1-2. Ta e bapatisomu neganai, dahaka hahenamo e davarimu?

 TA E BAPATISOMU neganai, una na moale bada ḡauna, bona ia na Iehova ena ruma bese lalonai e vareaimu. Bapatiso taudia ese Salamo e torea tauna ena hereva e hamomokaniamu, ia na e gwa: “[Iehova e,] emu maḡu ai baine noho totona o abia hidimu bona o hakaua kahimu tauna be namo.”—Sal. 65:4.

² Iehova ese ena ruma bese lalonai ta na se hakaua vareai kavamu. Stadi atikol 9 ai ta herevalaia heḡereḡerena, Iehova ese e abidia daemu taudia na ia e uramu bae hetura henia taudia. (Iak. 4:8) Iehova enai emu mauri o gwauhamatalaiamu bena o bapatisomu neganai, oi na Iehova o hakahikahiamu. Una dainai bavabia dae, Iehova ese ena “hahenamo na latamui ai baina seia dobi ela bona baine hepurai dobi.”—Mal. 3:10; Ier. 17:​7, 8.

3. Ta e gwauhamatamu bona e bapatisomu neganai iena maduna be dahaka? (Kohelete 5:​4, 5)

³ Oi o bapatisomu neganai, oiemu hesiai ḡaukara, Iehova enai na de matamamu. Una murinai, emu gwauhamata na ba badinaia, ena be hedibaḡani eiava hahetoho ba davari. (Kohelete 5:​4, 5 ba duahidia.) Oi na Iesu ena hahediba ta dainai, iena haheitalai bona haheḡani ba badinadia namonamo. (Mat. 28:​19, 20; 1 Pet. 2:21) Ina atikol ese be durumumu unu ba kara toma.

 HEDIBAḠANI BONA HAHETOHO NEGADIAI IESU BA BADINAIA

4. Iesu ena hahediba be edena dala ai “hisihisi auna” e huaiamu? (Luka 9:23)

⁴ Bapatiso murinai, emu mauri lalonai hekwakwanai na dounu be varamu. Oibe, Iesu na e gwa iena hahediba na “dina iboudiai” hisihisi auna bae huaia. (Luka 9:23 ba duahia.) Anina be Iesu be e gwaumu iena hahediba na dina iboudiai be hisihisimu, a? Lasi, iena hereva anina na hahenamo na baita davarimu, to hekwakwanai danu. Unu hekwakwanai haida na hisihisi bada be havaraiamu.—2 Tim. 3:12.

5. Iesu na e gwauhamata, sibodia edia ura e dadaraimu taudia be hahenamo ede bamodia be davarimu?

⁵ Reana emu bese taudia ese vada e dadaraimu eiava tauani dalanai ḡau namodia haida o dadarai Basileia bavatoa guna totona. (Mat. 6:33) Bema oi na unu o kara toma, Iehova ese ia dainai o kara ḡaudia na basine laloboiomu. (Heb. 6:10) Reana Iesu ena hereva na oiemu ai e ḡuḡurumu. Ia na e gwa: “Ta ese ruma eiava tadikakana eiava taihuna eiava sinana eiava tamana eiava natuna eiava tano lau daigu ai bona sivarai namo dainai vada e rakatanidia, ia hari ina nega ai sinahu sinahu be abimu, ruma, tadikakana, taihuna, sinana, natuna, tano, bona hisihisi danu; bona bainema negana ai mauri hanaihanai baine abia.” (Mar. 10:​29, 30) Oibe, o abimu hahenamodia ese o dadarai ḡaudia na e hereadiamu.—Sal. 37:4.

