1. Iehova ena orea ai ta moalelaimu ḡaudia haida be dahaka?

 ITA NA ta moalemu badina ini nega dikadia lalodiai Iehova ena orea ai ta nohomu dainai. Oibe, mauri na e auka hereamu, to Iehova dainai ita na lalotamona ai ta nohomu. (Sal. 133:1) Ia ese e durudamu eda ruma bese ai baita moale. (Efe. 5:33–6:1) Danu, Iehova ese aonega bona laloparara e henidamu dainai asita lalohekwarahi momomu.

2. Dahaka baita kara be namo, bona dahaka dainai?

² Ena be Iehova ena orea lalonai ta nohomu, to baita hekwarahi nega iboudiai Iehova baita hesiai henia. Dahaka dainai? Badina reana nega haida ta ena hereva eiava kara dainai basita moalemu. Eiava ta lalomanokamu badina kerere haida na ta kara lou kara loumu. Iehova ena hesiai ḡaukara na baita goadalaia, ena be (1) kongrigeisen ai ta ese laloda e hahisimu, (2) adavada ese laloda e hahisimu, bona (3) eda kerere daidiai ta lalomanokamu negadiai. Unu point toi na ina atikol ai baita herevalaidiamu. Danu, Baibul ese e sivarailaidia taudia tatoi amo baita dibamu ḡaudia baita herevalaidiamu.

KONGRIGEISEN AI TA ESE LALODA E HAHISIMU NEGANAI, BAITA HAHEAUKA

3. Iehova ena taunimanima be ededia hekwakwanai e davarimu?

³ Hekwakwanai. Eda tadikaka taihu haida edia kara daidiai ita na ta lalohisihisimu. Elda taudia danu kerere e karamu. Unu e varamu neganai, haida na e daradaramu bema ina na  Iehova ena orea. Bona Iehova ihesiai henina karana na e hadokoamu. Heḡereḡere, tadikaka taihu asie hebamo henidiamu bona hebou ilao henina karana danu e hadokoamu. Bena una ese Iehova “isiaina bae lao heni mai lalodia tamona ida” karana na e hadikaiamu. (Sef. 3:9) Una na dia aonega karana. Mani Baibul ese e sivarailaia tauna ta aita herevalaia, ia danu hekwakwanai unu bamodia e davari.

4. Aposetolo Paulo be dahaka hekwakwanai haida e davari?

⁴ Baibul sivaraina ta. Aposetolo Paulo na mai dibana Kristen tadikaka taihu na dia ḡoḡoevadae. Heḡereḡere, ia na hahediba ta ai ela neganai, kongrigeisen taudia ese e gari heniava. (Apos. 9:26) Gabeai, haida ese e maumauraia badina e urava ia ladana bae hadikaia. (2 Kor. 10:10) Bona Paulo ese elda ta ena abi hidi kererena amo haida e hahekwakwanaidia karana na e itaia. (Gal. 2:​11, 12) Nega ma ta ai be turana Mareko ese lalona e hahisia bada. (Apos. 15:​37, 38) Unu lalohisihisi karadia daidiai Paulo ese idia na basinema bamodia. To, ia ese lalohadai maorona e abia dainai, tadikaka taihu na e lalodia badava bona dounu Iehova e hesiai heniava. Dahaka ese Paulo e durua e haheauka?

5. Dahaka ese Paulo e durua tadikaka taihu ida e ḡaukara hebou? (Kolose 3:​13, 14) (Laulau danu ba itaia.)

⁵ Paulo ese tadikaka taihu na e lalokau henidia bada. Una dainai edia kerere na se lalova, to edia kara namodia hari e lalova. Danu lalokau dainai sibona ese e torea sisibana e badinaia, Kolose 3:​13, 14. (Ba duahidia.) Mani Paulo ese Mareko e kara henia dalana aita itaia. Paulo ena misinari laolaona ginigunana lalonai Mareko ese e rakatania dainai e lalohisihisi, to se badu noho badu noho. Gabeai, ia ese Kolose kongrigeisen e tore henia neganai, Mareko na e gwauraia, ḡaukara hebou tauna namona bona hahegoada tauna. (Kol. 4:​10, 11) Bona Roma ai e hadiburaia neganai, Paulo na e noinoi Mareko na bainela ia iduruna. (2 Tim. 4:11) Momokani, Paulo na tadikakana edia dika e gwautao bona dounu idia ida e ḡaukara hebou. Paulo ena amo dahaka ta dibamu?

