1. Iehova ena hesiai taudia haida be dahaka dainai nega haida e lalo manoka?

 IEHOVA ese ena orea taudia na e lalo namo henidia, una ta dibamu dainai ta moalemu, ani? Baibul na e gwaumu: “Iehova ese ena orea taudia na e moalelaidiamu.” (Sal. 149:4) Nega haida, haida na e lalo manokamu dainai e gwaumu, ‘Lau be momokani Iehova ese e lalo namo henigumu?’ Baibul negadiai abidadama taudia momo danu lalohadai unu bamodia e abiva.—1 Sam. 1:​6-10; Iob. 29:​2, 4; Sal. 51:11.

2. Iehova be daidia e lalo namo henidiamu?

² Baibul ese e hahedinaraia ḡoevaḡoevamu dia ḡoevadae taudia danu, Iehova ena lalo namo bae abia diba. To edena dala ai? Iehova ese baine lalo namo henida totona, namona na Iesu Keriso baita abidadama henia bona baita bapatiso. (Ioa. 3:16) Unu amo ta hahedinaraiamu ita na eda kara dika amo vada ta helalo-kerehai bona Dirava ta gwauhamata henia ena ura baita karaia. (Apos. 2:38; 3:19) Unu ta kara tomamu neganai Iehova na e moalemu. Eda gwauhamata ta badinamu neganai, Iehova ese e lalo namo henidamu bona e gwauraidamu ita na ia turana namona.—Sal. 25:14.

3. Ededia henanadai toi baita herevalaimu?

³ Dahaka dainai haida na e gwaumu Dirava ese idia na se lalo namo henidiamu? Iehova ese ena lalo namo be ede e hahedinaraia tomamu? Bona Kristen tauna ta be ede e diba tomamu ia na Dirava ese e lalo namo heniamu?

DAHAKA DAINAI HAIDA NA E GWAUMU DIRAVA ESE IDIA NA ASIE LALO NAMO HENIDIAMU?

4-5. Bema ta hemamimu ita na asi anida, baita laloatao ḡauna be dahaka?

⁴ Ita momo na maraḡida negana amo ina lalohadai na ta abiamu, ‘ita na asi anida.’ (Sal. 88:15) Tadikaka ta ladana  Adrián na e gwa: “Lau na maraḡigu vaitani na lalova ta ese se lalokau henigumu. Na helalotaomu lau maraḡigu ai na ḡuriḡuriva neganai Dirava na noiava egu famili na lau ida Paradaiso ai baia noho, ena be na hemamiva lau na dia heḡereḡere unuseniai baina noho.” Tony tamana bona sinana na dia Witnes taudia, ia na e gwa: “Asina helalotaomu bema idia ese nega ta e hamaorogu lau na e lalokau henigumu eiava e lalo namo henigumu. Una dainai na lalova ba karamu ḡaudia idia ediai na asi anidia.”

⁵ Bema nega haida ta hemamimu ita na asi anida, namona na baita helalotao ita na Iehova sibona ese e boirida. (Ioa. 6:44) Iehova ese iseda kara namodia na e lalo badamu bona ia na mai dibana ita kudouda ai be dahaka ta lalomu. (1 Sam. 16:7; 2 Sis. 6:30) Una dainai bema ia na e gwaumu, ita na e lalokau henidamu, baita abia dae na namo.—1 Ioa. 3:​19, 20.

6. Aposetolo Paulo be ena kara dika gunadia daidiai dahaka e gwa?

⁶ Hereva momokani do asita diba neganai ta karava ḡaudia daidiai, hari ita haida na doini ta lalo-hisihisimu. (1 Pet. 4:3) Ena be haida na laḡani daudau Iehova vada e hesiai henia, to edia manoka ḡaudia daidiai doini e hekwarahimu. Oi emu ai unu e vara tomamu, a? O laloamu Dirava ese emu dika be gwautaomu, eiava? Namona na ba diba Iehova e hesiai heniava taudia haida danu unu e hemami tomava. Heḡereḡere, Paulo na ena kara gunadia e lalova dainai ina hereva “ihabaigu” e ḡaukaralaia. (Roma 7:24) Ena be Paulo na ena kara dika amo e helalo-kerehai bona e bapatiso. To ia na e gwa: “Aposetolo iboudiai ese lau e hereagumu” bona ma eto kara dika taudia padadiai ia na “dika hereana.”—1 Kor. 15:9; 1 Tim. 1:15.