6. Dahaka dainai bapatiso murinai dounu baita hekwarahi “tau-anina ena heḡahusi” baita dadaraia?

⁶ O bapatisomu murinai, oi na dounu ba hekwarahi “tau-anina ena heḡahusi” ba tuari henia. (1 Ioa. 2:16) Badina oi na Adam natuna ta, bona dounu dia ḡoevadae. Nega haida emu hemami na reana Aposetolo Paulo ena hemami heḡereḡerena. Ia na e gwa: “Badina be lalogu ese Dirava ena taravatu e moalelaiamu; a tau-anigu ai taravatu idauna na itaiamu, ia be lalogu ena taravatu e tuari heniamu, bena e ḡuigumu, kara dika taravatuna ena, tau-anigu ai e nohomu ḡauna bunai.” (Roma 7:​22, 23) Nega haida lalohadai kereredia eiava ura dikadia daidiai oi na reana o lalohisihisimu. To, bema Iehova enai o karaia gwauhamatana bo laloamu, una ese lalomu na be hagoadaiamu, o davarimu hahetohodia ba hanaidia. Edena dala ai emu gwauhamata ese oi na be durumumu emu mauri lalonai ḡau momo basio lalohekwarahilai?

7. Edena dala ai Iehova enai emu mauri o gwauhamatalaia karana ese baine durumu ia ba badinaia?

⁷ Iehova enai emu mauri o gwauhamatalaiamu neganai, oi na ia o hamaoroamu, emu mauri na bo ḡaukaralaiamu ia ba hesiai henia hanaihanai totona. Anina na Iehova ba hamoalea totona, oi na mai lalomu idoinai ida sibomu emu ura bo ato tabemu. (Mat. 16:24) Una dainai emu ai hahetoho ta baine vara neganai, oi na da mai dibamu dahaka ba kara. Badina oi na lalomu vada o hadaia, Iehova ba badinaia bona ia ba hamoalea. Iobu na unu e kara toma. Hekwakwanai negadiai, ia na mai lalona ibounai ida e gwa: “Harihari ela bona baina mase, egu lalo-maoromaoro basina negea.”—Iobu 27:5.

8. Edena dala ai emu gwauhamata ese baine durumu hahetoho ba hanaidia?

⁸ Iehova enai o karaia gwauhamatana bo laloa dobumu karana ese be durumumu hahetoho idauidau ba hanaidia. Heḡereḡere, oi ese ta adavana ba ḡahusia be maoro, a? Lasi. Oi na Iehova o gwauhamata henia oto kara unu bamodia na basio kara. Oibe, gabeai hemami kereredia bae vara neganai, oi ese maoromaoro bo dadaraidiamu. Unu amo “kara havara taudia edia dala . . . basio rakalaia.”—Her. 4:​14, 15.

9. Edena dala ai Iehova enai o karaia gwauhamatana ese baine durumu ia bavatoa guna?

 ⁹ Bema ta na e uramu iena kampani ai ba ḡaukara, to una ese emu hebou ilao henina karana be hadikaiamu, oi be dahaka bo karamu? Una nega ai, oi na basio daradaramu. Una ḡaukara do so davaria neganai, oi na lalomu vada o hadaia ḡaukara unu bamodia na basio abi dae. Una dainai, dia namo abi hidi kererena ta baita karaia bena dala baita tahu Iehova baita atoa guna. Iesu ena haheitalai ba laloa, ia na lalona e hadaia Tamana baine hamoalea. Iesu e kara bamona, ita danu Dirava enai ta gwauhamata dainai, una ese baine duruda ia lalona basita hahisia bona ia ese inai henimu karadia baita dadarai.—Mat. 4:10; Ioa. 8:29.

10. Bapatiso murinai Iehova ese oi be ede be durumu tomamu Iesu murinai dounu ba raka totona?

¹⁰ Hahetoho o davarimu eiava hekwakwanai e varamu negadiai, oiemu kara ese be hahedinaraiamu, oi na dounu o uramu Iesu ‘murinai ba raka.’ Namona na ba diba, nega unu bamodiai Iehova ese oi na be durumumu. Baibul na e gwaumu: “Dirava na momokani; ia ese baine narimui, emui goada e hereaiamu hedibaḡanina ta ese baine butumui tao na garina; hedihaḡani negana ai ia ese emui roho mauri dalana baine henimui, bena ba haheaukalaia diba.”—1 Kor. 10:13.