6-7. Dahaka dainai tadikaka taihu ilalokau henidia karana baita goadalaia? (1 Ioane 4:7)

⁶ Ta dibamu ḡauna. Iehova na e uramu tadikaka taihu ilalokau henidia karana baita goadalaia. (1 Ioane 4:7 ba duahia.) Bema ta ese e kara auka henidamu basita badu haraḡa na namo. Bona baita helalotao, ia danu e hekwarahimu Iehova baine hamoalea. (Her. 12:18)  Dirava ese ena abidadama hesiai taudia na e lalokau henidiamu, ena be mai edia manoka ḡaudia. Danu eda kerere na se duahimu, bona ena badu na se mia hanaihanaimu. (Sal. 103:9) Ta moalemu badina Iehova ese eda dika e gwautaomu, ita danu baita hekwarahi ma haida edia dika baita gwautao!—Efe. 4:32–5:1.

⁷ Baita helalotao dokona na e kahikahimu dainai, tadikaka taihu ida eda hetura karana na baita hagoadaia. Daḡedaḡe karadia danu be badamu. Eda abidadama dainai dibura ruma ai bae atoda diba. Nega unu bamodiai, tadikaka taihu edia heduru baita abia na mai anina bada. (Her. 17:17) Spain ai, elda ta ladana Josep a enai e vara ḡauna aita laloa. Ia bona tadikaka haida na edia gini siri karana dainai dibura rumai e atodia. Josep na e gwa: “Dibura ruma ai, ai na gabu tamonai a nohova dainai, emai hereva eiava kara amo ma ta baia habadua haraḡa diba. Ai na baia haheauka, bona baia hegwautao heheni na namo. Unu a kara toma neganai lalotamona ai a noho, badina ai na Iehova asie hesiai heniava taudia padadiai a nohova. Nega ta imagu na haberoa dainai, ḡau ta asina karaiava. To tadikaka ta ese egu dabua e huriva bona dala idauidau ai e duruguva. Una nega ai, lau ese lalokau korikorina na mamia.” Hari na nega namona, ita bona tadikakada padadai e varamu hekwakwanaidia baita hamaoromaoro!

ADAVAMU ESE LALOMU E HAHISIAMU NEGANAI BA HAHEAUKA

8. Headava taudia ese dahaka hekwakwanai e haheaukalaimu?

⁸ Hekwakwanai. Headava lalonai hekwakwanai na idauidau. Baibul ese e hahedinaraiamu headava taudia na “hisi do bae ani.” (1 Kor. 7:28) Dahaka dainai? Badina headava ese dia ḡoevadae taudia rarua e hatamonadiamu, idia ta ta edia kara, kastom, bona mauri daladia na i-daui-dau. Una dainai headava murinai be karamu karadia haida ese hekwakwanai be havaramu. Heḡereḡere hewakwanai e varamu neganai, tau bona hahine ese hekwakwanai ihamaoromaorona daladia se tahumu, to gwau na ta ese ma ta e heniamu. Una dainai e laloamu bae parara eiava bae divos na namo. To una ese hekwakwanai be hamaoromaoroamu, a? b Mani Baibul ese e sivarailaia hahinena ta aita herevalaia, ia danu adavana ena kara auka karadia e haheaukalai.

9. Abigail be dahaka hekwakwanai e haheaukalai?

⁹ Baibul sivaraina ta. Abigail adavana ladana na Nabala bona Baibul ese Nabala na e gwauraiamu, mai daḡedaḡena bona kara dika tauna. (1 Sam. 25:3) Reana Abigail ena headava maurina na auka. Una dainai Abigail ese ena headava bema hadokoa diba, a? Oibe. Badina Nabala ese David bona ena tatau e gwau henidia neganai David na ia ialana ela. (1 Sam. 25:​9-13) Abigail bema ura neganai, David na basinema koua bena adavana bema alaia. To unu na se kara toma, ia ese David e hamaoroa Nabala na basine hamasea. (1 Sam. 25:​23-27) Dahaka dainai unu e kara toma?