7. Eda kara dika gunadia be ede baita lalodia toma?

⁷ Tamada guba ai na e gwauhamata bema ita na baita helalo-kerehaimu eda dika na be gwau taomu. (Sal. 86:5) Una dainai bema ita na mai kudouda idoinai ta helalo-kerehai, Iehova ena gwauhamata baita laloa, e gwa: “Iseda kara dika iboudiai vada e gwau tao.”—Kol. 2:13.

8-9. Bema ta laloamu eda hesiai ḡaukara na Iehova ese se moalelaiamu, dahaka baita kara?

⁸ Ita iboudai na ta uramu Iehova ena hesiai ḡaukara idauidau baita kara. To, reana ita haida na buruka eiava gorere dainai dia heḡereḡere Iehova ena hesiai ḡaukara ma haida baita kara. Bena baita laloamu Iehova ese ita na se lalo namo henidamu. Taihu ta ladana Amanda na e gwa: “Na lalomu Iehova baina hesiai henia namonamo totona lau na ḡau momo baina kara. To unu asina haḡuḡurumu neganai na lalo-hisihisimu bona na laloamu Iehova na se moalemu.”

⁹ Bema ta laloamu iseda hesiai ḡaukara na Iehova ese se moalelaiamu, dahaka baita kara? Baita helalotao Iehova na mai dibana eda goada hetoana bona taravatu aukadia na se ato. Ia ese ita na se doridamu basita kara diba ḡaudia baita kara. To mai kudouda idoinai ta karamu ḡaudia na ia ese e moalelaimu. Danu, Baibul negadiai Iehova e hesiai henia taudia sivaraidia ba lalodia dobu. Heḡereḡere mani Paulo sivaraina aita laloa. Ia na laḡani momo Iehova e hesiai henia goada goada, bona gabu momo ai kongrigeisin momo e hagini. To, gabeai ena noho dalana e idau dainai gabu idauidau ai se harorova. To Iehova ese dounu e lalo namo heniava, a? Oibe. Ia na ena noho dalana heḡereḡerena ai Iehova e hesiai henia dainai Iehova ese e hanamoa. (Apos. 28:​30, 31) Una heḡereḡerena, Iehova dainai ta karamu hesiai ḡaukaradia na  nega haida be idaumu. To Iehova na ia ta hesiai heniamu badina hari e laloa badamu. Iehova ena lalo namo ita edai e hahedinaraiamu daladia haida mani aita herevalai.

EDENA DALA AI IEHOVA ESE ENA LALO NAMO E HAHEDINARAIAMU?

10. Edena dala ai Iehova ese ena lalo namo e hahedinaraiamu? (Ioane 16:27)

¹⁰ Baibul amo. Iehova ese e lalokau henidiamu taudia na e hamaorodiamu ia ese e lalodia badamu. Baibul ai, nega rua Ia ese Iesu e hamaoroa eto: “Natugu binai, egu lalokau.” (Mat. 3:17; 17:5) Oi o uramu Iehova ese baine hamaoromu ia ese e lalokau henimumu? Ia na dia guba amo ita e hereva henidamu, to Baibul amo e hereva henidamu. Iesu ese ena hahediba taudia e hamaorodia eto: “Tamada ese e ura henimuimu.” Hereva unu bamodia ta duahimu neganai, ta lalo-pararamu Iehova ese ita na e lalokau henidamu. (Ioane 16:27 ba duahia.) Iesu ese Tamana ena kara e hahedinarai ḡoevaḡoeva. Una dainai ena hahediba e hamaorodia “na lalokau henimuimu.” Hereva unu bamodia ta duahimu neganai, una na vaitani Iehova ese ita e hereva henidamu.—Ioa. 15:​9, 15.

11. Dahaka dainai hekwakwanai ta davarimu neganai, basitato Iehova ena lalo namo na ta haboioa? (Iakobo 1:12)

¹¹ Ena kara amo. Iehova na e uramu ita baine duruda. Una dainai, eda dabu ḡaudia e henidamu. (Iobu 1:​8-11) Nega haida Iehova ese eda hekwakwanai na se koudiamu Iobu enai e kara heḡereḡerena. Nega unu bamodia ai, basitato Iehova ena lalo namo vada ta haboioa. (Iakobo 1:12 ba duahia.) Unu amo Iehova ena lalokau bona heduru dainai baita haheauka dibamu.

