu henanadai haeredia na Mose ena Taravatu lalonai baita davarimu.

Bema tau ta baine mase eiava baine ogoḡami dainai ena tano baine hoihoilaia, ena tano be vada e haboioa vaitani, a? Ia tadikakana o varavarana ta ese ena tano baine hoia lou diba. Unu amo ena bese ese una tano na dounu bae biagua.​—Lev. 25:23-28; Num. 27:8-11.

Edena dala ai mase tauna ena bese ladana na basine boio? Basine boio dalana na, mase tauna tadikakana ese vabu baine adavaia, Ruta enai e vara bamona. Una tau ese vabu baine adavaia unu amo ia enai baine havaraia natuna ese mase tauna ladana baine abia bona ena tano danu baine biagua. Iehova ese una dala amo vabu baine naria diba.​—Deu. 25:5-7; Mat. 22:23-28.

Mani Naomi enai e vara ḡauna aita laloa. Ia na tau ta ladana Elimelek ese e adavaia. Elimelek bona natudia memerodia raruosi e mase neganai, Naomi na vada asi inarina. (Ruta 1:1-5) Iuda e lou lao neganai, Naomi ese ravana Ruta e hamaoroa Boa baine noia, edia tano baine hoia lou. Boa na Elimelek varavarana ta. (Ruta 2:1, 19, 20; 3:1-4) To Boa na e diba Elimelek varavarana korikorina ta na noho, una dainai ia na mai ena maoro una tano baine hoia lou.​—Ruta 3:9, 12, 13.

Matamanai, una tau na e ura una tano baine hoia. (Ruta 4:1-4) Ena be moni be negemu, to dibana Naomi na bese ta basine havaraiamu Elimelek ena tano ibiaguna. Ia ese una tano baine abia bona una tano amo moni baine kara diba.

To gabeai, una tau na e laloparara Ruta baine adavaia neganai, lalona na e haidaua. Eto: “Lau na basina abia diba, sibogu dihigu ai baina dabu na garina.” (Ruta 4:5, 6) Dahaka dainai lalona e haidaua?   

Bema una tau eiava ma ta ese Ruta baine adavaia bona mero ta baine havaraia, una mero ese Elimelek ena tano baine biagua. Edena dala ai una tau na ‘dihina ai baine dabu’ o ahuna baine haboioa? Baibul ese se gwauraia hedinarai, to ini badi haida baita lalodia diba.

• Ginigunana na, toana na baine ḡaukaralaia monina na basine abia lou diba, badina Elimelek ena tano na Ruta natuna ese baine biagua.

• Iharuana na, iena maduna na Naomi bona Ruta baine naridia.

• Ihatoina na, bema Ruta na ia enai natuna baine havaradia, idia bona una tau natuna ese tano bae haria.

• Ihahanina be, bema una tau na asi natuna, Ruta enai baine havaraia merona ese Elimelek bona ia ahuna tanodia baine biagudia. Una dainai ena tano na Ruta enai e havaraia merona ese Elimelek ladanai be biagudiamu, dia ia ladanai. Ia na se ura Naomi iduruna ai ahuna baine haboiodia dainai, Boa e hamaoroa, ia gabunai una tano baine hoia. Boa ese una maduna e abia dae badina e ura ‘mase tauna dihina baine havaraia bona ladana na basine boio ena iduhu ai.’​—Ruta 4:10.

Toana na una tau na sibona ladana bona ahuna e lalodia. Sibona ena namo itahuna karana ese ena lalohadai e biagua. Ena be e hekwarahi ladana baine mia hanaihanai totona, to hari ia ladana na asi dibada. Dia una mo, ia ese bema abia hahenamo hereadaena na Boa ese e abia. Mesia, Iesu Keriso, e vara besena lalonai Boa ladana danu mia. Una tau na sibona e helalo bona se ura dabu tauna ta baine durua dainai, una hahenamo na e haboioa!​—Mat. 1:5; Luka 3:23, 32.