10. Ena be Abigail ena headava maurina na auka, to dahaka ese e durua e haheauka?

¹⁰ Abigail ese Iehova e lalokau henia, bona ena headava gwauhamatana e matauraia. Baita gwau dibamu, Abigail na Dirava ese Adam bona Heva e hamaorodia herevana na mai dibana. (Gen. 2:24) Danu Abigail na mai dibana Iehova vairanai headava na helaḡa. Ia na e  ura Dirava baine hamoalea dainai, ḡau haida e kara adavana bona ena ruma bese baine hamauridia. Ia ese David e koua Nabala basine hamasea. Danu, ia na e sori ena be dia iena kerere. Una dainai Iehova ese una boga auka bona lalogoada hahinena na e lalokau henia. Headava ta’tau bona ha’hine be Abigail ena haheitalai amo dahaka e dibamu?

11. (a) Iehova be e uramu headava taudia be dahaka bae kara? (Efeso 5:33) (b) Carmen ena ekspiriens amo dahaka o dibamu? (Laulau danu ba itaia.)

¹¹ Ta dibamu ḡauna. Iehova na e uramu headava lalonai tau bona hahine na bae noho hebou ena be ta ena kara na auka. Bona ia na e moalemu bema headava taudia na e ḡaukara heboumu hekwakwanai e hamaoromaoromu, e helalokau hehenimu bona e hemataurai hehenimu. (Efeso 5:33 ba duahia.) Mani Carmen ena ekspiriens aita laloa. Carmen na e headava bona laḡani siks murinai Iehova ena Witnes ida e stadi matama, bena se daudau e bapatiso. Carmen na e gwa: “Lau adavagu ese egu abi hidi na se moalelaia, bona e badu dikadika. Ia ese e ere dika heniguva bona e daḡedaḡe heniguva.” Ena be unu ḡau idauidau e varava, to Carmen na e haheaukava. Edia headava laḡanidia 50 lalodiai, Carmen na e ḡaukara goada adavana baine lalokau henia, bona baine matauraia. Ia na ma e gwa: “Laḡani momo lalodiai lau ese adavagu ena hemami na lalopararalaia, bona na diba hemataurai dalanai baina hereva henia na namo. Iehova vairanai headava na helaḡa dainai, lau na na ḡaukara goada egu headava baina gimaia. Iehova na lalokau heniamu dainai, adavagu na asina rakatania.” c Bema emu headava lalonai hekwakwanai o davarimu, bavabia dae Iehova ese be durumumu, bona bo haheauka dibamu.

EDA KERERE DAIDIAI TA LALOMANOKAMU NEGADIAI

12. Dahaka be varamu bema kara dika badana ta baita karaiamu?

¹² Hekwakwanai. Kara dika badana ta ta karaiamu neganai, ta lalomanokamu. Baibul ese e hahedinaraiamu eda kara dikadia dainai, baita ‘lalo-hisihisimu’ bona baita ‘dara-dokomu.’ (Sal. 34:18) Tadikaka ta ladana Robert na laḡani momo lalodiai e ḡaukara goada bena hesiai tauna ta ai ela. To, kara dika badana ta e karaia neganai e laloparara ia na Iehova lalona e hahisia. Robert na e gwa: “Na kara dika neganai lalogu mamina na e dika herea, bona na lalohekwarahi bada, na tai dikadika bona Iehova na ḡuriḡuri henia. Na lalo Dirava ese egu ḡuriḡuri na ma basine kamonai loumu,  badina lalona na hahisia.” Kara dika badana ta ta karaiamu neganai, ta lalohekwarahimu, badina ta lalomu Iehova ese ita na vada e dadaraida. (Sal. 38:4) Bema unu o hemami tomamu, mani Baibul ese e sivarailai tauna ta aita laloa. Ia danu ena be kara dika badana ta e karaia, to dounu Iehova e hesiai henia.