12. Dmitrii ena ekspiriens amo dahaka ta dibamu?

¹² Asia ai tadikaka ta ladana Dmitrii enai e vara ḡauna mani aita laloa. Ia na ena ḡaukara amo e hadokoa bona hua momo lalodiai ḡaukara e tahu to se davari. Una dainai lalona e hadaia ena haroro ḡaukara baine habadaia, unu amo baine hahedinaraia ia na Iehova enai e tabekaumu. Hua momo e ore to ḡaukara ta do se davaria. Gabeai ia na gorere badana ta dainai bedi ai mo e hekureva, una dainai e laloava ia na dia tama namona, dia heḡereḡere ena femli baine naria bona Iehova ena lalo namo na vada e haboioa. Bena hanuaboi ta ai, natuna kekenina na Isaia 30:15 ena hereva na pepa ai e torea bena e henia. Una siri na e  gwaumu: “Maino ai bona heabidadama ai goada ba davaria.” Bena kekeni na e gwa, “Tamagu, bema o lalo-hisihisimu, ina siri ba laloa.” Dmitrii na e laloparara, Iehova ese e naridiava dainai idia na mai edia aniani, dabua bona noho gabuna. Dmitrii na eto: “Lau ese baina karaia ḡauna na egu Dirava hari baina abidadama henia.” Bema oi danu hekwakwanai unu bamona ta o davariamu, namona na bavabia dae Iehova ese oi na e lalokau henimumu bona be durumumu ba haheauka.

13. Iehova ese ena lalo namo e hahedinaraiamu dalana ma ta be dahaka?

¹³ Tadikaka taihu amo. Iehova ese tadikaka taihu amo ena lalokau ita edai e hahedinaraiamu. Heḡereḡere, idia ese nega korikori ai hahegoada herevadia e henimu. Asia ai, taihu ta na e lalo metau neganai, e hagoadaia. Ia na ena ḡaukara amo e hadokoa bona gorere badana ta e davaria. Danu adavana na kara dika badana ta e karaia dainai ena elda madunana na e kokia. Una taihu na e gwa: “Asina lalopararava dahaka dainai egu ai unu na e varava. Na tomava lau na kerere ta na karaia dainai Iehova ena lalo namo na haboioa.” Una dainai taihu na Iehova e noia, unu amo baine hahedinarai henia Ia ese taihu na e lalokau heniamu. Iehova ese ena noinoi e haerelaia? Oibe. Una taihu na e gwa: “Elda taudia ese e hereva henigu neganai, e hamaorogu Iehova ese lau na e lalokau henigumu.” To lalona na dounu e hekwarahiva dainai Iehova e noia baine hadibaia ia be momokani e lalokau heniamu eiava lasi. Una taihu na ma e gwa, “Una dina ai tadikaka taihu ese e torea revarevana ta na davaria. Edia hahegoada herevadia na duahi neganai na laloparara Iehova ese egu ḡuriḡuri na e haerelaia.” Oibe, Iehova na tadikaka taihu edia hahegoada herevadia amo ena lalokau e hahedinaraiamu.—Sal. 10:17.

14. Iehova be edena dala ma ta ai tadikaka taihu e ḡaukaralaidiamu?

 ¹⁴ Iehova ese ena lalokau ita edai e hahedinaraia dalana ma ta na tadikaka taihu e ḡaukaralaidiamu ita bae sisiba henida. Haheitalai na, Kristen ginigunadia edia nega ai, Iehova na aposetolo Paulo e ḡaukaralaia revareva 14, e toredia. To dahaka dainai unu revareva lalodiai sisiba herevadia danu e tore? Badina Iehova na Tama namona ta bona “e lalo namo heniamu” tauna na e sisiba heniamu. (Her. 3:​11, 12) Una dainai bema ta ese Baibul amo baine sisiba henida, basitato Iehova na ita edai se moalemu, badina una na Iehova ena lalokau toana. (Heb. 12:6) Iehova ese ena lalo namo e hahedinaraiamu daladia ma haida be dahaka?