IESU MURINAI DOUNU BAITA RAKA DALANA

11. Iesu dounu baita badinaia dalana badana ta be dahaka? (Laulau danu ba itaia.)

¹¹ Iesu na mai kudouna ibounai ida Iehova e hesiai henia, bona ia na hanaihanai Iehova e ḡuriḡuri heniava dainai ena hetura karana ia ida na namo herea. (Luka 6:12) Oi danu, emu bapatiso murinai Iesu dounu ba badinaia totona, namona na emu hetura karana Iehova ida ba hagoadaia noho. Baibul na e gwaumu: “Vada ta davari ḡaudia heḡereḡeredia ai baita  raka.” (Fili. 3:16) Tadikaka taihu haida ese edia hesiai ḡaukara e habadaia sivaraidia na nega momo bo kamonaimu. Idia haida na Basileia Evanelia Skulina ai e vareai, haida be pablisa dia momo gabudia ai e nohomu. Bema emu noho dalana na heḡereḡere emu goal ai ba halaoa diba. Iehova ena taunimanima na e ura dikadikamu edia hesiai ḡaukara bae habadaia. (Apos. 16:9) To bema hari oi na dia heḡereḡere unu ba kara toma be ede bamona? Basioto oiemu hesiai ḡaukara na asi anina. Ḡau badana na mauri ena heau helulu lalonai mai haheaukamu ida ba heau. (Mat. 10:22) Bapatiso murinai Iesu dounu ba badinaia dalana badana ta na, emu goada bona noho dalana heḡereḡerena ai Iehova ba hesiai henia bona ia ese una na e laloa badamu.—Sal. 26:1.

12-13. Bema emu hesiai ḡaukara na so moalelaiamu, oi be dahaka ba kara diba? (1 Korinto 9:​16, 17) (Ina maua “ Heau Helulu ai Dounu Ba Heau” ba itaia.)

¹² Oi be dahaka ba kara bema o mamiamu emu ḡuriḡuri na dia mai kudoumu ibounai ida o gwauraiamu eiava haroro ḡaukara na so moalelaiamu? Bema emu Baibul duahiduahi na so moalelaiamu, dia guna bamona, dahaka ba kara? O bapatiso murinai bema ḡau unu bamodia na oiemu ai e vara, basioto Iehova ese ena lauma helaḡa na oiemu amo vada e kokia. Ita na dia ḡoevadae tauda dainai, nega haida be baita moalemu nega haida be lasi. Bema emu hesiai ḡaukara na so moalelaiamu aposetolo Paulo ena haheitalai ba laloa. Ia na e urava Iesu baine tohotohoa to nega haida na e hekwarahiva sivarai namona baine harorolaia totona. (1 Korinto 9:​16, 17 ba duahidia.) Paulo na e gwa:“Badina be sibogu egu ura dainai bama karaia, ahugu bama abia; to dia sibogu egu ura dainai, hahedua dainai na karaia.” Iena hereva ese e hahedinaraiamu,  herevana iena hemami na edeheto to lalona e hadaia ena hesiai ḡaukara baine haḡuḡurua.

¹³ Paulo heḡereḡerena, o uramu ḡau ta ba karaia neganai dia namo oiemu hemami ese baine biagumu. Una dainai herevana emu hemami na edeheto namona na lalomu ba hadaia kara maorona ba karaia totona. Bema unu bo kara tomamu, emu hemami na be namo loumu. Heḡereḡere, sibomu emu stadi, ḡuriḡuri karana, hebou ilao henina, bona haroro ḡaukara ese be durumumu Iesu ba badinaia. Danu, emu haheitalai namona ese tadikaka taihu na be hagoadadiamu.—1 Tes. 5:11.

“SIBOMUI BA HETAHU . . . UMUI NA ABIDADAMA TAUMUI EIAVA LASI”

14. Emu mauri ai ba haerodia ḡaudia haida be dahaka, bona dahaka dainai? (2 Korinto 13:5)

¹⁴ O bapatisomu murinai hanaihanai emu kara ba tahudia namonamo na ḡau badana. (2 Korinto 13:5 ba duahia.) Nega ta ta sibomu emu mauri ba haeroa unu amo bo dibamu bema oi ese ḡuriḡuri karana, Baibul iduahina bona istadilaina karana, hebou ilao henina karana bona haroro ḡaukara na o goadalaimu eiava lasi. Danu, unu tomadiho karadia ba moalelai bona baine durumu daladia ba lalo. Heḡereḡere, sibomu ba henanadai: ‘Lau ese ma haida ediai Baibul ena hereva badadia na herevalaimu, eiava? Ededia dala ma haida ai egu haroro ḡaukara baina moalelaia diba? Lau be egu hesiai ḡaukara ai baina hanamo ḡaudia na ḡuriḡurilaimu? Lau be hanaihanai Kristen heboudia na laomu? Hebou ai egu hakala bona haere karadia be ede baina hanamo toma?’