13. Aposetolo Petro be ededia kerere e kara, bona gabeai edena kara dika badana e karaia?

¹³ Baibul sivaraina ta. Iesu do se mase hanuaboina ai, aposetolo Petro na kerere haida e kara bona dokonai kara dika badana ta e karaia. Petro ese e karaia kerere ginigunana na, ia na e gwa taunimanima iboudiai bae hekwakwanai, a lau be lasi. (Mar. 14:​27-29) Iharuana be, Getesemane umana ai ia na se gima to e mahuta. (Mar. 14:​32, 37-41) Ihatoina be, hutuma ese Iesu e dabaia tao neganai Petro na e heau. (Mar. 14:50) Dokonai, Petro na nega toi Iesu e ḡorea. (Mar. 14:​66-71) Petro na e laloparara ia na kara dika badana ta e karaia neganai ia be dahaka e kara? Ia na e lalohisihisi bona e tai dikadika. (Mar. 14:72) Mani a laloa Petro turana Iesu na hora haida murinai e mase neganai, ia na e lalohisihisi bada. Petro na e hemami ena mauri na asi anina!

14. Dahaka ese Petro e durua dounu Iehova e hesiai henia? ( laulauna ba itaia.)

¹⁴ Petro na badi haida daidiai dounu Iehova e hesiai henia. Heḡereḡere ia na sibona se noho, to hahediba haida dekedia ela bona idia ese e hagoadaia. (Luka 24:33) Danu, Iesu e toreisi lou neganai ia na Petro enai e hedinarai, bena e hagoadaia. (Luka 24:34; 1 Kor. 15:5) Gabeai, Iesu na Petro ena kerere dainai se gwau henia, to maduna badadia haida e henia. (Ioa. 21:​15-17) Ena be Petro na kara dika badana ta e karaia, to dounu e hekwarahiva kara maorodia baine kara. Dahaka dainai? Badina e diba, biaguna Iesu na dounu ia e lalokau heniava. Bona tadikaka taihu ese e duruava. Petro ena haheitalai amo dahaka ta dibamu?

15. Iehova be e uramu dahaka baita diba? (Salamo 86:5; Roma 8:​38, 39) (Laulau danu ba itaia.)

¹⁵ Ta dibamu ḡauna. Iehova na e uramu baita diba ia ese ita na e lalokau henidamu bona ia na heḡaeḡae eda dika baine gwautao. (Salamo 86:5; Roma 8:​38, 39 ba duahidia.) Ta kara dikamu neganai, eda hemami na e dikamu. Vaia unu ta hemami tomamu na maoro. To basita laloa Iehova ese ita na se lalokau henidamu eiava eda dika na basine gwautaomu. Namona na heduru baita abi haraḡa. Matamanai tame herevalaia tauna Robert, na e gwa: “Lau na na kara dika badina sibogu egu goada ai na tabekau.” Ia na e laloparara elda  baine hereva henidia na namo. Bona e gwa: “Una na karaia neganai, maoromaoro Iehova ena lalokau na mamia. Danu na diba elda taudia ese lau na e lalokau henigumu. Idia ese e durugu na laloparara Iehova ese lau na se rakatanigu.” Ita danu ta dibamu Iehova ese e lalokau henidamu bona eda dika na be gwautaomu bema eda kara dika amo baita helalokerehaimu, heduru baita tahumu, bona baita hekwarahimu unu kerere na ma basita karadia lou. (1 Ioa. 1:​8, 9) Una dainai dounu baita hekwarahi Iehova baita hesiai henia, ena be ta kereremu.

16. Dahaka dainai o uramu Iehova ena hesiai ḡaukara dounu ba karaia?

¹⁶ Ina nega dikana lalonai Iehova ese eda hesiai ḡaukara na e laloa badamu. Una dainai Iehova ena heduru amo lalohisihisi e havaramu ḡaudia baita haheaukalai diba. Ginigunana, bema tadikaka taihu ese e hahisidamu lalokau dainai edia dika baita gwautao. Iharuana, bema headava lalonai hekwakwanai baita hamaoromaoromu, baita hahedinaraiamu ita ese Dirava na ta lalokau heniamu bona headava gwauhamatana ta matauraiamu. Bona ihatoina, bema kara dika badana ta ta karaiamu, Iehova ena heduru baita tahua diba bona baita abia dae ia ese e lalokau henidamu bona eda dika na be gwautaomu. Baita ḡaukara goada dounu ia baita hesiai henia. Momokani, Iehova ese be hanamodamu, bema “kara namo ikarana basita hesikulaia.”—Gal. 6:9.