IEHOVA ESE ENA LALO NAMO E HAHEDINARAIAMU DALADIA MA HAIDA

15. Iehova ese ena lauma helaḡa be daidia e henidiamu, bona dahaka dainai una ese e hagoadadamu?

¹⁵ Iehova ese ena lauma helaḡa na e lalo namo henidiamu taudia e henidiamu. (Mat. 12:18) Mani sibomu ba henanadai, ‘Lau ese Dirava ena lauma huahuadia na hahedinaraimu eiava?’ Reana guna oi na so haheaukava, to hari Iehova o dibaia dainai o mamiamu oi na o haheaukamu, a? Momokani, Dirava ena lalo namo na bo abiamu bema oi na iena lauma huahuadia bo hahedinaraimu.—Ina maua “ Lauma Huahuadia” ba itaia.

16. Iehova ese sivarai namona iharorolaina ḡaukarana be daidia e henidia? (1 Tesalonika 2:4)

¹⁶ Iehova ese e lalo namo henidiamu taudia na sivarai namona iharorolaina ḡaukarana e henidia. (1 Tesalonika 2:4 ba duahia.) Taihu ta ladana Jocelyn na hahenamo e abi sivarai namona e harorolaia dainai. Daba ta ai e noga neganai lalona na e metau. Ia na e gwa. “Una nega ai, tauanigu na dia goada, to na painiava dainai baina haroro na namo. Bena na ḡuriḡuri murinai, na ha-haroro.” Una daba ai Jocelyn na hahine ta e davaria, ladana na Mary bona e ura Baibul baine stadilaia. Hua haida muridiai Mary na e gwa, Dirava ese baine durua totona e ḡuriḡuriva bena Jocelyn na iduara ai e kokokoko. Una ekspiriens amo Jocelyn be dahaka e diba? Ia na e gwa: “Na diba vaitani Iehova na lau e hamaoroguva oi na na ‘lalo namo henimumu.’” Momokani, haida na basie kamonaimu, to ta dibamu haroro ḡaukara ai eda nega bona goada ta ḡaukaralaimu neganai, Iehova na e moalemu.

17. Vicky ese Iesu ena boubou ḡauna e herevalaia dalana amo dahaka o dibamu? (Sal. 5:12)

 ¹⁷ Iesu ena boubou ḡauna dainai Iehova ese e lalo namo henidiamu taudia edia dika na e gwautaomu. (1 Tim. 2:​5, 6) Bema ta na Iesu ena boubou ḡauna e abia dae bona e bapatiso to e laloamu Iehova ese ia na se lalo namo heniamu be ede bamona? Baita helalotao, nega haida eda lalohadai na e kereremu dainai hanaihanai Iehova baita abidadama henia. Iesu ena boubou ḡauna e abidadama heniamu taudia na Iehova ese maorodia e gwauraimu bona e gwauhamata baine hanamodia. (Salamo 5:12 ba duahia; Roma 3:26) Taihu ta ladana Vicky na Iesu ena boubou ḡauna e laloa dobu karana ese e durua. Dina ta, una e lalohadailaiava lalonai e gwa: “Iehova na lau daigu ai e haheaukamu. . . . Toana na Iehova na hamaoroava: ‘Oi ese lau na so lalokau henigumu. Natumu ena boubou ḡauna na dia heḡereḡere egu dika baine gwauatao.’” Vicky na una lalo dobu karana amo e diba Iehova ese ia na e lalokau heniamu. Ita danu bema Iesu ena boubou ḡauna baita laloa dobumu, baita dibamu Iehova ese ita na e lalokau henidamu.

18. Bema hanaihanai Iehova baita lalokau heniamu, dahaka be varamu?

¹⁸ Ena be ta hekwarahimu ina atikol ai e gwaurai ḡaudia baita badina, to nega haida baita lalo manokamu bona baita daradaramu Iehova ese ita be e lalo namo henidamu eiava. Bema unu bamona, ba helalotao Iehova ese Ia e ‘ura heniamu taudia’ na e lalo namo henidiamu. (Iak. 1:12) Una dainai namona na ba hekwarahi Iehova ida emu hetura karana ba hagoadaia bona ena lalo namo oiemu ai e hahedinaraia daladia ba ita. Bona hanaihanai ba helalotao Iehova bona ita “padada na dia daudau.”—Apos. 17:27.