15-16. Tadikaka ta ese hahetoho e dadaraia karana amo dahaka o dibamu?

¹⁵ Emu manoka ḡaudia ba diba na mai anina bada. Tadikaka ta ladana Robert sivaraina ese una poin e hahedinaraia. Ia na e gwa: “Lau laḡanigu na 20 neganai, pat taim moni ḡaukara ta na karaiava. Dina ta, ḡaukara murinai a ḡaukara heboumu kekenina ta ese e invaitigu iena ruma baiala. Ia na e gwa rumai na ai mo sibomai bona nega namona baia abia heboumu. Matamanai lau na ekskius idauidau na gwauraiva, to dokonai na gwa lasi bona badina danu na hamaoroa.” Robert ese una hahetoho na e dadaraia dainai e moalemu. To gabeai una hahetoho e haeroa neganai, ena manoka ḡauna na e lalopararalaia. Ia na e gwa: “Lau ese una kekeni ena invateisin na bama dadaraia haraḡa, Iosef ese Potifara adavana e dadaraia haraḡa heḡereḡerena. (Gen. 39:​7-9) To, lau na matamanai unu asina kara toma, bona na hoa badina una hahetoho idadaraina egu ai na e auka. Una nega ai na  laloparara egu hetura karana Iehova ida baina hagoadaia na namo.”

¹⁶ Robert heḡereḡerena oi danu sibomu emu mauri ba haeroa na mai ena namo. Ena be hahetoho ta o dadaraia, to sibomu ba henanadai diba, ‘Lau be maoromaoro una hahetoho na dadaraia eiava?’ Bema o itaiamu ḡau ta ba hamaoromaoroa na namo, basio lalohisihisi, to ba moale badina hari oi na mai dibamu emu manoka ḡauna be dahaka. Una na ba ḡuriḡurilaia, bona dala ba tahu Iehova ena kara maoromaoro taravatudia ba badina.—Sal. 139:​23, 24.

17. Robert ese Iehova e badinaia neganai, edena dala ai una ese Iehova ladana e hanamoa?

¹⁷ Robert ena ekspiriens amo ḡau ma ta ta dibaiamu. Robert na ma e gwa: “A ḡaukara hebou kekenina ena invateisin na dadaraia murinai, ia ese e hamaorogu eto, ‘Name tohomu to ome kwalimu!’ Na henanadai dahaka dainai unu e hereva toma neganai, una kekeni na e gwa ia turana ta na guna Witnes kekenina ta, bona ia e hamaoroa Witnes matamatadia iboudiai na mauri daladia rua e badinamu, bona e tohodiamu neganai haraḡa herea e morumu. Una dainai e ura baine diba lau danu ba morumu eiava. Na moale lau ese Iehova ladana na hanamoa.”

18. Emu bapatiso murinai lalomu o hadaiamu dahaka ba kara? (Maua ladana, “ Ini Atikol Na Bo Moalelaimu” danu ba itaia.)

¹⁸ Iehova enai emu mauri o gwauhamatalaiamu bona o bapatisomu neganai, o hahedinaraiamu oi ese ia ladana na o uramu ba hahelaḡaia. Bona bavabia dae Iehova na mai dibana oi be dahaka hahetoho o davarimu bona ededia hedibaḡani o dadaraimu. Unu hahetoho lalodiai Iehova bo badinaiamu neganai ia ese be hanamomumu. To bavabia dae Iehova na ena lauma helaḡa amo goada be henimumu ia ba badinaia. (Luka 11:​11-13) Iehova ena heduru amo emu bapatiso murinai oi na dounu Iesu bo badinaiamu.